Okhala-wene olapha, “yooleiherya yuulupale enipakiwa mwa nsina na Muluku, aahiiso etthu ekina ya efaita yuulupale . . . sintoko namoona”. Pooti okhala etthu yoolavuliwa aahiiso yoolempwa.

Atthu akina pooti wuupuwelaka wira ti vootthekeya olapha maana Yesu aahimmye so: “Muhilapheke mahala ene . . . Olavula wanyu woowi ‘aayo’, okhaleke aayo, ‘nnaari’, okhaleke nnaari. Moolumo anincererya anyu, anikhuma wa Mutakhali”. (Math. 5:33-37) Hata vari siiso Yesu aanisuwela wira nlamulo na Moise naanaaruma atthu olapha, nave arumeyi oororomeleya a Muluku yaanilapha. (Maph. 14:22, 23; Okhum. 22:10, 11) Aanisuwela-tho wira mwaneene Yehova aanilapha. (aHeeb. 6:13-17) Yesu khahiyo aaphavela ohimya wira ti vootthekeya olapha. Ohiya-vo, aalopola atthu wira ehilapheke mwaha wa itthu saamukhaani. Okathi wotheene nihaana opaka itthu ninleiherya ahu, maana eyo ti etthu Yehova oniphavela awe. Nihaana othokorerya moolumo ahu sintoko etthu yoowaarya enikhuma wa Muluku.

Exeeni munreerela anyu opaka akhala wira munnivekeliwa olapha? Yoopacerya, musuweleke saana akhala wira munoowerya opaka etthu munleiherya anyu. Mwaahisuweleke saana fataari ohilapha. Nuulumo na Muluku ninnilopola so: “Halali ohimmana natiri ovikana ohimutthukula natiri omaniwe”. (Mus. 5:4) Moottharelana, nweheke malakiheryo a mBiibiliyani anilavula sa olapha. Nuumala-vo mpakeke itthu moovarihana ni murima anyu wiixuttihiwe ni Nuulumo na Muluku. Soolepa sikina sinihimyani?

Anatiri akina annivarihana ni itthu Muluku oniphavela awe. Mwa ntakiheryo, Anamoona a Yehova annaamana anatiri nihiku anithela aya aahiiso otheliwa. Anatiri awo ari ntoko olapha. Ale anithelana annileiherya ohoolo wa Muluku ni wa atthu otheene ari opuro owo, wira anoophentanaka, okhapelelana, ni ottittimihana “okathi wotheene anrowa aya okhala akumi hoothe”. (Woonasa wene atthu akina khanilavula itthu simosaru okathi anithelana aya, masi hata vari siiso, annimmana natiri ohoolo wa Muluku.) Nto awo annipakeya mulopwana ni mwaarawe, ni ahaana okhala hoothe okumi aya wotheene. (Maph. 2:24; 1 aKor. 7:39) Mareheryo awo a olapha nihiku na ekasamento annivarihana ni yoophavela ya Muluku.

Anatiri akina khanivarihana ni itthu Muluku oniphavela awe. Mukristau eekeekhai khaarowa olapha wira aamwaakiherya elapo awe okhottoni wala ohiya omurumeela Muluku. Opaka eyo waamutthekela malamulo a Muluku. Makristau eekeekhai khaniirela mpantta aahiiso khanlikana ni “atthu a olumwenku ola”. Tivonto ahinikhaliherya aya myaha ni ikhotto siniwaniwa.—Yoh. 15:19; Yes. 2:4; Yak. 1:27.

 Anatiri akina anivarihana ni murima wa khula mutthu. Okathi mukina nihinatthi olapha, vannireerela otthokelela saana moolumo Yesu aahimmye awe wira “munvaheke Seesari ekhanle ya Seesari, nave munvaheke Muluku ekhanle ya Muluku”.—Luka 20:25.

Mwa ntakiheryo, nuupuwele wira mukristau oniphavela okhalana edokumentu enimweemererya othaamela elapo ekina, aahiiso onimphavela pasaporti. Masi onaweha wira aaphavelaka ophwanya idokumento iyo, ohaana oleiherya okhala mutthu oororomeleya. Nto akhala wira okathi woolapha aamuleiherya opaka etthu ehimmusivela Muluku, murima awe woowiixuttihiwa ni Biibiliya, khiwaarowa omweemererya opaka eyo. Masi woonasa wene kuvernu onnimweemererya orukunuxa moolumo makina a yooleiherya eyo wira murima awe ohimphukeleke.

Olokiherya moolumo makina a edukumento erina natiri oowi mutthu owo onileiherya ororomeleyaka, pooti ovarihana ni ele onihimya awe aRoma 13:1, wira: “Niwiiweleleke makhulupale a mulaponi”. Nto mukristau pooti woonaka wira khahiyo vootthekeya olapha wira onoopaka etthu Muluku onnitumererya awe opaka.

Nave vannireerela wiiwelela murima ahu wowiixuttihiwa ni Biibiliya, akhala wira okathi woolapha ninnivekeliwa orumeela wala opaka etthu ntoko ovenxa moono wala etthu ekina. Aroma a khalai, ni atthu a nloko Cita yaanilaphela ikatana saya evekelaka ovahiwa owerya ni muluku a ikhotto, aphavelaka wooniherya wira yaalavula ekeekhai. Nave okathi akereku yaalapha aya, yaaniteexerya ntata musulu. Awo yaakupali wira sookhala ikuru sa wiirimu siniweha itthu sotheene sinihimmwa ni sinipakiwa.

Ekeekhai wira murumeyi a Yehova khaarowa orumeela etthu wala ekanyeryo enivuwiha etiini yowootha. Masi ankhi akhala wira otribunaale munnivekeliwa ompweherya Biibiliya ntata nanyu ni olapha wira paahi munrowa olavula ekeekhai? Akhala wira eyo enimwiiraneya, nyuwo pooti opaka ele munvekeliwa anyu, maana Biibiliya onnooniherya wira khalai yaahikhala arumeyi akina a Yehova, yaawiiyaathenrye ntata atthu akina okathi yaalapha aya. (Maph. 24:2, 3, 9; 47:29-31) Masi vannireerela ohiliyala wira akhala wira munoopaka yooleiherya eyo, nyuwo munlapha ohoolo wa Muluku nave paahi munrowa ohimya ekeekhai. Muhaana wiilokiherya wira muhimyeke ekeekhai okathi wowaakhula khula nikoho.

Opatthani ahu ni Yehova wookhalana efaita yuulupale. Tivonto nihaana ovekela ni wuupuwelela saana nihinatthi olapha. Vannireerela okhalana ephoole wira nihitthekele murima ahu woowiixuttihiwa ni Biibiliya. Moonaka wira pooti olapha, muhaana osuwela saana akhala wira munoowerya ovara etthu munileiherya anyu.—1 Ped. 2:12.