“AKHALA mutthu onrowa okhootta waatuphela atthu a elapo ya oFrança aahiiso a wInglaterra, ootheene anyu munimwiiviwa!” Eyo ti etthu muhoo- leli mmosa a maNazista aalenle awe Anamoona a Yehova okathi wa ekho- tto ya Nenli ya Olumwenku Wootheene. Anakhotto ale a maNazista yaaphavela waamala-maliha Anamoona a Yehova, masi awo khiyaahiyale waamini waya. Iwo waari olipa murima! Nla ntakiheryo nooloka na moota Anamoona a Yehova anoonela aya ikhotto sa mulapo. Tthiri hiyo khaninkhaliherya ikhotto sa mulaponi. Hata atthu anoopopihaka wira naahirowe owana ekhotto anooniva, hiyo khanniivoloiha muhina myaha sa mulaponi.

1. ATTHU OOTHEENE A MULUKU YIIRELA MPANTTA NLOKO NIMOSA PAAHI

Khalai, Yehova aahattukumanya atthu awe khukhala nloko nimosa paahi, eyo piiyo, aisarayeli. Yehova aahiwiitthana aisarayeli okhala ‘nloko nothanliwa wa maloko othene’. (Okhum. 19:5) Nave Muluku aahaavaha elapo ya vameekhaaya. Nto okathi Muluku aarumme awe aisarayeli orowa otuphela maloko makina, awo kiyaapwetexa axinnaya, aahiiso atthu yaamukokhorela Yehova. *

 Olelo-va, atthu anceene animukokhorela Yehova anikhuma “maloko otheene, mahimo otheene, makhuli otheene ni mattaava otheene”. (Wiis. 7:9) Vaakhanle wira arumeyi a Muluku a olelo-va yaaniirela mpantta ikhotto, awo yaarowa owanaka aahiiso owiivaka axinnaya oowaamini.

2. YEHOVA AAHARUMA AISARAYELI OROWA OWANA EKHOTTO

Khalai, Yehova taathanla okathi ni nthowa naya aisarayeli yaareerela aya orowa owana ekhotto. Mwa ntakiheryo, Muluku aahaaruma aisarayeli orowa waapwetexa aKanaani. Mwaha wa xeeni? Mwaha woowi atthu awo yanaakokhorela amuluku eethiru, yaanirupihana moohiloka, ni yaanapaha anamwane ntoko mukuttho. Ohiya-vo, atthu a oKanaani yaakhala elapo Muluku aalehenrye awe waavaha arumeyi awe. Ti nthowa naya, Yehova aarumme awe aisarayeli waapwetexa atthu ale, wira ehahapuxe arumeyi a Muluku ni mweettelo aya woohiloka. (Moth. 18:24, 25) Hata nuumala aisarayeli okuxa elapo yaaleheriwe aya ikwaha sikina Muluku aaneemererya wira awo yawane ekhotto ni awanani aya. (2 Sam. 5:17-25) Masi Yehova khatonko oweemererya aisarayeli orowa owana ekhotto ohaarumme. Okathi yaarowa aya owana ekhotto Yehova ohaarumme sanaakhumelela mixankiho sinceene. — Moth. 14:41-45; 2 Wah. 35:20-24.

Olelo-va, Yehova khoniweemererya apinaatamu orowa owana ekhotto. Okhala wira olelo-va maloko makina aniwana wira yaakiherye soophavela saya, ohiya sa Muluku. Mwa ntakiheryo, awo anniwana ekhotto wira yincererye elapo aya, mihakhu saya aahiiso yaakiherye myaha saya sa epoliitika. Masi niireke ti vooloka owana ekhotto wira naakiherye nsina na Muluku, etiini ahu, aahiiso wiiviwa awanani a Muluku? Nnaari. Okhala wira Yehova onrowa oowakiha arumeyi awe ni waapwetexa awanani aya muhoolo, eyo piiyo, okathi wa ekhotto ya Harmagedoni. (Wiis. 16:14, 16) Waphiya okathi owo, Muluku onrowa orumeela malaikha awe wira yawane ekhotto, ohiya apinaatamu animurumeela. — Wiis. 19:11-15.

3. AISARAYELI KHIYAAWIIVA ATTHU YAALE YAMWAAMINI YEHOVA

Khalai, anakhotto a wIsarayeli ikwaha sinceene yaaniwoonela othunku atthu yaale yaamwaamini Muluku,  masi yaanapwetexa atthu yaale Yehova aaruma awe wira yaahaana wiiviwa. Nrowe niwehe matakiheryo manli. Yehova aahaaruma aisarayeli opwetexa muttetthe wa oYerikho, masi awo khiyaampwetenxe Rahabi vamosa ni emusi awe mwaha woowi owo aahooniherya waamini. (Yox. 2:9-16; 6:16, 17) Muhoolo mwaya, muttetthe wa oGabawoni khiwaapwetexiwe okhala wira atthu a muttetthe ole yaahooniherya wira yaanimuttittimiha Muluku. — Yox. 9:3-9, 17-19.

Olelo-va, maloko yaale anirowa owana ekhotto khaniwoonela othunku hata ale animwaamini Yehova. Nave ikwaha sinceene okathi maloko awo anirowa aya owana ekhotto anniwiiva atthu ahitthenke.

4. YEHOVA AAHAAVAHA AISARAYELI MALAKIHERYO OOKHOTTONI

Nave khalai, Yehova aahaaruma anakhotto a wIsarayeli otthara malakiheryo awe okathi yaarowa aya owanaka ekhotto. Mwa ntakiheryo, ikwaha sinceene Muluku aahaaruma arumeyi awe wira ahinatthi waatuphela awanani aya yaahana waavekela ‘wira yavare metto’. (Otum. 20:10) Yehova aahaaruma anakhotto a wIsarayeli wira yaahaana okhalana mweettelo wooloka ni okhala ooratta opuro yaakhala aya. (Otum. 23:9-14) Mwa ntakiheryo anakhotto a maloko makina yaanaatuphela athiyana a mittetthe seiye yaakuxa aya, masi Yehova aahaakhottiha anakhotto a wIsarayeli opaka eyo. Nave Yehova aahaaruma anakhotto a wIsarayeli wira yaahaana omuthela muthiyana yanvanre aya nuumala ovira mweeri mmosa akunxe ene muttetthe awe. — Otum. 21:10-13.

Olelo-va, ilapo sinceene soopaka nivarihano na malamulo na moota woowana ikhotto. Malamulo awo akumiheriwe wira yaakhapeleleke ale ahitthenke aahiiso ahirina nthowa masi mooriipiha murima awo khanitthara malamulo awo.

5. MULUKU AANIWAAKIHA ARUMEYI AWE

Khalai, Yehova aaniwaakiha aisarayeli, ikwaha sinceene aanaavaha oxintta iwo orumeelaka miiriirya. Mwa ntakiheryo, moota xeeni Yehova aakhalihenrye awe aisarayeli oxintta muttetthe wa oYerikho? Attharaka malakiheryo a Yehova okathi aisarayeli yoopale aya “elulu ya ekhotto: nananoru ixiri sa muttetthe sahiphomowa”, yaakweherya aka oxintta muttetthe ole. (Yox. 6:20) Nave moota xeeni aisarayeli yaaxinttale aya muttetthe wAmori? “Apwiya yaharupihela epula ya maluku malupale . . . Ale yiviwe ni maluku a maralala yahavikana ale yiviwe n’atthu a Isarayeli n’ikatana”. — Yox. 10:6-11.

MAKRISTAU EKEEKHAI ATTHU A MURETTELE

Ntoko niwenha ahu, makhalelo ahu toovirikana ni aisarayeli a khalai. Masi ohiya paahi ovirikana wa makhalelo aakhala mathowa makina anniiriha ohirowa owana ekhotto. Mwa ntakiheryo, Muluku aahihimya wira mahiku ookiserya atthu yaarowa wiixuttihiwaka ni yena kiyaarowa ‘wixuttihiwaka owana ekottho’, nnakhala orowa owana ekhotto. (Yes. 2:2-4) Ohiya-vo, Kristu aahaaleela atthareli awe wira khanlikana ni atthu a mulaponi, niire so, khiyaarowa wiirelaka mpantta owana-wana wa mulaponi.—Yoh. 15:19.

Nave Kristu aahaatumererya atthareli awe opaka itthu sikina. Yesu aahaalopola awiixutti awe wira yaahaana osyaka opaka itthu ntoko: Opweha mathowa vamurimani, owali ni owana ikhotto. (Math. 5:21, 22) Nave Yesu aahiwiixuttiha atthareli awe okhala a “murettele”, niire so, wiimananiha okumiherya murettele ni waaphenta awanani aya. — Math. 5:9, 44.

Ankhi hiyo olelo-va, ninrowa wooniherya sai okhala atthu amurettele? Ekeekhai wira hiyo khanimphavela orowa owana ekhotto. Niireke vamurimani vahu nookhalana miyoonelo sa owali, seiyo saarowa okumiherya manyaku-nyaku ni okawanyeya mmulokoni? Nto nihaana wiimananiha omala-maliha miyuupuwelo sa owali.—Yak. 4:1, 11.

Hiyo khaninkhaliherya myaha sa ikhotto sa mulaponi ohiya-vo ninniimananiha okumiherya murettele ni ophentana. (Yoh. 13:34, 35) Nto hiyo noolakela ohiirela mpantta myaha sa ikhotto nilipelelaka okathi Yehova onrowa awe omaliha ikhotto sootheene. — Esal. 46:9.