1. Otheene ahu nihaana opaka exeeni?

NIIREKE mwaamwiirela mpantta otthimaka munsuwela anyu wira ti woovila, otepexa wene akhala wira munoowereiwa aahiiso mookhulumuwa? Woonasa wene nnaari. Murummwa Paulo, aahimmye wira maKristau otheene eekeekhai annitthimaka. (aHéb. 12:1) Tthiri, amiravo, ale oowuuluvala, ale arina ikuru sinceene ni ale oolosowa otheene ahu nihaana ovilela naaphavelaka waakhela etthuvo Yehova onrowa awe onivaha.—Math. 24:13.

2. Moovarihana ni aFilipi 3:14, xeeni ninhimya ahu wira Paulo aalavula ekeekhai?

² Paulo aahimya ekeekhai mwaha woowi owo ‘ahitthimaka [mpakha] omukanoni’. (Mmusome aFilipi 3:14.) Masi enamuna xeeni ya otthimaka Paulo aalavula awe?

3. Enamuna xeeni ya otthimaka Paulo aalavula awe?

³ Okathi mukina Paulo aahilepa itthu saapakiwa okathi wa axooku oGresia wa khalai, seiyo sinniixuttiha itthu sinceene. (1 aKor. 9:25-27; 2 Tim. 2:5) Okathi omosa, Paulo aahilikanyiha okumi wa maKristau ni otthimaka. (1 aKor. 9:24; aGal. 2:2; aFil. 2:16) Otthimaka wa eKristau, mutthu onipacerya nuumala wiivahererya wa Yehova ni opatisiwa. (1 Ped. 3:21) Nto onniphiya omukanoni vaavo Yehova onrowa awe onvaha etthuvo ya ekumi yoohimala.—Math. 25:31-34, 46; 2 Tim. 4:8.

4. Mwaha ola, ninrowa othokorerya exeeni?

⁴ Niireke sookhala itthu sinlikana eriyari ya otthimaka wooxinttana ni otthimaka wa maKristau? Aayo sookhala itthu sinceene sinlikana. Masi vano nrowe niwehe itthu tthaaru paahi. Yoopacerya, mutthimakeke ephiro yooloka, ya nenli, nwehexexeke opuro onrowa anyu ni ya neeraru muhihiye otthimaka hata murina ene mixankiho.

5. Ephiro xeeni nintthara ahu ni nthowa xeeni?

⁵ Wira ale antthimaka aphwanye etthuvo, awo ahaana otthimaka attharaka ephiro ethanliwe. Mwa enamuna emosaru, naaphavelaka ophwanya etthuvo ya ekumi yoohimala nihaana otthara ephiro ya eKristau aahiiso ephiro ya ekumi. (Mit. 20:24; 1 Ped. 2:21) Masi Satana ni ale animutthara, khaniphavela otthara ephiro ya eKristau, awo aniphavela wira hiyo nave ‘netteke ephiro’ awo aneetta aya. (1 Ped. 4:4) Mwaha woohipaka eyo, awo anninruwana ni anihimya wira ephiro antthara aya ennaaphwanyiha otaphuwa. Masi awo animwiiwoka.—2 Ped. 2:19.

6. Ntakiheryo na Brian ninniixuttiha exeeni?

⁶ Moohipisa ale antthimaka ni atthu a olumwenku ola wa Satana, animoona wira ephiro antthara aya khenaaphwanyiha otaphuwa, masi enaakhaliha ipottha sa Satana ni soophavela saya. (aRom. 6:16) Nkahaya nwehe ntakiheryo na Brian. Owo aanitumereriwa ni anamuyari awe otthara ephiro ya eKristau. Masi okathi aari awe mmiravo, owo uupuwela wira ephiro aatthara awe khiyaarowa omphwanyiha ohakalala wekeekhai. Nto Brian aahithanla otthimaka vamosa ni atthu anilamuleliwa ni Satana. Owo onihimya so: “Vakhaani-vakhaani kaahipacerya woona wira otaphuwa waahimmwa, waanikiiriha opaka itthu soohiloka ni sootakhala. Nuuvira okathi kaahipacerya ohapaliwa vanceene, olya mirette soohapala ni orupihana moohiloka. Mwa iyaakha sinceene saattharelana, kaahipacerya otepa olya mirette sotakhala ni kaahipakeya epottha ya mirette iyo. . . . Nave kaahipacerya otumiha mirette iyo soohapala ni sootakhala”. Nuuvira okathi, Brian aahilakela wiiwelela malamulo a Yehova. Owo aahituruka mukhalelo awe, khupatisiwa mwaakha wa 2001. Vano owo onnihakalala mwaha wootthara ephiro ya eKristau, yeeyo eniphwanyiha ekumi. *

7. Moovarihana ni Matheyo 7:13, 14, iphiro xeeni piili sikhanle?

⁷ Tthiri ti vooloka othanla otthara ephiro yooloka! Satana oniphavela wira nihiye otthimaka nttharaka ephiro ‘enkeliha mwekumini’ wira nitthareke ephiro yuulupale yeeyo atthu anceene a olumwenku ola antthara aya. Ephiro eyo khareere atthu antthara ni ti yookhweya weetta. Masi eyo ‘enroiha worimelani’, niire so, eniphwanyiha okhwa. (Mmusome Matheyo 7:13, 14.) Wira nihihiye otthara ephiro yooloka, nihaana omuroromela Yehova ni onwiriyana.

8. Akhala wira ole ontthimaka onnimora exeeni onipaka awe?

⁸ Okhala wene ale antthimaka arowaka opuro woorakamela anniweha oratteene ohoolo  anrowa aya wira ahimore. Masi awo pooti okwattuliwa aahiiso moohilakela okakhiwa ni mutthu mukina antthimakana aya. Akhala wira annimora, awo annivenya anavikaniha otthimaka. Awo khaniwehexexa etthu yaamorinhe masi aniphavela ophiya omukanoni wira aphwanye etthuvo yaalipelela aya.

9. Akhala wira nookwattuliwa, nihaana opaka exeeni?

⁹ Ikwaha sinceene vaavo nintthimaka ahu pooti okwattuliwa aahiiso omora, mwaha wa enamuna ninlavula ahu wala opaka etthu yoohiloka. Nave ale nintthimakana ahu pooti opaka etthu enniriipiha murima. Nto akhala wira eyo ennikhumelela hiyo khanintikhina. Maana otheene ahu na atthu oohimalela ni nintthimaka ephiro emosaru wira naphwanye ekumi. Nto okathi mukina hiyo pooti opaka etthu enrowa waawereya aahiiso waanyoonya anna ni arokora. Murummwa Paulo aanisuwela wira okathi mukina hiyo pooti ‘omutthekela’ munna wala murokora. (aKol. 3:13) Ohiya owehexexa itthu iyo sinnikwattuliha nihaana owehexexa itthu sa muhoolo. Akhala wira nookwattuliwa nihaana ovenya, ni ovikaniha otthimaka. Nave akhala wira noonyoonyiheya nnahiya omurumeela Yehova khaninrowa ophiya omukanoni ni ophwanya etthuvo. Ohiya-vo, namora vale nihinavenya hiyo pooti waattiyelela atthu akina yaawo antthimaka ni hiyo.

10. Ninrowa osyaka sai waakwattuliha atthu akina?

¹⁰ Enamuna ekina nikhanle ahu osyaka waakwattuliha ale nintthimakana ahu, ori osyaka waakhanyererya opaka itthu ahimphavela aya aahiiso ovarexexa moonelo ahu. (aRom. 14:13, 19-21; 1 aKor. 8:9, 13) Eyo ennooniherya wira noovirikana ni ale antthimaka mooxinttana. Awo anniimananiha otthimaka wira yaaxintte akhwaaya ni ophwanya etthuvo mekhaya. Eyo enooniherya wira awo aniisuupuwela mmansaya paahi. Nave, okathi anipaka aya eyo awo annaakakha akhwaaya wira akhale ohoolo. Moovirikana ni atthu antthimaka mooxinttana, hiyo khaninxinttana. (aGal. 5:26; 6:4) Yoolakela ahu okhaliheryana wira noopowe ni nikele elapo esya ninrowa ahu okhala mahiku otheene. Tivonto, nniimananiha ahu ovarihela muteko miruku sa Paulo sini: “Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”.—aFil. 2:4.

11. Exeeni ale antthimaka mooxinttana anwehexexa aya ni nthowa xeeni?

 ¹¹ Ohiya paahi owehexexa ephiro enivira aya, ale antthimaka mooxinttana anniwehexexa omukanoni. Hata ahiwehaka mukano owo, awo annuupuwela aphiyale ene omukanoni ni yaakhenle ene etthuvo aya. Nto eyo ennaakhaliherya ohihiya otthimaka, wira aphiye omukanoni.

12. Mooreerela murima, Yehova onivanhe exeeni?

¹² Mooreerela murima vaavo nintthimaka ahu, Yehova onileiherya wira onimwaatthuvela ale anrowa ophiya omukanoni aavahaka okumi woohimala wiirimu akina mparayiisu valaponi. Wira nuupuweleleke moota okumiha ahu onrowa aya oloka, Biibiliya onnihimya etthuvo eyo. Vaavo nnuupuwela ahu itthu Yehova onileihenrye awe, ninnitepa wiimananiha ovilela ni oheemererya okwattulihiwa.

13. Eparakha xeeni nrina ahu moovirikana ni ale antthimaka mooxinttana?

¹³ Ale yaawiirela mpantta axooku ootthimaka oGresia wa khalai yaahaana ovilela mixankiho ntoko okhulumuwa ni woona owereya. Masi otheene aya yaaroromela oterenari ni ikuru saya. Ntoko atthu awo yaatthimaka mooxinttana, nihaana oterenari moota wootthimaka. Masi moovirikana ni atthu ale anitthimaka mooxinttana, hiyo nookhalana eparakha ya vameekha aya. Maana Yehova onninivaha ikuru ni onninikhaliherya okathi wotheene. Akhala wira ninnimuroromela Yehova, owo onninileiherya oniixuttiha ni onlipiha!—1 Ped. 5:10.

14. 2 aKorinto 12:9, 10 onnikhaliherya sai okathi wa mixankiho?

¹⁴ Murummwa Paulo aahikhalana mixankiho sinceene. Ohiya paahi oruwaniwa ni olupatthiwa, ikwaha sikina Paulo aanikhulumuwa ni aanivilela ele aahimmye awe okhala “ohawa mwerutthuni”. (2 aKor. 12:7) Masi Paulo kheemerenrye mixankiho iyo simwiirihaka ohiya omurumeela Yehova, ohiya-vo, owo aanimuroromela. (Mmusome 2 aKorinto 12:9, 10.) Okhala wira Paulo aahikhalana moonelo wooloka, Yehova aahimukhaliherya ovilela mixankiho sotheene.

15. Akhala wira nnoomutakiha Paulo, eparakha xeeni ninrowa ahu okhalana?

¹⁵ Olelo-va aakhala atthu anceene anniveeha ni annilupattha mwaha wa waamini wahu. Ohiya-vo, anamunceene a hiyo anniwereyasiwa ni annikhulumuwa. Masi akhala wira nnoomutakiha Paulo, khula muxankiho ninrowa ahu okumanaka onoonivaha eparakha ya woona wira Yehova onniniphenta ni onninikhaliherya.

16. Akhala wira munniwereyasiwa, exeeni mukhanle anyu oopaka?

¹⁶ Niireke munoowereiwa aahiiso muneetta ni ekhatera ya maroota? Niireke sinoowereyani metto wala maitho anyu khanoona saana? Akhala wira ti siiso, niireke munoowerya otthimaka vamosa ni amiravo ni ale arina okumi wooloka? Aayo munoowerya! Anna ni arokora anceene oowuuluvala ni aniwereiwa, annitthimaka ephiro ya ekumi. Awo khantthimaka ni ikuru saya. Maana Yehova onnaavaha ikuru vaavo aniwiriyana aya mithukumano mutelefonini, aahiiso aniweha aya mithukumano munternetini. Nave awo anniimananiha waapaka awiixutti yaalaleeryaka matotoro, manfirimeero ni amusi aya.

17. Yehova oniwoonela sai ale arina mixankiho sa ekumi?

¹⁷ Akhala wira khamunwerya opaka itthu mwaaphavela anyu mmutthenkesoni mwa Yehova mwaha wa mixankiho, muhikhulumuwe muupuwelaka wira khamunrowa owerya ovilela wanikisa wa olumwenku ola. Yehova onnoophentani vanceene mwaha wa waamini wanyu ni itthu sotheene mpanke anyu. Nto vano, munniphavela okhaliheriwa ni Yehova ovikana khalai. Muhiliyale wira Yehova  khonikhala-khala oonyanyalakani. (Esal. 9:11) Ohiya woonyanyalani, Yehova onrowa otepaka owaattamelani. Nkahaya nwehe ele murokora orina mixankiho sa okumi ohimmye awe oriki: “Vaavo okumi aka waatepa aya oxankiha, kaanoona okhala eparakha waalaleerya atthu akina. Nave kinnisuwela wira itthu saamukhaani kinipaka aka sinnimuhakalaliha Yehova, nto eyo ennikihakalaliha vanceene”. Okathi munixanka anyu, muupuweleke wira khamukhanle mekhinyu, maana Yehova onnookhaliheryani. Muupuweleke ntakiheryo murummwa Paulo onivanhe awe ni muhiliyale moolumo awe oolipiha ani: “Kinnitteliwa murima mwaha w’ohilipa waka: . . . Tthiri, kakhalaka òhilipa, vavo-nto kinlipaka”.—2 aKor. 12:10.

18. Muxankiho xeeni atthu akina aniwanana aya?

¹⁸ Atthu akina antthimaka ephiro ya ekumi anniwanana muxankiho mukina. Awo aakhalana mixankiho saya seiyo atthu akina ahinweha aya ni ahinsuwela aya. Mwa ntakiheryo, woonasa wene awo anniriipiwa murima aahiiso annixanka vanceene. Mixankiho iyo sinaaphwanya arumeyi awo a Yehova sinnivirikana ni mixankiho sikina. Mwaha wa xeeni? Mwaha woowi vaavo munna oninteya awe moono aahiiso oneetta awe ni ekhatera ya maroota, khula mutthu onninweha ni onniphavela omukhaliherya. Masi ale anriipiwa murima aahiiso anixanka pooti okhalaka ntoko wira kharina muxankiho. Nto muxankiho aya ti wootepa owereya onvikana mutthu inteyale moono aahiiso mwetto. Okhala wira atthu akina khanoona muxankiho awe, awo khanwerya omphenta, omukhapelela ni omukhaliherya ntoko aaphavela awe.

19. Ntakiheryo na Mefiboxethi ninniixuttiha exeeni?

¹⁹ Akhala wira mookhalana muxankiho munoona anyu wira atthu akina khansuwela oratteene, ntakiheryo na Mefiboxethi nnimookhaliheryani vanceene. (2 Sam. 4:4) Owo aari mutthu oorakala, nto okathi omosa Mwene Davidi aahimuthokorerya mwa enamuna yoohiloka. Khahiyo wira Mefiboxethi saamukhumelela mixankiho iye mwaha woopaka itthu soohiloka. Tthiri itthu iyo khisaamwiirinhe onanariwa. Owo aanixukhurela khula etthu yooloka yaamukhumelela mookumini mwawe. Nave, aanixukhurela mwaha wa Mwene Davidi omureerela murima. (2 Sam. 9:6-10) Nto, okathi Davidi aamuthokorenrye awe moohiloka, Mefiboxethi aahoona wira Davidi khasuwela itthu sotheene saakhumelenle. Tthiri kheemerenrye yoovonya ya Davidi emwiirihaka okhala mutthu oohiloka. Nave Mefiboxethi khanvanhe nthowa Yehova mwaha wa itthu Davidi aapanke awe. Mefiboxethi aaniimananiha oweha etthu aakhanle awe oopaka wira omukhaliherye mwene aathanliwe ni Yehova. (2 Sam. 16:1-4; 19:24-30) Nto Yehova oheemererya wira ntakiheryo na Mefiboxethi  nilempwe mBiibiliyani wira nniixuttiheke.—aRom. 15:4.

20. Oxanka pooti omwiiriha exeeni mutthu ni okupaliki exeeni?

²⁰ Okhala wira animakela oxanka, anna ni arokora akina anninyoonyiheya yuupuwelaka wira makhalelo aya toovirikana ni atthu akina. Awo annixanka vaavo anikhala aya eriyari ya atthu anceene. Hata vari siiso, awo khanihiya orowela mithukumano sa mmulokoni, asembeleya ni kongreso. Nave vannaavila olavula ni atthu ahinaasuwela aya, nnaamwi vari siiso awo anniimananiha waalaleerya atthu ahinaasuwela aya. Akhala wira eyo enniwiiraneelani, musuweleke wira khamukhanle mekhinyu. Maana arumeyi anceene a Yehova anniwanana muxankiho murina anyu. Muupuweleke wira Yehova onnisiveliwa ni itthu sotheene munipaka anyu ni murima wotheene. Tthiri okhala wira khamuhiyale omurumeela Yehova eyo enooniherya wira onnooreelihani ni onnoovahani ikuru wira nvilele. * (aFil. 4:6, 7; 1 Ped. 5:7) Akhala wira nlelo munnimurumeela Yehova hata murina ene mixankiho mukupaliki wira Yehova onnooreelihani.

21. Nikhaliheriwaka ni Yehova etthu xeeni nikhanle ahu oopaka?

²¹ Ninnixukhurela okhala wira wookhala ovirikana eriyari ya otthimaka wooxinttana ni otthimaka Paulo aalavunle awe. Otthimaka mooxinttana waapakiwa okathi wa Biibiliya, mutthu mmosa paahi taaphwanya etthuvo. Moovirikana ni enamuna eyo ya otthimaka, otheene ale anivilela moororomeleya otthimaka wa eKristau animwaakhela etthuvo ya ekumi yoohimala. (Yoh. 3:16) Muhiliyale wira otheene ale aniirela mpantta otthimaka mooxinttana, ahaana okhalana okumi wooloka maana yaahikhalane woonasa wene khanrowa owerya oxintta. Moovirikana ni vo, anamunceene a hiyo khanrina okumi wooloka masi hata vari siiso, ninniwerya ovilela. (2 aKor. 4:16) Nikhaliheriwaka ni Yehova, otheene ahu nnoowerya otthimaka mpakha ophiya omukanoni!