MWAHA ONITHOKORERIWA 14
Niireke Munnivara Moomalela Muteko Anyu Woolaleerya?
“Mwetteke mulaleyaka ehapari yorera, munvareleke Muluku muteko womalela”.—2 TIM. 4:5.
NSIPO 57 Naalaleeryeke Atthu Otheene
ELE NINROWA AHU WIIXUTTA *
Nuumala ohihimuxiwa, Yesu onnikumana ni arummwa awe onaavaha yooruma yoowi: “Muroweˊ, mwawixuttiheke atthu” (Nwehe ettima 1)
1. Etthu xeeni arumeyi otheene a Muluku aniphavela aya opaka ni nthowa xeeni? (Nwehe elatarato ya ekaapa.)
YESU KRISTU ohaaruma atthareli awe otheene wira: “Murowé, mwawixuttiheke atthu a maloko othene”. (Math. 28:19) Arumeyi otheene oororomeleya a Muluku, anniphavela osuwela moota woovara “muteko [woolaleerya] womalela”, yoowo avahiwe aya wira avareke. (2 Tim. 4:5) Tthiri muteko owo ti wootepa otthuneya ni ohaana ovariwa moowaakuveya ovikana miteko sikina. Masi, vannivila oviriha okathi munceene nlaleeryaka ntoko naaphavela ahu.
2. Mixankiho xeeni sikhanle oonikhoottiherya omaleliha muteko ahu woolaleerya?
2 Sookhala miteko sikina sootthuneya sinniiyerya okathi ni ikuru sinceene. Mwa ntakiheryo, anna anceene ahaana oviriha okathi munceene avaraka muteko wira alyiheke etthoko aya. Nave anna akina ahaana wiimananiha owanana itthu sikina sa etthoko aya, ntoko owereeliwa, oriipiwa murima aahiiso mixankiho sinikhumelela mwaha wa wuuluvala. Ninrowa omaleliha sai muteko ahu woolaleerya hata nikumanaka mixankiho iyo?
3. Masu a Yesu ari Matheyo 13:23, anniixuttiha exeeni?
3 Akhala wira mikhalelo sanyu khasiniweemereryani oviriha okathi munceene nvaraka muteko wa Yehova, muhixanke. Yesu aanisuwela wira awiixutti awe khiyaarowa okumiheryaka mihokorokho sa Omwene simosa-ru, eyo piiyo, iwoora ni ikuru simosaru wira akhaliherye muteko woolaleerya. (Mmusome Matheyo 13:23.) Yehova onnivaha efaita khula etthu nimpaka ahu ni murima wotheene wira nikhaliherye muteko awe. (aHéb. 6:10-12) Masi ikwaha sikina ninnoona wira makhalelo ahu khanneemererya ovara vanceene muteko wa Muluku. Mwaha ola, ninrowa woona moota nikhanle ahu ohela nipuro noopacerya muteko woolaleerya mookumini mwahu, okhweiherya okumi ahu ni olokiherya inamuna sahu soolaleerya. Wanipacerya, ninrowa oweha ele enitaphulela aya omaleliha muteko woolaleerya.
4. Ontaphulela exeeni omaleliha muteko ahu woolaleerya?
4 Ontaphulela exeeni omaleliha muteko ahu woolaleerya? Olavula mookwasa, omaleliha muteko woolaleerya ontaphulela olaleerya ni owiixuttiha atthu mpakha vaniwerya ahu. Masi omaleliha muteko woolaleerya khonlipa ni okathi ninviriha ahu nlaleeryaka. Yehova onnivaha efaita yinceene ele enniiriha olaleerya. Hiyo ninniimananiha ni murima wotheene omaleliha muteko ahu wa eKristau *, mwaha woowi ninnimphenta Yehova ni anamwaattamanani ihu. (Mar. 12:30, 31; aKol. 3:23) Omurumeela Yehova ni murima wotheene, ontaphulela orumeela ikuru sahu, okathi ahu ni osuwela wahu wira nivare muteko awe ni murima wotheene. Akhala wira ninnoona muteko ahu woolaleerya okhala eparakha, nnootepaka wiimananiha waalaleerya atthu anceene ihapari sooreera.
5-6. Nvahe nlikanyiho nnooniherya moota mutthu orina okathi vakhaani okhanle awe oohela nipuro noopacerya muteko woolaleerya.
5 Nkahaya mmuupuwele mmiravo onisiveliwa omoopa viola. Owo onnisiveliwa wiipa isipo ni viola awe khula okathi. Muhoolo mwaya, owo onniphwanya muteko woomoopa viola murestaurante woomalani wa esumana. Masi musurukhu onivahiwa awe khoniphiyerya othuma itthu oniphavela awe. Nto onnipacerya ovara muteko wooliviha musurukhu mulooxa okhuma Segunda-feira mpakha Namathanu. Hata ovaraka muteko wooliviha mulooxa, etthu enitepa omusivela, omoopa viola. Owo onniphavela wunnuuherya omoopa wawe viola wira wiipa, okhale muteko awe wa okathi wotheene. Hata vari siiso, owo onnivikaniha ottottela mureerelo khula okathi wira omoopeke viola awe hata okhalaka okathi vakhaani.
6 Moolikanasa, pooti wira khamurina okathi munceene wira mulaleyeke ihapari sooreera. Masi munnisiveliwa muteko woolaleerya. Nto munniimananiha vanceene olokiherya inamuna sanyu soolaleerya wira mwaakhaliheryeke atthu osiveliwa ihapari sooreera. Hata sikhanle ene itthu sinceene siniiya okathi anyu, woonasa wene, munnuupuwela etthu ekhanle anyu oopaka wira muhele nipuro noopacerya muteko woolaleerya.
MOOTA WOOHELA NIPURO NOOPACERYA MUTEKO WOOLALEERYA
7-8. Ninrowa otakiha sai moonelo wa Yesu voohimya sa muteko woolaleerya?
7 Moota Yesu oonela awe muteko woolaleerya, oonivaha ntakiheryo nooloka otthara. Etthu yootepa otthuneya mookumini mwawe waari olavula sa Omwene wa Muluku. (Yoh. 4:34, 35) Yesu aaheetta ikiloomo sinceene wira aalaleerye atthu anceene. Owo aanittottela mureerelo khula okathi wira olaleerye, akhale mapuro oowaatta atthu aahiiso mmawaani. Tthiri Yesu aanihela nipuro noopacerya muteko woolaleerya mookumini mwawe.
8 Enamuna emosa nikhanle ahu omutakiha Kristu ori ottottela mureerelo khula okathi wira naalaleerye atthu akina khula opuro. Nave ninnileva itthu sinnisivela wira nivikanihe ovara muteko woolaleerya. (Mar. 6:31-34; 1 Ped. 2:21) Anna akina mmulokoni anniwerya okhala mapioneero ookhaliherya, ookilaatheya aahiiso mapioneero a vameekhaaya. Akina anniixutta nttaava nikina aahiiso annithaamela muttetthe woothowa anamalaleerya. Masi muteko munceene onivariwa ni anamalaleerya ahinwerya ovara miteko iyo, yaawo aniimananiha ovara mpakha vanwerya aya. Moohicikha ele ennikhumelela, Yehova khonnivekela etthu nihinwerya ahu. Owo oniphavela wira otheene ahu nihakalaleke vaavo ninwiixuttiha ahu atthu “ehapari yooreera ya nttittimiho na Muluku”.—1 Tim. 1:11, Waataana wa Naanaano; Otum. 30:11.
9. (a) Hata aapaka iheema wira iikhaliheryeke, Paulo aahela sai nipuro noopacerya muteko woolaleerya? (b) Moovarihana ni Miteko 28:16, 30, 31, Paulo oonela sai muteko woolaleerya?
9 Murummwa Paulo, ntakiheryo nikina na mutthu aahela nipuro noopacerya muteko woolaleerya. Ori ene oKorinto, okathi wa mukwaha awe wa nenli wa omisionaario, Paulo khaarina musurukhu waaphiyerya wira ovikanihe mukwaha awe, owo aahiviriha okathi vakhaani opakaka iheema. Masi, muteko woopaka iheema khahiyo waari woopacerya mookumini mwawe. Owo aanivara muteko owo wira iikhaliheryeke, opaka eyo yaahimukhaliherya olaleya ihapari sooreera oKorinto ‘ohivekenle etthu’. (2 aKor. 11:7) Nnaamwi Paulo aavara muteko wira ophwanyeke yoolya, owo aahivikaniha ohela nipuro noopacerya muteko wa Muluku ni aanilaleerya khula eSaabadu. Nto nuumala makhalelo awe oloka, Paulo aaniimananiha olaleerya moomalela. Owo “ahìvahererya olaleya, àthonyeryaka aYuda wira Yesu ti Mòpoli”. (Mit. 18:3-5; 2 aKor. 11:9) Muhoolo mwaya, okathi aari awe empa aatthukweliwe awe oRoma iyaakha piili, Paulo aanaalaleerya atthu yaamuxukurya ni aahilepa iwarakha. (Musome Miteko 28:16, 30, 31.) Paulo kheemerenrye nnakhala etthu emosa emukhoottiheryaka olaleerya. Owo aahimmye so: “Siso hiyo khannojela muteko ahu”. (2 aKor. 4:1) Nimutakihaka Paulo, hata nivaraka muteko onniiyerya okathi, nnoowerya ohela nipuro noopacerya miteko sa Omwene mookumini mwahu.
Sookhala inamuna sinceene nikhanle ahu oovara moomalela muteko ahu woolaleerya (Nwehe ittima 10-11)
10-11. Hata nwereyasiwaka, munrowa omaleliha sai muteko anyu woolaleerya?
10 Anna akina khaniwerya olaleerya empa ni empa mwaha woowereyasiwa aahiiso wuuluvala. Hata vari siiso, awo anoowerya okhaliherya inamuna sikina sa olaleerya. MaKristau a eseekulu yoopacerya, yanaalaleerya atthu khula opuro yaaphwanya aya. Yaanittottela mureerelo khula okathi wira alaleye ekeekhai, okhale empa ni empa, mapuro oowaatta atthu, moohiilokiherya ni ‘mmapuwani atthu yàphwanyaya’. (Mit. 17:17; 20:20) Akhala wira khamunwerya weetta, nyuwo pooti okilaathi waattamela mphironi wira mwaalaleeryeke ale anvira. Nave, nyuwo pooti olaleerya moohiilokiherya, omurumeela telefoni aahiiso olepa iwarakha. Anamalaleerya anceene arina mixankiho sa okumi anihakalala ni osiveliwa vaavo anlaleerya aya arumeelaka inamuna iyo.
11 Hata nwereyasiwaka, munoowerya omaleliha muteko anyu woolaleerya. Nkahaya muupuwele-tho ntakiheryo na murummwa Paulo. Owo aahimmye so: “Owerya nno wulupalexa onrwa wa Muluku, khuhiyó wawihu”. (2 aKor. 4:7) Okathi omosa Paulo aari awe muteko wa omisionaario, owo aahiwereiwa ni aanitthuneya ovahiwa ikuru aahiiso okhaliheriwa. Owo aahaaleela anna a oGalasia wira: “Nyuwo mosuwela wira, okathi wapajenryaka wolalèryani ehapari yorera, kapajenrye mwaha w’owereiwa waka”. (aGal. 4:13) Moolikanasa, pooti wira owereyasiwa wanyu onimoovahani eparakha ya waalaleerya ihapari sooreera atthu akina ntoko, matotoro, manfurumeero ni ale anaakhapelela aretta. Woonasa wene, atthu awo khanikhala owaani okathi anamalaleerya anvara aya muteko muttetthe aya.
MOOTA WOOKHWEIHERYA OKUMI ANYU
12. Ontaphulela exeeni okhalana niitho nooluluwanya?
12 Yesu aahimmye so: “Muthuko w’erutthu, maithó! Tivó maitho anyu yakhalá òrera [ooluluwanyu], erutthu anyu yothene ennetta vokókola”. (Math. 6:22) Moolumo ala antaphulela exeeni? Antaphulela wira, naaphavelaka okhweiherya okumi ahu nihaana owehexexa yoolukama ahu ni oheemererya itthu sikina sinihapuxaka. Yesu oovaha ntakiheryo nooloka na ohela nipuro noopacerya muteko woolaleerya. Nave aahiwiixuttiha atthareli awe wira aheleke nipuro noopacerya omurumeela Yehova ni Omwene awe. Nto ninnimutakiha Yesu vaavo ninhela ahu nipuro noopacerya olaleya ihapari sooreera ni ‘opacerya ophavela Omwene wa Muluku ni wiwelela otthuna wawe’.—Math. 6:33.
13. Exeeni enrowa onikhaliherya ohela nipuro noopacerya muteko woolaleerya?
13 Enamuna emosa nnooniherya ahu wira ninnihela nipuro noopacerya muteko ahu woolaleerya ori okhweiherya okumi ahu. Niira siiso, nnookhalana okathi wira naakhaliherye atthu akina omusuwela ni omphenta Yehova. * Mwa ntakiheryo, nyuwo pooti onvekela patarau anyu wira oovaheeni okathi vakhaani wira mwalaleeryeke eriyari ya esumana. Aahiiso nyuwo pooti osyaka matthekulelo anwiiyeryani okathi munceene.
14. Marukunuxo xeeni anamathelana amosa apanke aya wira aviriheke okathi munceene alaleeryaka?
14 Eyo ti etthu mutokweene oniihaniwa Elias ni mwaarawe apanke aya. Owo onihimya so: “Khinaarowa owerya okhala mapioneero moowaakuveya, maana naahaana opaka marukunuxo wira niviriheke okathi munceene nlaleeryaka. Nto naahipaka marukunuxo wira nincererye okathi naaviriha ahu nivaraka muteko woolaleerya. Mwa ntakiheryo, naahihiya othuma itthu sinceene, ovukula okathi naaviriha ahu ntthekulaka ni naahaavekela mapatarau ahu wira apake eprograma yaarowa onikhaliherya olaleerya vanceene. Mwaha woopaka eyo, nookhalana okathi woolaleerya ohiyu, wiiriha soosoma sa Biibiliya ni olaleerya eriyari ya esumana ikwaha piili khula mweeri. Eyo yooniphwanyiha ohakalala wuulupale!”
MOOTA WOOLOKIHERYA INAMUNA SANYU SOOLALEERYA NI WIIXUTTIHA
Ovarihela muteko itthu nniixutta ahu muthukumano wa eriyari ya esumana sinoonikhaliherya olokiherya inamuna sahu soolaleerya (Nwehe ittima 15-16) *
15-16. Moovarihana ni 1 Timótheyo 4:13, 15, ninrowa ovikaniha sai olokiherya inamuna sahu soolaleerya? (Nwehe ekaaxa eni: “ Soolukama Sinrowa Wookhaliheryani Omaleliha Muteko Anyu Woolaleerya”.)
15 Enamuna ekina enrowa onikhaliherya omaleliha muteko woolaleerya ori olokiherya inamuna sahu soolaleerya. Mwa ntakiheryo, moovarihana ni muteko anivara aya, atthu akina annivahiwa malakiheryo ni wiinihiwa nikuruta wira asuweleke ovara saana muteko aya. Etthu emosa-ru enniiraneya ni anamalaleerya a Omwene. Nihaana ovikaniha wiixutta moota woolaleerya saana ni olokiherya inamuna sahu soolaleerya.—Mir. 1:5; mmusome 1 Timótheyo 4:13, 15.
16 Masi nihaana opaka exeeni wira nikhale anamalaleerya ooloka? Nihaana ovaha ephoole malakiheryo ninvahiwa ahu eriyari ya esumana, Muthukumano Okumi ni Orummwa Ahu. Muthukumano owo, onninivaha malakiheryo ooloka annikhaliherya olokiherya inamuna sahu soolaleerya. Mwa ntakiheryo, vaavo muhooleli a muthukumano onaavaha awe miruku anaxikola, nihaana ovaha ephoole malakiheryo anrowa onikhaliherya olokiherya inamuna sahu soolaleerya. Nto nihaana ovarihela muteko malakiheryo awo okathi ninrowa ahu olaleya ihapari sooreera. Pooti onvekela muhooleli a egrupu ahu malakiheryo aahiiso ovara vamosa ni yena muteko woolaleerya. Nave pooti okhaliheriwa ni namalaleerya orina sookumanana, pioneero aahiiso mutokweene a esirkwiitu. Nave-tho, wira nitepeke wiilokiherya, nihaana orumeela saana ikaruma siri, Ekaaxa ya Ikaruma Sinnikhaliherya Wiixuttiha. Niira siiso, nnoowerya osiveliwa vanceene olaleerya ni wiixuttiha.
17. Munrowa ophwanya exeeni akhala wira munoomaleliha muteko anyu woolaleerya?
17 Tthiri eparakha yuulupale weemereriwa ‘ovara vamosá’ ni Yehova! (1 aKor. 3:9) Nto mwiimananiheke wira “musuweleke othanla itthu sintepa ophwanela” ni ohela nipuro noopacerya ovara muteko wa Muluku. Mwiira siiso, munoomurumeela Yehova “n’utteliwa murima”. (aFil. 1:10; Esal. 100:2) Okhala wira mwa murumeyi a Muluku, mukupaliki wira owo onimoovahani ikuru wira mmalelihe muteko anyu woolaleerya hata mukumanaka mixankiho ni owereyasiwa. (2 aKor. 4:1, 7; 6:4) Akhala wira munimwiimananiha olaleerya mpakha vaniwerya anyu hata vakhala vanceene aahiiso vakhaani, nyuwo munoowerya “wittottopa” mwaha woowi munimurumeela Muluku ni murima wotheene. (aGal. 6:4) Vaavo munimaleliha anyu muteko anyu woolaleerya, munnooniherya wira munnimphenta Yehova ni atthu akina. Nto mwiira siiso, “munimòpowa mmansinyu vamosá n’ale aniwiwani”.—1 Tim. 4:16.
NSIPO 58 Naaphaveleke Apatthani a Murettele
^ etti. 5 Yesu oonivaha muteko woolaleya ihapari sa Omwene ni waapaka awiixutti. Mwaha ola, ninrowa wiixutta moota nikhanle ahu oomaleliha muteko ahu woolaleerya, hata nikumanaka mixankiho. Nave, ninrowa wiixutta moota woolokiherya inamuna sahu soolaleerya ni ophwanya ohakalala.
^ etti. 4 MOOLUMO OOTTHOKIHERIWA: Muteko ahu wa eKristau, onihela muhina itthu sinceene ntoko olaleerya ni wiixuttiha, oteka ni olokiherya ipa sinirumeeliwa ni mutthenkeso ahu ni okhaliherya okathi sinikhumelela aya ihasara seephattu.—2 aKor. 5:18, 19; 8:4.
^ etti. 13 Nwehe elista eri ekaaxa eni: “Moota Wookhweiherya Okumi Anyu”, erevista Owehaweha Julyo 2016 epaaxina 8.
^ etti. 62 OTTHOKIHERIWA WA IFOOTU: Muthukumano wa eriyari ya esumana, murokora opakaka yowooniherya ya moota woopaka mikwaha sootthikela oxukurya. Moottharelana, vaavo onivahiwa awe miruku ni muhooleli, owo onnilepa inoota ebroxura awe Osoma ni Wiixuttiha. Nto okathi onilaleerya awe wanikisa wa esumana owo onnivarihela muteko malakiheryo awo.
