1-2. Yowoopola exeeni, ni xeeni vaatthuneya ahu ovahiwa yowoopola?

NUUMALA Adamu ottheka, awo yaahipweteiwa eparakha ya okumi woohimala. Ohiya mmensaya paahi, masi-tho ni anaaya otheene yaarowa oyariwa muhoolo. Khivaareerela Adamu oleveleliwa. Mwaha wa xeeni? Mwaha woowi aaroolakelela ottheka. Nto ankhi anaaya? Awo khiyaakhanle okathi Adamu yaatthenke aya. (aRom. 5:12, 14) Nto niireke yookhala etthu yaareerela opakiwa wira anamwane a Adamu yoopoliwe etampi ni okhwa? Aayo! Moohipisa, nuumala Adamu ottheka Yehova ahooniherya vakhaani-vakhaani moota aarowa awe owoopola etampi ni okhwa imilyau sinceene sa osulu wa Adamu. (Maph. 3:15) Okathi wooreerela Yehova ammuruma Mwanawe wira ovahe okumi awe wira “owoopole atthu anceene”.—Mar. 10:45; Yoh. 6:51.

² Yowoopola exeeni? Soolempwa sa Ekereku sa Ekristau, yowoopola esisapo Yesu ovanhe awe wira othume ele Adamu ayelenle aya. (1 aKor. 15:22) Xeeni vaatthuneya ahu ovahiwa yowoopola? Mwaha wa malamulo a xariya a Yehova. Nlamulo Yehova aavanhe awe aIsarayeli aahimmye wira ekumi eliviwe ni ekumi. (Okhum. 21:23, 24) Adamu apweteiwale okumi woomalela. Nto moovarihana ni malamulo a xariya a Yehova, Yesu aahaana ovaha okumi woomalela. (aRom. 5:17) Mwaha woopaka eyo, owo ookhala “Tithi a Mahiku Othene” a atthu otheene anaamini yowoopola.—Yes. 9:5; aRom. 3:23, 24.

3. Moovarihana ni Yohani 14:31; 15:13, etthu xeeni yaamwiirinhe Yesu ovaha ekumi awe wira owoopole apinaatamu?

³ Yesu onnimphenta vanceene Tiithi awe a wiirimu ni onniniphenta vanceene. Tivonto ovanhe awe okumi awe wira owoopole apinaatamu otheene. (Mmusome Yohani 14:31; 15:13.) Mwaha wa ophenta iwo, Yesu aahilakela ohihiya ororomeleya mpakha okhwa ni opaka ele Tiithi awe aaphavela awe. Nto mwaha woopaka eyo, yoolakela ya Muluku wa apinaatamu ni elapo ya vathi enimwiiraneya. Mwaha ola, ninrowa woona etthu yaamwiirinhe Muluku weemererya Yesu ohasuliwa ni wiiviwa mwa enamuna  yoowooniha othunku. Nuumala-vo, ninrowa woona matakiheryo vakhaani a atthu yaamulempe Biibiliya yaawo yoonihenrye wira yaanixukhurela yowoopola. Wanikisa waya, ninrowa oweha moota nikhanle ahu oowooniherya wira ninnixukhurela yowoopola. Nave, ninrowa woona moota nikhanle ahu oowuncererya oxukhurela wahu yowoopola Yehova ni Yesu anivanhe aya.

4. Mutthokiherye moota Yesu aakhwiiye awe.

⁴ Nkahaya muupuwele nihiku nookiserya Yesu ari awe valaponi. Ekeekhai wira Yesu anwerya ovekela muttitthi wa malaikha wira amukhapelele. Masi Yesu aahiweemererya anakhotto ooRoma omutthukwa ni ommana voowooniha othunku. (Math. 26:52-54; Yoh. 18:3; 19:1) Anakhotto yaahirumeela murepettho yoowo wahaareere onvulaliha Yesu. Muhoolo mwaya nnaamwi Yesu ahaareere ovulalihiwa iparari, anakhotto ale yaahimukhanyererya okapatta mwiri woolemela. Nto Yesu ahiimananiha opurula mwiri ole oroihaka nipuro aarowa awe okhomeliwa. Masi moohipisa anakhotto ale yaahinvekela mutthu mukina omukhaliherya Yesu okapatta mwiri ole. (Math. 27:32) Nuumala Yesu ophiya nipuro arowa awe wiiviwa, anakhotto yaahikhomela matata ni inawu sawe vamwirini. Nto olemela wa erutthu ya Yesu, yaanincererya wunnuwa wa makhwatta ale. Tthiri okathi ole apatthani awe yaahiriipiwa murima, maama awe aamunla masi ahooleli a etiini ya aYuda yaamunveeha. (Luka 23:32-38; Yoh. 19:25) Nto khula okathi waavira Yesu aanitepa woona owereya. Okhala wira murima ni masasu a Yesu yaahikhulumuwa, vaanimuxankiha vanceene omumula. Yesu aanisuwela wira moohipisa aamookhwa moororomeleya. Nto aahipaka nivekelo nookiserya, nuumala-vo aahuuramiha muru khivahererya okumi awe. (Mar. 15:37; Luka 23:46; Yoh. 10:17, 18; 19:30) Moohaaniherya okhwa wa Yesu waari vakhaani-vakhaani, woowereya ni wowooniha othunku!

5. Etthu xeeni yaatepa omuxankiha Yesu ovikana wiiviwa vamwirini va nihaaxeryo?

⁵ Etthu yaatepa omuxankiha Yesu khahiyo yaari enamuna aiviwe awe, masi yaari etthu ootheriwe awe wira iiviwe. Maana Yesu ootheriwe onveeha Muluku, eyo piiyo, okhala mutthu ahaamuttittimiha Muluku ni ahaattittimiha nsina na Muluku. (Math. 26:64-66) Tthiri wootheriwa okhala mutthu anveeha Muluku, waanimuxankiha vanceene Yesu. Nto aahinvekela Tiithi awe wira oheemererye ohasuliwa mwa enamuna eyo. (Math. 26:38, 39, 42) Xeeni Yehova ohalaka weemererya Mwanawe ohasuliwa mpakha wiiviwa? Nrowe nithokorerye mathowa mararu.

6. Xeeni vari aya vootthuneya Yesu wiiviwa vamwirini va nihaaxeryo?

⁶ Noopacerya, Yesu aahaana wiiviwa vamwirini va nihaaxeryo wira owoopole aYuda yaawo yaatakhalihiwe. (aGal. 3:10, 13) AYuda ale yaahitakhalihiwa mwaha woowi yaahimuleiherya Muluku wira yaamwiiwelelaka Malamulo awe. Masi awo khiyaapanke ele yaaleihenrye aya. Mwaha wa yeeyo, ohiya paahi ophukeliwa okhwa mwaha wookhala osuulu wa Adamu, awo yaari atthu ootakhalihiwa. (aRom. 5:12) Nlamulo Muluku aavanhe awe aIsarayeli naahimya wira akhala wira mutthu aanipaka etampi yaaphwanela okhwa, owo aahaana wiiviwa. Nuumala-vo murutthu awe waahaana othomeiwa vamwirini va nihaaxeryo. * (Otum. 21:22, 23; 27:26) Nto okhala wira Yesu aahikhomeliwa vamwirini va nihaaxeryo, eyo yaahaakhaliherya atthu a nloko nne yaawo yaamukhoottale ottottela mureerelo mukuttho aavanhe awe wira owoopole apinaatamu.

7. Etthu xeeni ya nenli yaamwiirinhe Muluku weemererya Mwanawe ohasuliwa mpakha wiiviwa?

⁷ Vano nwehe etthu ya nenli yaamwiirinhe Muluku weemererya Mwanawe ohasuliwa mpakha wiiviwa. Yehova aamwiixuttiha Mwanawe wira avareke saana muteko aarowa awe onvaha muhoolo,  eyo piiyo, okhala Mukhulupale a Anamukuttho ahu. Tthiri Yesu aahoona moota vanivila aya omwiiwelela Muluku okathi ninviriha ahu mixankiho sinceene. Yesu aahoona owereya vanceene nto aahinvekela Muluku “okhuwelaka vanceene ni inlaka”. Tthiri okhala wira Yesu aahiviriha mixankiho iyo sootheene owo onnisuwela wira hiyo ninnixanka, nto onoowerya onikhaliherya neehereriwaka. Ninnimuxukhurela vanceene Yehova mwaha wa onivaha Mukhulupale Aanamukuttho “oomoriwa ikharari” yoowo onwerya osuwela “otteettheya wahu”.—aHeeb. 2:17, 18; 4:14-16; 5:7-10.

8. Etthu xeeni ya neeraru yaamwiirinhe Yehova weemererya wira Yesu eehereriwe mpakha wanikisa?

⁸ Na neeraru, Yehova aaheemererya wira Yesu ohasuliwe mpakha wiiviwa wira aakhule nikoho nuulupale. Nikoho nene tinna: Niireke apinaatamu anoowerya ohihiya ororomeleya hata yeehereriwaka vanceene? Satana onihimya wira pinaatamu khoniwerya ororomeleya wa Muluku akhala wira onneehereriwa! Nave Satana onihimya wira apinaatamu animukokhorela Muluku mwaha wa itthu sooloka onaavaha awe. Nave-tho Satana onihimya wira amutakihaka tiithi aya Adamu apinaatamu khanimphenta Yehova. (Yobi 1:9-11; 2:4, 5) Yehova aanikupali ororomeleya wa Mwanawe tivonto eemerenrya awe wira Yesu eehereriwe mpakha wanikisa ni ovilele ntoko pinaatamu. Yesu khaahiyale ororomeleya wa Muluku nto ohooniherya wira Satana nawoothe.

9. Ntakiheryo xeeni murummwa Yohani onivanhe awe?

⁹ MaKristau manceene aalipiha waamini waya mwaha wa okupali yowiixuttiha ya yowoopola. Awo khanihiya olaleerya hata alupatthiwaka, saaphwanyaka mixankiho ni wuuluvala. Nkahaya nwehe ntakiheryo na murummwa Yohani. Owo aahilaleya moororomeleya ekeekhai voohimya sa Kristu, mukuttho ni woonasa wene okathi ole aarina iyaakha saavikana 60. Nto okathi aarina awe iyaakha 90, anamalamulela a oRoma yaamuthokorerya Yohani okhala mutthu ootakhala, nto yaahimuroiha esisiro ya oPatmo. Ekrime xeeni Yohani ootheriwa awe wira aahipaka? Ekrime ene yaari “mwaha wa omulaleya Muluku, ni olavula ekeekhai ya Yesu”. (Wiis. 1:9) Tthiri Yohani oovaha ntakiheryo nooloka na waamini ni ovilela!

10. Iliivuru Yohani olempe awe, sinooniherya sai wira aanivaha efaita yowoopola?

¹⁰ Iliivuru siri mBiibiliyani Yohani olempe awe, sinnooniherya oratteene wira aanimphenta Yesu ni aanixukhurela yowoopola. Nave iliivuru Yohani olempe awe sinnilavula yowoopola ni mareeliho yowoopola enikumiherya aya ikwaha sinivikana 100. Mwa ntakiheryo, Yohani aalempe so: “Akhala mutthu onipaka etampi, nookhalana namakhaliherya Yesu Kristu, naxariya, yoowo ori ni Tiithi”. (1 Yoh. 2:1, 2) Nave iliivuru sikina Yohani olempe awe, onnittittimiherya efaita erina aya omukhalela “onamoona Yesu”. (Wiis. 19:10) Yohani aanivaha efaita yinceene mukuttho. Nto ninrowa wooniherya sai wira ninnivaha efaita mukuttho?

11. Etthu xeeni enrowa onikhaliherya okhootta opaka etampi?

¹¹ Mukhootteke opaka etampi. Akhala wira ninnixukhurela yowoopola ni murima ahu wotheene hiyo nnoosyakaka wuupuwela so: ‘Khivanireerela wiimananiha okhootta etampi. Akhala wira kinoopaka etampi kinoorowa onvekela Muluku okilevelela’. Ohiya-vo, vaavo nneehereriwa ahu opaka itthu soohiloka hiyo nihaana ohimya so: ‘Nnaari! Mwaha wa itthu sotheene Yehova ni Yesu apanke aya nkinkhala-khala kipakaka etthu yootakhala ntoko ela’. Nuupuwelaka eyo nihaana onvekela Yehova wira onivahe ikuru nave pooti omuxonttela nihimyaka so: ‘Xontte Yehova muhikihiye keehereriwaka’.—Math. 6:13.

12. Ninrowa otthara sai miruku siri 1 Yohani 3:16-18?

 ¹² Mwaaphenteke anna ni arokora. Vaavo nimphentana ahu ninnooniherya wira ninnixukhurela yowoopola. Mwaha wa xeeni? Mwaha woowi Yesu khahiyo ovanhe okumi awe wira onoopole hiyo paahi, masi-tho wira owoopole anna ni arokora. Nto akhala wira Yesu aahivahererya okumi awe wira owoopole, eyo enooniherya wira onnaavaha efaita yinceene. (Mmusome 1 Yohani 3:16-18.) Nto enamuna nnaathokorerya ahu anna ni arokora ninnooniherya akhala wira ninnaaphenta wala nnaari. (aEef. 4:29, 31, 32; 5:2) Mwa ntakiheryo, hiyo nihaana waakhaliherya anna ni arokora aniwereiwa ni waakhaliherya vaavo anikhalana aya mixankiho sinceene ntoko ihasara sa ephattu. Nto nihaana opaka exeeni vaavo munna wala murokora onipaka awe etthu enniwereya vanceene?

13. Xeeni vari aya vooloka okathi wootheene waalevelela atthu akina?

¹³ Niireke vannoovilani omulevelela munna wala murokora vaavo onootthekelaaweni? (Onam. 19:18) Akhala wira ti siiso, mutthareke miruku iya sini: “Nvilelaneke, mulevelelaneke ni murima wotheene ikwaha sotheene, hata musuwelaka wira mootthekeliwa. Ntoko Yehova oolevelenlyaaweni, ni nyuwo-tho mwiireke siiso”. (aKol. 3:13) Okathi wotheene nnaalevelela ahu anna ni arokora ninnimooniherya Tiithi ihu a wiirimu wira ninnixukhurela ni murima wotheene yowoopola. Etthu xeeni ninreerela ahu opaka wira nincererye omuxukhurela wahu Muluku mwaha wa onivaha yowoopola?

14. Munrowa wuncererya sai oxukhurela wanyu yowoopola?

¹⁴ Mmuxukhureleke Yehova mwaha wa yowoopola. Murokora Joanna orina iyaakha 83 yoowo onikhala wÍndia onihimya so: “Kinoona wira ti vooloka oromola yowoopola mahiku otheene okathi kinvekela aka ni omuxukhurela Yehova”. Nto okathi munivekela anyu mekhinyu mwiimananiheke wuupuwela soovonya mpanke anyu nihiku nenno. Nuumala-vo munvekeleke Yehova wira ooleveleleni. Ekeekhai wira akhala wira moopaka etampi yuulupale muhaana waavekela nikhaliheryo axitokweene. Awo animoowiriyanani ni woovahani malakiheryo anikhuma Nuulumo na Muluku. Nave awo animoovekelelani wira Yehova ooleveleleni orumeelaka mukuttho wowoopola wa Yesu. Mwiira siiso awo animookhaliheryani “okhala saana” mwa omunepani.—Yak. 5:14-16.

15. Xeeni vari aya vooloka osoma voohimya sa yowoopola ni wuupuwelela ele ninsoma ahu?

¹⁵ Muupuweleleke yowoopola. Murokora orina iyaakha 73 oniihaniwa Rajamani ohimmye so:  “Vaavo kinsoma aka moota Yesu aahasuliwe awe, kinnimoroxa maithori”. Nyuwo nave pooti woowereyani vanceene vaavo munuupuwelela anyu moota Mwaana a Muluku ahaareere awe ohasuliwa. Nto vaavo munrowa anyu otepaka wuupuwelela mukuttho Yesu ovanhe awe, nyuwo munrowa otepaka omphenta Yesu ni Yehova. Munoonela sai osoma oratteene mwaha ola wa yowoopola ni wuupuwelela ele munisoma anyu?

16. Xeeni vari aya vooloka owiixuttiha atthu akina voohimya sa yowoopola? (Nwehe elatarato ya ekaapa.)

¹⁶ Nwiixuttiheke atthu akina voohimya sa yowoopola. Okathi wotheene nnaaleela ahu atthu akina voohimya sa yowoopola, ninnincererya oxukhurela wahu yowoopola. Sookhala iliivuru ni iviidiyu sinnikhaliherya owiixuttiha atthu akina etthu yaamwiirinhe Yesu okhwa wira onoopole. Mwa ntakiheryo, nyuwo pooti orumeela yoosoma 4 ya ebroxura Ihapari Sooreera Sinikhuma wa Muluku! Yoosoma eyo erina muru oni: “Yesu Kristu ti Pani?” Nave nyuwo pooti orumeela muru 5 wa eliivuru Biibiliya Oniixuttiha Exeeni? Muru owo orina mwaha oni: “Yowoopola Eri Yoovaha Yuulupalexa ya Muluku”. Nave khula mwaakha ninnincererya oxukhurela wahu yowoopola nirowelaka muthukumano wa Wuupuwelela okhwa wa Yesu ni wiimananiha waalattula atthu akina wira nuupuwelele vamosa. Ninnimuxukhurela vanceene Yehova onivaha eparakha ya owiixuttiha atthu akina voohimya sa Mwanawe!

17. Xeeni yowoopola eri aya yoovaha yuulupale ya Muluku?

¹⁷ Moohaanyiherya, sookhala itthu sinceene sinniiriha wuncererya oxukhurela wahu yowoopola. Maana yowoopola enninikhaliherya okhalana waataana wooloka ni Yehova nnaamwi nri ene anatampi. Nave yowoopola enimwiiriha omalihiwa itthu sootheene sootakhala Diabo onipaka awe. (1 Yoh. 3:8) Mwaha wa yowoopola, enimwiiraneya ele Yehova oniphavela awe. Nto okathi owo olumwenku wotheene onrowa okhala eParayiisu. Nave khula mutthu onoomusuwela, omphenta ni omukokhorela Yehova. Nto khula nihiku, otheene ahu nihaana wooniherya wira ninnixukhurela ele Muluku aavanhe awe apinaatamu, eyo piiyo, yowoopola!