1-2. (a) Eunisi aari aani? Nave etthu xeeni yaamuxankiha okathi aamwiixuttiha awe mwanawe omphenta Yehova ni Yesu? (b) Mutthokiherye edesenyo ya ekaapa.

 NNAAMWI Biibiliya ohihimyaka itthu sotheene saakhumelenle nihiku aapatisiwe awe Timootheyo, moohaanyiherya amamawe khiyaareere ohakalala. (Mir. 23:25) Nkahaya muupuwele moota Eunisi maama awe Timootheyo aahakalanle awe okathi anwenhe awe mwanawe eemenle ene mmaasini. Mmuupuwele otheyaka, eemenle ene waattamela opuro aari awe Loide, piipi awe Timootheyo. Eunisi moowaakuveya onniittha iphumu okathi onninweha awe Timootheyo opwinaka mmaasini. Nuumala-vo, Timootheyo onnikhuma mmaasini otheyaka, nto Eunisi onnimoroxa maithori mwaha woohakalala. Eunisi aahixintta muxankiho wa omwiixuttiha mwanawe omphenta Yehova, ni Yesu Kristu. Masi mixankiho xeeni samphwannye okathi aamwiixuttiha awe Timootheyo?

² Timootheyo aahuuwale etthoko yeetteliwa itiini soovirikana. Apapawe yaari mukereku, nave amamawe ni apiipi awe yaari ayuda. (Mit. 16:1) Woonasa wene okathi Loide ni Eunisi yaakenle aya ekristau, iira Timootheyo ori ene mwaana. Hata vari siiso, apapawe Timootheyo khiyaakenle ekristau. Nto etiini xeeni Timootheyo aarowa awe othanla? Woonasa wene okathi ole Timootheyo aahikhalana iyaakha soothanla etiini awe. Niireke aarowa othanla etiini ya apapawe? Niireke aarowa othipelela weettela soolema sa ayuda aixuttihiwe awe okhuma enamwane awe? Aahiiso niireke aarowa othanla okhala mwiixutti a Yesu?

3. Moovarihana ni Miruku 1:8, 9, Yehova onoonela sai muteko aximaama anivara aya wa owiixuttiha anaaya okhala apatthani awe?

³ Olelo-va aximaama makristau mwa miruku annaaphenta atthu a vatthokoni vaya. Awo aniphavela waakhaliherya anaaya  okhala apatthani a Yehova. Muluku ahu, onnivaha efaita wiimananiha waya. (Musome Miruku 1:8, 9.) Yehova onnaakhaliherya aximaama anceene owiixuttiha anaaya omphenta yena ni omurumeela.

4. Mixankiho xeeni sinaaphwanya aximaama olelo-va?

⁴ Okhala wene aximaama pooti wiikohaka akhala wira anaaya anoothanla omurumeela Yehova, sintoko Timootheyo. Ale ari anamuyari annisuwela saana wira anaaya, sinnaaphwanya mixankiho sinceene olumwenku ola wa Satana. (1 Ped. 5:8) Nave aximaama akina vannaaxankiha waahuwa anaaya mekhaya aahiiso ni iyaya ohinimurumeela Yehova. Mwa ntakiheryo murokora mmosa oniitthaniwa Christine * ohimmye so: “Iyaka aari mulopwana ooreera murima ni aaniniphenta vanceene miyo ni aniihu. Masi aanikikhoottiherya owiixuttiha aniihu wira ekhale Anamoona a Yehova. Kaaninla mwa iyaakha sinceene ni kaaniikoha akhala wira anaaka yammurumeelaka Yehova”.

5. Exeeni ninrowa ahu othokorerya mwaha ola?

⁵ Akhala wira nyuwo mwa maama mukristau, munoowerya waakhaliherya aniinyu omphenta ni omurumeela Yehova, sintoko Eunisi. Mwaha ola nnooweha moota wootthara ntakiheryo nawe, okathi munwiixuttiha anyu aniinyu ni moolumo vamosa ni mweettelo anyu. Nnooweha-tho moota Yehova onrowa awe wookhaliheryani.

6. Sintoko onihimya awe 2 Timootheyo 3:14, 15, Timootheyo aakenle sai ekristau?

⁶ Okathi Timootheyo aari awe mwaana, amamawe yaahiimananiha omwiixuttiha “soolempwa soowaarya”, ettharaka sowiixuttiha sa ayuda. Ekeekhai wira Eunisi khaasuwela itthu sinceene maana khaamusuwela Yesu Kristu. Masi hata vari siiso, itthu Timootheyo aixuntte awe saahimukhaliherya weemererya ekristau. Masi aawenrye sai okela ekristau? Okathi annuwa awe, Timootheyo aahikhalana ediretu yoothanla okhala mukristau. Moohaanyiherya etthu emosa yaamukhalihenrye Timootheyo ‘okupali’ ekeekhai ya Yesu, waari wiimananiha wa amamawe. (Mmusome 2 Timootheyo 3:14, 15.) Eunisi khaareere ohakalala mwaha woowerya omukhaliherya mwanawe omusuwela Yehova hata vaaxankiha! Nsina noowi Eunisi, nintaphulela “mutthu ooxintta”, nto ti etthu aapanke awe.

7. Eunisi aamukhalihenrye sai mwanawe olipiha opatthani awe ni Yehova nuumala opatisiwa?

⁷ Okathi Timootheyo aapatisiwe awe aahiphwanya etthu aaphavelaxa awe. Masi nlelo Eunisi aanixanka ni itthu saakhanle oomwiiraneela mwanawe nuumala opatisiwa. Mwanawe aarowa orumeela sai okumi awe okhuma nihiku nle? Niireke khaarowa okhalana apatthani oohiloka? Aamurowa osoma wAthena ni weemererya sowiixuttiha sa mafiloosofu mapakau a epooma ele? Niireke khaarowa osiveliwaka ni mihakhu ni orumeela okathi awe wotheene, ikuru sawe ni omiravo awe ohaavyaka itthu iyo? Eunisi khaakhanle oomuthanlela Timootheyo etthu yoopaka, masi anwerya omukhaliherya. Moota xeeni? Anwerya ohihiya okhalela nthiti omwiixuttiha olipiha omphenta wawe Yehova ni ele mwanawe Yesu Kristu aapakenle awe ntoko emusi. Khahiyo paahi makristau athelanne ni mutthu ohinimurumeela Yehova tonaaphwanya muxankiho wa waakhaliherya anaaya omphenta Yehova. Hata anamuyari oowanli emurumeelaka Yehova, pooti okhala vooxankiha waakhaliherya anaaya amiravo okhala arumeyi oororomeleya a Yehova. Axipaapa ni aximaama aniixuttani ni ntakiheryo na Eunisi?

8. Aximaama anrowa waakhaliherya sai axiiyaya okathi aniwiixuttiha aya anaaya omusuwela Yehova?

 ⁸ Mmusomeke Biibiliya ni aniinyu. Nyuwo arokora, akhala wira iyanyu Namoona, Yehova oniphavela wira mmukhaliheryeke owiixuttiha aniinyu voohimya sa Yena. Enamuna emosa mukhanle anyu oopaka eyo, okhaliherya mareheryo a Yoosoma ya Emusi. Mulavuleke moolipiha voohimya sa yoosoma eyo. Nave mwiimananiheke okhaliherya wira okathi wa woosoma atthu otheene ehakalaleke. Waanyiheryasa nyuwo pooti omukhaliherya iyanyu opaka eprograma ya omusoma Biibiliya ni osoma iliivuru sikina. Nave akhala wira ookhala mwaana muulupale okhanle oottottela mureerelo yoosoma ya Biibiliya orumeelaka eliivuru Okumi Woohimala!, nyuwo pooti omukhaliherya iyanyu wira mwaana owo okhalane yoosoma awe.

9. Exeeni enrowa omukhaliherya maama otheliwe ni mutthu ohimmurumeela Yehova?

⁹ Aximaama akina anaasomiha mmensaya Biibiliya anaaya, mwaha woohitheliwa, aahiiso otheliwa ni mutthu ohikhanle Namoona a Yehova. Akhala wira eyo ti etthu eniwiiraneelani, muhikhulumuwe. Yehova onimookhaliheryani. Murumeeleke iliivuru, iviidiyu ni itthu sikina sinikumiheriwa ni mutthenkeso awe wira mwaasomiheke aniinyu. Nyuwo pooti omukoha namuyari mukina onisuwela itthu sinceene wira ooleeleni moota onirumeela awe itthu iyo okathi oniwiixuttiha awe anaawe. * (Mir. 11:14) Munvekeleke Yehova wira ookhaliheryeni orumeela saana makoho wira musuwele itthu aniinyu anuupuwela aya. (Mir. 20:5) Niireke nikoho ntoko: ‘Exeeni enooxankihani oxikola?’ pooti wookhaliheryani osuwela itthu simmukhumelela mwaninyu?

10. Nave etthu xeeni ekina munreerela anyu opaka wira mwaakhaliherye aniinyu omusuwela Yehova?

¹⁰ Muhaavyeke okathi wooreerela wira mwaakhaliheryeke aniinyu omusuwela Yehova. Mulavuleke voohimya sa Yehova ni itthu sooreera oopakenle aweni. (Otum. 6:6, 7; Yes. 63:7) Eyo pooti wookhaliheryani vanceenexa akhala wira khamunwerya waasomiha aniinyu ikwaha sinceene. Christine nimuromonle ahu woopaceryani wa mwaha ola, onihimya so: “Vaanikixankiha okhalana okathi woovaanela ni anaaka voohimya sa Yehova. Nto kaanittottela mureerelo khula eparakha yaakhumelela. Naanirowa opasiyari mwentto aahiiso ni ekalawa wira niweryeke olavula itthu sootikiniha Yehova opanke awe, ni itthu sikina sinnikhaliherya okhala apatthani awe. Okathi anaaka yannunwe aya, kaahaatumererya omusoma Biibiliya mekhaya”. Nave mulavuleke itthu soolipiha voohimya sa mutthenkeso wa Yehova, ni mwaalavuleke saana anna ni arokora a mmulokoni. Muhaavaanyiheke axitokweene. Moota munaalavula anyu axitokweene, pooti owiiriha aniinyu waavekela nikhaliheryo aahiiso nnaari okathi anixanka aya.

11. Moovarihana ni Yakobo 3:18, xeeni vanireerela aya okumiherya murettele vatthokoni?

¹¹ Mukumiheryeke murettele vatthokoni vanyu. Mmuleeleke iyanyu ni aniinyu wira munnaaphenta. Mmulavuleke saana iyanyu ni mmuttittimiheke, nave nwiixuttiheke aniinyu opaka etthu emosaru. Akhala wira munoopaka eyo, munimoona okhweya waakhaliherya aniinyu wiixutta voohimya sa Yehova. (Mmusome Yakobo 3:18.) Muthokorerye ntakiheryo na Jozsef yoowo onrumeela ntoko pioneero a vameekhaawe oRomênia. Okathi annuwa awe, apapawe yaanimwiiriha yena, amamawe, murokora awe ni axihima awe anli woona oxankiha omurumeela Yehova. Jozsef ohimmye so: “Amaama yaanimananiha okumiherya  murettele vatthokoni. Okathi apaapa yaatepa aya osareya owali, nave amaama yaamutepa-tho waareerela murima. Okathi amaama yaweha aya wira vaaninixankiha owiiwelela ni waattittimiha apaapa, yaanimusoma aEefeso 6:1-3. Nuumala-vo, yaanilavula mikhalelo sooloka apaapa yaarina aya, ni yaaninikhaliherya osuwela nthowa naya naareerela ahu waaphentaka. Eyo yaahikhaliherya etthoko ahu okhalana murettele”.

12. Sintoko onihimya awe 2 Timootheyo 1:5, ntakiheryo na Eunisi naamukhalihenrye sai Timootheyo?

¹² Mmusome 2 Timootheyo 1:5. Eunisi aahinvaha ntakiheryo nooloka Timootheyo. Aahimwiixuttiha wira waamini wekeekhai, onooneya ni miteko. (Yak. 2:26) Moohaanyiherya Timootheyo aaniweha wira omphenta Yehova ti waawiiriha amamawe opaka itthu sooreera. Nave aanikupalixa wira omurumeela Yehova ti waawiiriha amaama awe ohakalala. Ntakiheryo na Eunisi naamukhalihenrye sai Timootheyo? Murummwa Paulo aahimmye wira Timootheyo aahikhalana waamini sintoko amamawe. Waamini wa Timootheyo khiwaalimpe mekhayaru paahi. Aaniweha ntakiheryo na amamawe, nto eyo yaahimwiiriha waatakiha. Moolikanasa olelo-va, aximaama anceene aawerya waakhaliherya atthu a vatthokoni vaya ‘ehilavulaka etthu’. (1 Ped. 3:1, 2) Nyuwo-tho munoowerya opaka etthu emosaru. Moota xeeni?

13. Xeeni maama onireerela awe ohela opuro woopacerya opatthani awe ni Yehova?

¹³ Muheleke opuro woopacerya opatthani anyu ni Yehova. (Otum. 6:5, 6) Moolikanasa ni aximaama anceene, muhaana oleva itthu sinceene. Muleveke okathi anyu, musurukhu, ikhove, ni itthu sikina wira mwaakhapeleleke aniinyu. Masi mukhalaneke ephoole wira muhitepeke ovara itthu iyo mpakha oleva opatthani anyu ni Yehova. Mwiivaheke okathi woovekela, opaka yoosoma anyu ya Biibiliya, ni orowela mithukumano sa ekristau. Mwiira siiso, munootepaka omwaattamela Yehova, ni munimwaavaha ntakiheryo nooloka atthu a vatthokoni vanyu.

14-15. Ntakiheryo na Leanne, Maria, ni João exeeni niwiixuttinhe ayani?

¹⁴ Vano nrowe nithokorerye matakiheryo vakhaani aamiravo yaixuntte omphenta Yehova mwaha woowaaweha amamaya. Mwanawe oopacerya Christine Leanne onihimya so: “Okathi apaapa yaakhala aya owaani, khinaamusoma Biibiliya. Masi amaama khiyacompela mithukumano. Hata nuupuwela wira khiyaasuwela itthu sinceene sa mBiibiliyani, mweettelo aya waahinikhaliherya okhalana waamini woolipa. Naasuwenle wira Anamoona a Yehova anniixuttiha ekeekhai nihinatthi opacerya orowela mithukumano”.

¹⁵ Maria, yoowo apapawe yaahaaxa atthu a vatthokoni vawe mwaha woorowela mithukumano, onihimya so: “Amaama, murokora oolipa murima kitonko aka omusuwela. Okathi kaari aka mwaana, ikwaha sikina kaanikhootta opaka itthu mwaha wa woova moota atthu akina yaarowa aya woonela. Masi oweha olipa murima wa amaama ni moota okathi wootheene yaahela aya opuro woopacerya opatthani aya ni Yehova, waahikikhaliherya oxintta owoova atthu”. João yoowo apapawe yaamukhoottiherya omulavula Yehova ni Biibiliya, onihimya so: “Etthu yaakilipinhe vanceene waari oweha wira nnaamwi amaama yaanipaka itthu sotheene wira yaahakalalihe apaapa, khiyeemya oleva opatthani aya ni Yehova”.

16. Ntakiheryo na maama ninrowa waakhaliherya sai atthu akina?

¹⁶ Aximaama, muhiliyale wira ntakiheryo nanyu pooti waakhaliherya atthu akina. Moota xeeni? Nrowe niwehe moota ntakiheryo  na Eunisi, naamukhalihenrye aya murummwa Paulo. Paulo aahiweha wira waamini woohoothererya wa Timootheyo, awenhe ni maama awe “Eunisi”. (2 Tim. 1:5) Paulo aapacenrye silini oweha waamini wa Eunisi? Woonasa wene waari okathi wa mukwaha awe woopacerya wa omisionaario okathi aakumanne awe ni Loide vamosa ni Eunisi oListra. Nave waanyiheryasa aahaakhaliherya okhala makristau. (Mit. 14:4-18) Nkahaya muupuwele ela: Okathi Paulo aamulepenle awe Timootheyo epaphelo, sivinre ene iyaakha 15. Nlelo Paulo aanuupuwela itthu aavara awe Eunisi sooniherya waamini ni moota aarumeela awe ntakiheryo nawe wira atthu akina etthareke! Ntakiheryo nawe naahimulipiha vanceene murummwa Paulo ni makristau makina a okathi ole. Akhala wira munaahuwa aniinyu mekhinyu, aahiiso etthoko anyu eneetteliwa itiini soovirikana, mukupaliki wira ntakiheryo nanyu na waamini ninnaalipiha ni waavaha ikuru atthu akina.

17. Exeeni munreerela anyu opaka akhala wira munoona wira aniinyu khaniphavela omurumeela Yehova hata mwiimananihaka waakhaliherya?

¹⁷ Ankhi akhala wira aniinyu khanoona wiimananiha wanyu? Muhiliyale wira owiixuttiha anamwane onivekela okathi. Sintoko enooniherya aya edesenyo, okathi mutthu onaala awe epyo pooti wiikohaka akhala wira enimunnuwa ni enimwiima mihokorokho. Nnaamwi muhisuwelaka saana akhala wira mwiri owo onimwiiwa wala nnaari, khamunihiya ohela maasi wira wunnuweke saana. (Mar. 4:26-29) Mwa enamuna emosaru, okathi mukina maama pooti wiikohaka akhala wira wiimananiha wawe onnaakhaliherya tthiri anaawe omphenta Yehova.  Ekeekhai wira khamunwerya omuleela mwaninyu khula etthu onreerela awe opaka. Masi akhala wira khamunihiya wiimananiha waakhaliherya aniinyu wira nwiixuttihe, munimwaakhaliherya okhala apatthani a Muluku.—Mir. 22:6.

18. Yehova onrowa waakhaliherya sai aniinyu okhala apatthani awe?

¹⁸ Okhuma khalai, Yehova onnaakhaliherya amiravo anceene okhala apatthani awe. (Esal. 22:10, 11) Nave pooti waakhaliherya aniinyu okhala apatthani awe, akhala wira anoophavela. (1 aKor. 3:6, 7) Hata aniinyu ehimurumeelaka Yehova ni murima aya wotheene, Yehova pooti waakhaliherya ohihiya omphenta. (Esal. 11:4) Akhala wira animooniherya wira aakhalana “murima wooloka”, Yehova onimwaakhaliherya okhala apatthani awe. (Mit. 13:48; 2 Wah. 16:9) Owo pooti wookhaliheryani olavula etthu yooreera okathi wooreerela. (Mir. 15:23) Nave Yehova pooti omwiirihaka munna aahiiso murokora a mmulokoni, waakhaliherya aniinyu ophavela okhala apatthani a Yehova. Hata nuumala aniinyu wunnuwa, Yehova pooti waakhaliherya wuupuwela itthu yiixuttihiwe aya khalai. (Yoh. 14:26) Akhala wira khamunrowa ohiya owiixuttiha aniinyu murumeelaka moolumo ni ntakiheryo nanyu, Yehova onimootthuvelani.

19. Xeeni munireerela anyu okupali wira munniphentiwa ni Yehova?

¹⁹ Moota Yehova onoophentaweni khonlipa ni soothanla ampaka aya aniinyu. Yena onnoophentani mwaha woowi nyuwo-tho munnimphenta. Akhala wira mwa namuyari onaahuwa anamwane mekhawe, Yehova onnileiherya okhala Tiithi a aniinyu ni onoowaakihakani. (Esal. 68:6) Ekeekhai wira khamunwerya owehaweha khula etthu aniinyu anipaka aya wira emurumeele Yehova. Masi akhala wira khamunrowa ohiya omuroromela Yehova, ni opaka ele eniwerya anyu, owo onootepaka woophentani.