1. Matheyo oonihenrye sai wiira aanikupali nlipelelo na ohihimuxiwa?

 MMIRAVO MMOSA oniitthaniwa Matheyo, aaniwereiwa vanceene nto aaniprisari wooperariwa ikwaha sinceene. Okathi aarina awe iyaakha 7, owo ni anamuyari awe yaaniweha eprokrama ya khula mweeri ya JW Broadcasting^®. Nto ehalaka omala eprokrama ele, yaahiwehasa nsipo na eviidiyu. Nsipo nno naawooniherya atthu awaakhelaka amusi aya yaakhwiiye. b Nuumala eprokrama, Matheyo aahiwaattamela anamuyari awe ni aavarela matata onahimya so: “Maama, paapa, hata miyo kikhwaaka, kinoohihimuxiwa. Nto mwakilipeleke”. Tthiri anamuyari awe Matheyo, yaahihakalala vanceene nuumala osuwela wiira mwanaya aahikhalana nlipelelo na ohihimuxiwa.

2-3. Xeeni vari aya vooloka wuupuwelaka yooleiherya ya ohihimuxiwa?

² Khula okathi, ootheene ahu ninnireerela wuupuwelelaka yooleiherya ya mbiibiliyani ya ohihimuxiwa. (Yoh. 5:28, 29) Mwaha wa xeeni? Mwaha woowi khaninsuwela okathi enrowa aya onikhumelela eretta yuulupale aahiiso okhweliwa ole namphenta ahu. (Mus. 9:11; Yak. 4:13, 14) Tthiri nlipelelo nahu na ohihimuxiwa pooti onikhaliherya ovilela khula muxankiho. (1 aTes. 4:13) Biibiliya onihimya wiira Tiithi ahu a wiirimu onninsuwela oratteene nave onniniphenta vanceene. (Luka 12:7) Hata nikhwaaka, Yehova onrowa onihihimuxa ni onivaha mukhalelo ni muupuwelo naarina ahu nihinatthi okhwa. Eyo enooniherya wiira Yehova onninisuwela oratteene. Okhala wiira Yehova onniniphenta vanceene, owo oonivaha eparakha ya okhala mahiku ootheene! Nto hata nikhwaaka, owo onoorowa onihihimuxa ni onivaha okumi woohimala.

³ Mwaha ola, nnooweha nthowa naya ninreerela ahu okupali yooleiherya ya ohihimuxiwa. Moottharelana, nnoothokorerya yoowiiraneya ya mbiibiliyani enlipiha waamini wahu. Yoowiiraneya eyo, tekumihiwe aya muru wa mwaha ahu ola oni: “Murokorinyu onoohihimuxiwa”.  (Yoh. 11:23) Wookiseryani, nnimwiixutta etthu nikhanle ahu oopaka wiira nilipihe nroromelo nahu na ohihimuxiwa.

4. Wiira nikupali etthu eleiheriwe, nihaana osuwela exeeni? Nvahe ntakiheryo.

⁴ Wiira nikupali etthu eleiheriwe, nihaana osuwela akhala wiira mutthu owo onileiherya onniphavela omaliherya etthu eyo ni ookhalana owerya. Nrowe nilikanyihe so: Muupuwele wiira empa anyu yoohononiwa ni epheyo yuulupale. Nuumala-vo, mpatthani anyu onarwa ni onooleelani wiira: ‘Kinimookhaliheryani olokiherya empa anyu’. Nyuwo munnisuwela wiira mpatthani anyu owo khonootha, nto munnikupali wiira onniphavela wookhaliheryani. Akhala wiira owo onnisuwela oteka saana empa ni ookhalana ikaruma sinirumeeliwa, nyuwo munnisuwela wiira onoowerya wookhaliheryani. Nto eyo enniwiirihani okupali yooleiherya awe. Nto munoonela sai yooleiherya ya Muluku ya waahihimuxa atthu akhwiiye? Munoona wiira onniphavela ni ookhalana owerya woomaleliha yooleiherya awe eyo?

5-6. Exeeni ennikupaliha wiira Yehova onniphavela waahihimuxa atthu akhwiiye?

⁵ Niireke Yehova onniphavela waahihimuxa atthu akhwiiye? Aayo. Maana aahaaruma arumeyi awe olepa yooleiherya eyo Biibiliya. (Yes. 26:19; Hos. 13:14; Wiis. 20:11-13) Nto okathi Yehova onileiherya awe etthu, onnimaliherya. (Yoox. 23:14) Moohaanyiherya, Yehova onniphavela vanceene waattikiherya okumi atthu akhwiiye. Exeeni enniiriha ohimyaka siiso?

⁶ Nrowe niwehe ele Yobi aahimmye awe. Owo aanikupali wiira hata okhwaaka, Yehova ammuhihimuxa. (Yob. 14:14, 15) Tthiri, Yehova onniphavela vanceene waahihimuxa arumeyi awe ootheene akhwiiye. Nave onniphavela waaweha ahakalalaka. Nto ankhi atthu ale imilyau sinceene akhwiiye ahinatthi omusuwela Yehova? Nave-tho Muluku ahu oophenta Yehova onimwaahihimuxa. (Mit. 24:15) Yehova oniphavela wiira atthu awo, akhalane eparakha yoomusuwela, ni wiira akhaleke mahiku ootheene valaponi vaava. (Yoh. 3:16) Veekeekhai, vannooneya wiira Yehova onniphavela waahihimuxa atthu akhwiiye.

7-8. Etthu xeeni ennikupaliha wiira Yehova ookhalana owerya wa waahihimuxa atthu akhwiiye?

⁷ Niireke Yehova ookhalana owerya woowaahihimuxa atthu akhwiiye? Aayo! Owo onihimya so: “Miyo ka Muluku Oowerya Sotheene”. (Wiis. 1:8) Muluku ookhalana owerya woowaapwetexa awanani oothene, ohela muhina okhwa. (1 aKor. 15:26) Nto osuwela eyo onninivaha ikuru ni onimaaliha. Nrowe niwehe yoowiiraneya ya murokora Emma Arnold. Owo ni emusi awe yaahivilela mixankiho sinceene seeherenrye waamini waya okathi wa Ekhotto ya Nenli ya Olumwenku Wootheene. Mixankiho iyo, saahela muhina okhweliwa atthu yaaphenta aya mapuro waavariwa muteko mookhanyereriwa wAlemanha. Ophavelaka wiira omulipihe mwanawe mwaamuthiyana, Emma aahimmye so: “Akhala wiira Muluku khonwerya waattikiherya okumi amusi ahu akhwiiye, weeso okhwa wookhalana owerya onvikana Muluku! Masi eyo khahiyo ekeekhai”. Maana khuuvo orina owerya wuulupale onvikana Yehova! Muluku oowerya sootheene yoowo opattunxe okumi, moohaanyiherya onimwaattikiherya okumi ale akhwiiye.

⁸ Ehaavo etthu ekina enniiriha ohimyaka wiira Muluku onimwaahihimuxa atthu akhwiiye. Owo ookhalana muupuwelo ohinimala. Wiira muupuwelele paahi, Yehova onnisuwela nsina na khula etheneeri. (Yes. 40:26) Moolikanasa, Yehova onniwuupuwela atthu ootheene akhwiiye. (Yob. 14:13; Luka 20:37, 38) Nto khivanrowa onvila Yehova waahihimuxa atthu ale akhwiiye ni mikhalelo yaarina aya. Nave eyo enihela muhina moota yaari aya owiitho waya, mikhalelo saya ni itthu saakhumelenle mookumini mwaya.

9. Xeeni munikupali anyu yooleiherya ya Yehova ya ohihimuxiwa?

⁹ Moohaanyiherya, sihaavo itthu sinceene sinnikupaliha wiira Yehova onimwaahihimuxa atthu akhwiiye. Maana, ninnisuwela wiira Yehova  onniphavela ni ookhalana owerya woopaka eyo. Masi ehaavo etthu ekina enniiriha-tho okupaliki yooleiherya eyo. Etthu ene tiila: Yehova aahaahihimuxa atthu yaakhwiiye khalai. Nave Yehova aahaavaha arumeyi awe omuhela muhina Yesu owerya wa waahihimuxa atthu yaakhwiiye. Vano nrowe niwehe yoowiiraneya emosa ya mulopwana aahihimuxiwe ni Yesu eri Yohani ekapiitulu 11.

10. Exeeni Yesu aaleeliwe awe, nto aavirinhe mahiku makavi wiira ophiye oBethania? (Yohani 11:1-3.)

¹⁰ Mmusome Yohani 11:1-3. Nrowe nuupuwelele ele yiiraneyale oBethania, mwaakha wa 33 Nuumala Kristu Orwa. Muttetthe ole Yesu aahikhalana apatthani awe aalupale: Laazaro ni axirokorawe anli, Marta ni Maria. (Luka 10:38-42) Masi Laazaro aahipacerya owereiwa vanceene. Tivonto axirokorawe ale yaahixanka. Nto awo yaahivekela oleeliwa Yesu, yoowo aari muttetthe mukina wa muro Yordani. Wiira mutthu ophiye muttetthe ole, aahaana weetta mahiku manli mwentto. (Yoh. 10:40) Mooriipiha murima, Laazaro aahikhwa woonasa wene okathi yoole Yesu aaleeliwe awe wiira yena anwereiwa. Hata Yesu aasuwenle wiira mpatthani awe aahikhwa, owo aahilipelela ovira mahiku manli wiira okhume orowaka oBethania. Nto Yesu aaphiyale oBethania avinre ene mahiku maxexe nuumala Laazaro okhwa. Xeeni Yesu ohalaka olipelela ovira mahiku awo? Owo aaphavela waakhaliherya apatthani awe. Nave aaphavela opaka etthu yaarowa onvuwiha Yehova Muluku. — Yoh. 11:4, 6, 11, 17.

11. Yoowiiraneya ya Laazaro enniixuttiha exeeni voohimya sa opatthani?

¹¹ Yoowiiraneya ela enniniixuttiha itthu sinceene voohimya sa opatthani. Nrowe nuupuwelele ela: Okathi Marta ni Maria yaarumme aya oleeliwa Yesu, awo khiyanvekenle wiira aahaana orwa oBethania. Masi yaaphavela omuhimeerya paahi wiira mpatthani awe anwereiwa. (Yoh. 11:3) Ohiya-vo, Yesu anwerya omuhihimuxa Laazaro hata ohironwe oBethania. Hata vari siiso, Yesu aahilakela orowa oBethania wiira akhale vamosa ni apatthani awe, Marta ni Maria. Niireke nyuwo mookhalana mpatthani anyu siisa, khula okathi oniphavela wookhaliheryani hata muhinvekenle? Akhala wiira ti siiso, muhaana omuroromelaka mpatthani anyu owo wiira onimookhaliheryakani hata “okathi w’oxanka”. (Mir. 17:17) Nimutakihaka Yesu, nnoowerya okhala mpatthani ooloka! Vano nrowe ntthikele yoowiiraneya ya Laazaro wiira niwehe etthu yiiraneyale moottharelana.

12. Yesu aamuleihenrye exeeni Marta? Xeeni Marta aareerela awe okupali yooleiherya eyo? (Yohani 11:23-26.)

¹² Mmusome Yohani 11:23-26. Marta aahiiwa wiira Yesu aanirwa. Nto aahikhuma otthimakaka orowaka okumana ni yena. Onamuhimeerya wiira: “Pwiya, mwaari vaava, murokoraka khaarowa okhwa”. (Yoh. 11:21) Ekeekhai wiira Yesu anwerya ompenuxa Laazaro ohinatthi okhwa. Masi aaphavela opaka etthu yootikiniha! Nto owo aahimuleiherya Marta oriki: “Murokorinyu onoohihimuxiwa”. Nave Yesu aahimuleela Marta nthowa naya aareerela awe okupali yooleiherya eyo oriki: “Miyo ki ohihimuwa ni okumi”. Eyo enooniherya wiira Yesu aahivahiwa owerya ni Muluku wiira aahihimuxe atthu akhwiiye. Ninnisuwela eyo okhala wiira Yesu iira otonko ene waahihimuxa atthu anli. Oopacerya, mwaaruusi aamuhihimunxe awe omalaka-ru okhwa. A nenli, mmiravo aamuhihimunxe awe woonasa wene nihiku nenlo aakhwiiye awe. (Luka 7:11-15; 8:49-55) Niireke Yesu anwerya omuhihimuxa Laazaro yoowo aavirinhe  mahiku maxexe okhwiiye ene? Erutthu awe yiira epacenrye ene wuntta!

13. Moovarihana ni Yohani 11:32-35, Yesu oonenle sai nuumala onweha Maria ni atthu akina yinlaka? (Nwehe eteseenyo.)

¹³ Mmusome Yohani 11:32-35. Muupuwele wiira nyuwo muri opuro ole, nwehaka itthu sootheene siiraneya. Vano Maria murokora awe Laazaro, onnimoona Yesu. Nto onnitthikela omuleela moolumo mamosa-ru Marta aamulenle awe Yesu oriki: “Pwiya, mwaari vaava, murokoraka khaarowa okhwa”. Maria vamosa ni atthu akina yaari vaavale, yaahiriipiwa murima vanceene ni yaaninla. Nuumala Yesu waaweha yinlaka, owo aahiriipiwa murima vanceene ni aahixanka. Vano oonaka owereya mwaha woowaaweha apatthani awe ariipiwe ene murima, Yesu aahipacerya wunla. Owo aanisuwela owereya waya, okhweliwa mutthu onimphenta ahu. Tthiri yena aaniphavela omala-maliha muxankiho waawiiriha apatthani awe ale oriipiwa murima.

14. Moonelo wa Yesu nuumala onweha Maria anlaka, onniixuttiha exeeni voohimya sa Yehova?

¹⁴ Moonelo wa Yesu nuumala onweha Maria anlaka, onniixuttiha wiira Yehova Muluku toosareya othunku. Ninsuwela sai eyo? Ntoko niwenhe ahu mwaha ovinre, Yesu onnitakiha moomalela othunku ni miyuupuwelelo sa Tiithi awe, Yehova. (Yoh. 12:45) Nto, okathi ninsoma ahu moota Yesu aawonenle awe othunku apatthani awe mpakha wunla, eyo ennikupaliha wiira Yehova onninoonela othunku ni onnixanka okathi onniweha awe ninlaka. (Esal. 56:9) Osuwela eyo, onnincererya ophavela wahu okhala mpatthani a Muluku ahu oophenta, Yehova. Khahiyo siiso?

15. Moovarihana ni Yohani 11:41-44, exeeni yiiraneyale nuumala Yesu ophiya opuro Laazaro aavithiwa awe? (Nwehe eteseenyo.)

¹⁵ Mmusome Yohani 11:41-44. Yesu aahiphiya opuro avithiwa awe Laazaro, nto aahivekela wiira nikumihiwe nluku naari vamukhora. Marta aahaakhula wiira opaka eyo khiyaarowa okhala etthu yooloka, okhala wiira murutthu awe waahipacerya wunkha. Masi Yesu aahimwaakhula oriki: “Nkoohimenryeni wira mwakupali, mwanweha ovuwa wa Muluku?” (Yoh. 11:39, 40) Nuumala-vo, Yesu aahiweha wiirimu onapaka nivekelo. Owo aaphavela onvaha Yehova ovuwa wootheene wa itthu iye saarowa wiiraneya. Nuumala-vo aahikhuwela oriki: “Laazaro, mukhumele ota!” Vano Laazaro aahikhuma mmahiye eettaka. Yesu aahipaka etthu yootikiniha yaakhala ntoko khiyaaweryaneya. —Nwehe mwaha oni: “Você Sabia?, Por que Jesus demorou quatro dias para chegar ao túmulo de Lázaro?” okumihiwe erevista A Sentinela a 1 a Janeiro, 2008.

16. Yohani ekapiitulu 11 onlipiha sai waamini wahu nlipelelo na ohihimuxiwa?

¹⁶ Eliivuru ya Yohani ekapiitulu 11, ennilipiha waamini wahu nlipelelo na ohihimuxiwa. Enlipiha sai? Muupuwele yooleiherya Yesu aamuhimenrye awe Marta oriki: “Murokorinyu onoohihimuxiwa”. (Yoh. 11:23) Moolikanasa ni Tiithi awe, Yesu onniphavela ni ookhalana owerya woomaleliha yooleiherya eyo. Wunla wa Yesu onooniherya wiira yena onniphavela ni murima wootheene omaliha okhwa ni mixankiho sinikumiheriwa ni okhwa. Okathi ole, Laazaro aakhumme awe mmahiye Yesu aahooniherya wiira ookhalana owerya woowaahihimuxa atthu akhwiiye. Ohiya-vo, muupuwelele etthu Yesu aamuupuxenrye awe Marta oriki: “Nkoohimenryeni wira mwakupali, mwanweha ovuwa wa Muluku?” (Yoh. 11:40) Nto nookhalana mathowa ooloka anniiriha okupali wiira yooleiherya ya Muluku ya ohihimuxiwa atthu akhwiiye enimwiiraneya. Nto nihaana opaka exeeni wiira nitepeke okupali yooleiherya eyo?

17. Exeeni ninreerela ahu wuupuwelelaka okathi ninsoma ahu soowiiraneya sa mbiibiliyani sa ohihimuxiwa?

¹⁷ Musomeke ni mwiivaheke okathi wiira nwuupuweleleke atthu yaahihimuxiwe khalai. Mbiibiliyani ninniphwanya soowiiraneya 8 sa atthu yaahihimuxiwe. c Munoonela sai wiivaha okathi wiira musome soowiiraneya iyo? Nto okathi munisoma anyu muhiliyale wiira awo yaari alopwana, athiyana ni anamwane yaatonko okhala valaponi. Nto khula yoowiiraneya munisoma anyu mphaveleke wiixutta etthu. Muupuweleleke moota ohihimuxiwa wa atthu awo onnilipiha aya wiira Muluku onniphavela ni ookhalana owerya wa waattikiherya okumi atthu akhwiiye. Mwiivaheke okathi wiira muupuweleleke efaita orina aya ohihimuxiwa wa Yesu. Ohihimuxiwa wawe waahooniwa ni atthu imiya sinceene. Eyo ennilipiha waamini wahu wiira ohihimuwa onimwiiraneya. Nto muhiliyale eyo.— 1 aKor. 15:3-6, 20-22.

18. Munrowa ottottela sai mureerelo masipo ni muusika sinlavula sa ohihimuxiwa? (Nwehe enoota.)

 ¹⁸ Nwiriyaneke muusika ni masipo anlavula sa ohihimuxiwa. d (aEef. 5:19) Masipo awo annilipiha waamini wahu ni nlipelelo na muhoolo. Owiriyana masipo awo onooniiriha okupali wiira ohihimuxiwa onimwiiraneya. Nto nwiriyaneke ni munsayariki masipo awo. Okathi woomulompa Muluku vatthokoni, nwiriyaneke isipo sa omwene ni muthokoreryeke ele enihimya aya. Muheleke mmuru ni vamurimani masipo awo. Akhala wiira enimoophwanyani eretta yuulupale aahiiso mookhweliwa ole mwamphenta anyu, ikuru sa Muluku sinimookhaliheryani wuupuwelela ele anihimya aya masipo awo. Nto masipo awo animoovahani ikuru ni woomaalihani.

19. Itthu xeeni ninreerela ahu wuupuwelelaka voohimya sa ohihimuxiwa? (Nwehe ekaaxa eni: “ Etthu Xeeni Muniphavela Anyu Orowa Waakoha?”)

¹⁹ Muupuweleleke itthu sa muhoolo. Yehova oonivaha eparakha ya wuupuwelelaka itthu sinrowa wiiraneya mparayiisu. Murokora mmosa ohimmye so: “Kooviriha okathi munceene kuupuwelelaka moota okumi aka onrowa aya okhala mparayiisu. Okathi owo vanikhala ntoko wiira kinoona wunkhela wa ifilori sooreera siri mparayiisu”. Mwiivaheke okathi wiira muupuwelele ohakalala onrowa okhala waasuwela alopwana ni athiyana oororomeleya a okathi wa khalai aniromoliwa mbiibiliyani. Tani mwaaphavela anyu waasuwela? Exeeni muniphavela anyu orowa waakoha? Nave-tho muupuwelele ohakalala onrowa okhala otthikela okhala hoothe ni amusi vamosa ni apatthani anyu akhwiiye. Nkahaya muupuwelele khula etthu munrowa anyu opaka nuumala okumana. Mwa ntakiheryo: Muupuwelele moolumo oopacerya munrowa anyu olavula, moota munrowa anyu omukhupaarela ni maithori munrowa anyu omoroxa mwaha woohakalala!

20. Exeeni nilakenle ahu ohihiya opaka?

²⁰ Ninnimuxukhurela vanceene Yehova mwaha wa yooleiherya awe ya waahihimuxa atthu akhwiiye! Nto nikupaliki wiira Yehova onoomaliherya yooleiherya eyo. Mwaha wa xeeni? Mwaha woowi yena ookhalana owerya ni onniphavela waahihimuxa apatthani ahu. Tivonto, nihihiye olipiha nroromelo nahu na yooleiherya eyo yoohakalaliha. Napaka eyo, nnoomwaattamela Yehova. Owo oomuleiherya khula mmosa a hiyo oriki: ‘Ale munaaphenta anyu akhwiiye anootthikela okhala akumi’.