1. Exeeni enniphwanyiha ohakalala wuulupale?

 YEHOVA oniphavela wira nihakalaleke. Ntoko ninsuwela ahu, mukhalelo wa ohakalala onikumiheriwa ni munepa awe wowaarya. (aGal. 5:22) Nto okhala wira mutthu onivaha onnihakalala vanceene onvikana ole onivahiwa, nave ninnitteeliwa murima okathi ninkhalela ahu nthiti muteko woolaleerya ni waakhaliherya axinnihu mwa inamuna soovirikana.—Mit. 20:35.

2-3. (a) Sintoko onihimya awe aGalasia 6:4, itthu xeeni piili sinrowa onikhaliherya ohihiya otteeliwa murima okathi ninvara ahu muteko wa Yehova? (b) Exeeni ninrowa ahu othokorerya mwaha ola?

² Yoolepa ya aGalasia 6:4, murummwa Paulo aahiromola itthu piili sinrowa onikhaliherya ohihiya otteeliwa murima. (Mmusome.) Yoopacerya, yoolukama ahu ehaana okhala onvaha Yehova ele ninwerya ahu. Akhala wira ninninvaha Yehova itthu sooreerexa ninwerya ahu opaka, nto nihaana otteeliwa murima. (Math. 22:36-38) Yanenli, nihaana osyaka wiilikanyiha ni atthu akina. Hata nirina ene okumi wooloka, niixuttihiwe ene vanceene, aahiiso nisuwelaka saana opaka itthu sikina, nihaana omuxukhurela Yehova. Itthu sotheene ninsuwela ahu opaka yena tonivanhe. Nto akhala wira ninnimoona munna osuwelaka ovara saana miteko sikina sa Muluku onivikana hiyo, nihaana otteeliwa murima mwaha wonweha munna owo orumeelaka osuwela wawe wira onvuwihe Yehova, ohiya wiivuwiha aahiiso ophavela itthu simmusivela paahi. Nto ohiya oxinttanaka, nihaana wiixutta niwehaka itthu sooreera atthu akina anipaka aya.

³ Mwaha ola nnooweha etthu enrowa onikhaliherya ohitepa oriipiwa murima mwaha woohiwerya opaka itthu sotheene naaphavela ahu. Nnooweha-tho moota woorumeela saana osuwela wahu, ni itthu nikhanle ahu oowiixutta ni matakiheryo aatthu akina.

4. Itthu xeeni sikhanle ooniriipiha murima? Nvahe ntakiheryo.

⁴ Mwaha wa wuuluvala aahiiso owereyasiwa, olelo-va arumeyi akina a Yehova, khaniwerya onvarela Yehova itthu sotheene yaaphavela aya. Eyo ti etthu yaamwiiranenle murokora mmosa oniitthaniwa Carol. Aahikhalana eparakha yoorumeela mapuro oothowa anamalaleerya. Okathi ole wotheene aaniiriha soosoma sa Biibiliya 35. Nave aahaakhaliherya atthu anceene orowa vahoolo mpakha wiivahererya wa Yehova ni opatisiwa. Olaleerya wa Carol waanikumiherya mireerelo! Nuumala-vo aahiwereiwa vanceene ni aahaana okhala owaani okathi munceene. Carol onihimya so: “Koosuwela wira mwaha wa okumi aka, vano nkinwerya opaka itthu sikina atthu akina anipaka aya. Masi hata vari siiso kinoona wira khahiyo ka mukristau oolokexa ntoko atthu awo. Etthu yoowereya mutthu ohiwerya opaka itthu murima awe oniphavela aya, nto khivanikhweya ovilela”. Carol oniphavela onvarela Yehova itthu sotheene oniwerya awe. Eyo etthu yooreera! Nihaana okupalixa wira Muluku ahu oomoriwa ikharari onniweha itthu sooreerexa murokora ole onipaka awe.

5. (a) Exeeni ninreerela ahu ohiliyala akhala wira makhalelo ahu anninriipiha murima? (b) Sintoko sinooniherya aya ifootu, moota xeeni anna otheene ahinihiya aya onvaha Yehova ele eniwerya aya?

⁵ Akhala wira ikwaha sikina munniriipiwa murima mwaha woohiwerya ovara itthu sikina, mwiikoheke so: ‘Etthu xeeni Yehova onkivekela awe?’ Yehova oniphavela wira mpakeke ele eniwerya anyu moovarihana ni makhalelo anyu a niinaano. Nkahaya nthokorerye yowiiraneya ela: Murokora mmosa a iyaakha 80, onniriipiwa murima mwaha woohiwerya olaleerya vanceene sintoko khalai okathi aarina awe iyaakha 40. Murokora ole onuupuwela wira hata onvahaka Yehova itthu sooreerexa onwerya awe, khoniwerya omuhakalaliha. Niireke eyo ekeekhai? Nihiliyale wira murokora ole onvaha Yehova ele oniwerya awe mwa iyaakha soowiiraka 40, nave olelo-va hata orina ene iyaakha soowiiraka 80 nlelo onnipaka eyo. Akhala wira nnuupuwela wira muteko nninvarela ahu Yehova vakhaani ni khonimuhakalaliha, nihiliyale wira Yehova tonithanla akhala wira muteko owo onnimuhakalaliha wala nnaari. Nave naimananiha opaka ele eniwerya ahu, Yehova onooxukhurela ohimyaka so: “Muhiira saana”.—Mulikanyiherye ni Matheyo 25:20-23.

6. Ntakiheryo na murokora Maria ninniixuttihani?

⁶ Akhala wira nnoowehexexa itthu ninwerya ahu opaka ohiya iye nihinwerya ahu, vanoonikhweela ophwanya ohakalala. Nrowe niwehe ntakiheryo na murokora mmosa oniitthaniwa Maria, yoowo aahaawa vanceene mwaha wa oretta waamwiiriha ohiwerya onvarela Yehova miteko sinceene. Woopaceryani aahiriipiwa murima ni oona wira muteko aavara awe khiwaaphiyerya etthu. Masi nuumala-vo aahimuupuwela murokora mmosa a muloko awe aawereiwa vanceene. Maria aahoona wira vanireerela omukhaliherya. Onihimya so: “Naahivarihana orowa olaleerya hoothe nimurumeelaka telefoni ni ikarta. Okathi wotheene naavara ahu hoothe, kaatthikela owaani kihakalanle ene vanceene mwaha woosuwela wira kaahiwerya omukhaliherya murokora ole”. Hiyo-tho pooti wuncererya ohakalala wahu niwehexexaka itthu ninwerya ahu opaka ohiya iye nihinwerya ahu. Masi ankhi akhala wira sookhala itthu aahiiso etthu nihinwerya ahu opaka saana mmuteko mwa Yehova?

7. Miruku xeeni soovareleya muteko murummwa Pedru aavanhe awe makristau?

⁷ Epaphelo yoopacerya murummwa Pedru aarummwale awe olepa, ahaatumererya axinnawe orumeela etthu yaavahiwe aya ni Muluku ni itthu yaasuwela aya opaka wira yaalipiheke akhwaaya. Pedru aalempe so: “Khula etthu mutthu ovahiwa awe ni Muluku, orumeeleke wira aavareleke muteko akina ntoko murumeyi ooloka, oreereliwe  murima vaalupale ni Muluku”. (1 Ped. 4:10) Nihooveleleke orumeela itthu ninsuwela ahu opaka wala osuwela wahu noovaka okhaleliwa nrima aahiiso waakhulumula atthu akina. Akhala wira nnoopaka eyo khaninrowa onvaha Yehova etthu yooreerexa ninwerya ahu opaka.

8. Moovarihana ni 1 aKorinto 4:6, 7, exeeni ninreerela ahu osyaka wira nihiixinnuuhe mwaha wa osuwela nivahiwe ahu?

⁸ Nihaana orumeela moomalela osuwela nivahiwe ahu ni Muluku masi nihaana-tho okhalana ephoole wira nihiikompeleke mwaha wa osuwela iyo. (Mmusome 1 aKorinto 4:6, 7.) Mwa ntakiheryo, nyuwo pooti wookhweelani opaceriha soosoma sa Biibiliya. Muhoovelele orumeela yoovaha eyo! Masi wookhala ovirikana eriyari ya orumeela yoovaha eyo ni wiixinnuuha mwaha wa yoovaha eyo. Nkahaya muupuwele wira moopaceriha yoosoma ya Biibiliya okathi woolaleerya, nuumala-vo munaphavela vanceene waaleela anna a ekrupu anyu. Masi okathi munaaphwanya anyu munanweha murokora mukina ohakalanle ene vanceene mwaha woowerya onvaha erevista mwaneene etthoko. Moone paahi murokora ole owenrye ovaha erevista, masi nyuwo nwenrye opaceriha yoosoma ya Biibiliya. Masi nnaamwi musuwelaka wira anna anoohakalala wiiwa etthu ewiiranenleni, munoona wira fataari waaleela nihiku nikina yowiiraneya eyo, maana akhala wira munimwaaleela nihiku nenlo, munoomunyoonyiha murokora ole aahakalanle mwaha woovaha erevista. Ekeekhai wira opaka eyo waarowa wooniherya oreera murima. Masi eyo khiyaakhanle oowiirihani ottharuwa opaceriha soosoma sa Biibiliya. Tivonto muhihiye orumeela yoovaha eyo.

9. Ninrowa orumeela sai osuwela nivahiwe ahu?

⁹ Vannireerela ohiliyala wira itthu sotheene ninsuwela ahu opaka nivahiwe ni Muluku. Nto nihaana orumeela osuwela iwo wira nilipihe muloko, ohiya wiivuwiha hiyo mmensihu. (aFil. 2:3) Akhala wira nnoorumeela ikuru sahu ni osuwela wahu wira nipake itthu simmusivela Muluku, nnookhalana mathowa oohakalala. Enrowa onihakalaliha khahiyo opaka itthu suulupale waavikana atthu akina aahiiso wiixoona okhala atthu a vasuluxa waavikana anna awo, masi mwaha woosuwela wira noorumeela osuwela wahu wira ninvuwihe Yehova.

10. Xeeni vahinreerela aya wiilikanyiha ni atthu akina?

¹⁰ Mutthu aahikhalane ephoole, pooti opaceryaka olikanyiha itthu onsuwela awe opaka saana ni iye sinaaxankiha atthu akina. Mwa ntakiheryo, munna pooti osuwelaka olavula saana myaha sa mmulokoni. Eyo etthu yooreera. Vamurimani vawe pooti opaceryaka wiixoona okhala oolokexa onvikana munna mukina ommuxankiha olavula saana myaha. Masi munna owo onimuxankiha olavula  saana myaha, pooti okhalaka mutthu oosuwela owaakhela aletto, owiixuttiha anamwane, ni okhalela nthiti muteko woolaleerya. Ninnixukhurela okhalana anna ni arokora anceene anrumeela osuwela waya wira amurumeele Yehova ni waakhaliherya axinnaya.

11. Xeeni ninreerela ahu otthara ntakiheryo na Yesu?

¹¹ Ekeekhai wira khivanireerela wiilikanyiha ni atthu akina, masi nnoowerya wiixutta itthu sinceene nittharaka matakiheryo a anna. Nave ntakiheryo nuulupale ninreerela ahu otthara ti na Yesu. Khivanreerela wiilikanyiha ni Yesu maana yena aayariwe ohirina etampi. Masi nnoowerya wiixutta itthu sinceene ni mikhalelo sooreera aarina awe, ni moota aakhala awe. (1 Ped. 2:21) Okathi nniimananiha ahu omutthara Yesu vakhiviru vene, ninnikhala makristau ooloka nave ninnilokiherya inamuna sahu soolaleerya.

12-13. Exeeni nniixutta ahu ni ntakiheryo na mwene Davidi?

¹² MBiibiliyani, aakhala matakiheryo manceene a alopwana ni athiyana oororomeleya nnaamwi yaari atthu oottheka. (aHeeb. 6:12) Nkahaya nuupuwele ntakiheryo na mwene Davidi yoowo Yehova aamuhimmye awe okhala mulopwana “onihakalaliha murima aka”. (Mit. 13:22) Hata vari siiso, Davidi aari mutthu oottheka. Ohimya ekeekhai, yena aahipaka itampi suulupale. Masi hata vari siiso oonihiyerya ntakiheryo nooloka ninreerela ahu otthara. Mwaha wa xeeni? Mwaha woowi okathi aapwapweliwe awe khaamananinhe wiisaakiha. Ohiya-vo, aaheemererya miruku aavahiwe awe ni aahittharuwa ni murima awe wotheene itthu aapanke awe. Nto eyo yaahimwiiriha Yehova omulevelela.—Esal. 51:5, 6, 12-14.

¹³ Okathi munsoma anyu ntakiheryo na Davidi, mwiikoheke so: ‘Kinoonela sai okathi kinvahiwa aka miruku? Kiireke moowaakuveya kinneemererya wira koopaka etthu yoohiloka, wala kimmananiha paahi wiisaakiha? Kiireke kinnaakuvela waarunela atthu akina? Kiireke kinnimananiha ohitthikela opaka etampi emosaru?’ Nave nyuwo pooti opaka makoho makina ntoko ala musomaka sowiiraneya sa arumeyi oororomeleya a Yehova anromoliwa mBiibiliyani. Niireke sahaaphwanya mixankiho ntoko sawinyu? Mikhalelo xeeni yoonihenrye aya? Nave mwiikoheke so: ‘Exeeni kikhanle aka oopaka wira kilikaneke ni murumeyi ola oororomeleya a Yehova?’

14. Exeeni nikhanle ahu oowiixutta ni matakiheryo a anna ni arokora?

¹⁴ Nnoowerya wiixutta itthu sinceene niwehaka matakiheryo a anna a mmulokoni, hata ari ene amiravo aahiiso atthu aalupale. Mwa ntakiheryo, nkahaya mmuupuwele munna oororomeleya  a muloko anyu onixanka vanceene woonasa wene mwaha woweehereriwa opaka etampi, olupatthiwa ni amusi awe, aahiiso owereiwa. Niireke munna owo ookhalana mikhalelo sooloka mukhanle anyu ootakiha? Vekeekhai matakiheryo a anna ni arokora, pooti onikhaliherya vanceene. Nave hiyo pooti orumeela itthu nniixutta ahu ni anna awo wira nixintte mixankiho sinniphwanya. Tthiri ninnihakalala okhalana anna awo ni arokora ntoko matakiheryo nikhanle ahu ootthara!—aHeeb. 13:7; Yak. 1:2, 3.

15. Miruku xeeni Paulo aavanhe awe sinrowa onikhaliherya ohihiya otteeliwa murima okathi ninvara ahu muteko wa Yehova?

¹⁵ Khula mmosa ohaana opaka ele eniwerya awe wira okumiherye murettele ni wiiwanana mmulokoni. Nrowe nithokorerye ntakiheryo na makristau a eseekulu yoopacerya. Otheene aya yaahivahiwa owerya woopaka saana itthu, ni yaahithanleliwa miteko soovirikana. (1 aKor. 12:4, 7-11) Masi khiyaaxinttana yaaworu enakumiherya okawanyeya. Murummwa Paulo aahaatumererya atthu otheene a mmulokoni wira yaahaana opaka ele yaawerya aya wira ekhaliherye “olipiha erutthu ya Kristu”. Nave aahaalepela makristau a wEefeso wira: “Okathi khula mpantta onivara aya saana, onniiriha erutthu wunnuwa wira yotheene elipe moophentani”. (aEef. 4:1-3, 11, 12, 16) Makristau yaatthanre miruku iye, yaahikhaliherya okumiherya murettele mmulokoni, nave etthu emosa eniiraneya olelo-va.

16. Exeeni ninreerela ahu opaka? (aHeeberi 6:10)

¹⁶ Muhiilikanyiheke ni atthu akina. Ohiya-vo mmutakiheke Yesu ni arumeyi akina oororomeleya a Yehova a khalai ni a olelo-va. Muhihiye wiimananiha opaka ele eniwerya anyu ni mukupaliki ni murima anyu wotheene wira Yehova “khonrowa oliyala muteko anyu ni ophenta wanyu nsina nawe”. (Mmusome aHeeberi 6:10.) Tivonto nihihiye omurumeela Yehova moohakalala nihiliyalaka wira akhala wira ninnikhalela nthiti opaka ele eniwerya ahu, ninnimuhakalaliha.