Xeeni ohinatthi okhwa Yesu aalavunle awe moolumo a Davidi ari Esalimo 22:2?

Moolumo makina a Yesu aalavunle awe ohinatthi okhwa, alempwale Matheyo 27:46, yaawo anihimya wira: “Muluku aka, Muluku aka, xeeni muhalaka okinyanyala?” Mwaha woohimya moolumo ala, Yesu aamaliherya moolumo a Davidi ari Esalimo 22:2. (Mar. 15:34) Vaarowa okhala voohiloka wuupuwela wira etthu yaamwiirinhe Yesu olavula moolumo awo mwaha woowi aaroonyonyiheya wala khaarina waamini okathi vakhaani. Yesu aanisuwela oratteene etthu yaamwiiriha wiiviwa ni aaniphavela opaka eyo. (Math. 16:21; 20:28) Nave Yesu aanisuwela wira waphiya okathi aarowa awe okhwa Yehova khaarowa omwaakiherya “sotakhala sothene”. (Yobi 1:10) Nto eyo yammwiiriha Yesu wooniherya wira aaniroromeleya wa Yehova hata okhwaaka mwa enamuna yowooniha othunku.—Mar. 14:35, 36.

Nto xeeni Yesu ohalaka olavula moolumo a Esalimo ele? Nnaamwi nihisuwelaka oratteene etthu yaamwiirinhe, nrowe nimananihe oweha itthu woonasa wene saamwiirinhe olavula moolumo awo. *

Woonasa wene, etthu yaamwiirinhe Yesu olavula moolumo awo aaphavela ottittimiherya wira Yehova khaarowa okhoottiherya Yesu wiiviwa. Maana Yesu aahaana oliverya yowoopola ohikhaliheriwaka ni Yehova. Okathi ole Yesu aari pinaatamu nto aahaana okhwa “mwaha wa atthu otheene”.—aHeeb. 2:9.

 Woonasa wene, Yesu aahilavula moolumo a Esalimo ela wira aakhaliherye atthu akina wuupuwela Esalimo yotheene. Mahiku a Yesu, aYuda yaahikhalana yoolema ya ohela mmuru isalimo sinceene. Akhala wira yanwiriyana moolumo a eveersu ela, woonasa wene awo yaamuupuwela Esalimo yotheene. Akhala wira ti yeeyo Yesu uupuwela awe olavulaka moolumo ala, woonasa wene aaphavela waakhaliherya awiixutti awe aYuda wuupuwelela iprofesia sinceene saavarihana ni okhwa wawe siri Esalimo ela. (Esal. 22:8, 9, 16, 17, 19, 25) Ohiya-vo, moolumo ookiserya a Esalimo ela anninvuwiha Yehova ni annimuhimya okhala Mwene a elapo yotheene.—Esal. 22:28-32.

Woonasa wene, etthu yaamwiirinhe Yesu oolavula moolumo ala a Davidi, aaphavela ottittimiherya wira khaarina nthowa. Ohinatthi wiiviwa, Yesu aahiphukeliwa moohixariya ni aahootheriwa onveeha Muluku. (Math. 26:65, 66) Yesu aaphukeliwe mowaakuveya vailale ene vanceene ni enamuna aaphukeliwe awe khiyavarihana ni malamulo a omphukela mutthu a okathi ole. (Math. 26:59; Mar. 14:56-59) Vaavo Yesu aahimmye awe wira: “Muluku aka, Muluku aka, xeeni muhalaka okinyanyala?” Woonasa wene, Yesu aaphavela ottittimiherya wira khaapanke etthu yaaphwanela wiiviwa.

Woonasa wene, Yesu aaphavela owuupuxerya atthu akina wira mixankiho samphwannye Davidi khisooniherya wira kheemereriwa ni Yehova. Nikoho Davidi aapanke awe khinooniherya wira khaarina waamini. Maana nuumala opaka nikoho, Davidi ohimmye wira aaniroromela ikuru sowoopola sa Yehova ni Yehova khaarowa ohiya omureeliha Davidi. (Esal. 22:24, 25, 28) Mwa enamuna emosaru, nnaamwi Yesu “Mwaana a Davidi” aahaawale vanceene vamwirini va nihaaxeryo, eyo khiyooniherya wira kheemereriwa ni Yehova.—Math. 21:9.

Woonasa wene, Yesu aaphavela wooniherya owereya oonale awe mwaha wa ohikhapeleliwa ni Yehova okathi ole wooxankiha. Wanipacerya, Yehova khaaphavela wira Mwanawe ohaawe mpakha wiiviwa. Masi aahaana opaka eyo nuumala ohiiweleliwa ni Adamu ni Eva ojardim wa wEdeni. Yesu khaapanke etthu yootakhala, masi aahaana ohasuliwa mpakha wiiviwa wira aakhule nikoho naakumiheriwe ni Satana ni ovaha mukuttho wira apinaatamu aphwanye ele yaayelenle aya. (Mar. 8:31; 1 Ped. 2:21-24) Vanweryaneya eyo wiiraneya akhala wira Yehova aamuhiya omukhapelela Yesu mwa okathi vakhaani.

Woonasa wene, Yesu aaphavela waakhaliherya atthareli awe wuupuwela etthu yaamwiirinhe Yehova weemererya Yesu wiiviwa mwa enamuna ele. * Yesu aanisuwela wira wiiviwa vamwirini va nihaaxeryo ntoko nakrime, wanwiiriha atthu anceene okhulumuwa. (1 aKor. 1:23) Masi akhala wira atthareli awe yanwehexexa etthu yaamwiirinhe Yehova weemererya Yesu wiiviwa mwa enamuna ele, eyo yaamwaakhaliherya osuwela ele yaataphulela aya. (aGal. 3:13, 14) Nto eyo yanwiiriha atthareli awe omoonaka Yesu ntoko Moopoli ohiya ntoko nakrime.

Moohicikha etthu yaamwiirinhe Yesu olavula moolumo ale, owo aanisuwela oratteene wira aahaana okhwa vamwirini va nihaaxeryo wira opake ele Yehova aaphavela awe. Moohipisa nuumala olavula moolumo a esaalimo ele Yesu aahimmye wira: “Itthu sotheene soomaliheriwa”. (Yoh. 19:30; Luka 22:37) Nnaamwi aahaakhapeleliwe ni Yehova okathi ole wooxankiha, Yesu aahipaka moomalela ele aarwenle awe valaponi. Nave Yesu aahiwerya omaliherya itthu sotheene “silempwale ni nlamulo na Moise ni soolempwa sa Maprofeta ni Isaalimo”.—Luka 24:44.