1. Abrahamu oonihenrye sai wira aanikupali wira Yehova amphukela ipooma sa oSodoma ni oGomora mwa xariya? (Nwehe elatarato yoopacerya.)

ABRAHAMU aahimukoha Yehova wira: “Nyuwo munlamula elapo yothene, khamunrowa wettela exariya?” (Maphattuwelo 18:25) Mulopwana ole oororomeleya Abrahamu, khahiyo wira aamukonhe Muluku mwaha woowi aamwaaniherya. Ohiya-vo, nikoho nawe ninnooniherya wira aanikupali wira Yehova aarowa ophukela mwa xariya ipooma sa oSodoma ni oGomora. Nave aanikupali wira Yehova khaarowa “owìva atthu òloka vamosá n’atthu òtakhala”. Omuhimyaka Yehova, Biibiliya oni: “Owo t’ikuru sahu: miteko sawe ti soloka, iphiro sawe sothene ti sa xariya. Muluku ahu t’òroromeleya: owo khannòtotha. Owo t’àxariya ni t’owòkololowa”.​—Otumererya 31:19; 32:4.

2. Xeeni vahiniweryaneya aya Yehova ophuka myaha moohixariya?

² Exeeni yaamukupaliha Abrahamu wira okathi wotheene Yehova onipaka itthu mwa xariya? Mwaha woowi Yehova ookhalana malamulo ooloka ni a xariya. Tthiri, moolumo oowi  “oloka” ni “exariya”, ikwaha sinceene annirumeeliwa vamosa mwa Soolempwa sa eHeeberi, maana anitaphulela etthu emosaru. Tivonto, okhala wira okathi wotheene malamulo a Yehova ta xariya, nto owo onniphuka myaha mwa xariya. Biibiliya onihimya so: “Apwiya wasivela exariya n’oloka”.​—Esalimo 33:5.

3. Nvahe ntakiheryo na ohixariya munoona anyu mulaponi olelo-va.

³ Tthiri ti voohakalaliha osuwela wira okathi wotheene Yehova onipaka itthu mwa xariya. Masi olumwenku ola woosareya ohixariya. Mwa ntakiheryo, atthu annilamuliwa ni otthukweliwa mukhatteya mwaha wa ikrime ahipanke aya. Nuumala otokosiwa saana mwaha owo, akina annooniwa wira khapanke ekrime eyo, masi aniira ahaawale ene iyaakha sinceene mukhatteya. Ohixariya iwo onnikumiherya onyoonyiheya ni onanariwa. Masi yookhala enamuna ekina ya ohixariya enitepa ovila ovilela. Enamuna xeeni eyo enihimmwa?

4. Moota xeeni waamini wa muKristau waarowa aya weehereriwa?

⁴ Okhala wene hiyo khannilipelela othokoreriwa moohixariya ni anna ni arokora mmulokoni. Masi, waamini wahu pooti weehereriwa akhala wira ninnoona aahiiso ninnithokoreriwa moohixariya mmulokoni. Akhala wira eyo enimwiiraneya, munrowa opaka exeeni? Niireke munookhumuwa?

5. Xeeni vahinitikhina ahu akhala wira ninnoona aahiiso ninnithokoreriwa moohixariya mmulokoni?

⁵ Okhala wira otheene ahu na atthu oohimalela ni ninnivonya, nto okathi mukina pooti othokoreriwa moohixariya aahiiso omuthokorerya moohixariya mutthu mukina mmulokoni. (1 Yohani 1:8) Hata vari siiso, eyo kheniiraneya ikwaha sinceene, nave maKristau oororomeleya khanitikhina aahiiso okhumuwa vaavo anithokoreriwa aya moohixariya. Yehova oonivaha miruku sa mBiibiliyani soovareleya muteko, seiyo sinnikhaliherya ovikaniha ororomeleya vaavo vanithokoreriwa ahu moohixariya ni anna aahiiso arokora.​—Esalimo 55:13-15.

6, 7. Moota xeeni munna aathokoreriwa awe moohixariya ni mikhalelo xeeni saamukhalihenrye?

⁶ Nkahaya nthokorerye ntakiheryo na Willi Diehl. Wanipacerya wa mwaakha wa 1931, Munna Diehl aahirumeela moororomeleya eBetheli ya oBerna, oSuíça. Mwaakha wa 1946, aahirowa Exikola ya oGileadi nummuru 8, oNova York, wEstados Unidos. Nuumala ograduwariwa, aahitanleliwa muteko wa osirkwiitu oSuíça. Yowiiraneya ya okumi awe, Munna Diehl ohimmye wira Maio a 1949, aahilepela eBetheli ya oSuíça ohimyaka wira aarowa othela. Anna yaahoolela yaahimwaakhula wira nuumala othela aarowa ohiihiwa miritti sawe sotheene. Masi aarowa weemereriwa okhala pioneero paahi. Munna Diehl onihimya so: “Miyo nkeemereriwa olavula myaha. Nave anna anceene khiyaanilavuliha ni yaanithokorerya ntoko atthu ookumihiwa mmulokoni”.

⁷ Oonenle sai Munna Diehl? Owo aahimmye wira: “Hiyo naahisuwela wira Biibiliya khonikhoottiha othela aahiiso otheliwa, tivonto naaninvekela ni omuroromela Yehova”. Okhala wira anna akina khiyaarina moonelo wa Yehova voohimya sa ekasamento, nuuvira okathi, moonelo aya waahilokiheriwa, nto Munna Diehl, aahittikiheriwa  miritti sawe. Yehova aahimutthuvela mwaha woororomeleya. * (Nwehe enoota.) Nto niikoheke so: ‘Akhala wira kinoothokoreriwa moohixariya, kiireke nave kinoopixa murima kilipelelaka wira Yehova onoolokiherya mwaha owo? Aahiiso kinrowa wiiroromela keereryaka olokiherya mekhaka mwaha owo?’​—Miruku 11:2; mmusome Mikeya 7:7.

8. Exeeni yaarowa oniiriha wuupuwela wira hiyo aahiiso atthu akina aathokoreriwa moohixariya?

⁸ Mwaha wookhala atthu oohimalela, hiyo pooti woonaka wira noothokoreriwa moohixariya aahiiso mutthu mukina mmulokoni oothokoreriwa moohixariya. Eyo pooti wiiraneya mwaha woowi ikwaha sinceene khaninsuwela itthu sotheene sa mwaha owo. Hata nithokoreriwe ene moohixariya aahiiso nnaari, nihaana onvekela Yehova, omuroromela ni ovikaniha okhala oororomeleya. Opaka eyo enoonikhaliherya osyaka “onviruwela Muluku”.​—Musome Miruku 19:3.

9. Mwaha ola ni onittharelana, ninrowa othokorerya matakiheryo xeeni?

⁹ Nrowe nthokorerye matakiheryo mararu a atthu a Yehova yaathokoreriwe moohixariya khalai. Mwaha ola, ninrowa othokorerya ntakiheryo na musulwaawe Abrahamu iihaniwa Yosefe, yoowo aathokoreriwe moohixariya ni annawe. Nto mwaha onittharelana, ninrowa woona moota Yehova aamuthokorenrye awe Mwene Akhabi ni murummwa Pedru, okathi aari awe wAntiyokiya oSiria. Vaavo ninthokorerya ahu matakiheryo ala, mphavele onwehexexa Yehova wira mulipihe wataana wanyu ni yena, otepexa wene okathi munoona anyu wira moothokoreriwa moohixariya.

10, 11. (a) Moota xeeni Yosefe aathokoreriwa awe moohixariya? (b) Eparakha xeeni Yosefe aarina awe mukhatteya mme?

¹⁰ Yosefe aari murumeyi oororomeleya a Yehova yoowo aathokoreriwe moohixariya ni atthu a elapo ekina. Masi othokoreriwa moohixariya wahaareere onwereya, tuule iireliwa awe ni annawe. Okathi Yosefe aarina awe iyaakha 17, annawe yaahinvara khumutumiha ntoko epottha. Nuumala-vo, aahiroihiwa wEjiitu. (Maphattuwelo 37:23-28; 42:21) Muhoolo mwaya, ori ene wEjiitu, Yosefe aahootheriwa omutuphela mwaarawe pwiya awe, nto aahiriheliwa mukhatteya. (Maphattuwelo 39:17-20) Yosefe aahihaawa ntoko epottha ni aahiviriha iyaakha 13 ori ene mukhatteya. Ntakiheryo na Yosefe ninniixuttiha exeeni enrowa onikhaliherya nathokoreriwa moohixariya ni annihu?

¹¹ Okathi Yosefe aatthukweliwa awe mukhatteya, mukhulupale aalawiha soowurya sa mwene aahiriheliwa-tho mukhatteya. Ohiyu omosa, mukhulupale ole aahiloha. Nto Yehova aahimukhaliherya Yosefe  otaphulela yooloha ele. Yosefe aahimuleela mukhulupale ole a mwene wira aarowa otaphuliwa mukhatteya ni aamutthikela omurumeela Farawo. Nto Yosefe aahittottela muraarelo omuleela ele yaamukhumelenle. Tivonto, nnoowerya wiixutta etthu ohiya paahi ni ele Yosefe aalavunle awe, masi-tho ni ele ahaalavunle awe.​—Maphattuwelo 40:5-13.

12, 13. (a) Ninsuwela sai wira Yosefe khaamaalale okathi aathokoreriwa awe moohixariya? (b) Exeeni Yosefe ahaamuleelale awe mukhulupale ole a mwene?

¹² Musome Maphattuwelo 40:14, 15. Nwehe wira Yosefe aahimmye wira “kivariwé” mulaponi mwa aHeeberi. Nuulumo nna nrumeeliwe mBiibiliyani pooti-tho otaphulela “wiiyiwa”. Tthiri, Yosefe aahithokoreriwa moohixariya. Nave Yosefe aahooniherya wira khaarina nthowa mwaha wa mulattu ootheriwa awe. Ti maana aya anvekenle awe mukhulupale aalawiha soowurya sa mwene wira amuxonttele wa Farawo. Tiivi yaari yoolakela awe? Owo aahimmye so: “Wira akikumihe mukhatteya-mu”.

¹³ Niireke Yosefe aarowa omaala paahi ni ohipaka etthu wira ophuke mwaha ole? Nnaari! Yosefe aahisuwela wira aamootheriwa, aahiiso aathokoreriwa moohixariya. Tivonto, aamutthokihenrye awe mwaha awe mukhulupale ole, olipelelaka wira ammukhaliherya.  Masi moone wira Biibiliya khonihimya wira Yosefe aahimuleela Farawo aahiiso mutthu mukina wira annawe ti yaamutuminhe. Mwekeekhai, okathi annawe yaaronwe aya wEjiitu wira apake murettele ni Yosefe, mwene Farawo aahiwaakhela saana ni waaleela wira yakhaleke “elapo yotepexa oruwerya ya wEjitu”.—Maphattuwelo 45:16-20.

14. Exeeni enrowa onikhaliherya osyaka ohimya etthu yoohiloka, okathi onithokoreriwa ahu moohixariya mmulokoni?

¹⁴ Noona wira ninnithokoreriwa moohixariya mmulokoni, nihaana ovaha ephoole yuulupale wira nisyake othaala mwaano aahiiso waapa naaleelaka atthu akina mwaha owo. Tthiri, nihaana ovekela nikhaliheryo ni waaleela axitokweene akhala wira munna aahiiso murokora, oopaka etampi yuulupale. (Onamukuttho 5:1) Masi myaha sinceene seiye sihikhanle etampi yuulupale, vanniweryaneya opaka murettele ni munna aahiiso murokora, nihimulenle mutthu mukina aahiiso axitokweene. (Mmusome Matheyo 5:23, 24; 18:15.) Okathi owo nihaana okhala oororomeleya nivarihelaka muteko malakiheryo a Biibiliya voohimya sa mwaha owo. Ikwaha sikina, hiyo pooti woona wira mwaha woohiiwexexa saana mwaha owo, naahivonya vaavo nuupuwela ahu wira naathokoreriwe moohixariya. Nihaana oxukhurela vanceene akhala wira khanitepinhe mwaha owo, maana khinaanyohonle annihu! Muupuweleke wira hata nitthekeliwe ene aahiiso nihitthekeliwe, olavula etthu yoowereiha murima, khenrowa ophuka muxankiho owo. Masi, akhala wira nnoororomeleya wa Yehova ni annihu, nnoosyaka opaka eyo. Maana nasaalimo aahimmye wira ole “onettela exariya”, mutthu yoole “ohiniwotherya akhw’awe: ohiniwirela akhw’awe sotakhala”.​—Esalimo 15:2, 3; Yakobo 3:5.

15. Mwaha wa Yosefe ororomeleya wa Yehova, aareelihiwe sai?

¹⁵ Nave yookhala etthu ekina eniixutta ahu ni ntakiheryo na Yosefe. Mwa iyaakha 13 aathokoreriwa awe moohixariya, Yosefe aahooniherya wira aarina moonelo wa Yehova. (Maphattuwelo 45:5-8) Owo khanvanhe nthowa Yehova mwaha wa ohaawa wawe. Nto, nnaamwi Yosefe ahaaliyanle ohixariya iireliwa awe, owo khaananariwe. Masi etthu yootepa otthuneya, owo kheemerenrye soovonya aahiiso sowiira soohiloka sa atthu akina, sihononaka wataana wawe ni Yehova. Ororomeleya wa Yosefe waahimukhaliherya woona moota Yehova aareelinha awe emusi awe ni olokiherya ohixariya iireliwa awe.

16. Xeeni vanitthuneya ahu otepa omwaattamela Yehova, okathi onthokoreriwa ahu moohixariya mmulokoni?

¹⁶ Moolikanasa, nihaana ovaha efaita ni okhapelela wataana wahu ni Yehova. Niheemererye sootteettheya sa annihu  sinimwalanyihaka ni Muluku onimphenta ahu ni onimukokhorela ahu. (aRoma 8:38, 39) Masi, akhala wira ninnithokoreriwa moohixariya mmulokoni, nihaana otthara ntakiheryo na Yosefe ni otepa omwaattamela Yehova. Nave nihaana ophavelasa okhalana moonelo wa Yehova voohimya sa mwaha owo. Nuumala opaka sotheene siniwerya ahu wira niphuke muxankiho nittharaka malakiheryo a Biibiliya, nihaana ohiya muxankiho owo mmatatani mwa Yehova. Nikupaliki wira Yehova onrowa olokiherya muxankiho owo, okathi onoona awe oreerela ni ntoko siniphavela awe.

17. Ninrowa wooniherya sai wira ninnimukupali ‘Mulamuli a elapo yothene’?

¹⁷ Okhala wira ninkhala olumwenku ola wootakhala, niwehereryeke othokoreriwa moohixariya. Ikwaha sikina, nyuwo aahiiso mutthu onimusuwela anyu pooti othokoreriwa moohixariya mmulokoni. Nto muhikhumuwe. (Esalimo 119:165) Ohiya-vo, nvikaniheke okhala oororomeleya wa Muluku, munvekelaka nikhaliheryo, ni mmuroromelaka yena. Nave muupuweleke wira mwaha woohimalela, nyuwo pooti ohiiwexexa saana mwaha owo ni waaniheryasa ohisuwela itthu sotheene. Mutthareke ntakiheryo na Yosefe ni musyakeke othaala mwaano wira muhitepihe mwaha owo. Nave, ohiya wiiroromela, mmananihe okhala oororomeleya wa Yehova ni opixa murima, mukupaliki wira Yehova onoophuka okathi wooreerela. Mwiira siiso, Yehova onoosiveliwa ni nyuwo, ni onimooreelihani ntoko Yosefe. Mukupaliki tthiri wira Yehova, yoowo ori ‘Mulamuli a elapo yothene’, okathi wotheene oniira itthu mwa xariya, maana “iphiro sawe sothene ti sa xariya”.​—Maphattuwelo 18:25; Otumererya 32:4.

18. Mwaha onittharelana, ninrowa othokorerya exeeni?

¹⁸ Mwaha onittharelana, ninrowa othokorerya matakiheryo makina manli a atthu a Yehova yaathokoreriwe moohixariya okathi aalempwa awe Biibiliya. Matakiheryo awo anrowa onikhaliherya woona moota wiiyeviha ni olevelela onnikhaliherya aya otakiha moota Yehova onoonela awe exariya.