OXANKA, pooti olikanaka ni muritti woolemela ori vamurimani vahu. (Mir. 12:25) Niireke nookhala nihiku mwaaxankale anyu vanceene? Niireke mwaahipacerya wuupuwela wira khimwaarowa owerya ovilela muxankiho owo? Akhala wira ti siiso, khamukhanle mekhinyu. Anamunceene a hiyo ninnixanka, okhulumuwa, ni oriipiwa murima mwaha wa mathowa manceene. Mwa ntakiheryo, akina animukhapelela mmusi aya oniwereiwa, akina aakhweliwa, nave akina annihaawa mwaha wa ihasara sa ephattu. Exeeni enrowa onikhaliherya ovilela okathi ninxanka ahu? *

Ntakiheryo na mwene Davidi, pooti onikhaliherya wiixutta itthu sinceene wira nivileleke okathi ninxanka ahu. Davidi saahimphwanya mixankiho sinceene. Nave waahikhala okathi aahala awe vakhaani wiiviwa. (1 Sam. 17:34, 35; 18:10, 11) Exeeni yaamukhaliherya ovilela okathi owo wooxanka? Ninrowa otthara sai ntakiheryo nawe?

Davidi saahimphwanya mixankiho sinceene okathi omosaru. Mwa ntakiheryo, nkuupuwelani etthu yaamukhumelenle okathi aamutthyawa awe mwene Sawuli yoowo aaphavela omwiiva. Nihiku nimosa, okathi Davidi ni anakhotto awe yaatthinke aya okhottoni, yaahiriipiwa murima vanceene nuumala oweha wira awanani aya yaahiiya mireerelo saya, yaahipaha ipa saya, ni yaahaakuxa amusi aya wira yaakhalihe ipottha. Davidi oonenle sai? Biibiliya onihimya wira “Davidi n’atthu awe yahikhuwela, yinlaka vanjene mpakha walala vammilo”. Ohiya-vo, atthu aarina awe ni aarooromela awe, yaahipacerya ovaanela “etthokelelaka omwiva”. (1 Sam. 30:1-6) Davidi saahimphwanya mixankiho 3 suulupale okathi omosaru. Woopacerya, amusi awe yaari mmaxakhani. Wanenli, khaasuwela saana akhala wira atthu aarina awe khiyaarowa omwiiva. Wa neeraru, nave Sawuli aaphavela omwiiva. Nkahaya muupuwele moota Davidi aaxankale awe!

Nuumala-vo, exeeni aapanke awe? Moowaakuveya “ahilipiha murima n’ikuru s’Apwiya Muluku awe”. Aapanke sai eyo? Okathi wootheene, aaninvekela Yehova, nave aanitthokelela moota Yehova aamukhalihenrye awe khalai. (1 Sam. 17:37; Esal. 18:3, 7) Davidi aaniisuwela wira vaanireerela omukoha Yehova etthu yoopaka. Eyo yammukhaliherya osuwela etthu Yehova aaphavela awe wira opake. Nuumala ovahiwa malakiheryo yaakhuma wa Yehova, moowaakuveya Davidi aahitthara. Mwaha woopaka eyo, Davidi ni atthu awe yaahireelihiwa ni Yehova. Nave yaahiwoopola amusi aya, ni yaahiphwanya mireerelo saya saakuxiwe. (1 Sam. 30:7-9, 18, 19) Niireke mooweha itthu tthaaru Davidi aapanke awe? Aahivekela wira Yehova omukhaliherye, aahuupuwela moota Yehova aamukhalihenrye awe khalai, ni aahiiwelela malakiheryo yaakhuma wa Yehova. Ninrowa omutakiha sai Davidi? Nrowe nithokorerye inamuna tthaaru.

1. Ovekela. Khula okathi ninxanka ahu, vanireerela onvekela Yehova wira onikhaliherye ni onivahe miruku. Omuleela itthu sootheene sinnixankiha, pooti onikhaliherya okhala saana. Nave hiyo pooti onvekela moowaakuveya ni moohiiwanyeya, moovarihana ni makhalelo a opuro niri ahu. Okathi wootheene nninvekela ahu Yehova, ninnooniherya wira ninnimuroromela sintoko Davidi, yoowo aahimmye so: “Apwiya t’ikuru saka, wilipiha waka ni wopowa waka: Apwiya ti Muluku aka ni ntthyawelo naka”. (Esal. 18:3) Niireke veekeekhai  ovekela onnikhaliherya? Murokora mmosa pioneera oniitthaniwa Kahlia, ohimmye so: “Nuumala ovekela kinnimaaleleya. Ovekela onnikikhaliherya wuupuwela ntoko Yehova onuupuwela awe, nave-tho kinnitepa omuroromela”. Ovekela, yoovaha yoowerya enikhuma wa Yehova ennikhaliherya ovilela okathi ninxanka ahu.

2. Wuupuwela. Okathi munuupuwela anyu itthu saatonko wookhumelelani, munniwerya oweha mixankiho nwenrye anyu ovilela paahi mwaha wookhaliheriwa ni Yehova? Okathi nnuupuwela ahu moota Yehova onikhalihenrye awe, ni aakhalihenrye awe arumeyi awe a khalai, ninniphwanya ikuru, nave ninnitepa omuroromela. (Esal. 18:18-20) Mutokweene mmosa oniitthaniwa Joshua, ohimmye so: “Kookhalana elista ya mavekelo kaapanke aka, Yehova aakhula. Eyo ennikhaliherya wuupuwela okathi kanvekenle aka Yehova etthu, nuumala-vo okivaha”. Otthokelela itthu Yehova aanipakenle awe, onninivaha ikuru wira niwerye oxintta okathi nimpacerya ahu wuupuwela itthu sinniiriha oxanka.

3. Otthara malakiheryo. Nihinatthi othanla etthu yoopaka, vannireerela toko oweha etthu Nuulumo na Muluku ninhimya aya, wira niphwanye malakiheryo oororomeleya. (Esal. 19:8, 12) Atthu anceene anniweha wira okathi anivarerya aya saana yoolepa emosa ya mBiibiliyani, annoona moota yoolepa eyo enivareleya aya muteko mookumini mwaya. Mutokweene mmosa oniitthaniwa Jarrod, onitthokiherya so: “Otokosa onnikikhaliherya oweha itthu sootheene siniheliwa muhina nversiikuluni mmo, ni wiiwexexa etthu Yehova omphavela awe okiixuttiha. Eyo ennikikhaliherya ororomela ele kinsoma aka, ni opaka etthu kittharaka malakiheryo awo”. Vaavo ninhaavya ahu malakiheryo a Yehova ari mBiibiliyani, ni otthara miruku nimphwanya ahu, ninnikhalana murettele ni otteeliwa murima okathi ninxanka ahu.

Davidi aahoona wira aaphavelaka oxintta okathi wooxanka, ahaana okhaliheriwa ni Yehova. Nave aanimuxukhurela vanceene Yehova mwaha wooomukhaliherya. Eyo yaahimwiiriha ohimya so: “N’ikuru sawe kinnatuphela awanani aka: n’ukilipiha wawe kinnikuxa mittetthe saya”. (Esal. 18:30, 33) Ikwaha sikina hiyo pooti woonaka wira mixankiho sahu suulupale ni khivaniweryaneya ovilela. Masi nikhaliheriwaka ni Yehova, nnoowerya ovilela mixankiho sotheene hata sikhalaka suulupale. Okathi nninvekela ahu Yehova wira onikhaliherye, wuupuwelela itthu sootheene onipakenle awe, ni otthara malakiheryo awe, nikupaliki wira onoonivaha ikuru ni ankhili anrowa onikhaliherya ovilela okathi ninxanka ahu!