1. Ninrowa olipiha sai ompatthani ahu?

OKHALA WENE, etthu yoopacerya nimpaka ahu wira nlipihe ompatthani ahu ni mutthu, ori oviriha okathi ni mutthu owo. Vaavo munivaanela anyu muleelanaka mixankiho sanyu, muupuwelo ni itthu sookhumelenleni munnikhala apatthani oolipa. Masi okathi mukina khivanikhweya okhala apatthani a Yesu, maana sookhala mixankiho. Mixankiho xeeni?

2. Muxankiho xeeni woopacerya ninreerela ahu owanana wira nikhale apatthani a Yesu?

² Muxankiho woopacerya: Hiyo khanitonko omoona Yesu. Ohiya hiyo paahi, maKristau manceene yaakhala okathi wa arummwa khiyaatonko onweha Yesu. Hata vaari siiso, murummwa Pedru aahimmye so: “Nyuwo munnimphenta, munamwi muhimonne: munnimwamini, nlelo muhimonaka”. (1 Ped. 1:8) Nto vannooneya wira vanniweryaneya okhala mpatthani a Yesu hata nihitonko omoona.

3. Muxankiho xeeni wa nenli ninreerela ahu owanana wira nikhale apatthani a Yesu?

³ Muxankiho wa nenli: Hiyo khaninwerya olavula ni Yesu. Musuweleke wira okathi ninvekela ahu, hiyo ninlavula ni Yehova ohiya ni Yesu. Ekeekhai wira ninvekela mwa nsina na Yesu, masi khaninlavula ni yena. Nave mwaneene Yesu, khoniphavela wira ninvekeleke. Mwaha wa xeeni? Mwaha woowi, nivekelo enamuna emosa ya okokhorela ni mutthu onireerela okokhoreliwa ti Yehova paahi. (Math. 4:10) Hata vari siiso, nihaana omphenta Yesu.

4. Muxankiho xeeni wa neeraru, ni mwaha ola ninrowa oweha exeeni?

⁴ Muxankiho wa neeraru: Yesu onikhala wiirimu. Nto khaninwerya oviriha okathi nri ene nuuwo. Musuweleke wira vanniweryaneya omusuwela Yesu oratteene hata nihikhanle ni yena. Mwaha ola, ninrowa oweha itthu xexe nikhanle ahu oopaka wira nlipihe ompatthani ahu ni Yesu. Wanipacerya, nrowe niwehe  nthowa naya vanireerela aya okhala apatthani a Kristu.

5. Xeeni ninreerela ahu okhala apatthani a Yesu? (Nwehe ekaaxa eni: “ Okhala Mpatthani a Yesu Onniniiriha Okhala Apatthani a Yehova” ni “ Moonelo Wooloka Voohimya sa Muteko wa Yesu”.)

⁵ Naaphavelaka okhalana waataana wooloka ni Yehova nihaana okhala apatthani a Yesu. Mwaha wa xeeni? Nkahaya nwehe mathowa manli: Noopacerya, Yesu aahaaleela arummwa awe wira: “Atithi ene yawo annophentani, mana nyuwo mokiphenta miyo”. (Yoh. 16:27) Nave Yesu aahimmye so: “Khavo onwerya orowa w’Atithi, ahivinre mwa miyo”. (Yoh. 14:6) Wiimananiha okhala apatthani a Yehova nihikhanle apatthani a Yesu onoolikana ni okela mpaani mutthu oviraka vaxanelani. Yesu aahirumeela ntakiheryo nno vaavo aahimmye wira: “Miyo ka mukhora wa ipwittipwitthi”. (Yoh. 10:7) Nthowa na nenli: Yesu aahitakiha moomalela mikhalelo sa Tiithi awe. Musuweleke wira, Yesu aahaaleela awiixutti awe wira: “Ole okònne miyo, owònne Atithi”. (Yoh. 14:9) Tthiri wira nimusuwele oratteene Yehova nihaana osoma okumi ni mikhalelo sa Yesu. Nto vaavo nniixutta ahu itthu sinceene voohimya sa Yesu, ninrowa otepaka omphenta. Nave vaavo omphenta wahu Yesu onrowa aya wunnuwaka, ninrowa otepaka omphenta Tiithi awe.

6. Nthowa xeeni vanireerela aya okhalana waataana wooloka ni Yesu? Mutthokiherye.

⁶ Nihaana okhalana waataana wooloka ni Yesu wira mavekelo ahu yaakhuliwe. Eyo enooniherya wira khoniphiyerya ohimya paahi “mwa nsina na Yesu” wanikisa wa mavekelo ahu. Maana nihaana osuwela moota Yehova onimurumeela awe Yesu wira aakhule  mavekelo ahu. Yesu aahaaleela arummwa awe wira: “Etthu p’itthu enrowanyu ovekela ni nsina naka, miyo kinowirelani”. (Yoh. 14:13) Nnaamwi Yehova owiriyanaka ni waakhula mavekelo ahu, owo onvaha Yesu owerya woopaka soothanla sawe. (Math. 28:18) Ohinatthi waakhula mavekelo ahu, Yehova onniweha akhala wira ninnivarihela muteko malakiheryo a Yesu. Mwa ntakiheryo, Yesu aahimmye so: “Mwalevelelaka akhw’inyu sottheka saya, nave Atith’inyu ari wirimu animolevelelani nyuwo. Nto nyuwo mwahaleveleleke akhw’inyu, nave Atith’inyu khanolevelelani sottheka sanyu”. (Math. 6:14, 15) Ninnoona wira ti vooloka waareerela murima atthu akina ntoko siisaale Yehova ni Yesu annireerela aya murima!

7. Tani anittottela mureerelo mukuttho wa Yesu?

⁷ Atthu anrowa ottottela mureerelo mukuttho Yesu ovanhe awe, taale paahi arina waataana wooloka ni yena. Ninsuwela sai eyo? Yesu aahimmye wira aahileva “ekumi awe mwaha w’apatthani awe”. (Yoh. 15:13) Atthu oororomeleya yaamurumeela Yehova, yaawo yaakhanle Yesu ohinatthi orwa valaponi anookhalana eparakha ya wiixuttihiwa voohimya sa Yesu ni omphenta. Alopwana ni athiyana awo oororomeleya anihela muhina Abrahamu, Sara, Moise ni Rahabi. Nto nuumala ohihimuxiwa, anrowa wiixuttihiwa wira akhale apatthani a Yesu ni ophwanya okumi woohimala.—Yoh. 17:3; Mit. 24:15; aHéb. 11:8-12, 24-26, 31.

8-9. Ntoko onooniherya awe Yohani 15:4, 5, nihaana opaka exeeni wira nikhale apatthani a Yesu ni xeeni vari aya vooloka opaka eyo?

⁸ Ninnihakalala ovara vamosa ni Yesu muteko woolaleya ni owiixuttiha atthu ihapari sooreera sa Omwene. Okathi aari awe valaponi, Yesu aahisuweliwa okhala mwiixuttihi. Nuumala otthikela wiirimu, Yesu oothanliwa okhala muhooleli a miloko ni onnivikaniha ohoolela muteko woolaleerya ni owiixuttiha atthu. Owo onniweha ni onnivaha efaita wiimananiha wanyu waakhaliherya atthu anceene omusuwela yena ni Tiithi awe. Tthiri wira nivare muteko owo, nihaana okhaliheriwa ni Yehova vamosa ni Yesu.—Mmusome Yohani 15:4, 5.

⁹ Biibiliya onnooniherya oratteene wira naaphavelaka omusiveliha Yehova, nihaana omphenta Yesu. Vano, nrowe niwehe itthu xexe ninreerela ahu opaka wira nikhale apatthani a Yesu.

10. Etthu xeeni yoopacerya ninreerela ahu opaka wira nikhale apatthani a Yesu?

¹⁰ (1) Nihaana omusuwela oratteene Yesu. Nnoowerya omusuwela Yesu nisomaka eliivuru ya Matheyo, Marko, Luka ni Yohani. Tthiri vaavo nnuupuwelela ahu sowiiraneya sa Yesu silempwale mBiibiliyani, ninnipacerya omphenta Yesu mwaha woowi ninnisuwela moota aareerela awe murima atthu. Mwa ntakiheryo, nnaamwi Yesu aari Mwiixuttihi, owo khaathokorerya awiixutti awe ntoko ipottha. Ohiya opaka eyo, Yesu aanaaleela moonelo ni muupuwelo awe. (Yoh. 15:15) Nto okathi yaariipiwa aya murima, owo nave aaniriipiwa murima ni aaninla vamosa naawo. (Yoh. 11:32-36) Musuweleke wira, hata atthu yaale yaamunyokha Yesu yaanisuwela wira atthu ale yeemererya muhupi aalaleya awe yaanikhala apatthani awe. (Math. 11:19) Akhala wira nnootakiha enamuna Yesu aathokorerya awe awiixutti awe, waataana wahu ni atthu akina onooloka ni ninrowa ohakalalaka. Nto eyo enooniiriha wuncererya omphenta ni omuttittimiha wahu Yesu.

11. Etthu xeeni ya nenli ninreerela ahu opaka wira nikhale apatthani a Yesu, ni xeeni opaka eyo eri aya etthu yooloka?

 ¹¹ (2) Nihaana otakiha enamuna Yesu aalavula awe ni aapaka awe itthu. Vaavo nintepa ahu omusuwela ni otakiha enamuna Yesu uupuwela awe, ninrowa otepaka okhala apatthani awe. (1 aKor. 2:16) Ninrowa omutakiha sai Yesu? Nkahaya nwehe ntakiheryo nimosa. Yesu aahiixuttiha ikwaha sinceene voohimya sa waakhaliherya atthu akina ohiya wiisiveliha mmensihu. (Math. 20:28; aRom. 15:1-3) Okhala wira aahikhalana muupuwelo owo, Yesu anaakhaliherya atthu akina ni aari oolevelela. Owo khahiyo aari mutthu oowaakuva oveeheya aahiiso onanariwa vaavo atthu akina yaamulavula aya moohiloka. (Yoh. 1:46, 47) Nave kheemererya wira itthu soohiloka atthu akina yaapanke aya khalai simwiirihe ohaathokorerya saana. (1 Tim. 1:12-14) Yesu aahimmye so: “Atthu othene anosuwela wira mwá awixutti aka, mwaphentanaka mukina ni mukhw’awe”. (Yoh. 13:35) Tthiri ti vooloka nyuwo wiikoha so: “Kiireke kinniimananiha okhala ni murettele vamosa ni anna ni arokora kittharaka ntakiheryo na Yesu?”

12. Etthu xeeni ya neeraru ninreerela ahu opaka wira nikhale apatthani a Yesu, ni ninrowa opaka sai eyo?

¹² (3) Mwaakhaliheryeke axinnawe Kristu. Itthu sotheene nimpaka ahu wira naakhaliherye axinnawe Kristu, owo onoona wira nnimpakela yena. (Math. 25:34-40) Enamuna yuulupale nikhanle ahu oowooniherya wira ninnaakhaliherya axinnawe Kristu ori okhaliherya olaleya ihapari sooreera sa Omwene ni waapaka awiixutti. Muhiliyale wira muteko owo nivahiwe ni mwaneene Yesu wira nivareke. (Math. 28:19, 20; Mit. 10:42) Akhaliheriwaka ni “ipwittipwitthi sikina”, olumwenku wotheene axinnawe Kristu annivara muteko woolaleerya ovikana khalai. (Yoh. 10:16) Akhala wira muniirela mpantta ipwittipwitthi sikina, khula okathi munilaleerya anyu munooniherya wira muhaataana ohiya paahi ni axinnawe Kristu, masi ni mwaneene Yesu.

13. Ninrowa ovarihela sai muteko moolumo a Yesu ari Luka 16:9?

¹³ Sookhala inamuna sikina nikhanle ahu oowaakhaliherya axinnawe Kristu. Enamuna emosa ori ovaha musurukhu ahu wira nikhaliherye muteko onivariwa olelo-va mmutthenkesoni mwa Yehova. (Mmusome Luka 16:9.) Mwa ntakiheryo, hiyo pooti ovaha musurukhu ahu nikhaliheryaka muteko onivariwa olumwenku wotheene. Musurukhu owo onirumeeliwa wira silaleiwe ihapari sooreera ohela muhina mapuro oorakamela opooma, otekiwa ni olokiheriwa Ipa sa Omwene ni ipa sikina sinirumeeliwa ni mutthenkeso ahu. Nave onnirumeeliwa musurukhu owo wira akhaliheriwe ale aphwanyiwe ihasara sa ephattu. Ohiya-vo, pooti ovaha musurukhu ahu wira nikhaliherye miteko sinivariwa muloko ahu aahiiso waakhaliherya ale nnoona ahu wira toothoiwa. (Mir. 19:17) Iyo inamuna nikhanle ahu oowooniherya wira ninnaakhaliherya axinnawe Kristu.

14. Ntoko onooniherya awe aÉfeso 4:15, 16, etthu xeeni ya neexexe ninreerela ahu opaka wira nikhale apatthani a Yesu?

¹⁴ (4) Mukhaliheryeke soothanla sa mutthenkeso wa Yehova. Ninnilipiha waataana wahu ni Yesu, yoowo ori muhooleli a miloko sotheene vaavo ninwiiwelela ahu ale aathanlale awe wira anihooleleke. (Mmusome aÉfeso 4:15, 16.) Mwa ntakiheryo, ninniimananiha orumeela oratteene Ipa sotheene sa Omwene ninthukumana ahu. Wira epakiwe eyo, miloko sikina sootakaahiwa ni miloko sikina siri muttetthe mmosaru, vano sikina soolokiheriwa. Nuumala opakiwa eyo, vooweryaneya ohirumeeliwa musurukhu munceene onisonkheriwa  mmutthenkesoni mwa Yehova. Okathi omosaru, eyo ehaakhaliherya anamalaleerya akina olimalela makhalelo masya. Anamalaleerya akina yaahiviriha iyaakha sinceene athukumanaka muloko mmosaru paahi, nto yaahikhalana apatthani anceene muloko aya wa khalai. Akina a yaawo annivekeliwa orumeela miloko sikina. Tthiri Yesu onnihakalala vanceene vaavo onaaweha awe anamalaleerya awo akhaliheryaka moororomeleya malakiheryo a mutthenkeso!

15. Muhoolo ompatthani ahu ni Yesu onrowa otepa sai oloka?

¹⁵ Ale anithanliwa ni ikuru sowaarya sa Yehova, aakhalana nlipelelo na olamulela vamosa ni Yesu Momweneni mwa Muluku. Tthiri awo anrowa onweha, olavulana ni oviriha okathi akhalaka ni Yesu. (Yoh. 14:2, 3) Nave ale anrowa okhalaka valaponi anoottottela mureerelo ophenta ni okhapelela wa Yesu. Hata ahirowaka omoona Yesu, awo anrowa okhala apatthani ooloka a Yesu vaavo anrowa aya opuhaka okumi Yehova ni Yesu oniphavela awe wira akhalane.—Yes. 9:5, 6.

16. Mareeliho xeeni ninrowa ahu ophwanya mwaha wookhala apatthani a Yesu?

¹⁶ Vaavo nneemererya ahu nlattulo na Yesu na okhala apatthani awe, ninniphwanya mareeliho manceene. Mwa ntakiheryo, niinaano-va ninnittottela mureerelo ophenta ni nikhaliheryo na Yesu. Muhoolo ninrowa okhalaka mahiku otheene mparayiisu. Etthu yootepa okhala ya efaita, okhala wira ompatthani ahu ni Yesu onninivaha eparakha ya vameekhaaya ya okhalana waataana wooloka ni Yehova, yoowo ori Tiithi awe Yesu. Moohaanyiherya, eparakha yuulupale okhala apatthani a Yesu!