1-2. Etthu xeeni enireerela ahu opaka vaavo ninlipelela ahu elapo esya?

 NINNIMUXUKHURU vanceene Yehova, mwaha wa natiri awe a oturuka elapo ela yoohiloka ni elapo esya ya murettele. (2 Ped. 3:13) Hata nihisuwelaka nihiku Yehova onrowa awe opake eyo, itthu sinoona ahu siiraneyaka mulaponi sinooniherya wiira okathi ohanle ori vakhaani. — Math. 24:32-34, 36; Mit. 1:7.

² Hata nipacenrye ene khalai omurumeela Yehova, ootheene ahu nihaana olipiha omwaamini wahu natiri owo. Nthowa xeeni? Nthowa noowi vaavo vanivira aya okathi waamini wahu pooti opacerya ovukuwa. Tthiri, murummwa Paulo ohimmye wiira ohikhalana waamini “etampi enaakuva onihopha”. (aHeeb. 12:1) Wiira waamini wahu ohivukuwe, nihaana othokorerya oratteene itthu siniiraneya valaponi seiyo sinooniherya wiira elapo esya eri vakhiviru. — aHeeb. 11:1.

3. Itthu xeeni ninrowa ahu othokorerya mwaha ola?

³ Mwaha ola, ninrowa othokorerya inamuna tthaaru sa moota woolipiha waamini wahu yooleiherya ya Yehova ya elapo esya: (1) wuupuwelela mukuttho wowoopola, (2) wuupuwela owerya wa Yehova ni (3) orumeela okathi ahu nivaraka miteko sa Muluku. Moottharelana, ninrowa woona moota woolipiha waamini wahu nithokoreryaka muhupi Yehova anvahale awe Habakuki. Masi wanipacerya, nnooweha moota nihaana olipiha waamini wahu sooleiherya sa elapo esya wiira niwerye oxintta mixankiho sinniphwanya olelo-va.

XEENI NINREERELA AHU OLIPIHA WAAMINI WAHU?

4. Soothanla xeeni sinivekela okhalana waamini woolipa?

⁴ Khula nihiku, nihaana opaka soothanla, suulupale wala saamukhaani.  Okhalana waamini woolipa, onoonikhaliherya opaka soothanla sooloka. Mwa ntakiheryo, khula nihiku ninnipaka soothanla sinihela muhina waathanla apatthani, otthekula, osoma oxikola, othela wala otheliwa, anamwane ni muteko wa mulaponi. Nto nihaana wiikoha so: ‘Kiireke soothanla saka sinnooniherya wiira kinnikupali wiira elapo ela ehanle vakhaani oranttelihiwa ni elapo esya? Aahiiso soothanla saka sinivarihana ni muupuwelo wa atthu a mulaponi yaawo anikupali wiira khivaniweryaneya okhala moohimala?’ (Math. 6:19, 20; Luka 12:16-21) Akhala wiira nnoolipiha waamini wahu wiira elapo esya eri vakhiviru, nnoowerya opaka soothanla mwa miruku.

5-6. Xeeni vari aya vooloka okhalana waamini woolipa okathi sinniphwanya aya mixankiho suulupale? Nvahe nlikanyiho.

⁵ Hiyo nihaana okhalana waamini woolipa wiira nivilele mixankiho sinniphwanya. Mixankiho ntoko olupatthiwa, iretta sihinivoniwa, wala mixankiho sikina pooti onikhulumula. Woopaceryani, hiyo pooti wuupuwelaka wiira nnoowerya oxintta mixankiho sinniphwanya. Masi, mixankiho ntoko iyo, ikwaha sinceene sinnipisa omala. Ti maana aya vari aya vooloka olipiha waamini wahu wiira nihihiye omurumeela Yehova moohakalala. — aRom. 12:12; 1 Ped. 1:6, 7.

⁶ Okathi onniphwanya aya muxankiho muulupale, ikwaha sikina ninnipacerya wuupuwela wiira elapo esya Yehova oleihenrye awe, khenkhala-khala erwaaka. Niireke muupuwelo owo ontaphulela wiira waamini wahu woovukuwa? Nnaari. Muthokorerye nlikanyiho nna: Eyiita yaphiya vanniriirya ni ennirupa epula yinceene. Nto okathi owo hiyo pooti wuupuwelaka wiira elimwe khenikhala-khala-tho ephiyaka. Masi enapisaka-ru elimwe, enniphiya. Moolikanasa, okathi sinniphwanya aya mixankiho suulupale, pooti wuupuwelaka wiira elapo esya khenkhala-khala ephiyaka. Masi nakhalana waamini woolipa ninrowa okupaliki wiira Yehova onimwaataphula anatiri awe ootheene. (Esal. 94:3, 14, 15; aHeeb. 6:17-19) Akhala wiira ninnikupali eyo, khaninrowa ohiya ohela opuro woopacerya omukokhorela Yehova mookumini mwahu.

7. Moonelo xeeni woohiloka ninreerela ahu osyaka?

⁷ Hiyo nave-tho nihaana okhalana waamini woolipa wiira nilaleerye. Atthu anceene nnaalaleerya ahu “ihapari iya sooreera” voohimya sa elapo esya ya Muluku, khanikupali. (Math. 24:14; Ezek. 33:32) Masi, nihikhala-khale neemereryaka wiira moonelo aya woohiloka ohonone muupuwelo ahu. Wiira nisyake moonelo owo woohiloka, nihaana olipiha waamini wahu. Nrowe nithokorerye inamuna tthaaru sinrowa onikhaliherya opaka eyo.

WUUPUWELELA MUKUTTHO WOOWOOPOLA

8-9. Wuupuwelela mukuttho woowoopola onlipiha sai waamini wahu?

⁸ Enamuna emosa ya olipiha waamini wahu ti wuupuwelela mukuttho woowoopola. Mukuttho woowoopola ethoonyeryo yuulupale yoowi Yehova onoomaliherya sootheene oleihenrye awe. Wuupuwelela etthu emwiirinhe Yehova ovaha mukuttho woowoopola ni itthu sootheene Yehova olenve awe, onoolipiha waamini wahu wiira Yehova onoopaka itthu oleihenrye awe. Nave wiira onoonivaha okumi woohimala elapo esya ya murettele. Xeeni ninhimya ahu siiso?

⁹ Wiira ovahe mukuttho woowoopola, Yehova aahimuruma mwanawe mmoseene, yoowo onimphenta awe vanceenexa wiira oyariwe ntoko pinaatamu valaponi. Ori ene valaponi, Yesu aahihaawa mwaha wa mixankiho sinceene. Wanikisa waya aahikhwa nuumala ohaaxiwa. Tthiri Yehova aahileva etthu ya faita yuulupale wiira ovahe mukuttho woowoopola!  Muluku ahu oophenta, khaarowa weemererya wiira mwanawe ohaaxiwe wiira niphwanye okumi iyaakha vakhaani paahi. (Yoh. 3:16; 1 Ped. 1:18, 19) Okhala wiira oovaha etthu ya faita yuulupale wiira niphwanye okumi woohimala elapo esya, moohaanyiherya, Yehova onoomaliherya sootheene oleihenrye awe.

WUUPUWELA OWERYA WA YEHOVA

10. Moovarihana ni aEefeso 3:20, etthu xeeni Yehova oniwerya awe opaka?

¹⁰ Enamuna ya nenli ekhanle oonikhaliherya olipiha waamini wahu ti wuupuwela owerya wa Yehova. Owo ookhalana owerya wa omaliherya sootheene oleihenrye awe. Ekeekhai wiira pinaatamu pooti woonaka okhala etthu ehiniweryaneya okhala mahiku ootheene elapo esya. Masi, okhala wene, Yehova onnileiherya opaka itthu seiyo apinaatamu ahinwerya aya. Maana, Yehova, Muluku Oowerya Sootheene. (Yob. 42:2; Mar. 10:27) Okhala wiira toowerya, ti nthowa naya onileiherya awe opaka itthu sooreera. — Mmusome aEefeso 3:20.

11. Nvahe ntakiheryo nimosa na yooleiherya Yehova omalihenrye awe hata vaakhala ntoko khivaaweryaneya. (Nwehe ekaaxa eni: “ Itthu Muluku Aaleihenrye Awe Siiraneyale”.)

¹¹ Nrowe niwehe itthu vakhaani Yehova aaleihenrye awe arumeyi awe a khalai, seiyo saakhala ntoko khisaarowa wiiraneya. Owo aahimuleiherya Abrahamu ni Sara wiira yaammuyara mwaana nnaamwi yuuluvanle. (Maph. 17:15-17) Nave, aahimuhimeerya Abrahamu wiira aarowa ovaha osuulu awe elapo ya oKanani. Vaakhala ntoko wiira khivaaweryaneya omaliherya yooleiherya eyo. Maana aisarayeli, yaawo yaari osuulu wa Abrahamu, yaahikhala ipottha wExiitu mwa iyaakha sinceene. Masi Yehova aahimaliherya yooleiherya awe. Iyaakha sinceene muhoolo mwaya, Yehova aahihimya wiira muthiyana mmosa oowuuluvala iitthaniwa Elizabeti ammuyara mwaana. Nave aahileiherya wiira Maria, mwali ahaatonko orupa ni mulopwana aarowa omuyara Mwaana a Muluku. Eyo yaarowa omaliherya eprofesia Yehova aapanke awe iyaakha ikonto sinceene, wEedeni! — Maph. 3:15.

12. Yoolepa ya Yooxuuwa 23:14 ni Yesaya 55:10, 11, enooniherya exeeni voohimya sa owerya wa Yehova?

¹² Wuupuwelela moota Yehova omalihenrye awe sooleiherya sawe, onnilipiha waamini wahu wiira tthiri onookumiherya elapo esya. (Mmusome Yooxuuwa 23:14; Yesaya 55:10, 11.) Napaka eyo nnoowerya waakhaliherya atthu akina woona wiira natiri a elapo esya, khahiyo ethale. Voohimya sa erimu esya ni elapo esya, Yehova oni: “Moolumo ala toororomeleya ni teekeekhai”. — Wiis. 21:1, 5.

ORUMEELA OKATHI AHU NIVARAKA MITEKO SA MULUKU

13. Moota xeeni mithukumano sa mmulokoni sinlipiha aya waamini wahu? Mutthokiherye.

¹³ Etthu ya neeraru ekhanle oolipiha waamini wahu eri orumeela okathi ahu nivaraka miteko sa Muluku. Mwa ntakiheryo, muupuwele mithukumano sahu. Murokora mmosa oniitthaniwa Ana, yoowo onimakela ovara miteko sa Muluku sa okathi wootheene onihimya so: “Ntoko nankura, mithukumano sinnilipiha waamini waka. Hata mulipa oolavula mwaha ohikhweiheryaka wala ohiixuttihaka etthu esya, masi yookhala etthu enayevaka-ru enihimya awe enkikhaliherya omwiiwexexa saana Biibiliya. Nto eyo ennilipiha waamini waka”.  b Ohiya-vo, waamini wahu pooti olipihiwa vanceene ni ikomentaario sa anna ni arokora mmithukumanoni. — aRom. 1:11, 12; 10:17.

14. Muteko woolaleerya, onlipiha sai waamini wahu?

¹⁴ Nave-tho, wiirela mpantta muteko woolaleerya onnilipiha waamini wahu. (aHeeb. 10:23) Barbara, yoowo ovirinhe iyaakha 70 omurumeelaka  Yehova onihimya so: “Okhuma khalai, wiirela mpantta muteko woolaleerya onnilipiha waamini waka. Khula okathi kinilavulaka ni atthu akina voohimya sa sooleiherya soovara murima sa Yehova, waamini waka onnitepa olipa”.

15. Yoosoma ya omwaneene, enlipiha sai waamini wahu? (Nwehe iteseenyo.)

¹⁵ Muteko mukina wa Muluku onlipiha waamini wahu ti yoosoma ya omwaneene. Murokora mmosa oniitthaniwa Susan omusivela ompaka palano a yoosoma awe. Owo onihimya wiira: “Ettiminku kinnilokiherya yoosoma ya Owehaweha ya esumana enittharelana. Segunda-feira ni Namanli kinnilokiherya mithukumano sa eriyari ya esumana. Nto mahiku makina kinnimpaka palano a yoosomaka”. Mwaha wookhalana eprograma awe yoosoma, Susan onniwerya olipiha waamini wawe. Irene, yoowo onimurumeela Yehova iyaakha sinceene oSeedi ya Olumwenku Wootheene, onihimya wiira osoma iprofesia sa mbiibiliyani onnilipiha waamini wawe. Owo onitthokiherya so: “Etthu enikivara murima woona moota Yehova onimaliherya awe iprofesia moohihiya etthu”. c

“ONOKHUMELELA TTHIRI, KHIVANINTEYA”

16. Xeeni ninhimya ahu wiira masu Yehova aamuhimenrye awe Habakuki anninimaaliha olelo-va? (aHeeberi 10:36, 37.)

¹⁶ Okhuma khalai, arumeyi anceene a Yehova annilipelela woona wanikisa wa elapo ela yoohiloka. Moonelo wa apinaatamu, vankhala ntoko wiira Muluku onnitepa opisa omaliherya sooleiherya sawe. Masi Yehova onnisuwela itthu sinaaxankiha arumeyi awe. Owo aahimuhimeerya profeta Habakuki wiira: “Mutthak’ola khunakuva okhumelela: okathi aya nlelo khuphiye, masi onimwiraneya tthiri. Wapisá ohikhumelenle, mulipeleleke, okhala wira onokhumelela tthiri, khivaninteya”. (Hab. 2:3) Niireke Yehova aalavunle masu awo ophavelaka  ommaaliha Habakuki paahi? Aahiiso, masu awo anninimaaliha olelo-va? Uupuxeriwaka ni Muluku, murummwa Paulo aahaahimeerya-tho masu awo makristau anlipelela elapo esya. (Mmusome aHeeberi 10:36, 37.) Nto, hata noonaka wiira iprofesia iyo sinnitepa opisa, mutthaka owo “onokhumelela tthiri, khivaninteya”.

17. Murokora mmosa aatthanre sai miruku Yehova anvahale awe Habakuki?

¹⁷ Okhuma khalai, anna ni arokora anceene annitthara miruku sa Yehova sa ‘ohihiya olipelela’. Mwa ntakiheryo, murokora Louise opacenrye omurumeela Yehova mwaakha wa 1939. Owo onihimya wiira: “Okathi ole, kuupuwela wiira Harmagedoni aarowa okiphwanya nlelo keettaka oxikola, kihinatthi omaliha oxikola secundária. Masi khahiyo ti yeeyo yiiraneyale. Okathi ola wootheene, etthu enkikhaliherya ti osoma mbiibiliyani voohimya sa atthu ‘yaamulipelenle’ Yehova omaliherya sooleiherya sawe. Atthu ntoko Nowe, Abrahamu, Yosefe ni akina. Ohihiya olipelela, onnikikhaliherya miyo ni atthu akina okupali wiira elapo esya eri vakhiviru”. Tthiri, anna ni arokora apacenrye khalai omurumeela Yehova annikupali masu awo!

18. Moota xeeni oweha itthu sipattuxiwe onlipiha aya waamini wahu wiira elapo esya enimoorwa tthiri?

¹⁸ Ekeekhai wiira elapo esya nlelo khenatthi ophiya. Masi muupuwele itthu sikhanle ni sinooneya itthu ntoko itheneeri, miri, inama ni atthu. Khuuvo onihimya wiira itthu iya khahiyo seekeekhai, masi wookhala okathi sahaakhanle aya. Itthu iyo sookhala okhala wiira sipattuxiwe ni Yehova. (Maph. 1:1, 26, 27) Muluku ahu ooleiherya oruuha elapo esya, nto owo onooruuha tthiri. Okathi owo, atthu anrowa okhalana ekumi yooloka ni yoohimala. Waphiya okathi Yehova othanlale awe, elapo esya enrowa okhala yeekeekhai ntoko sinoona ahu itthu sipattuxiwe. — Yes. 65:17; Wiis. 21:3, 4.

19. Munrowa olipiha sai waamini wanyu?

¹⁹ Nlipelelaka ophiya elapo esya, nihaana ottottela mureerelo khula etthu wiira nlipihe waamini wahu. Okathi wootheene muxukhureleke mukuttho woowoopola. Muupuweleke owerya wa Yehova. Nave, murumeeleke okathi anyu nvaraka miteko sa Muluku. Mwiira siiso, tthiri munookhala vamosa ni “ale anaakhela itthu sileiheriwe, mwaha wa waamini ni opixa murima”. — aHeeb. 6:11, 12; aRom. 5:5.