1. Xeeni ninkomentari ahu mmuthukumanoni?

 XEENI ninrowela ahu mithukumano sa mmulokoni? Etthu yuulupale enniiriha ori onvuwiha Yehova. (Esal. 26:12; 111:1) Etthu ekina, okhala wiira nimphavela olipihana mukina ni mukhwawe, otepaka wene okathi ola wooxankiha ninkhala ahu. (1 aTes. 5:11) Nto okathi nneemexa ahu ntata ni nnakomentari, ninninvuwiha Yehova ni waalipiha anna ni arokora.

2. Okathi xeeni ninkhalana ahu eparakha ya okomentari mmithukumanoni?

² Khula esumana, ninnikhalana eparakha ya ovaha ikomentaario sahu omuthukumanoni. Mwa ntakiheryo, wuumalani wa esumana ninnikhalana eparakha ya okomentari okathi wa Yoosoma ya Owehaweha. Nave eriyari ya esumana, ninnikomentari okathi wa Itthu sa Efaita sa Mbiibiliyani, Yoosoma ya Biibiliya ya Muloko ni ipantta sikina sa muthukumano.

3. Mixankiho xeeni nikhanle ahu ookhalana? Nto masu ari aHeeberi 10:24, 25, annikhaliherya sai?

³ Ootheene ahu, ninniphavela vanceene onvuwiha Yehova ni waalipiha anna ni arokora. Masi okathi nimphavela ahu okomentari, woonasa wene ninnikhalana mixankiho. Hiyo pooti woovelelaka ovenxa ntata wiira nikomentari. Nave pooti ophavelaka okomentari ikwaha sinceene, masi nihinathanliwa ikwaha sootheene nimphavela ahu. Nto ninrowa oxintta sai mixankiho iya? Ekarta murummwa Paulo aalepenle awe aHeeberi, enoonikhaliherya ophwanya waakhuliwa wa nikoho nna. Olavulaka sa efaita erina aya othukumana, Paulo aahaaleela aHeeberi wiira yaahaana oluttuweliwaka ‘olipihana mukina ni mukhwaawe’. (Mmusome aHeeberi 10:24, 25.) Nto vaavo ninsuwela ahu wiira ninnaalipiha anna ni arokora hata ekomentaario ahu ekhalaka yaamukhaani, khaninrowa woovelelaka okomentari. Hata nihithanliwaka ikwaha sootheene naaphavela ahu, hiyo  ninnihakalala osuwela wiira anna ni arokora akina aawerya ovaha ikomentaario saya. — 1 Ped. 3:8.

4. Itthu xeeni tthaaru ninrowa ahu othokorerya mwaha ola?

⁴ Mwaha ola, nnooweha itthu tthaaru. Yoopacerya, moota nikhanle ahu oolipihana mukina ni mukhwaawe miloko saamukhaani, memmo ahinaatta aya atthu anivaha ikomentaario. Ya nenli, ninrowa oweha moota woolipihana mukina ni mukhwaawe miloko suulupale memmo anaatta aya atthu anivaha ikomentaario. Ya neeraru ni yookiserya, ninrowa oweha etthu nikhanle ahu oopaka wiira ele enihimya aya ekomentaario ahu yaalipiheke anna ni arokora.

5. Ninrowa olipihana sai mukina ni mukhwaawe muloko mwaamukhaani?

⁵ Muloko mwaamukhaani wala ekhurupu, khanaatta atthu anivaha ikomentaario. Nto ikwaha sikina, munna onihoolela ohaana olipelela vakhaani wiira okhale mutthu onivenxa ntata wiira okomentari. Eyo yiiraneya, pooti wiirihaka muthukumano owo opisa omala aahiiso okhulumula. Nto exeeni mukhanle anyu oopaka? Nvenxeke ntata ikwaha sinceene. Maana mwiira siiso, munimwaatumererya atthu akina ophavelaka okomentari.

6-7. Itthu xeeni munreerela anyu opaka wiira muhitepe oxanka okathi muniphavela anyu okomentari?

⁶ Ankhi akhala wiira munnixanka okathi munivaha anyu ekomentaario? Atthu anceene anoonela siiso. Nto munrowa opaka exeeni wiira nvukule oxanka, okathi munikomentari anyu ni owerya waalipiha anna ni arokora?

⁷ Nyuwo muhaana otthikela oweha myaha sikumiheriwe erevista Owehaweha. b Mwa ntakiheryo, etthu mukhanle anyu oopaka ori olokiherya khula muthukumano. (Mir. 21:5) Nto okathi munisuwela anyu mwaha onrowa othokoreriwa omuthukumanoni, munimoonaka okhweya okomentari. Etthu ekina, ori ovaha ikomentaario sookhuveya. (Mir. 15:23; 17:27) Akhala wiira munoovaha ekomentaario yookhuveya, munoovukula oxanka. Ohiya-vo, anna anniiwexexa ekomentaario yookhuveya, ya moolumo vakhaani, ohiya yoorakama ni yoowaattana moolumo. Okathi munivaha anyu ekomentaario yookhuveya ni moolumo anyu, munimooniherya wiira muhiilokiherya saana ni muhiiwexexa mwaha owo.

8. Yehova onoonela sai wiimananiha wahu?

⁸ Masi ankhi akhala wiira muheererya inamuna iya sootheene, masi nlelo munaxanka mwaaphavelaka okomentari? Mukupaliki wiira Yehova onnivaha efaita yinceene itthu sootheene muniwerya anyu opaka. (Luka 21:1-4) Tthiri, Yehova khonnivekela opaka etthu nihinwerya ahu. (aFil. 4:5) Musuweleke etthu muniwerya anyu opaka, nuumala-vo mpakeke okhala yoolukama anyu ni munvekeleke Yehova wiira oovaheeni murima woomaaleleya. Wanipacerya, yoolukama anyu ekhaleke ovaha ekomentaario yookhuveya.

9. Muxankiho xeeni onikhumelela muloko muulupale?

⁹ Akhala wiira muri muloko ari aya anamalaleerya anceene, itthu pooti oturukeya. Woonasa wene, pooti wiira anna anceene annivenxa moono wiira akomentari, masi ikwaha sinceene munna orina mpantta owo, khonoothanlani wiira mukomentari. Mwa ntakiheryo, murokora mmosa oniitthaniwa Paula, onnimusivela okomentari mmuthukumanoni. c Owo onnoona okomentari okhala  enamuna onimukokhorela awe Yehova, waalipiha akina ni enamuna ya wuncererya osuwela wawe itthu Biibiliya oniixuttiha awe. Masi nuumala yena othaamela muloko muulupale, aathanliwa ikwaha vakhaani. Nave ikwaha sikina, saanimala mithukumano ohithanliwe wiira okomentari. Paula onihimya so: “Kaaniriipiwa murima vanceene, vakhala ntoko wiira kaayelela eparakha. Nto akhala wiira eyo enniiraneya ikwaha sinceene, nyuwo pooti wuupuwelaka wiira munna owo onoolakela ohoothanlani”.

10. Ninrowa wuncererya sai inamuna sahu sa okomentari mmuthukumanoni?

¹⁰ Niireke mootoko okhalana moonelo mmosa-ru wa Paula? Akhala wiira eyo enniwiiraneelani, woonasa wene munniphavela ohiya weemexa ntata wiira nwiriyaneke mithukumano paahi. Masi muhihiye weererya okomentari. Nto etthu xeeni munreerela anyu opaka? Nyuwo pooti olokiherya ikomentaario sinceene sa khula mpantta. Akhala wiira khamunthanliwa wanipacerya wa mpantta owo, nyuwo munookhalana-tho eparakha ya okomentari ipantta sikina. Okathi munlokiherya anyu yoosoma ya Owehaweha, mmananiheke wuupuwelela khuta ettima moota envarihana aya ni mwaha owo. Nto mwapaka eyo, munoowerya ovaha ikomentaario sanyu. Ohiya-vo, nyuwo pooti wiilokiherya wiira mukomentari ittima seiye sinlavula myaha sooxankiha, okhala wene siri soovila otthokiherya. (1 aKor. 2:10) Mwaha wa xeeni? Mwaha woowi atthu vakhaani tanivenxa ntata okathi sinithokoreriwa aya myaha iyo. Ankhi akhala wiira muheererya malakiheryo ala masi nlelo muhinawerya okomentari mmuthukumanoni? Nyuwo pooti olavula ni munna onihoolela epantta eyo, sihinatthi opacerya mithukumano mmuleelaka ettima mwaaphavela anyu okomentari.

11. Yoolepa ya aFilipi 2:4, ennitumererya opaka exeeni?

¹¹ Mmusome aFilipi 2:4. Murummwa Paulo, aahaatumererya makristau wiira aphaveleke mureerelo wa atthu akina. Ninrowa otthara sai malakiheryo awo okathi wa mithukumano? Nuupuwelaka wiira nave atthu akina anniphavela okomentari.

12. Enamuna xeeni yooloka yoowaalipiha anna mmithukumanoni? (Nwehe efootu.)

¹² Muupuwele ela: Okathi munivaanela anyu ni apatthani anyu, niireke munnilavula okathi  wootheene, nto muhinaahiya apatthani anyu wiira alavuleke? Nnaari. Maana nyuwo munniphavela wiira apatthani anyu awo alavuleke. Moolikanasa, nimphavela wiira atthu anceene akomentariki okathi wa mithukumano. Mweekeekhai, enamuna emosa ya waalipiha anna ori waavaha eparakha yoowooniherya waamini waya okathi anikomentari aya. (1 aKor. 10:24) Vano nrowe niwehe moota nikhanle ahu oopaka eyo.

13. Itthu xeeni nikhanle ahu oopaka wiira atthu akina aweryeke okomentari?

¹³ Etthu emosa nikhanle ahu oopaka ori ovaha ikomentaario sookhuveya. Maana opaka eyo, enimwaakhaliherya atthu anceene ovaha ikomentaario saya. Axitokweene, anna ni arokora yiixuntte ekeekhai khalai, pooti ovaha ntakiheryo nooloka. Hata nvahaka ekomentaario yookhuveya, musyakeke olavula iponto sinceene sa ettima eyo. Vakhala wiira munoolavula iponto sootheene sa ettima eyo, anna akina khanirowa owerya okomentari. Mwa ntakiheryo, ettima ela nihoona itthu piili: Yoopacerya, ovaha ekomentaario yookhuveya ni ya nenli, ohilavula iponto sootheene sa ettima. Akhala wiira nyuwo mpacenrye othanliwa wiira mukomentari ettima eyo, munoonela sai olavula eponto emosa paahi?

14. Exeeni enrowa onikhaliherya othanla ikwaha kavi nikhanle ahu oovenxa ntata? (Nwehe efootu.)

¹⁴ Muupuweleke saana okathi munithanla anyu ikwaha kavi muniphavela anyu okomentari. Akhala wiira munoovenxaka ntata ikwaha sinceene, eyo enoomwiiriha muhooleli omakelaka woothanlani nnaamwi anna akina ahikomentari. Tthiri opaka eyo enoowiiriha atthu akina ohivenxa ntata wiira akomentari. — Mus. 3:7.

15. a) Nooneleke sai okathi muhooleli ohinnithanla awe wiira nikomentari? b) Akhala wiira mwa muhooleli a mpantta orina makoho ni waakhuliwa, munrowa wooniherya sai wiira munnaathokorerya atthu ootheene? (Nwehe ekaaxa eni: “ Akhala Wiira Mwa Muhooleli a Mpantta Orina Makoho ni Waakhuliwa”.)

¹⁵ Akhala wiira atthu anceene annivenxa ntata wiira akomentari, woonasa wene hiyo pooti ohiwerya okomentari ntoko naaphavela ahu.  Nave ikwaha sikina, munna onihoolela pooti ohiwerya onithanla nnakhala ekwaha emosa. Nto eyo pooti onikhulumula, masi nihaakuveke onyoonyiheya mwaha woohithanliwa. — Mus. 7:9.

16. Ninrowa waalipiha sai ale anivaha ikomentaario saya?

¹⁶ Akhala wiira khanwenrye okomentari ikwaha sinceene ntoko mwaaphavela anyu, munoonela sai owiriyana ikomentaario sa atthu akina, nuumala muthukumano munaattottopela? Woonasa wene, anna ni arokora anoolipihiwa vanceene ni moolumo anyu, ntoko ikomentaario mwaarowa anyu ovaha. (Mir. 10:21) Waattottopela atthu akina, enamuna ekina ninlipihana ahu mukinaku ni mukhwaawe.

17. a) Moota xeeni anamuyari anrowa aya waakhaliherya anaaya ovaha ikomentaario sooloka moovarihana ni iyaakha saya? b)  Moovarihana ni eviidiyu, itthu xeeni 4 nikhanle ahu oopaka wiira nilokiherye ikomentaario? (Nwehe enoota.)

¹⁷ Inamuna xeeni sikina, ninlipihana ahu mmuthukumanoni? Mwakhalana anamwane, mwaakhaliheryeke olokiherya ikomentaario moovarihana ni iyaakha saya. (Math. 21:16) Ikwaha sikina, myaha suulupale ntoko mixankiho sa vatthokoni ni moota wookhalana mweettelo wooloka sinoothokoreriwa okathi wa yoosoma eyo. Hata vari siiso, enookhala ettima emosa aahiiso piili aniinyu akhanle aya ookomentari. Masi mwaakhaliheryeke aniinyu  wiiwexexa wiira khahiyo khula okathi anrowa aya ovenxaka ntata anrowa othanliwaka. Mwiira siiso, okathi atthu akina anithanliwa aya ettima aniinyu yaalokihenrye aya, awo khanrowa oriipiwa murima. — 1 Tim. 6:18. d

18. Ninrowa osyaka sai wiihimya okathi onikomentari ahu? (Miruku 27:2.)

¹⁸ Ootheene ahu nnoowerya ovaha ikomentaario sinaalipiha anna ni sininvuwiha Yehova. (Mir. 25:11) Ikwaha sikina, hiyo pooti ovahaka ekomentaario enivarihana ni etthu eniiranenle. Masi, nihaana ovaha ephoole wiira nihikhale atthu oowiihimya. (Musome Miruku 27:2; 2 aKor. 10:18) Ohiya-vo, ikomentaario sahu sihaana olavulaka voohimya sa Yehova, Nuulumo nawe ni arumeyi awe. (Wiis. 4:11) Masi akhala wiira ettima eyo enivekela ohimya yoowiiraneya ahu, hiyo pooti opaka eyo. Ntakiheryo na moota woopaka eyo, nnooweha ettima enittharelana.

19. a) Exeeni enikhumelela akhala wiira ninnaathokorerya atthu ootheene okathi wa mithukumano? (aRoma 1:11, 12.) b) Xeeni vanoosivelaaya-ni okomentari okathi wa mithukumano?

¹⁹ Ekeekhai wiira khanikhanle nlamulo na moota wookomentari, masi ootheene ahu nihaana wiimananiha waalipiha anna ni arokora okathi ninkomentari ahu. Enamuna emosa nikhanle ahu oopaka eyo, ori wiimananiha okomentari khula muthukumano. Ikwaha sikina eyo enihela muhina ohakalala ni eparakha nrina ahu ya okomentari ni otteeliwa murima okathi nnaaweha ahu atthu akina akomentariki. Tthiri vaavo ninhela ahu nipuro noopacerya soophavela sa atthu akina okathi wa mithukumano, ninniwerya ‘olipihana’. — Mmusome aRoma 1:11, 12.