1. Mutthokiherye etthu yaamwiirinhe Yesu opaka mwiiriirya awe woopacerya.

 NKAHAYA muupuwele ela: Nri eyaakha 29 Nuumala Kristu Orwa, wanipacerya wa muteko wa Yesu valaponi. Yesu, maama awe ni awiixutti awe akina, annilattuliwa orowa efesta ya ekasamento. Eyo eniiraneya oKanani, waattamela oNazarethi, epooma aayariwa awe Yesu. Maria aari mpatthani a axineene etthoko ele yaari ekasamento, ni woonasa wene, aanikhaliherya waakhapelela aletto. Masi, elyiwaka efesta siisaale, onnikhumelela muxankiho muulupale waarowa omuulihiha muru mutheli ole vamosa ni amusi. Muxankiho xeeni? Eviinyu temanle. b Waanyiheryasa, yaahirwa atthu anceene ovikana nummuru na atthu yaalattuliwe. Moowaakuveya Maria aahirowa vaari awe Yesu khimuleela wiira: “Eviinyu ehaamalela”. (Yoh. 2:1-3) Exeeni Yesu aapanke awe? Owo aahitatuxa maasi khukhala “eviinyu yoowaawa”. Tthiri ela yaari etthu yootepa otikiniha! — Yoh. 2:9, 10.

2-3. a) Miiriirya xeeni Yesu aapanke awe? b) Mwaha ola, ninrowa othokorerya exeeni?

² Ola waari mwiiriirya woopacerya wa Yesu. Masi sookhala miiriirya sinceene Yesu aapanke awe. c Yesu aahirumeela owerya aavahiwa awe ni Muluku wiira aakhaliherye atthu anceene. Mwa ntakiheryo, ekwaha emosa paahi aahaalyiha alopwana 5.000. Nave ekwaha ekina, aahaalyiha-tho alopwana 4.000. Iya  saari miiriirya! Naatakaaha athiyana ni anamwane, pooti ovikana 27.000. (Math. 14:15-21; 15:32-38) Okathi yoowo-tho, Yesu aahaapenuxa aretta anceene. (Math. 14:14; 15:30, 31) Nkahaya muupuwele moota muttitthi ole waahakalanle awe mwaha wa openuxiwa ni ovahiwa yoolya mwa mwiiriirya!

³ Miiriirya sa Yesu sinniniixuttiha itthu sinceene. Yoosoma ela, ninrowa othokorerya itthu kamosa-kamosa siniixutta ahu seiyo sinlipiha waamini wahu. Moottharelana, ninrowa othokorerya moota wootthara ntakiheryo na wiiyeviha ni omoriwa ikharari wa Yesu okathi aapaka awe miiriirya.

4. Ti pani-tho onimwaamini ahu okathi ninsoma ahu miiriirya sa Yesu?

⁴ Miiriirya sa Yesu, sinninikhaliherya olipiha omwaamini wahu Yehova. Mwaha wa xeeni? Mwaha woowi Yehova tanvanhe Yesu owerya wa opaka miiriirya. Miteko 10:38, onihimya so: “Muluku aahimuthanla ni munepa woowaarya, khunvaha owerya. Siiso, aanivara itthu sooreera ni aanaapenuxa atthu otheene yaahaaxiwa ni Diabo, okhala wiira Muluku aari ni Yesu owo”. Nave muhiliyaleke wiira itthu sootheene Yesu aahimmye awe ni aapanke awe, (ohela muhina miiriirya sawe), aanitakiha oratteene muupuwelo ni moonelo wa Tiithi awe. (Yoh. 14:9) Nrowe niwehe itthu tthaaru nniixutta ahu ni miiriirya sa Yesu.

5. Etthu xeeni yaamwiiriha Yesu opaka miiriirya? (Matheyo 20:30-34.)

⁵ Yoopacerya, Yesu ni Tiithi awe anniniphenta vanceene. Ori ene valaponi, Yesu aahooniherya waaphenta wawe vanceene atthu. Aahipaka eyo orumeelaka owerya wawe wiira ovukule oxanka waya. Mwa ntakiheryo, nihiku nimosa, alopwana anli yahoona yaahikhuwela anvekelaka Yesu wiira aapenuxe. (Mmusome Matheyo 20:30-34.) Yesu “aahimoriwa ikharari”, nto aahaapenuxa. Moolumo a Ekereku oowi “aahimoriwa ikharari” anitaphulela othunku wuulupale, onikhuma vamurimani. Mwaha woowaaphenta, Yesu aahiwoonela othunku atthu, nto eyo yaahimwiiriha waavaha eyoolya ale yaavoliwe etala ni waapenuxa anamakuttula. (Math. 15:32; Mar. 1:41) Hiyo pooti okupali wiira Yehova, yoowo orina “othunku wuulupale”, vamosa ni Yesu, anniniphenta vanceene ni annixanka mwaha wa ohaawa wahu. (Luka 1:78; 1 Ped. 5:7) Moohaanyiherya, awo anoomaliha maxakha ootheene anniphwanya olelo-va!

6. Owerya xeeni Muluku onvahale awe Yesu?

⁶ Ya nenli, Muluku onvaha Yesu owerya wa omaliha mixankiho sahu. Miiriirya Yesu aapanke awe, sihooniherya wiira yena ookhalana owerya wa omaliha mixankiho seiyo nahaarowa ahu owerya omaliha. Mwa ntakiheryo, owo ookhalana owerya wa ophela mutathaari onnikumiherya mixankiho, eyo piiyo, etampi niranve ahu. Maana etampi eyo, ennikumiherya iretta ni okhwa. (Math. 9:1-6; aRom. 5:12, 18, 19) Miiriirya sawe saahooniherya wiira onoowerya omaliha “iretta sotheene” ni waahihimuxa alipa-ookhwa. (Math. 4:23; Yoh. 11:43, 44) Nave-tho, Yesu ookhalana owerya woomaaliha ipheyo suulupale ni oxintta malaikha ootakhala. (Mar. 4:37-39; Luka 8:2) Tthiri, ninnihakalala vanceene osuwela wiira Muluku onvaha Yesu owerya iwo wootheene!

7-8. a) Miiriirya sa Yesu sinnikupaliha exeeni? b) Miiriirya xeeni munlipelela anyu woona siiraneyaka elapo esya?

⁷ Ya neeraru, hiyo pooti okupali wiira Omwene wa Muluku onooruuha mareeliho manceene valaponi. Miiriirya sa Yesu, sinniniixuttiha itthu onrowa awe opaka muhoolo. Okhala wiira owo ti Mwene a Omwene wa Muluku onoopaka miiriirya sinceene olumwenku  wootheene. Muthokorerye itthu sinrowa oniiraneela moohipisa nilamuleliwaka ni Kristu. Hiyo ninrowa okhalana ekumi yooloka, okhala wiira owo onoomaliha iretta sootheene, orakala ni maxakha ootheene anaaphwanya apinaatamu. (Yes. 33:24; 35:5, 6; Wiis. 21:3, 4) Khuuvo-tho onrowa ovoliwaka etala wala oxanka mwaha wa ihasara sa ephattu. (Yes. 25:6; Mar. 4:41) Nnookhalana eparakha ya owaakhela amusi ahu anrowa okhuma “mmahiye”. (Yoh. 5:28, 29) Miiriirya xeeni munlipelela anyu woona elapo esya seiyo muninlela anyu?

⁸ Okathi aapaka awe miiriirya, Yesu aahooniherya wiiyeviha vanceene ni omoriwa ikharari. Nto hiyo nave nihaana omutakihaka. Nrowe nithokorerye matakiheryo manli, nipaceryaka ni efesta ya ekasamento oKanani.

9. Etthu xeeni Yesu aapanke awe okathi wa efesta ya ekasamento? (Yohani 2:6-10.)

⁹ Mmusome Yohani 2:6-10. Okathi eviinyu yaahanle aya omala vaniirani na ekasamento, niireke yookhala etthu yaamukhanyererya Yesu opaka etthu? Nnaari. Khiivo eprofesia yaahimya wiira Mesiya aarowa otatuxa maasi ekhale eviinyu. Masi nkahaya muupuwele ela: Mwaarowa woonela sai vaakhanle wiira efesta anyu ya ekasamento soowurya soomala! Woonasa wene, Yesu aahaamorela ikharari amusi, otepexa wene aahimoonela othunku mutheli ole. Nto khaaphavela wiira uuliwe muru. Tivonto, Yesu owo aahipaka mwiiriirya, ntoko niwenhe woopaceryani wa mwaha ola. Owo aahitatuxa maasi manceene, niire so: iliituru  soowiiraka 390 khukhala eviinyu yoowaawa. Woonasa wene, aahikumiherya eviinyu yinceene siisa wiira ehale ewuriwaka nuumala efesta aahiiso wiira etumihiwe ni ovahiwa musurukhu ene anamathelana ale. Tthiri nikhaliheryo na Yesu naahaakurunuxa murima anamathelana ale!

10. Soohimmwa xeeni sa vameekhaaya silempwale ekapiitulu 2 ya Yohani? (Nwehe eteseenyo.)

¹⁰ Muthokorerye soohimmwa sa vameekhaaya silempwale ekapiitulu 2 ya Yohani. Niireke mooweha wiira khahiyo Yesu mwaneene taasanrye maasi mino iye? Voohiixooniherya, owo aarumme arumeyi. (Iversiikulu 6, 7) Nave, nuumala otatuxa maasi khukhala eviinyu, Yesu khaarinke mmansawe onamuroihela muhooleli a efesta. Masi aavekenle arumeyi opaka eyo. (Eversiikulu 8) Tthiri Yesu khaateexenrye osulu ekalisi ya eviinyu, onaahimeerya atthu yaalattuliwe wiira: ‘Mulawihe, ni moone eviinyu epanke aka!’

11. Exeeni eniixutta ahu ni mwiiriirya wa Yesu?

¹¹ Exeeni eniixutta ahu ni mwiiriirya wa Yesu a otatuxa maasi khukhala eviinyu? Wiiyeviha. Yesu khaittottompe mwaha wa mwiiriirya ole. Mwekeekhai, Yesu khaatonko wiittottopa mwaha wa miteko sawe. Masi owo aari oowiiyeviha ni okathi wootheene anvuwiha Tiithi awe. (Yoh. 5:19, 30; 8:28) Namutakiha Yesu nikhalaka atthu oowiiyeviha, khaninrowa wiittottopaka mwaha wa itthu siniwerya ahu opaka. Nto khula etthu eniwerya ahu opaka mmutthenkesoni wa Yehova, nihoopeke nlope! Masi nimuttottopele ni onvuwiha Yehova, yoowo onnivaha eparakha ya omurumeela. (Yer. 9:23, 24) Nrowe ninvuwihe Muluku, tthiri khiivo etthu yaarowa ahu owerya opaka nihikhaliheriwaka ni Yehova. — 1 aKor. 1:26-31.

12. Enamuna xeeni ekhanle ahu oomutakiha Yesu okhala oowiiyeviha? Nvahe ntakiheryo.

¹² Muthokorerye enamuna ekina nikhanle ahu ootakiha wiiyeviha wa Yesu. Muupuwele etthu ela: Ela ekwaha yoopacerya murumeyi mmosa ookhaliherya onrowa awe olavula mwaha wa atthu ootheene. Nto mutokweene mmosa a mmulokoni onniviriha okathi munceene omukhaliheryaka olokiherya mwaha owo. Mwaha wa yeeyo, murumeyi ole onnilavula mwaha woolipiha, ni muloko wootheene onnihakalala. Nuumala muthukumano, anna akina annilavula ni mutokweene ole, yiiraka: ‘Olelo, mwaha olavuliwe khoreere oreera, kiira?’ Vano mutokweene ole khiyaakhula so: ‘Aayo, masi miyo kivirinhe okathi munceene kimukhaliheryaka’. Niireke vaamukhala va miruku mutokweene ole waakhula siiso? Nnaari. Owo aahaana waakhula so: ‘Aayo, khoreere olavula saana. Kinnimuxukhuru vanceene’. Wiiyeviha onninikhaliherya ohiittottopaka okathi vaniwiirela ahu sooreera atthu akina. Ninnihakalala osuwela wiira Yehova onniweha ni onnivaha efaita miteko sahu. (Mulikanyihe ni Matheyo 6:2-4; aHeeb. 13:16) Tthiri, ninnimusiveliha Yehova okathi onimutakiha ahu Yesu nikhalaka atthu oowiiyeviha. — 1 Ped. 5:6.

13. Etthu xeeni Yesu eniweha awe waattamela mukhora wa epooma ya oNayini, nto exeeni enipaka awe? (Luka 7:11-15.)

¹³ Mmusome Luka 7:11-15. Ovaraka muteko awe valaponi, Yesu aahiphiya epooma yaihaniwa Nayini. Epooma eyo yaakhala muttetthe wa oGalileya, waattamela oXunemi. Saahivira iyaakha 900 okhuma vaavale profeta Eliseyo aamuhihimunxe awe mwaana a muthiyana a epooma eyo. (2 Mam. 4:32-37) Muthokorerye etthu ela: Yesu onnaattamela mukhora wa epooma ele. Vano onnaaweha atthu ekhumaka, ekunxe ene murutthu. Ele yaari etthu yoowooniha othunku! Maana ole aakhwiiye, aari mwaana mmoseene mwaamulopwana a muthiyana naamukhweli oniromoliwa evanxeelyo ya  Luka. Masi muthiyana ole khahiyo aari mekhawe, aanihooliwa ni muttitthi muulupale wa atthu a epooma ele. Yesu onniweemexa ni onnipaka etthu naamukhweli ole yaahaarowa awe oliyala. Etthu ene tiila: Yesu onnimuhihimuxa mwaana ole a naamukhweli! Ola waari mwiiriirya woopacerya ya waahihimuxa atthu, eriyari ya miiriirya miraru sinihimmwa ni Ivanxeelyo.

14. Soohimmwa xeeni sa vameekhaaya silempwale ekapiitulu 7 ya Luka? (Nwehe eteseenyo.)

¹⁴ Muthokorerye soohimmwa sa vameekhaaya silempwale ekapiitulu 7 ya Luka. Mooweha wiira nuumala Yesu ‘onweha’ muthiyana ole, ‘aahimmorela ikharari’? (Eversiikulu 13) Woonasa wene, Yesu aahimoona muthiyana ole anlaka, ottharaka murutthu wa mwanawe. Nto eyo yaahimwiiriha ommorela ikharari. Khahiyo wiira Yesu ammorenle ikharari paahi, masi aahimoonela othunku. Owo aahimulavuliha moomuriiriha murima, oriki: “Mmaale wunla”. Moottharelana, aahipaka etthu wiira omukhaliherye muthiyana ole. Aahimuhihimuxa mmiravo ole aakhwiiye ni “aahaavahererya . . . amamawe”. — Iversiikulu 14, 15.

15. Mwiiriirya wa Yesu onniixuttiha exeeni?

¹⁵ Nniixutta exeeni ni mwiiriirya ola? Hiyo nihaana owoonelaka othunku ale akhweliwe. Noosuwela wiira khaninwerya waahihimuxa alipa-ookhwa. Masi, nnoowerya omutakiha Yesu niimanahihaka waakhaliherya atthu akhweliwe ni owoonela othunku. Nto nihaana okhala oowehaweha. Hiyo pooti opacerya waalavuliha aahiiso opaka etthu enrowa waalipiha ni waakhaliherya atthu awo akhweliwe. d (Mir. 17:17; 2 aKor. 1:3, 4; 1 Ped. 3:8) Hata masu vakhaani wala miteko saamukhaani pooti waakhaliherya vanceene.

16. Moovarihana ni efootu, mwiixuntte exeeni ni maama aakhweliwe mwanawe?

¹⁶ Muthokorerye yoowiiraneya emosa. Iyaakha vakhaani sivinre, murokora mmosa, okathi iipa awe nsipo omuthukumanoni, aahimoona maama mmosa omoroxaka maithori. Nsipo nlo naalavula sa nlipelelo na ohihimuwa. Yaavinre mahiku vakhaani paahi nuumala okhweliwa mwanawe mwaamuthiyana. Moowaakuveya,  murokora ole aahirowa opuro vaari awe, onvarela mmakhatani ni onapacerya wiipa vamosa. Muhoolo mwaya, maama owo aahimmye so: “Kaahoona wiira kaaniphentiwa vanceene ni anna ni arokora”. Owo aahihakalala vanceene orowa omuthukumanoni. Maama owo onihimya-tho so: “Tthiri mithukumano sinninikhaliherya vanceene”. Nto nikupaliki wiira Yehova onniweha ni onnivaha efaita hata etthu yaamukhaani enipaka ahu wiira niwoonele othunku “alipa-òwojeya” ntoko Biibiliya onihimya awe. — Esal. 34:19.

17. Itthu xeeni niixuntte ahu yoosoma ela?

¹⁷ Nnoolipihiwa vanceene nathokorerya miiriirya sa Yesu siniphwanyaneya iliivuru sa evanxeelyo. Iyo sinniniixuttiha moota Yehova ni Yesu anniphenta aya. Nave sinninooniherya owerya Yesu orina awe wa omaliha mixankiho sootheene sa apinaatamu. Ohiya-vo, sinniniiriha okupali wiira itthu sootheene Yehova oleihenrye awe sinimwiiraneya muhoolo moohipisa okathi Omwene wa Muluku onrowa aya olamulelaka elapo yootheene. Vaavo vanisoma ahu soohimmwa iyo sootheene nihaana wuupuwelelaka moota nikhanle ahu oomutakiha Yesu ni wooniherya mikhalelo sawe. Munoonela sai ompaka palano a yoosoma anyu aahiiso osuka nihiku nimosa na omukokhorela Muluku vatthokoni wiira mwiixutte itthu sikina ni miiriirya sa Yesu? Okathi onrowa anyu opaka eyo, mmananihe wiixutta itthu isya. Nuumala-vo pooti ovaanela ni atthu akina itthu iyo mwiixuntte anyu. Nkahaya muupuwele itthu sooreera ni soolipiha munrowa anyu ovaanela! — aRom. 1:11, 12.

18. Mwaha onittharelana, ninrowa waakhula makoho xeeni?

¹⁸ Wanikisa wa muteko awe valaponi, Yesu aahipaka mwiiriirya wa neeraru ni wookiserya wa omuhihimuxa mutthu. Okathi owo, aahimuhihimuxa mpatthani amphenta awe vanceene. Mwiiriirya owo waari woovirikana ni miiriirya sikina aapanke awe. Maana mpatthani awe owo aahiviriha mahiku maxexe okhwiiye ene. Nniixutta exeeni ni mwiiriirya owo? Nave ninrowa olipiha sai nlipelelo nahu na ohihimuwa? Nnimwaakhula makoho awo yoosoma enittharelana.