1-2. Exeeni yaamukhalihenrye Yesu ohitepa oxanka?

OHIYU wookiserya ari awe valaponi, Yesu aahixanka vanceene. Moohipisa, Yesu aarowa ohasuliwa ni wiiviwa vowooniha othunku ni atthu ootakhala murima. Masi Yesu khahiyo aaxankale paahi mwaha woowi aarowa wiiviwa. Masi owo aanimphenta vanceene Tiithi awe ni aaphavela omusiveliha. Yesu aanisuwela wira aahaana ovikaniha okhala oororomeleya wira ovuwihe nsina na Yehova ni okumiha itthu sotheene onootheriwa awe. Nave, Yesu aanaaphenta vanceene atthu. Mwaha woowi, wira apinaatamu aphwanye okumi woohimala waalipa ni ovikaniha wawe okhala oororomeleya mpakha okhwa.

² Hata aaxankale vanceene, Yesu aahikhalana murettele. Owo aahaaleela arummwa awe wira: “Kinovahani murettele aka”. (Yoh. 14:27) Yesu aahikhalana “murettele wa Muluku”, eyo piiyo, omaaleleya onikhumelela mwaha wookhalana waataana wooloka ni Yehova. Murettele owo, waahimukhaliherya Yesu ovikaniha okhala oomaaleleya.​—aFil. 4:6, 7.

3. Mwaha ola, ninrowa othokorerya exeeni?

³ Khuuvo mutthu onrowa okumana mixankiho samphwannye Yesu. Hata vari siiso, otheene ale aniphavela omutthara Yesu, anoophwanya mixankiho. (Math. 16:24, 25; Yoh. 15:20) Nave, ntoko Yesu, hiyo pooti oxanka vanceene. Masi ninrowa opaka exeeni wira niheemererye oxanka oniiyeryaka murettele wa mmuupuweloni? Nrowe nithokorerye itthu tthaaru saamukhalihenrye Yesu ovikaniha okhalana murettele okathi aari awe valaponi. Nuumala-vo, ninrowa woona moota nikhanle ahu ootthara ntakiheryo na Yesu okathi ninkumana ahu mixankiho.

4. Moovarihana ni 1 aTesalonika 5:17, nvahe matakiheryo anooniherya wira Yesu aahivekela ikwaha sinceene nihiku aarowa awe wiiviwa.

⁴ Mmusome 1 aTesalonika 5:17. Mahiku ookiserya Yesu aari awe valaponi aahivekela ikwaha sinceene. Vaavo aapacerinhe awe wuupuweleliwa okhwa wawe, Yesu aahivekela ohinatthi waavaha arummwa awe ephaawu ni eviinyu. (1 aKor. 11:23-25) Nave ahinatthi okhuma opuro yaamwiira aya Paasikha, Yesu aahivekela ni arummwa awe. (Yoh. 17:1-26) Nuumala-vo, okathi Yesu ni arummwa awe yaaphiyale aya Mwaako wa oJeseemani, Yesu aahivekela ikwaha sinceene. (Math. 26:36-39, 42, 44) Nave moolumo ookiserya Yesu aalavunle awe ohinatthi okhwa, yaari nivekelo. (Luka 23:46) Mwaha woopaka mavekelo ikwaha sinceene, Yesu aaphavela wira Yehova iireleke mpantta khula etthu yaarowa omukhumelela nihiku nne.

5. Xeeni arummwa yaahaawenrye aya ovikaniha olipa murima?

⁵ Etthu yaamukhalihenrye Yesu ovikaniha ovilela mpakha wanikisa waari omuroromela Tiithi awe ni onvekela. Masi ohiyu ole, arummwa khiyaawenrye ovekela ikwaha sinceene. Mwaha woohiya opaka eyo, okathi yeehererinwe aya awo khiyaawenrye okhala oolipa murima. (Math. 26:40, 41, 43, 45, 56) Vaavo ninkumana ahu mixankiho nnoowerya ovikaniha ororomeleya akhala wira nnootthara ntakiheryo na Yesu nivekelaka moohihiyererya. Nivekeleke exeeni?

6. Waamini onrowa onikhaliherya sai ovikaniha okhalana murettele?

⁶ Nihaana onvekela Yehova wira ‘injererye wamini wahu’. (Luka 17:5; Yoh. 14:1) Maana nihaana okhalana waamini mwaha woowi Satana onniweehererya atthareli otheene a Yesu. (Luka 22:31) Waamini onnikhaliherya sai ovikaniha okhalana murettele hata  sinikhumelelaka mixankiho sinceene? Vaavo nimpaka ahu itthu sotheene ninwerya ahu wira niphuke muxankiho ahu, waamini onooniiriha omuhiyerya Yehova muxankiho owo. Moovirikana ni hiyo, Yehova onnisuwela saana etthu yoopaka wira nikhalane murettele wa mmuupuweloni.​—1 Ped. 5:6, 7.

7. Ntakiheryo na Robert ninniixuttiha exeeni?

⁷ Hata siniphwanyaka mixankiho sinceene, ovekela onninikhaliherya okhalana murettele wa mmuupuweloni. Nwehe ntakiheryo na Robert, mutokweene oororomeleya orina iyaakha sinivikana 80. Owo onihimya so: “Miruku siri aFilipi 4:6, 7 sookikhaliherya ovilela mixankiho sinceene mookumini mwaka. Waahikhala okathi kihaareere aka omaleliwa. Nave mwa okathi vakhaani kaahiyeleela eparakha aka yoorumeela ntoko mutokweene”. Exeeni yaamukhalihenrye Robert okhalana murettele wa mmuupuweloni? Robert onihimya so: “Vaavo kaapacerya aka oxanka, kaanivekela mowaakuveya. Kaanoona wira vaavo kaatepa aka ovekela, khanikhalana murettele”.

8. Moovarihana ni Yohani 8:29, nthowa xeeni nikina naamwiiriha Yesu okhalana murettele?

⁸ Mmusome Yohani 8:29. Hata okathi aalupatthiwa awe, Yesu aanikhalana murettele, maana aanisuwela wira aanimusiveliha Tiithi awe. Yesu aanimwiiwelela Tiithi awe hata okathi yoole waavila aya opaka eyo. Mwaha womphenta Tiithi awe, eyo yaahimukhaliherya omurumeela Yehova moomalela okumi awe wotheene. Mwa ntakiheryo, ohinatthi orwa valaponi, Yesu ‘aninvarela miteko’ Muluku. (Mir. 8:30) Nto okathi aari awe valaponi, Yesu aaniluttuweliwa owiixuttiha atthu voohimya sa Tiithi awe. (Math. 6:9; Yoh. 5:17)  Muteko owo Yesu aavara awe waanimuhakalaliha vanceene.​—Yoh. 4:34-36.

9. Oluttuweliwa muteko woolaleerya onnikhaliherya sai ophwanya ohakalala?

⁹ Ninnimutakiha Yesu, vaavo nimmwiiwelela ahu Yehova ni ‘nintepa ahu okelela oholo mmutekoni mw’Apwiya vohihiyererya’. (1 aKor. 15:58) Vaavo ‘nnìvahererya’ ahu ovara muteko woolaleerya, nnookhalana moonelo wooloka voohimya sa mixankiho sahu. (Mit. 18:5) Mwa ntakiheryo, atthu anceene nnaalaleerya ahu aakhalana mixankiho suulupale ovikana sawihu. Vaavo atthu awo aniixutta aya omphenta Yehova ni ovarihela muteko ele aniixutta aya, makhalelo aya anniloka ni annihakalala vanceene. Nto okathi nintepa ahu woona eyo ekhumelelaka, ninnitepa okupali wira Yehova onoonikhapelelaka. Nto okupali iwo onoonikhaliherya okhalana murettele wekeekhai. Murokora mmosa aahoona wira eyo ekeekhai. Okumi awe wotheene aaniwanana oriipiwa murima, nto eyo yaanimwiiriha wuupuwelaka wira khaarina efaita. Owo onihimya so: “Vaavo kinluttuweliwa aka muteko woolaleerya, kinniwerya okasoopa muupuwelo aka ni kinnihakalala vanceene. Kinoona wira vaavo kinlaleerya aka kinnitepa omwaattamela Yehova”.

10. Ntakiheryo na Brenda ninniixuttiha exeeni?

¹⁰ Vano nrowe niwehe ntakiheryo na murokora oniihaniwa Brenda. Owo ni mwanawe mwaamuthiyana anniwereiwa oretta oniihaniwa esclerose múltipla. Brenda onirumeela ekhatera ya maroota ni khorina ikuru sinceene. Vaaweryaneyaka, owo onnilaleerya empa ni empa, masi ikwaha sinceene onilaleerya orumeelaka iwarakha. Brenda onihimya so: “Nuumala osuwela wira okumi aka khonrowa oloka olumwenku ola wa Satana, kaahoona wira kaahaana wiimananiha ohela nipuro noopacerya muteko woolaleerya. Tthiri muteko woolaleerya onnikikhaliherya ohuupuwela vanceene oretta aka. Nto eyo ennikiiriha wiimananiha waakhaliherya atthu otheene a muttetthe muloko aka onlaleerya awe. Nave muteko woolaleerya onnikuupuxerya nlipelelo nooloka kirina aka na muhoolo”.

11-13. (a) Arummwa ni atthu akina yoonihenrye sai okhala apatthani ooloka a Yesu? (b) Yesu oonela sai nikhaliheryo na apatthani awe?

¹¹ Okathi Yesu aalaleerya awe aahikumana mixankiho sinceene, masi owo aanikhaliheriwa ni arummwa awe oororomeleya, yaawo yaari apatthani awe eekeekhai. Awo yaari apatthani ntoko ale anilavuliwa eliivuru ya Miruku 18: 24, yeeyo eni: “Mpatthani èkekhai t’òwivaha ntoko mama”. Yesu aanaavaha efaita apatthani awe. Okathi Yesu aalaleerya awe khuuvo muhima awe aamwaamini. (Yoh. 7:3-5) Nave waahikhala okathi, amusi awe yaahimmye aya wira Yesu aaroovahuwa aahiiso aakhwa anepa. (Mar. 3:21) Moovirikana ni axihima awe, ohiyu wookiserya aari awe valaponi, Yesu aahaaleela arummwa awe oororomeleya wira: “Ti nyuwo mwakhalenle nthiti okhala ni miyo okathi wo wehereriwa waka”.​—Luka 22:28.

¹² Okathi mukina arummwa yaanimunyoonyiha Yesu, masi owo khaawehexexa soovonya saya, maana anisuwela wira yaanimwaamini. (Math. 26:40; Mar. 10:13, 14; Yoh. 6:66-69) Ohiyu ole aarowa awe wiiviwa, Yesu aahaaleela arummwa awe oororomeleya oriki: “Kiniwirelani apatthani aka, okhala wira kihosuwelihani sothene siwìwalyaka Atithi”. (Yoh. 15:15) Tthiri Yesu aanilipihiwa vanceene ni apatthani awe. Nikhaliheryo yanvaha aya okathi aalaleerya awe naanimuhakalaliha vanceene.—Luka 10:17, 21.

¹³ Yesu aahikhalana apatthani akina ohiya paahi arummwa awe. Yaahikhala alopwana ni  athiyana anceene yaawo yaamukhaliherya muteko awe woolaleerya mwa inamuna soovirikana. Atthu akina yaanimulattula owannyeya wira alye. (Luka 10:38-42; Yoh. 12:1, 2) Akina yaanimutthara mikwaha aapaka awe ni yaaninvaha mireerelo saya. (Luka 8:3) Yesu aahikhalana apatthani ooloka, maana owo-tho aari mpatthani ooloka. Owo aaniwiirela itthu sooloka ni khaalipelela wira yampaka itthu yahaawerya aya. Nto, nnaamwi Yesu aari oomalela, owo aanisiveliwa okhaliheriwa ni apatthani awe oohimalela. Moohaanyiherya apatthani awe ale yaahimukhaliherya Yesu okhalana murettele.

14-15. Ninrowa waapaka sai apatthani ooloka? Apatthani ahu anrowa onikhaliherya sai?

¹⁴ Apatthani a Muluku anoonikhaliherya ovikaniha ororomeleya wa Yehova. Nto musuweleke wira enamuna yooloka ya waapaka apatthani ori okhala mpatthani ooloka. (Math. 7:12) Mwa ntakiheryo, Biibiliya onnintumererya orumeela okathi ahu ni ikuru sahu wira naakhaliherye atthu akina otepexa wene “alipa-òthoiwa”. (aÉf. 4:28) Niireke ookhala mutthu a muloko anyu munimoona anyu wira onnitthuneya okhaliheriwa? Niireke munoowerya omukhaliherya munna aahiiso murokora onwereiwa orowa othuma mireerelo sawe olooxa? Niireke munoowerya waakhaliherya anna ahirina yoolya? Akhala wira munnisuwela omurumeela jw.org^® aahiiso aplikativo JW Library^®, niireke munoowerya owiixuttiha anna orumeela ikaruma iyo? Vaavo nintepa ahu waakhaliherya atthu akina, nnootepaka ohakalala.​—Mit. 20:35.

¹⁵ Apatthani ahu awo anoonikhaliherya okathi sinniphwanya aya mixankiho, aahiiso onikhaliherya okhalana murettele. Nimutakihaka Elihu yoowo anwiriyana moopixa murima Yobi  vaavo aalavula awe mixankiho sawe, apatthani ahu anooniwiriyana moopixa murima okathi ninrowa ahu waaleelaka mixankiho sahu. (Yobi 32:4) Masi nihuupuweleke wira apatthani ahu anoonipakela yoothanla, masi nnookhala atthu a ankhili akhala wira nnoowiriyana miruku annivaha aya amurumeelaka Biibiliya. (Mir. 15:22) Ohiya-vo, vaavo apatthani ahu aniimananiha aya onikhaliherya okathi wa mixankiho nihaana osyaka wiixinnuwiha. Masi nimutakiheke Mwene Davidi yoowo eemerenrya moowiiyeviha nikhaliheryo na apatthani awe. (2 Sam. 17:27-29) Tthiri apatthani ahu yoovaha enikhuma wa Yehova.​—Yak. 1:17.

16. Moovarihana ni aFilipi 4:6, 7, enamuna xeeni emosa nikhanle ahu oophwanya murettele? Mutthokiherye.

¹⁶ Mmusome aFilipi 4:6, 7. Xeeni Yehova ohimyaka wira onoonivaha murettele “mwa Yesu Kristu”? Mwaha woowi, wira niphwanye murettele wa mmuupuweloni nihaana omwaamini Yesu ni osuwela muteko orina awe mwa yoolakela ya Muluku. Mwa ntakiheryo, orumeelaka mukuttho wowoopola wa Yesu Kristu, Yehova onoonilevelela itampi sahu. (1 Yoh. 2:12) Tthiri osuwela eyo enninimaaliha vanceene! Ntoko Mwene a Omwene wa Muluku, Yesu onrowa omaliha mixankiho sotheene sikumiheriwe ni Satana vamosa ni olumwenku awe wootakhala. (Yes. 65:17; 1 Yoh. 3:8; Wis. 21:3, 4) Tthiri osuwela eyo enninivaha nlipelelo neekeekhai! Nnaamwi Yesu onivanhe ene muteko wooxankiha, owo ooleiherya onikhaliherya okathi wotheene mahiku ala ookiserya. (Math. 28:19, 20) Nto osuwela wira Yesu ori ni hiyo onninivaha olipa murima! Omaaleleya, nlipelelo ni olipa murima, maluku anlipiha murettele wa mmuupuweloni mwahu.

17. (a) Nihaana opaka exeeni wira nihiyeleele murettele ahu? (b) Ntoko onihimya awe Yohani 16:33, etthu xeeni ninrowa ahu owerya opaka?

¹⁷ Exeeni mukhanle anyu oopaka wira nvikanihe okhalana murettele hata mukumanaka mixankiho sinceene? Muhaana omutakiha Yesu. Yoopacerya, muhaana ovekela ni ohihiyererya ovekela iwo. Ya nenli, mmwiiweleleke Yehova ni mulaleeryeke mooluttuweliwa hata vavilaka opaka eyo. Ya neeraru, mweemereryeke nikhaliheryo na apatthani anyu. Nto mwiira siiso, murettele wa Muluku onoosuka muupuwelo ni murima anyu. Nave ntoko Yesu, nyuwo munoowerya oxintta khula muxankiho onrowa woophwanyani.​—Mmusome Yohani 16:33.