1. Moovarihana ni aÉfeso 6:10-13, mwa enamuna xeeni Yehova onooniherya awe wira onnaathokorerya arumeyi awe? Mutthokiherye.

ENAMUNA emosa Yehova onnooniherya awe wira onnaathokorerya arumeyi awe, ori waalopola ni waakhaliherya moota wookhoottela minepa sootakhala. Awanani ihu aalupale ti Satana Diabo ni malaikha ootakhala. Nto Yehova onninlopola voohimya sa awanani ihu awo ni onninikhaliherya osuwela moota wowaakhoottela. (Mmusome aÉfeso 6:10-13.) Akhala wira nnimweemererya nikhaliheryo na Yehova ni omuroromela ni murima wotheene, nnoowerya omukhoottela ni omuxintta Diabo. Nnoowerya okhalana nroromelo murummwa Paulo aarina awe. Owo aahimmye so: “Muluku anikhapelelaka, t’ani ontthuna onivirikanyiha?”​—aRom. 8:31.

2. Mwaha ola, ninrowa othokorerya exeeni?

² Okhala wira na maKristau eekeekhai, hiyo khanintepa oxanka voohimya sa Satana ni minepa sootakhala. Masi ninnimananiha wiixutta voohimya sa Yehova ni omurumeela ni murima wotheene. (Esal. 25:5) Nnaamwi vari siiso, nihaana osuwela olavilavi ni miraakho sa Satana. Nthowa xeeni? Mwaha woowi niira siiso, nnoowerya osyaka owokiwa ni olavilavi awe. (2 aKor. 2:11) Mwaha ola, ninrowa oweha inamuna Satana ni malaikha ootakhala anirumeela aya wira yaawoke atthu. Nave, ninrowa woona ele nikhanle ahu oopaka wira nikhoottele minepa iyo sootakhala.

3-4. (a) Onammunepani exeeni? (b) Olelo-va, wuulaanale sai onammunepani?

³ Onammunepani, enamuna yuulupale Satana ni minepa sootakhala anirumeela aya wira yaawoke atthu. Atthu ale aniirela  mpantta onammunepani, anihimya wira annisuwela ni anneettiha itthu sikina apinaatamu akina ahinsuwela aya aahiiso ahinwerya aya weettiha. Mwa ntakiheryo, atthu akina anihimya wira anniwerya osuwela itthu sinrowa okhumelela muhoolo arumeelaka ehako aahiiso osoma itheneeri. Atthu akina pooti ohimyaka wira anniwerya olavula ni alipa-ookhwa. Nave, akina pooti wira annaaxerya ehako aahiiso orumeela maxintta ahimyaka wira anniwerya ompaka wala omurava mutthu mukina. *

⁴ Olelo-va, olumwenku wotheene ohuulaana onammunepani. Mwa ntakiheryo, atthu akohiwe a ilapo 18 sa wAmérica Latina ni oCaribe vahooneya wira eriyari ya atthu 3 mutthu mmosa onnikupali maxintta, okhwiri ni olowa, nave atthu anceene annikupali wira vanniweryaneya olavula ni minepa sootakhala. Nave yaahikohiwa atthu a ilapo 18 sa wÁfrica. Nto atthu anceene akohiwe ahimmye wira annikupali wira mutthu onniloiwa aahiiso onnipahuliwa. Ekeekhai wira moohicikha elapo ninkhala ahu nihaana wiimananiha osyaka onammunepani. Moohaanyiherya, Satana onnimananiha ‘owototha atthu othene’.​—Wis. 12:9.

5. Yehova onoonela sai onammunepani?

⁵ Esalimo 31:6 ennimuhimya Yehova okhala Muluku ‘òroromeleya’ ni eekeekhai. Nto onoonela sai onammunepani? Tthiri Yehova onninyokha moomalela! Yehova aahaaleela aIsarayeli wira: “Ahikhalé mutthu a nyuwo onrowa onviriha vaikho mwan’awe mwamulopwana walá mwamuthiyana, amuhelaka mukuttho: ahikhalé onrowa waxerya ehako, walá omurava mukhw’awe, walá wakoha amuluku èthiru, nnákhala opaka maxitta walá omulowa mutthu, nnákhala wakoha majini ni minepa s’alipa-okhwa. Apwiya annanyokha atthu anìra sotakhala seiyo”. (Otum. 18:10-12) Ekeekhai wira maKristau khaneettela Nlamulo Yehova aavanhe awe aIsarayeli. Masi, ninnisuwela wira nlelo onninyokha onammunepani, maana khoturukeyale.​—Mal. 3:6.

6. (a) Moota xeeni onammunepani ori aya wootakhala? (b) Moovarihana ni Musuweli 9:5, tuuvi ori mukhalelo wa alipa ookhwa?

⁶ Yehova onninlopola voohimya sa onammunepani mwaha woowi onnisuwela wira Satana onnirumeela onammunepani wira aahasule atthu. Satana onnirumeela onammunepani wira omwara-mwarye wootha wawe ohela muhina yoowootha yoowi alipa ookhwa annivikaniha okhala akumi. (Mmusome Musuweli 9:5.) Nave Satana onnirumeela onammunepani wira owoopopihe atthu ni waarakameliha ni Yehova. Yoolakela awe yuulupale, owiiriha atthu ale anivara onammunepani ororomela minepa sootakhala ohiya omuroromela Yehova.

7. Exeeni Yehova onnileela awe?

⁷ Ntoko nihimmye ahu wanipacerya, Yehova onninleela etthu nikhanle ahu oosuwela wira nihiwokiwe ni Satana ni minepa sootakhala. Nrowe nithokorerye itthu vakhaani nikhanle ahu oopaka wira niwanane ni omukhoottela Satana ni minepa sootakhala.

8. (a) Enamuna xeeni yuulupale nikhanle ahu ookhoottela minepa sootakhala? (b) Esalimo 146:4 envaanyiha sai wootha wa Satana voohimya sa okhwa?

⁸ Musomeke ni wuupuwelela Nuulumo na Muluku. Eyo enamuna yuulupale wira nikhootte  sowootha sa Satana ni minepa sootakhala. Nuulumo na Muluku, nri ntoko xoowa owiitha saana. Nno nnoowerya oxintta sowootha Satana onimwarya-mwarya awe ni onisuweliha ekeekhai. (aÉf. 6:17) Mwa ntakiheryo, Biibiliya onnihimya wira alipa-ookhwa khaniwerya olavula ni atthu akumi. (Musome Esalimo 146:4.) Nave Biibiliya onninuupuxerya wira Yehova paahi toniwerya ohimya moomalela ele enrowa wiiraneya muhoolo. (Yes. 45:21; 46:10) Akhala wira nnoosoma ni wuupuwelela Nuulumo na Muluku, nnoowerya okhootta sowootha sa Satana ni minepa sootakhala.

9. Mwa inamuna xeeni ninsyaka ahu onammunepani?

⁹ Musyakeke ovara itthu sinivarihana ni onammunepani. Okhala wira na maKristau eekeekhai, khanniirela mpantta inamuna sotheene sa onammunepani. Mwa ntakiheryo, hiyo khaninrowa waaxerya ehako ni khanneererya olavula ni alipa-ookhwa. Ntoko nithokorenrye ahu mwaha ovinre, ninnisyaka wiirela mpantta soolema sa masikho sinooniherya wira atthu ookhwa annivikaniha okhala akumi. Nave hiyo khaninsoma itheneeri niphavelaka osuwela itthu sinrowa wiiraneya muhoolo. (Yes. 8:19) Noosuwela wira soolema iyo ti sootakhala, maana pooti oniiriha ophavela olavula ni Satana ni minepa sootakhala.

10-11. (a) Nuumala wiixutta ekeekhai, etthu xeeni yaapanke aya atthu akina a eseekulu yoopacerya? (b) Moovarihana ni 1 aKorinto 10:21, xeeni vanireerela aya otthara ntakiheryo na maKristau a eseekulu yoopacerya ni ninrowa opaka sai eyo?

¹⁰ Muriheke aahiiso opaha itthu sotheene sinivarihana ni onammunepani. Eseekulu yoopacerya, atthu akina yaakhala epooma ya wEefeso yaaniirela mpantta onammunepani. Nuumala wiixutta ekeekhai, awo yaahipaka marukunuxo maalupale. Biibiliya onihimya wira: “Atthu akina anjene, yapaka maxitta òtakhala, yahiruha ilívuru saya, khupaha oholo w’atthu othene”. (Mit. 19:19) Atthu ale yaahipaka itthu sotheene yaawerya aya wira akhoottele minepa sootakhala. Musuweleke wira iliivuru saya saari sa musurukhu munceene. Nave ohiya ovaha aahiiso  waatumiherya atthu akina, awo yaahipaha moomalela iliivuru iyo. Awo yaaphavela paahi omusiveliha Yehova ohiya ophavelasa musurukhu wa iliivuru saya.

¹¹ Munrowa otthara sai ntakiheryo na maKristau a eseekulu yoopacerya a epooma ya wEefeso? Akhala wira mookhalana etthu enivarihana ni onammunepani enayeve-ru, ntoko ehirisi, ekhulula ni etthu ekina munuupuwela anyu wira ennookhapelelani, muhaana opaha.​—Mmusome 1 aKorinto 10:21.

12. Voohimya sa matthekulelo, makoho xeeni ninreerela ahu wiikoha?

¹² Muthanleleke matthekulelo anyu. Nyuwo muhaana wiikoha so: ‘Kiireke kinnisoma iliivuru, irevista ni myaha sikina munternetini sinivarihana ni onammunepani? Ankhi muusika kinwiriyana aka, iviidiyu kinweha aka ni axooku kiniweetta aka munternetini khanivarihana ni onammunepani? Kiireke enamuna kinitthekula aka khenivarihana ni onammunepani? Kiireke iviidiyu kinweha aka sinihela muhina waaweha mavampiiro, anookwiri aahiiso sinlavula sa minepa sootakhala? Niireke sinooniherya wira maxintta, nipako, oravana khahiyo etthu yootakhala?’ Khahiyo wira iviidiyu sotheene sa mulaponi sinilavula sa onammunepani. Vaavo munvarerya anyu matthekulelo anyu, muhaana opaka soothanla sinrowa wookhaliheryani ovikaniha onyokha itthu Yehova onnyokha awe. Nto othene ahu, nihaana wiimananiha wira nikhalane “muupuwelo wooreera ohoolo wa Muluku”.​—Mit. 24:16, Waataana wa Naanaano. *

13. Exeeni nikhanle ahu oosyaka?

¹³ Musyakeke olavula ihantisi voohimya sa minepa sootakhala. Hiyo nihaana otthara  vakhiviru vene ntakiheryo na Yesu. (1 Ped. 2:21) Ohinatthi orwa valaponi, Yesu aakhala wiirimu ni aanisuwela itthu sinceene voohimya sa Satana ni malaikha ootakhala. Masi nuumala orwa valaponi, owo khonalavule ihantisi aahiiso itthu saapakiwa wiirimu ni malaikha ootakhala. Yesu aaphavela okhala namoona a Yehova ohiya okhala namoona aahiiso namuhupi a Satana. Nto nnoomutakiha Yesu akhala wira khaninlavula itthu sinihimmwa wira sinnipakiwa ni minepa sotakhala. Ohiya-vo, nihaana wooniherya ni ‘murima ahu wosareya molumo òtthapela’ aahiiso eekeekhai.​—Esal. 45:2.

14-15. (a) Xeeni vahinreerela aya otepa woova malaikha ootakhala? (b) Olelo-va, exeeni enooniherya wira Yehova onninikhaliherya?

¹⁴ Muhitepeke woova minepa sootakhala. Olumwenku ola wootakhala ninkhala ahu, khula okathi sinnikhumelela itthu sooriipiha murima. Itthu iyo, sinihela muhina ihasara, iretta ni okhwa mootutuxerya. Masi nihuupuweleke wira itthu iyo sotheene sinikumiheriwa ni minepa sootakhala. Maana Biibiliya onihimya wira “oreriwa n’utakhaliwa khunimuthanla mutthu”. (Mus. 9:11) Yehova ohooniherya wira ookhalana owerya ovikana malaikha ootakhala. Mwa ntakiheryo, Yehova khaamweemerenrye Satana omwiiva Yobi. (Yobi 2:6) Okathi wa Moise, Yehova aahooniherya wira ookhalana owerya waavikana anamaxintta a wEjiitu. (Okhum. 8:18; 9:11) Muhoolo mwaya, Yehova onvaha mwene ahu Yesu owerya woomoomola Satana ni malaikha ootakhala wiirimu omurihela vathi-va. Moohipisa, awo anrowa oriheliwa munlittini mweepiphi wira ahaakumiherye-tho mixankiho apinaatamu.​—Wis. 12:9; 20:2, 3.

¹⁵ Olelo-va, sookhala itthu sinceene sinooniherya wira Yehova onnaakhapelela atthu awe. Nkahaya muupuwele ela: Hiyo ninnilaleya ni owiixuttiha atthu ekeekhai elapo yotheene. (Math. 28:19, 20) Muteko owo woolaleerya onnimwasa ni ohiya vanlakani vene sowootha sa Satana. Tthiri, vaakhanle wira Satana onniwerya, owo ampaka sotheene oniwerya awe wira onikhoottiherye ovara muteko owo. Tivonto, khivanitthuneya otepa omoova Satana ni minepa sootakhala. Hiyo noosuwela wira “Apwiya anniweha ilapo sothene wira yakhaliherye ale anaroromela ni murim’aya wothene”. (2 Wah. 16:9) Akhala wira nnoovikaniha ororomeleya wa Yehova, nikupaliki wira khiivo  etthu malaikha ootakhala anrowa aya opaka enrowa onikumiherya maxakha moohimala.

16-17. Nvahe ntakiheryo nnooniherya wira onitthuneya olipa murima wira nikhoottele minepa sootakhala.

¹⁶ Wira nikhoottele minepa sootakhala nihaana olipa murima, otepexa wene akhala wira apatthani ni amusi ahu khansuwela etthu enniiriha osyaka minepa sootakhala. Masi Yehova onnaareeliha atthu oolipa murima. Nwehe ntakiheryo na murokora Erica onikhala oGana. Owo aapacenrye omusoma Biibiliya orina ene iyaakha 21. Paapa awe Erica aari mukhulupale ni aanivara itthu sa onammunepani. Nto emusi awe yuupuwela wira Erica aarowa okhaliheryaka soolema sinihela muhina okhuura enama avahiwe amuluku eethiru a paapa awe. Vaavo Erica aakhoottale awe, anamuyari awe yoona wira aanaaveeha amuluku aya. Nto amusi awe, yuupuwela wira mwaha wa Erica opaka eyo, awo yanvahuwa aahiiso yaamwaaphwanya eretta yuulupale.

¹⁷ Amusi awe Erica yaahimukhanyererya wiirela mpantta soolema iyo, masi owo aahikhootta. Nto mwaha wookhootta, owo aahoomoliwa etthoko ya anamuyari awe. Anna akina yaahimwaakhela vatthokoni vaya. Vano Yehova oomureeliha Erica onvahaka emusi esya erina sookupali simosaru, yaawo ari ntoko annawe ni axirokorawe. (Mar. 10:29, 30) Nnaamwi oomoliwe ni amusi awe ni opahiwa mireerelo sawe, Erica aahivikaniha ororomeleya wa Yehova. Owo oobatiziwa ni onirumeela ntoko pioneera ookilaatheya. Vannooneya wira Erica khaatepa woova minepa sootakhala. Olavulaka sa emusi awe, Erica onihimya so: “Khula nihiku kinnivekela wira amusi aka amusuwele Yehova, ni yoone ni maitho aya ohakalala ni otaphuwa onikhumelela mwaha woomurumeela Muluku oophenta”.

18. Mareeliho xeeni anikhumelela mwaha woomuroromela Yehova?

¹⁸ Khahiyo wira otheene ahu, waamini wahu onrowa weehereriwa mwa enamuna emosaru. Masi otheene ahu nihaana omuroromela Yehova ni okhoottela minepa sootakhala. Akhala wira nnoopaka eyo, nnoophwanya mareeliho manceene ni khaninrowa ohapuxiwa ni sowootha sa Satana. Nave khaninrowa weemererya woova minepa sootakhala sinikhoottiheryaka omurumeela Yehova. Ohiya-vo, nnoolipiha waataana wahu ni Yehova. Vano mwiimananiheke otthara malakiheryo yaawo alempwale ni murummwa Yakobo ani: “Tivó, mmwiweleleke Muluku. Mmukhotteke Satana: Satan’owo onimotthyawani. Mmwattameleke Muluku: Muluku onowattamelani”.​—Yak. 4:7, 8.