1-2. (a) Enamuna xeeni Satana onirumeela awe wira aawoke atthu? (b) Mwaha ola, ninrowa oweha exeeni?

OKHUMA okathi wa Adamu ni Eva, Satana “tithi a wothá” onnaawoka apinaatamu. (Yoh. 8:44) Wootha iwo onihela muhina yowiixuttiha voohimya sa naakhwa ni wira atthu annivikaniha okhala akumi nuumala okhwa. Vannooneya wira soolema sinceene sinivarihana ni woova minepa sa alipa-ookhwa. Mwaha wa soolema iyo, anna ni arokora anceene ‘anniwanela wamini waya’ vaavo onikhwa awe mmusi aahiiso mutthu mukina muttetthe aya.​—Yuda 3.

² Akhala wira munniwanana yooweeha ntoko eyo, exeeni enrowa wookhaliheryani ovikaniha okhala oolipa ni waakiherya ele Biibiliya oniixuttiha awe voohimya sa okhwa? (aÉf. 6:11) Munrowa waamaaliha sai ni waalipiha anna ni arokora yaawo ankhanyereriwa wiirela mpantta soolema sihinimusivela Muluku? Mwaha ola, ninrowa oweha malakiheryo Yehova onnivaha awe. Masi wanipacerya, ninrowa othokorerya ele Biibiliya onihimya awe sa naakhwa.

3. Wootha woopacerya wa Satana okumihenrye exeeni?

³ Muluku khoniphavela wira apinaatamu akhweeke. Yehova aahaapattuxa Adamu ni Eva wira akhaleke mahiku otheene, masi wira ahikhwe, yahaana omwiiwelela Yehova. Tivonto aavanhe awe yooruma ela yookhweya wiiwelela eni: “Muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”. (Maph. 2:16, 17) Masi Satana aahivaanyiha ele Yehova aahimmye awe. Orumeelaka enowa, aahimuleela Eva wira: “Nnari, khamunokhwa!” Mooriipiha murima, Eva aahikupali yoowootha ele khulya muhokorokho ole. Muhoolo mwaya, owo aahinvaha iyawe ni owo khulya. (Maph. 3:4, 6) Yookhumelela aya, etampi ni okhwa ohaaphwanya apinaatamu otheene.​—aRom. 5:12.

4-5. Yoowootha xeeni ekina Satana onirumeela awe wira aawoke apinaatamu?

 ⁴ Okhala wira Muluku aahihimya, Adamu ni Eva ahookhwa. Masi Satana onnivikaniha waawoka apinaatamu. Vaavo okathi onivira aya, Satana onnincererya wootha wawe. Enamuna emosa ya wootha iwo ti yowiixuttiha yoowi nuumala mutthu okhwa munepa awe onnivikaniha okhala. Sookhala inamuna soovirikana sa wootha ni atthu anceene anniwokiwa ni wootha iwo.—1 Tim. 4:1.

⁵ Xeeni atthu anceene ankupali aya wootha wa Satana? Mwaha woowi khuuvo mutthu oniphavela okhwa. Yehova onipattunxe wira nikhaleke mahiku otheene. (Mus. 3:11) Nave otheene ahu noosuwela wira naakhwa nwanani muulupale. (1 aKor. 15:26) Nto Satana onnittottela mureerelo muupuwelo owo ni onnirumeela wira aawoke apinaatamu.

6-7. (a) Niireke Satana oowerya ovitha ekeekhai voohimya sa naakhwa? Mutthokiherye. (b) Xeeni vari aya vooloka osuwela ekeekhai voohimya sa okhwa?

⁶ Hata Satana iimananiha vanceene, owo khowenrye ovitha ekeekhai voohimya sa naakhwa. Tthiri ninkhala okathi atthu anceene ansuwela aya soowiixuttiha sa Biibiliya voohimya sa okhwa ni nlipelelo na ohihimuxiwa alipa-ookhwa. (Mus. 9:5, 10; Mit. 24:15) Sowiixuttiha iyo, sinninimaaliha ni sinninikhaliherya ohoova ni osuwela ele eniiraneya mutthu akhwa vale. Mwa ntakiheryo, hiyo khaninwoova atthu ookhwa, mwaha woowi noosuwela wira alipa-ookhwa khanihaawa. Nave, noosuwela wira alipa-ookhwa kharina okumi ni khaniwerya waahaaxa atthu akumi. Maana noosuwela wira okhwa onlikana ni orupa. (Yoh. 11:11-14) Nave-tho, alipa-ookhwa khansuwela wira okathi onnivira. Nto vaavo anrowa aya ohihimuxiwaka, hata ale akhwiiye iseekulu sinceene sivinre, khanrowa wuupuwelaka wira woovira okathi munceene. Onrowa okhala ntoko waaphila.

⁷ Ekeekhai voohimya sa okhwa ti yookhweya, yoowiiwanyeya ni yookhalela. Tthiri eyo ennivirikana ni sowootha sa Satana seiyo sinaahuurya maru atthu! Ohiya paahi waawoka apinaatamu, wootha wa Satana onnimunyohola Mpattuxa. Wira nisuwele mixankiho sikhumelenle mwaha wa wootha wa Satana, ninrowa woona waakhuliwa wa makoho ala ootthuneya: Moota xeeni wootha wa Satana onimunyohola aya Yehova? Wootha wa Satana oniwiiriha sai atthu wuupuwelaka wira mukuttho wa Yesu khorina efaita? Moota xeeni wootha wa Satana onincererya aya oriipiwa murima ni mixankiho sa apinaatamu?

8. Ntoko onooniherya awe Yeremiya 19:5, yoowootha ya Satana voohimya sa okhwa enimunyohola sai Yehova?

⁸ Wootha wa Satana onnimunyohola Yehova. Wootha iwo onihela muhina wira alipa-ookhwa annihaaxiwa omooroni. Tthiri yoowootha eyo ennimunyohola Muluku! Moota xeeni? Mwaha woowi, yowiixuttiha eyo enniwiiriha atthu wuupuwelaka wira Muluku oophenta orina mikhalelo ntoko sa Satana. (1 Yoh. 4:8) Munoonela sai vaavo atthu anuupuwela siiso? Ankhi Yehova, onoonela sai? Yehova onninyokha khula enamuna ya otakhala.​—Mmusome Yeremiya 19:5.

9. Ntoko onihimya awe Yohani 3:16 ni 15:13, wootha wa Satana onwiiriha atthu wuupuwela exeeni voohimya sa mukuttho wa Yesu?

⁹ Wootha wa Satana voohimya sa okhwa onniwiiriha atthu wuupuwelaka wira mukuttho wa Yesu khorina efaita. (Math. 20:28) Yoowootha ekina ya Satana ti yoowi apinaatamu aakhalana eroho aahiiso munepa ohinikhwa. Akhala wira eyo ekeekhai, khula mutthu onnikhala voohimala. Nto khivaareerela Yesu ovaha okumi awe ntoko mukuttho wowoopola wira niphwanye okumi woohimala. Muupuweleke wira mukuttho wowoopola wa Yesu, niphento nuulupale yooniheriwa aya apinaatamu. (Mmusome Yohani 3:16; 15:13.) Masi wootha wa Satana onniwiiriha atthu wuupuwelaka wira mukuttho owo khorina efaita. Vano, nkahaya muupuwele moota Yehova ni Yesu anoonela aya yoowootha eyo!

10. Moota xeeni sowootha sa Satana sinincererya aya oriipiwa murima ni mixankiho sa apinaatamu?

¹⁰ Sowootha sa Satana sinnincererya oriipiwa murima ni mixankiho sa apinaatamu. Mwa ntakiheryo, vaavo anamuyari anixanka aya ni oriipiwa murima mwaha wookhweliwa mwanaya, awo pooti oleeliwa wira: Muluku tomukunxe mwaninyu mwaha woowi aaphavela nlaikha wiirimu. Wootha iwo wa Satana onnincererya owereya ni oriipiwa waya murima. Vano nwehe yowiixuttiha ekina yoowootha ya Satana yoowi atthu annihaaxiwa ni opahiwa omooroni moohimala. Yoowootha eyo, ennirumeeliwa wira ahasuliwe, opahiwa ni othomeiwa vamwirini atthu yaale ahineemererya sowiixuttiha sa etiini. Moovarihana ni Inquisição Espanhola, * enihimya wira atthu akina yaapaka itthu iyo sootakhala yuupuwela wira yaawooniherya anammwareya aahiiso anamavaanyiha wira “yaarowa ohasuliwaka mahiku otheene omooroni”, nto yaahaana ottharuwa mweettelo aya wira ahirowe omooroni. Mwa ntakiheryo, ilapo sinceene atthu anceene annaakokhorela ni waavekela mareeliho amuhavinre aya. Atthu akina annaaxonttela amuhavinre aya wira ahaahukhumu. Mooriipiha murima, sowootha sa Satana khasinaamaaliha ale akhweliwe, masi sinootepiha oriipiwa waya murima. Nave sinniwiiriha atthu otepa oxanka ni owoova alipa-ookhwa.

11. Woonasa wene, exeeni apatthani ni amusi akhanle aya onikhanyererya opaka?

¹¹ Omphenta wahu Muluku ni Nuulumo nawe onniniiriha omwiiwelela Yehova hata apatthani ni amusi anikhanyereryaka wiirela mpantta soolema sihinivarihana ni Biibiliya voohimya sa naakhwa. Woonasa wene, awo pooti onuulihiha muru ahimyaka wira khannimphenta mutthu ole okhwiiye. Aahiiso awo pooti onoopopiha ahimyaka wira naahitthare soolema iyo, ole okhwiiye onimwaahaaxa ale ari akumi. Okathi owo, ninrowa waakiherya sai ekeekhai? Nrowe niwehe moota nikhanle ahu oovarihela muteko malakiheryo anittharelana.

12. Soolema xeeni voohimya sa naakhwa sinikhoottihiwa ni Biibiliya?

¹² Mwiimananiheke ‘ohivará’ soolema ni sookupali sihinivarihana ni Biibiliya. (2 aKor. 6:17) Mwa ntakiheryo, nloko nimosa na elapo  ya oCaribe, atthu anceene anikupali wira nuumala mutthu okhwa, “munepa” awe onnikhuma onakhala okathi munceene eriyari ya atthu ophavelaka omuhukhumu aahiiso omunlela ikuhu mutthu ole aamuhasula. Nave eliivuru emosa ehimmye wira “munepa” owo pooti “okumiherya manyaku-nyaku mmuttettheni”. Nave, mipantta sikina sa wÁfrica, atthu annikhuneela ni exiri ya empa awe namukhwa ispelyo ni ifootu sawe. Nthowa xeeni? Atthu akina anihimya wira eyo ennimwiiriha mulipa-ookhwa owo ohiweha owiitho wawe! Okhala wira na arumeyi a Yehova, khanimphavela wiirela mpantta ni khaninkupali soolema sinkhaliherya sowootha sa Satana!​—1 aKor. 10:21, 22.

13. Moovarihana ni Yakobo 1:5, mwaanyiheryaka yoolema emosa, etthu xeeni mukhanle anyu oopaka?

¹³ Mwaanyiheryaka yoolema emosa akhala wira ennimusivela Yehova aahiiso nnaari, muhaana onvekela wira oovaheeni ankhili ni waamini woolipa. (Mmusome Yakobo 1:5.) Nuumala-vo, muhaana otokosa muliivuruni mwahu yoolema eyo. Akhala wira vannireerela, mwaakoheke axitokweene a muloko anyu. Awo khanrowa wooleelani etthu yoopaka, masi animookhaliheryani ophwanya malakiheryo a mBiibiliyani oovareleya muteko, ntoko ala anilavuliwa mwaha ola. Vaavo munvarihela anyu muteko malakiheryo awo, munniwiixuttiha “ankhili” anyu, nto ankhili awo animookhaliheryani “osuwela n’uthanla sorera ni sotakhala”.—aHéb. 5:14.

14. Mwa inamuna xeeni ninrowa ahu osyaka waakwattuliha atthu?

¹⁴ “Mwireke sothene vonvuwiha Muluku. Mwetteke vorera vohatthekihaka” atthu. (1 aKor. 10:31, 32) Vaavo ninthanla ahu wiirela mpantta yoolema emosa, nihaana wuupuwela vakhala wira yoothanla eyo khenrowa oxankiha yowuupuxerya ya murima ya atthu akina, otepexa wene annihu maKristau. Tthiri, hiyo khinimphavela omukwattuliha mutthu! (Mar. 9:42) Nave-tho, nihaana osyaka opaka etthu yaarowa waaramusa ale ahikhanle Anamoona. Nto ophenta, onoonikhaliherya waatthokiherya sookupali sahu mwa nttittimiho wira ninvuwihe Yehova. Nave-tho, khanniphavela onyakulihana ni atthu awo nnakhala oramusa soolema saya. Musuweleke wira, ophenta wookhalana owerya wuulupale! Tthiri vaavo nnaaphenta ahu ni waattittimiha, nnoowerya waariiriha murima ale annilupattha.

15-16. (a) Xeeni vari aya vooreera waasuweliha akina sookupali sahu? Nvahe ntakiheryo. (b) Moolumo a Paulo aniphwanyaneya aRoma 1:16 annikhaliherya sai?

¹⁵ Mwaaleeleke atthu a muttetthe anyu wira mwa Namoona a Yehova. (Yes. 43:10) Akhala wira ohookhwa mmusi anyu, amusi anyu akina ni anamwaattamanani anyu pooti onyoonyiheya  mwaahiirele mpantta soolema saya. Tthiri vanookhweya waatthokiherya moonelo anyu akhala wira mwaahaaleela sookupali sanyu vahinatthi. Nkahaya nwehe ntakiheryo na Francisco, yoowo onikhala oMoçambique, oni: “Okathi miyo ni mwaaraka Carolina niixuntte ahu ekeekhai, nahaaleela amusi ihu wira khinaarowa-tho wiirela mpantta soolema voohimya sa alipa-ookhwa. Nto waamini wahu waaheehereriwa okathi muulupale awe Carolina aakhwiiye awe. Moovarihana ni soolema sa muttetthe ahu, naakhwa ohaana orapihiwa sitthariwaka soolema sahu. Nto mmusi mmosa ohaana orupa mahiku mararu opuro owo naakhwa aarapihiwa awe ni aataleliwe awe. Atthu a muttetthe ahu, anikupali wira opaka eyo onnimaaliha munepa wa namukhwa owo. Nto amusi awe Carolina yaahinvekela wira arupe opuro aarapihiwe awe”.

¹⁶ Exeeni Francisco ni Carolina yaapanke aya? Francisco onihimya so: “Okhala wira ninnimphenta Yehova ni nimphavela omuhakalaliha, naahikhootta otthara yoolema ele. Nto amusi awe Carolina yaahinanariwa vanceene. Awo yaahimmye wira khinaamuttittimihale ole aakhwiiye ni khiyaarowa-tho onixukurya nnakhala onikhaliherya. Okhala wira naahaaleela sookupali sahu vahinatthi, khinaalavunle-tho mwaha ole okathi ole yaananariwe aya. Amusi akina yaahinaakiha, ahimyaka wira hiyo naahitthokiherya sookupali sahu vahinatthi. Nto nuuvira okathi, amusi awe Carolina murima waahaakhurunuwa ni noottikela-tho waataana. Nave-tho, amusi akina yaahirwa owaani onivekela iliivuru sahu sinimutthokiherya Biibiliya”. Nto, khannuuleliwa muru ovikaniha okhala oororomeleya, maana noosuwela ele Biibiliya oniixuttiha awe voohimya sa naakhwa.​—Mmusome aRoma 1:16.

17. Exeeni enrowa onikhaliherya okhala mpatthani eekeekhai okathi munna aahiiso murokora onkhweliwa awe?

¹⁷ Vaavo munna aahiiso murokora onikhweliwa awe ole onimphenta awe, nihaana wiimananiha opaka ele ninwerya ahu wira nikhale “mpatthani” ni “munn’awe okathi w’oxanka”. (Mir. 17:17) Nihaana opaka eyo, otepexa wene okathi yoole munna aahiiso murokora onkhanyereriwa awe wiirela mpantta soolema sihinivarihana ni Biibiliya. Okathi owo nihaana opaka exeeni wira nikhale “mpatthani” eekeekhai? Nrowe niwehe malakiheryo manli anrowa onikhaliherya  ommaaliha ni omulipiha mutthu okhweliwe.

18. Exeeni yaamwiirinhe Yesu wunla? Ntakiheryo na Yesu ninniixuttiha exeeni?

¹⁸ “Munleke vamosa n’ale aninla”. (aRom. 12:15, Waataana wa Naanaano) Okathi mukina vannivila ohimya etthu wira nimmaalihe mutthu okhweliwe. Nto okathi owo, wunla ni mutthu okhweliwe pooti okhaliherya vanceene ovikana moolumo. Vaavo mpatthani awe Yesu iihaniwa Laazaro aakhwiiye awe, axirokorawe, Martha ni Maria ni atthu akina yaahinla. Nuuvira mahiku maxexe, Yesu aahiphiya. Biibiliya onihimya wira okathi owo “Yesu ahinla” hata aasuwela wira aarowa omuhihimuxa Laazaro. (Yoh. 11:17, 33-35) Wunla wa Yesu wooniherya moota Yehova onoonela awe vaavo mutthu onikhwa awe. Vaavo amusi awe Laazaro yanwenhe aya Yesu inlaka, awo yaahoona wira aanaaphenta vanceene, nto eyo yaahimmaaliha ni omulipiha Maria ni Martha. Moolikanasa, vaavo anna ni arokora anoona aya waaphenta ni waathokorerya wahu, awo annisuwela wira khakhanle mekhaya masi annikhaliheriwa ni apatthani aya eekeekhai.

19. Vaavo munna aahiiso murokora onikhweliwa awe, ninrowa otthara sai malakiheryo ari Musuweli 3:7?

¹⁹ “[Wookhala] okathi w’omàla n’ukathi w’olavula”. (Mus. 3:7) Enamuna ekina nikhanle ahu oowaamaaliha anna ni arokora ori waawiriyana saana okathi anilavula aya. Muhaana waahiya elavulaka itthu sotheene siri vamurimani vaya ni muhinyoonyiweke vaavo anlavula aya moolumo “òlolo”. (Yobi 6:2, 3) Woonasa wene munna aahiiso murokora owo onnixanka mwaha wa okhanyereriwa otthara soolema ni mmusi awe ohinimurumeela Yehova. Nto muhaana ovekela ni yena. Mmuxontteleke Yehova yoowo ‘Oniwìwa ale aninvekela’ wira oolipiheni ni woovahani muupuwelo wooloka. (Esal. 65:3) Nave akhala wira makhalelo anneemererya, muhaana omusoma Biibiliya ni yena. Aahiiso pooti osoma mwaha wala yowiiraneya eri iliivuru sahu.

20. Mwaha onittharelana ninrowa othokorerya exeeni?

²⁰ Yehova oonivaha eparakha yuulupale ya osuwela ekeekhai voohimya sa alipa okhwa ni nlipelelo arina aya na ohihimuxiwa! (Yoh. 5:28, 29) Tivonto, otheene ahu nrowe moolipa murima naakiherye ekeekhai voohimya sa alipa-ookhwa ni naaleeleke atthu akina khula okathi vanireerela aya. Masi yookhala enamuna ekina Satana onirumeela awe wira owiirihe atthu ovikaniha okhala mweepiphini. Enamuna ene ti onammunepani. Soolema ni inamuna sikina sa otthekula pooti ovarihana ni muraakho owo wa Satana. Mwaha onittharelana ninrowa othokorerya ele nikhanle ahu oopaka wira nihivariwe ni muraakho owo wa Satana.