1. Soolukama xeeni ninreerela ahu okhalana?

 OKHALA wira na makristau eekeekhai, ninnimphenta vanceene Yehova. Nimphavela wira muteko nninvarela ahu okhaleke wooreera. Naaphavelaka orumeela saana ikuru sahu ni owerya wahu wira nimuhakalalihe Yehova, nihaana okhalana soolukama soovara miteko sa Muluku sinnikhaliherya olipiha opatthani ahu nuuwo. Nave nihaana okhalana mikhalelo sa ekristau, ophavela wiixutta itthu sikina, ni ohaavya inamuna soowaakhaliherya atthu akina. *

2. Xeeni ninreerela ahu okhalana yoolukama yoovara miteko sa Muluku ni wiimananiha ophwanya?

² Xeeni nimphavela ahu okhala arumeyi ooloka a Yehova? Yoopacerya, okhala wira nimphavela omuhakalaliha Tiithi ahu oophenta a wiirimu. Yehova onnihakalala okathi onniweha awe nirumeelaka osuwela wahu, wira nivare miteko sawe. Nave nimphavela orowaka ohoolo ni miteko sa Muluku wira nirumeeliweke vanceene ni anna a mmulokoni. (1 aTes. 4:9, 10) Hata nipatisiwe ene khalai aahiiso niinaano, otheene ahu nihaana orowa ohoolo ni miteko sa Muluku. Nrowe niwehe moota woopaka eyo olelo-va.

3. Sintoko onihimya awe 1 Timootheyo 4:12-16, etthu xeeni murummwa Paulo aamutumerenrye awe Timootheyo opaka?

³ Nnaamwi okathi murummwa Paulo aamulepenle awe Timootheyo epaphelo awe yoopacerya, Timootheyo aari mmiravo, aari mutokweene a mmulokoni aasuwela itthu sinceene. Hata vari siiso, Paulo aahimutumererya ohihiya okhala murumeyi ooloka a  Yehova. (Mmusome 1 Timootheyo 4:12-16.) Okathi munuupuwela anyu moolumo a Paulo, munooweha wira aahimutumererya Timootheyo okela vahoolo mwa inamuna piili. Yoopacerya, okhalanaka mikhalelo sooreera sa ekristau sintoko ophenta, waamini, olokiherya inamuna soosoma ohoolo wa atthu anceene, otumererya ni wiixuttiha. Nuupuwelelaka ntakiheryo na Timootheyo, nrowe niwehe moota okhalana soolukama ninwerya ahu ophwanya, onrowa aya onikhaliherya olipiha opatthani ahu ni Muluku. Nave-tho nnooweha itthu sinrowa onikhaliherya wuncererya muteko ahu woolaleerya.

4. Sintoko onooniherya awe aFilipi 2:19-22, exeeni yaamwiiriha Timootheyo orumeeliwa vanceene ni Yehova?

⁴ Exeeni yaamwiiriha Timootheyo orumeeliwa vanceene mmutekoni mwa Yehova? Waari mwaha wa mikhalelo sawe sooreera. (Mmusome aFilipi 2:19-22.) Moota Paulo aamulavunle awe Timootheyo, onninikhaliherya oweha wira Timootheyo aari mutthu oowiiyeviha, oororomeleya, a miruku ni oowiiwelela. Timootheyo aanaathokorerya vanceene anna a mmulokoni. Eyo yaahimwiiriha Paulo omphenta ni ohoovelela onvaha miteko suulupale. (1 aKor. 4:17) Moolikanasa, akhala wira nnimooniheryaka mukhalelo wa ophenta, Yehova onooniphentaka, nave nnoorumeeliwaka vanceene mmulokoni.—Esal. 25:9; 138:6.

5. (a) Munrowa othanlela sai mikhalelo muniphavela anyu okhalana? (b) Sintoko enooniherya aya efootu, exeeni murokora mukristau okhanle awe oopaka wira otepeke wooniherya omoriwa ikharari?

⁵ Muthanleke soolukama sanyu. Nvekeleke ni wuupuwelela mikhalelo munreerela anyu olokiherya. Muthanleke mukhalelo mmosa muniphavela anyu owehexexa. Mwa ntakiheryo, nyuwo pooti ophavelaka wiixutta okhala mutthu oothunku, wala waakhaliherya anna ni arokora. Aahiiso niireke muhaana okhala mutthu onikumiherya murettele ni oolevelela? Nyuwo pooti omukoha mukristau mukina oororomeleya moota mukhanle anyu oolokiherya itthu iyo.—Mir. 27:6.

6. Etthu xeeni munreerela anyu opaka wira mphwanye yoolukama anyu ya okhalana mikhalelo sooreera?

⁶ Mwiimananiheke ophwanya soolukama sanyu. Munrowa opaka sai eyo? Enamuna emosa, osoma ni ephoole mikhalelo muniphavela anyu olokiherya. Nkahaya nitakiherye wira muniphavela wiimananiha okhala mutthu oolevelela. Nyuwo pooti opaceryaka musomaka ni wuupuwelela matakiheryo a mBiibiliyani a atthu yaalevelenle akhwaaya ni murima wotheene, ni ale yahaapanke eyo. Muthokorerye ntakiheryo na Yesu. Owo aaniphavela waalevelela  atthu akina. (Luka 7:47, 48) Nave khaawehexexa itthu soohiloka yaapanke aya khalai, masi aaweha itthu sooloka yaawenrye aya opaka. Moovirikana ni vo, afarisi a okathi wa Yesu, yaari atthu “yahaathokorerya akina”. (Luka 18:9) Nuumala wuupuwelela matakiheryo ala, mwiikoheke so: ‘Kiniwoonela sai atthu akina? Mikhalelo xeeni arina aya kiniwehexexa aka?’ Akhala wira vannooxankihani omulevelela mutthu mukina, mulepeke mikhalelo sawe sooreera muniwerya anyu oweha. Nuumala-vo, mwiikoheke so: ‘Yesu aarowa omoonela sai mutthu ola? Niireke ammulevelela?’ Opaka eyo pooti wookhaliheryani olokiherya muupuwelo anyu. Woonasa wene woopaceryani pooti onixankihaka omulevelela mutthu onitthekenle. Masi akhala wira nnoomananiha olokiherya mikhalelo sahu, nuuvira okathi nnimoonaka okhweya waalevelela atthu akina.

7. Moovarihana ni Miruku 22:29, Yehova onaarumeela sai atthu oosuwela ovara muteko olelo-va?

⁷ Yoolukama ekina munireerela anyu okhalana, ti ophavela wiixutta itthu sikina. Nkahaya nwuupuwele atthu anceene aniphaveliwa okhaliherya oteka inupa sa iBetheli, sa Asembeleya, ni sa Omwene. Anamunceene a anna awo aixuntte ovara saana miteko saya akhaliheriwaka ni anna akina apacenrye khalai ovara miteko iyo. Sintoko enooniherya aya efootu, anna ni arokora anniixutta ovara muteko wira ekhaliheryeke olokiherya Inupa sa Asembeleya ni sa Omwene. Orumeelaka inamuna iya ni sikina, Yehova Muluku, “Mwene onikhala mahiku otheene”, vamosa ni Kristu Yesu, yoowo ori “Mwene a mamwene”, annaarumeela atthu oosuwela ovara miteko wira apake itthu suulupale. (1 Tim. 1:17; 6:15; musome Miruku 22:29.) Nto nihaana wiimananiha vanceene orumeela saana itthu ninsuwela ahu opaka wira ninvuwihe Yehova, ohiya wiivuwiha hiyo mmensihu.—Yoh. 8:54.

8. Munrowa osuwela sai itthu munireerela anyu olokiherya?

⁸ Muthanleke etthu mumphavela anyu wiixutta opaka. Itthu xeeni mumphavela anyu owehexexa? Mwaakoheke axitokweene a muloko anyu aahiiso mutokweene a esirkwiitu itthu anoona aya wira muhaana olokiherya aahiiso wiixutta ovara saana. Mwa ntakiheryo, akhala wira awo anoohimya wira vannireerela olokiherya moota munlavula anyu ni wiixuttiha, nyuwo pooti waavekela wira yooleeleni mooluluwanya mikhalelo munreerela anyu olokiherya. Nuumala-vo, mwiimananiheke olokiherya itthu iyo. Munrowa opaka sai eyo?

9. Munrowa owerya sai ophwanya yoolukama anyu ya wiixutta itthu sikina?

⁹ Mwiimananiheke ophwanya soolukama sanyu. Nkahaya nitakiherye wira mumphavela olokiherya moota muniixuttiha anyu. Nyuwo pooti osoma ni ephoole ebroxura Mwiilipiheryeke Osoma ni Wiixuttiha. Akhala wira munoothanleliwa opaka mpantta okathi wa mithukumano sa eriyari ya esumana, nyuwo pooti onvekela munna wala murokora mukina oophwanelela wira oowiriyaneni okathi muninsayari anyu ni ooleeleni itthu munireerela anyu olokiherya. Mulokiherye mpantta anyu nihinatthi ophiya nihiku na mithukumano wira atthu yooneke wira mwa mutthu oovara muteko ni oororomeleya.—Mir. 21:5; 2 aKor. 8:22.

10. Nvahe ntakiheryo na moota woorowa vahoolo niixuttaka ovara saana itthu sikina.

¹⁰ Exeeni mukhanle anyu oopaka akhala wira soolukama sanyu sinihela muhina opaka itthu okhala wene sinooxankihani? Muhikhulumuwe. Munna mmosa oniitthaniwa Garry waanimuxankiha osoma saana. Onihimya wira aanixanka okathi aasoma awe moowiiwanyeya okathi wa mithukumano sa mmulokoni. Hata vari siiso, aahiimananiha olimalela. Garry vano onihimya wira mwaha wowiixuttihiwa, onniwerya  olavula myaha Empa ya Omwene, okathi wa asembeleya, ni akongresu!

11. Moolikanasa ni Timootheyo, exeeni enrowa onikhaliherya owerya ovara miteko sinceene sa Yehova?

¹¹ Niireke Timootheyo aari mutthu oosuwela olavula saana myaha ni wiixuttiha? Biibiliya khonihimya. Masi moohaanyiherya, orowa wawe vahoolo waanooneya ni moota aavara awe miteko aavahiwa awe ni otthara miruku sa Paulo. (2 Tim. 3:10) Moolikanasa, akhala wira nnoolokiherya moota ninvara ahu miteko, nnoowerya ovara miteko sikina sinceene.

12. Atthu akina ookhalihenryeni sai?

¹² Otheene ahu ninnittottela mureerelo itthu atthu akina anivara aya. Okathi nnaapaxari ahu ospitaale, ninnihakalala vanceene vaavo ninxukuriwa ahu ni axitokweene aniirela mpantta Igrupu sa Axitokweene Sinilavula ni Ixipitaali wala Ekomisau ya Axitokweene Enaaxukurya Aretta. Okathi sinniphwanya aya mixankiho, ninnixukhurela vanceene vaavo mutokweene oophenta onileva awe okathi awe wira oniwiriyane ni onilipiha. Okathi onnixankiha aya wiiriha yoosoma ya Biibiliya, ninnihakalala onweha pioneero oosuwela wiixuttiha iivahereryaka onihoola yoosoma ahu ni onivaha miruku. Anna awo otheene ni arokora annitteeliwa murima mwaha woonikhaliherya. Hiyo-tho nnoowerya waakawela atthu akina ohakalala iwo, niivahereryaka waakhaliherya axinnihu. Yesu aahimmye wira “ovaha onnitepa ohakalaliha ovikana ovahiwa”. (Mit. 20:35) Akhala wira muniphavela wuncererya muteko muninvarela anyu Yehova, murumeelaka inamuna iya aahiiso sikina, exeeni enrowa wookhaliheryani opaka eyo?

13. Okathi muniphavela anyu okhalana yoolukama, exeeni munireerela anyu wuupuwelela?

¹³ Mukhalaneke soolukama sooluluwanya. Mwa ntakiheryo, nyuwo pooti wuupuwelaka so: ‘Kinniphavela ovara miteko sinceene mmulokoni’. Masi woonasa pooti okhalaka vooxankiha osuwela moota woophwanya soolukama iyo, nave-tho pooti wuupuwelaka wira khivaniweryaneya osuwela okathi ene munrowa anyu opaka eyo. Tivonto muthanleke saana etthu mumphavelaxa anyu. Nave nyuwo pooti olepa soolukama iyo ni ompaka palano sa moota woophwanya.

14. Xeeni ninreerela ahu wiixaakuviha okathi ninkhalana ahu yoolukama?

¹⁴ Nave okathi ninkhalana ahu yoolukama, nihaana okhala atthu oowiixaakuviha wira  niwerye ophwanya. Mwaha wa xeeni? Mwaha woowi khaninsuwela etthu enrowa oniiraneela meelo. Mwa ntakiheryo, murummwa Paulo aahikhaliherya okhumelela muloko wa niinaano epooma ya oTesalonika. Nave moohaanyiherya aaniphavela okhala epooma ele wira aakhaliheryeke makristau ale a niinaano. Masi olupatthiwa waahimwiiriha Paulo okhuma epooma ele. (Mit. 17:1-5, 10) Vaakhanle wira khaakhumme, aamwaakumiherya mixankiho axinnawe. Masi yena khaakhulumunwe. Ohiya-vo, aahiimananiha wiilimaleliha makhalelo ale a niinaano. Muhoolo mwaya, aahimuruma Timootheyo wira aakhaliheryeke makristau ale a niinaano a oTesalonika. (1 aTes. 3:1-3) Moohaanyiherya aTesalonika khiyaareere ohakalala okathi yanwenhe aya Timootheyo iivahereryaka orwa waakhaliherya.

15. Soolukama sahu sinturukeya sai okathi makhalelo ahu anturukeya aya? Nvahe ntakiheryo.

¹⁵ Itthu saamwiiranenle Paulo oTesalonika pooti oniixuttiha etthu. Hiyo pooti ophavelaka iparakha mmutekoni mwa Yehova, masi makhalelo ahu pooti oturukeya aka ni ohiwerya ophwanya itthu iyo naaphavela ahu. (Mus. 9:11) Akhala wira eyo enoowiiraneelani, muthanleke itthu sinivarihana ni makhalelo anyu. Eyo ti etthu yamwiiranenle munna mmosa oniitthaniwa Ted ni mwaarawe Hiedi. Mwaha woowereiwa, yaahihiya okhaliherya oBetheli. Masi omphenta waya Yehova waahiwiiriha ohaavya inamuna sikina soovara miteko sinceene sa Yehova. Woopaceryani, yaahivekela okhala mapioneero ookilaatheya. Nuuvira okathi yaahithanliwa okhala mapioneero a vameekhaaya. Muhoolo mwaya Ted aahithanliwa okhala mutokweene a esirkwitu ooranttela. Muhoolo mwaya itthu saavekeliwa wira mutthu ophwanelele okhala mutokweene a esirkwitu saahiturukeya. Ted ni Hiedi yaahoona wira vano yaahuuluvala ni khiyaarowa-tho ovara muteko ole wa Yehova. Nnaamwi yaariipiwe murima, yaahoona wira yanwerya omurumeela Yehova mwa inamuna sikina. Ted onihimya so: “Naahoona wira ohiya paahi ovarexexa muteko mmosa, nahaana ophavela ovara miteko sikina”.

16. Exeeni onniixuttiha awe aGalasia 6:4?

¹⁶ Khaninwerya okhoottiherya itthu sotheene siniiraneya mookumi mwahu. Khivanreerela wuupuwelaka wira Yehova onninivaha efaita mwaha wa iparakha nirina ahu. Nave nihiilikanyiheke ni atthu akina. Hiedi onitthokiherya so: “Akhala wira mutthu onnilikanyiha makhalelo awe ni makhalelo a atthu akina, otteeliwa wawe murima onoomala”. (Mmusome aGalasia 6:4.) Vannireerela ohaavya inamuna sikina nikhanle ahu oowaakhaliherya atthu akina aahiiso omurumeela Yehova. *

17. Exeeni mukhanle anyu oopaka wira mphwanelele ovahiwa iparakha?

 ¹⁷ Vanooweryaneya wuncererya muteko muninvarela anyu Yehova, mukhweiheryaka okumi anyu ni osyaka okopha-kopha. Mukhalaneke soolukama sookhweya sinrowa wookhaliherya ophwanya soolukama suulupale. Mwa ntakiheryo, vakhala wira muniphavela okhala pioneero ookilaatheya, nyuwo pooti orumeelaka ntoko pioneero ookhaliherya mwa okathi munceene. Mwaaphavelaka okhala murumeyi ookhaliherya, nyuwo pooti oviriha okathi munceene mulaleeryaka, ni waaxukurya anna a muloko anyu aniwereiwa ni oowuuluvala. Itthu muniixutta anyu olelo-va, pooti wookhaliheryani ovahiwa iparakha sinceene muhoolo. Tivonto, mwiimananiheke ovara saana khula muteko munithanleliwa anyu.—aRom. 12:11.

18. Sintoko enooniherya aya efootu, exeeni mwiixuntte anyu ni ntakiheryo na Beverley?

¹⁸ Hata nuuluvanle ene nnoowerya okhalana ni ophwanya soolukama. Muthokorerye ntakiheryo nimosa na murokora mmosa oowuuluvala oniitthaniwa Beverley, orina iyaakha 75. Owo aahiwereiwa vanceene mpakha ohinawerya weetta. Masi aaniphavela okhaliherya ekampaanya ya Wuupuwelela Okhwa wa Yesu. Nto aahipaka eyo okhala yoolukama awe. Okathi aawenrye awe ophwanya etthu aaphavela awe, aahihakalala vanceene. Wiimananiha wawe waahiwiiriha akina okhalela nthiti muteko woolaleerya. Yehova onnivaha efaita muteko anivara aya anna oowuuluvala, hata makhalelo aya ahiweemereryaka ovara itthu sinceene yaaphavela aya.—Esal. 71:17, 18.

19. Itthu xeeni sikina nikhanle ahu ookhalana?

¹⁹ Mukhalaneke soolukama muniwerya anyu ophwanya. Nave mukhalaneke mikhalelo sinimusivela Yehova. Mwiixutteke itthu sinceene wira nweryeke orumeeliwa ni Muluku ni mutthenkeso awe. Mphaveleke inamuna sa waarumeela anna ni arokora. * Moolikanasa ni Timootheyo, mukhaliheriwaka ni Yehova orowa wanyu vahoolo onimooniwaka ni “atthu otheene”.—1 Tim. 4:15.