1-2. Exeeni yaamwiirinhe Yesu olavula moolumo ari Yohani 4:35, 36?

OKATHI Yesu eetta awe mukwaha awe, aaheemela mmatta woonasa wene, ematta ya esevada ekithi. (Yoh. 4:3-6) Saahala myeeri mixexe (4) wira ophiye okathi woohepha. Nto Yesu aahilavula etthu, atthu akina yahiiwexenxe aya, oriki: “Muttukhule maitho, nwehé imatta: mihokorokho sottokottha, sihemphweke”. (Mmusome Yohani 4:35, 36.) Yesu aaphavela ohimya exeeni?

² Vanikhala ntoko wira Yesu aalavula ohepha wa nthoonyeryo, eyo piiyo, waahepha atthu. Nkahaya muupuwele ele yiiraneyale okathi vakhaani waavinre. Nnaamwi aYuda yahiiwanana ni aSamariya, Yesu aahimulaleerya muthiyana a oSamariya, yoowo anwiriyanne oratteene! Tthiri okathi Yesu aalavunle awe wira “imatta mihokorokho sottokottha, sihemphweke”, aSamariya anceene yanwiriyanne muthiyana ole olavulaka itthu Yesu aahimmye awe, awo yaahirowa onwiriyana Yesu. (Yoh. 4:9, 39-42) Okomentariki iversiikulu iya mulopwana mmosa ohimye so: “Atthu ale yaaniphavela vanceene onwiriyana Yesu . . . Nto eyo enooniherya wira atthu ale yaari ntoko mihokorokho saattokontthe wira sihemphwe”.

3. Akhala wira munimwaathokoreryaka atthu ntoko Yesu aathokorerya awe, itthu xeeni sinrowa okhumelela?

³ Ankhi atthu a muttetthe ahu? Niireke munniwoona ntoko mihokorokho soottokottha wira sihemphweke? Akhala wira ti siiso, sookhala itthu tthaaru sinrowa okhumelela. Itthu sene tiiya: Yoopacerya, munrowa olaleeryaka moowaakuveya. Okathi woohepha onkhala vakhaani; nto onvariwa moowaakuveya. Ya nenli, nyuwo munoohakalalaka vaavo munrowa anyu owoonaka atthu yeemereryaka ihapari sooreera. Biibiliya onihimya wira: “[Atthu] annitthapa oholo wanyu ntoko sintteliwaya murima okathi w’ohepha”. (Yes. 9:2) Ya neeraru, nyuwo munrowa omoonaka khula mutthu wira onniphwanelela okhala mutthareli a Yesu, nto munimwaalaleeryaka moovarihana ni makhalelo aya.

4. Exeeni murummwa Paulo onniixuttiha awe?

 ⁴ Woonasa wene, awiixutti akina a Yesu yuupuwela wira khivaarowa oweryaneya aSamariya okhala atthareli a Yesu. Masi Yesu khaarina muupuwelo wa awiixutti awe. Maana aahoona wira aSamariya yanwerya okhala atthareli awe. Hiyo nave nihaana owoona atthu a muttetthe ahu wira anoowerya okhala atthareli a Kristu. Murummwa Paulo oonivaha ntakiheryo nooloka ninreerela ahu otthara. Exeeni onniixuttiha awe? Mwaha ola, ninrowa woona moota Paulo (1) aasuwela awe soolema sa atthu aalaleerya awe, (2) iimananiha awe osuwela itthu saasivela ni (3) aawoona awe wira yanwerya okhala mutthareli a Yesu.

5. Xeeni Paulo aasuwela awe atthu aalavulana awe musinagoga?

⁵ Ikwaha sinceene Paulo aalaleerya musinagoga mwa aYuda. Mwa ntakiheryo, esinagoga ya oTesalonika, Paulo “ahiviriha-wo iSábadu ttharú, alavulanaka aYud’awo mwaha wa Solempwa sa Muluku”. (Mit. 17:1, 2) Vanikhala ntoko wira Paulo khaakhalana mixankiho okathi aalaleerya awe musinagoga. Maana aahuuwale etthoko ya aYuda. (Mit. 26:4, 5) Paulo aanisuwela makhalelo a aYuda, tivonto vahaamuxankiha aya waalaleerya.—aFil. 3:4, 5.

6. Atthu yanwiriyana Paulo mapuro oowaatta atthu wAthena yaavirikanne sai ni ale aalaleerya awe musinagoga?

⁶ Nuumala waatthyawa awanani awe oTesalonika ni oBereya, Paulo aahiphiya wAthena. Nto aahitthikela ‘olavulana aYuda n’amalapo yamuttittimiha Muluku’. (Mit. 17:17) Masi okathi aalaleerya awe mapuro oowaatta atthu, Paulo aalavula ni atthu oovirikana ni ale aalavulana awe musinagoga. Maana eriyari ya atthu yanwiriyana mapuro oowaatta atthu, yaahikhala mafiloosofu ni Amalapo yaawo yuupuwela wira muhupi wa Paulo waari “mwixuttiho . . . wa nanano”. Awo yaahimya wira: “Sikina sinnilèlanyu ti sotikiniha”.—Mit. 17:18-20.

7. Moovarihana ni Miteko 17:22, 23, Paulo aalaleerya sai atthu moovarihana ni makhalelo aya?

⁷ Musome Miteko 17:22, 23. Paulo khaalaleerya Amalapo a wAthena mwa enamuna emosaru aalaleerya awe aYuda musinagoga. Vanikhala ntoko wira Paulo aaniikoha so: ‘Etthu xeeni atthu ala a wAthena anikupali aya?’ Owo aaniweha oratteene itthu saamurukurenrye ni aahoona soolema sa etiini sa atthu ale. Moottharelana, Paulo aaniphavelasa enamuna yaavarihana ni okokhorela wa atthu ale ni ekeekhai ya Soolempwa. Mulipa onikomentari myaha sa mBiibiliyani ohimye so: “Okhala wira aari muKristau muYuda, Paulo aanisuwela wira mapakau aGriki khiyaamukokhorela Muluku ‘ekeekhai’, yoowo maKristau aYuda  yaamukokhorela aya. Masi owo aaniimananiha owooniherya atthu a wAthena wira Muluku aalaleerya awe khahiyo aari Muluku yahaamusuwela aya”. Paulo aaniimananiha olokiherya enamuna aalaleerya awe moovarihana ni atthu aalavulana awe. Owo aahaaleela atthu a wAthena wira muhupi aalaleya awe waakhuma wa “Muluku òhisuweliwa”, yoowo yaimananiha aya omukokhorela. Nnaamwi Amalapo yahaasuwela soolempwa, Paulo khaahiyale waalaleerya. Ohiya-vo, owo aathokorerya ntoko mihokorokho soottokottha wira sihemphweke. Eyo yaahimwiiriha Paulo waalaleerya ihapari sooreera moovarihana ni makhalelo aya.

8. (a) Munrowa osuwela sai itthu anikupali aya atthu a muttetthe anyu? (b) Akhala wira mutthu onihimya wira ookhalana etiini munrowa omwaakhula sai?

⁸ Nimutakihaka Paulo, nihaana okhala atthu oowehaweha. Nweheke itthu sinooniherya sookupali sa atthu a muttetthe anyu. Mwa ntakiheryo, niireke sookhala ilatarato sa etiini vate vawe wala mukaaroni mwawe? Niireke nsina nawe, ikuwo sawe, enamuna ya wiitthokiha aahiiso enamuna onilavula awe enooniherya wira ookhalana etiini? Akhala wira mwaneene etthoko onnooleelani wira ookhalana etiini, exeeni mukhanle anyu oopaka? Pioneera a vameekhaaya oniihaniwa Flutura, onaakhula so: “Miyo nkaarweela wookhanyereryani weemererya sookupali saka, masi kaarweela wira nivaanele mwaha ola . . . ”

9. Myaha xeeni munreerela anyu olavula ni mutthu orina etiini?

⁹ Myaha xeeni munireerela anyu olavula ni atthu arina etiini? Mwiimananiheke ophwanya myaha otheene anyu munikupali anyu. Woonasa wene mutthu owo onimukokhorela Muluku mmosa paahi, onnikupali wira Yesu Moopoli, ni onnikupali wira ninkhala okathi wooxankiha ni itthu sootakhala sinoomala moohipisa. Murumeelaka sookupali iyo otheene anyu muneemererya anyu, mmuleeleke myaha sa mBiibiliyani mwa enamuna enrowa onvara murima.

10. Nihaana wiimananiha opaka exeeni ni nthowa xeeni?

¹⁰ Musuweleke wira atthu annikupali itthu sotheene etiini aya eniixuttiha aya. Nto nuumala osuwela etiini mutthu owo oneettela awe, mwiimananiheke osuwela itthu onikupali awe. Davidi, pioneero a vameekhaaya a wAustrália onihimya so: “Olelo-va, atthu anceene annitakaaha soowiixuttiha sa etiini ni ifilosofia”. Murokora oniihaniwa Donalta a wAlbânia, onihimya so: “Atthu akina anihimya wira aakhalana etiini, okathi mukina anneemererya wira khanimukupali Muluku”. Misionaario onirumeela wArgentina ohoona wira atthu akina anikupali wira Muluku ari atthu araru, khaneemererya wira Tiithi, Mwaana ni erooho yowaarya Muluku mmosaru. Misionaario ole onihimya so: “Vaavo kinoona aka wira mutthu kinilavulana aka khonikupali itthu sotheene etiini  awe enihimya aya, vannikikhweela ophwanya etthu otheene ahu ninkupali ahu”. Tivonto, mwiimananiheke osuwela itthu atthu a muttetthe anyu anikupali aya. Mwiira siiso, munrowa okhala ntoko Paulo yoowo ‘ìlikanyiha n’atthu othene mwa sothene’.—1 aKor. 9:19-23.

11. Moovarihana ni Miteko 14:14-17, mwa enamuna xeeni Paulo aalaleerya awe atthu a oListra?

¹¹ Musome Miteko 14:14-17. Paulo aanisuwela itthu saasivela atthu aalaleerya awe, tivonto aanaalaleerya moovarihana ni makhalelo aya. Mwa ntakiheryo, atthu a oListra yaasuwela itthu vakhaani aahiiso khiyaasuwela Soolempwa. Nto Paulo aahaalaleerya mwa enamuna yaarowa aya wiiwexexa. Owo aahilavula sa oruwerya, ohepha ni ottottela mureerelo okumi. Paulo aahirumeela moolumo ni matakiheryo yaakhweela wiiwexexa ale yanwiriyana.

12. Munrowa osuwela sai itthu sinaasivela atthu a muttetthe anyu ni waalaleerya moovarihana ni makhalelo aya?

¹² Mwiimananiheke osuwela itthu sinaasivela vanceene atthu a muttetthe anyu ni mwaalaleeryeke moovarihana ni makhalelo aya. Okathi muniphiya anyu vatthokoni, munrowa osuwela sai itthu sinimusivela mwaneene etthoko? Nweheke mikhalelo ni itthu onivara awe mutthu owo. Woonasa wene, mutthu owo onilokiherya ejardim awe, onisoma eliivuru, onilokiha ekaaro awe aahiiso onivara etthu ekina. Nto niireke khivaareerela orumeela etthu enivara awe wira mpacerihe ovaanela? (Yoh. 4:7) Nave musuweleke wira ikuwo mutthu oniwara awe sinnooniherya etthu, ntoko elapo oyariwa awe, muteko onivara awe, wala axooku animusivela. Munna oniihaniwa Gustavo ohimmye so: “Nihiku nimosa kaavaanela ni mmiravo a iyaakha 19, yoowo aawanre ekamiseeti ya mulipa-oowiipa oovuwa. Kaahimukoha nthowa naya aawanre awe ekamiseeti ele, nto aahikileela etthu yaamwiiriha osiveliwa ni mulipa-oowiipa ole. Ovaanela wahu waahikiiriha opaceriha yoosoma ya Biibiliya, vano mmiravo ole munnihu”.

13. Munrowa opaceriha sai yoosoma ya Biibiliya mwa enamuna enrowa onvara murima mutthu?

¹³ Vaavo muniphavela anyu opaceriha yoosoma ya Biibiliya ni mutthu, mpakeke eyo mwa enamuna enrowa omusivela. Mmooniheryeke  wira yoosoma eyo enoomukhaliherya vanceene. (Yoh. 4:13-15) Mwa ntakiheryo, murokora oniihaniwa Poppy, olaleeryaka aahikela etthoko emosa yeeyo amphwannye awe muthiyana aasiveliwe ekeekhai. Ori ene mpaani mme, Poppy aahoona vaxirini wira muthiyana ole aahikhalana certificado a wuniversidade. Nto murokora ole aahittittimiherya wira hiyo ninniwiixuttiha atthu naasomihaka Biibiliya ni mithukumano sahu. Muthiyana ole aaheemererya yoosoma ya Biibiliya, aahirowela mithukumano nihiku naattharelana ni aahimurowela asembeleya aapakiwe mahiku vakhaani muhoolo mwaya. Nuuvira mwaakha mmosa, muthiyana ole aahipatisiwa. Mwiikoheke so: ‘Exeeni enaasivela atthu ale kintthikela aka waaxukurya? Kinrowa opaceriha sai yoosoma ya Biibiliya mwa enamuna enrowa onvara murima mutthu owo?’

14. Munrowa owerya sai omusomiha khula mutthu moovarihana ni makhalelo awe?

¹⁴ Nuumala opaceriha yoosoma ya Biibiliya, mwiilokiheryeke oratteene vaavo munrowa anyu wiiriha yoosoma eyo. Khula okathi muupuweleke makhalelo ni ele enimusivela ole munrowa anyu omusomiha. Nto vaavo muniilokiherya anyu, muthanleke soolepa munrowa anyu osoma, iviidiyu munrowa anyu omooniherya ni malikanyiho munrowa anyu orumeela wira mmutthokiherye ikeekhai sa mBiibiliyani. Mwiikoheke so: ‘Exeeni enrowa omusivela ni onvara murima ole kinimusomiha aka Biibiliya?’ (Mir. 16:23) Mwa ntakiheryo, pioneera oniihaniwa Flora a wAlbânia, aanimusomiha muthiyana yoowo aahimmye wira: “Miyo nkinkupali itthu muniixuttiha anyu voohimya sa ohihimuxiwa”. Flora khaamukhanyerenrye muthiyana ole. Flora onihimya so: “Wanipacerya, kaahoona wira kaahaana omukhaliherya omusuwela Muluku oleihenrye wira atthu anoohihimuxiwa”. Okhuma nihiku nne, khula yoosoma, Flora aanittittimiherya ophenta, ankhili ni owerya wa Yehova. Muhoolo mwaya, muthiyana ole aahipacerya waamini yooleiherya ele ya ohihimuxiwa. Vano muthiyana ole oopatisiwa ni Namoona a Yehova oluttuweliwa.

15. Moovarihana ni Miteko 17:16-18, mixankiho xeeni Paulo aakumanne awe wAthena ni xeeni ahaahiyale awe waalaleerya?

¹⁵ Musome Miteko 17:16-18. Epooma ya wAthena yaahisareya amuluku a ethiru, orupihana woohiloka ni ifilosofia sa mapagau. Paulo khaahiyale waalaleerya atthu a wAthena mwaha wa itthu iyo soohiloka aahiiso, mwaha wa onveeha. Owo aanuupuwela wira aahikhala muKristau hata aari mutthu ooveeha, ‘alupattha, [ni] ahaxa’ awiixutti a Yesu. (1 Tim. 1:13) Ntoko Yesu aakupali awe wira Paulo aamukhala muKristau, Paulo aanikupali wira atthu a wAthena yanwerya okhala awiixutti a Yesu. Moonelo owo wooloka waahikhaliherya.—Mit. 9:13-15; 17:34.

16-17. Exeeni enooniherya wira atthu otheene anoowerya okhala atthareli a Kristu? Nvahe ntakiheryo.

¹⁶ Eseekulu yoopacerya, atthu a makhalelo oovirikana yaahikhala awiixutti a Yesu. Okathi Paulo aalepenle awe maKristau yaakhala oKorinto, owo aahimmye wira atthu akina a muloko ole yaari anakrime ni yaanirupihana moohiirya. Tivonto Paulo ancerenrye awe oriki: “Akinaku a nyuwo yetta siso. Nto vano morapihiwa”. (1 aKor. 6:9-11) Atthu ale a oKorinto yaahipaka marukunuxo khukhala atthareli a Yesu. Vaakhanle wira mwaakhala okathi ole, niireke mwanwerya oweha eyo?

¹⁷ Olelo-va, atthu anceene annipaka marukunuxo wira akhale awiixutti a Yesu. Mwa ntakiheryo, wAustrália pioneera a vameekhaaya oniihaniwa Yukina aahoona wira vanniweryaneya atthu otheene weemererya muhupi wa mBiibiliyani. Nihiku nimosa, Yukina ori ene nipuro eettiwa nakoso, aahinweha mwali ampanke tatuagem ni awanre ikuwo suulupale. Yukina onihimya so: “Mookathi vakhaani kaahuupuwela so: ‘Kimulaleerye wala kihimulaleerye?’ Nto kaahilakela opacerya ovaanela ni muthiyana ole. Kaahoona wira muthiyana  ole aanisiveliwa Biibiliya. Maana tatuagem mukina ampanke awe saari iversu sa eliivuru ya Esalimo!” Muthiyana ole aahipacerya omusoma Biibiliya ni orowela mithukumano. *

18. Xeeni vahinreerela aya waaphukela atthu?

¹⁸ Okhala wira Yesu aanoona wira mihokorokho saahittokottha mmatta wira sihemphweke, niireke aalipelela wira atthu otheene yammutthara? Nnaari. Soolempwa saahihimya vahinatthi wira atthu vakhaani paahi ti yaarowa omwaamini Yesu. (Yoh. 12:37, 38) Nave Yesu aahikhalana owerya wooweha ele eri vamurimani va mutthu. (Math. 9:4) Hata vari siiso, owo aaniimananiha waakhaliherya ale yaamwaamini, ni oluttuweliwa waalaleerya atthu otheene. Akhala wira Yesu yoowo aawerya osuwela ele eri vamurimani va mutthu khaakuvela waaphukela atthu, ankhi hiyo? Ohiya opaka eyo, nweheke mikhalelo saya sooloka. Misionaario a oBurkina Fasso, onihimya so: “Ikwaha sinceene, atthu yaale kinuupuwela aka wira anookela vahoolo momunepani, ikwaha sinceene annihiya omusoma Biibiliya. Masi ale kinuupuwela aka wira khankelela ottaiwene, tanrowa ohoolo momunepani. Nto kihoona wira etthu yooreera opaka ohiya ikuru sowaarya sa Muluku sinikhaliherya aka”.

19. Naathokoreryeke sai atthu a muttetthe ahu?

¹⁹ Wanipacerya, pooti wuupuwelaka wira atthu anceene a muttetthe anyu khahiyo ari ntoko mihokorokho soottokottha wira sihemphweke. Masi, muupuweleke ele Yesu aalenle awe awiixutti awe. Mihokorokho soottokottha mmatta, eyo piiyo, soolikana wira sihemphweke. Tthiri, atthu akina pooti opaka marukunuxo wira akhale awiixutti a Kristu. Yehova onnikupali wira atthu a muttetthe ahu anoowerya okhala awiixutti ni onniwoona okhala “mihakhu”, niire so, onnaavaha efaita yinceene. (Hag. 2:7) Akhala wira munnathokorerya atthu a muttetthe anyu ntoko Yehova ni Yesu anaathokorerya aya, eyo enimookhaliheryani osuwela makhalelo aya ni itthu sinaasivela. Nyuwo khamunrowa waathokoreryaka ntoko amalapo masi ntoko anna ni arokora.