1. Itthu xeeni ninsuwela ahu?

 HIYO na arumeyi a Yehova. Nto ninnisuwela wiira Yehova onniniphenta ni oniphavela wiira nihakalaleke. (aRom. 8:35-39) Nave hiyo ninnisuwela wiira ninniphwanya mareeliho vaavo ninvarihela ahu muteko malakiheryo a mbiibiliyani. (Yes. 48:17, 18) Masi nooneleke sai okathi sinniphwanya aya mixankiho nahaalipelela ahu?

2. Mixankiho xeeni sikhanle ooniphwanya, ni makoho xeeni nniikoha ahu okathi owo?

² Arumeyi ootheene a Yehova sinnaaphwanya mixankiho. Mwa ntakiheryo, mmusi ahu pooti oninyoonyiha aahiiso pooti oniphwanyaka oretta waarowa oniiriha ohiwerya omurumeela Yehova ntoko naaphavela ahu. Woonasa wene, sooniphwanya ihasara sa ephattu wala ninnilupatthiwa mwaha wa itthu ninkupali ahu. Okathi sinniphwanya aya mixankiho ntoko iyo, woonasa wene hiyo ninniikoha so: ‘Xeeni sinkiphwanya aya mixankiho iya? kiireke yookhala etthu yoohiloka kipanke aka? kiireke mixankiho iyo sinooniherya wiira Yehova khonikireeliha-tho?’ Niireke mootoko wiikoha makoho ala? Akhala wiira mootoko wiikoha, muhixanke. Maana hata arumeyi oororomeleya a Yehova a khalai yaahitoko wiikoha siiso. — Esal. 22:1, 2; Hab. 1:2, 3.

3. Esalimo 34:20, enihimya exeeni?

³ Musome Esalimo 34:20. Esalimo ela ennihimya itthu piili. Itthu sene tiiya: Yoopacerya, anaxariya sinnaaphwanya mixankiho. Ya nenli, Yehova onnaakhaliherya oxintta mixankiho iyo. Masi onaakhaliherya sai? Enamuna emosa onipaka awe eyo, ori onikhaliherya okhalana moonelo wooloka voohimya sa okumi ahu nnaamwi nikhalaka olumwenku ola wootakhala. Yehova onnileiherya wiira nnoophwanya ohakalala wunceene naamurumeelaka. Hata vari siiso, Yehova khonnileiherya wiira khaninrowa okhalanaka mixankiho. (Yes. 66:14) Yehova onnitumererya  wuupuwelelaka itthu sooloka sinrowa wiiraneya muhoolo, okathi ninrowa ahu okhalana okumi wooloka. Maana Yehova oniphavela wiira nikhaleke saana ni moohimala. (2 aKor. 4:16-18) Nto nilipelelaka ophiya okathi owo, Yehova khonrowa ohiya onikhaliherya wiira niweryeke omurumeela khula nihiku hata siniphwanyaka mixankiho. — Wikh. 3:22-24.

4. Mwaha ola, ninrowa othokorerya exeeni?

⁴ Mwaha ola nnoothokorerya matakiheryo a arumeyi oororomeleya a Yehova akhalai ni a mahiku ala. Nave nnimwiixutta wiira ootheene ahu sinooniphwanyaka mixankiho nahaalipelela ahu. Nave-tho, nnimwiixutta wiira naahihiye omuroromela Yehova, khula okathi onoonikhaliheryaka. (Esal. 55:23) Nto okathi ninrowa ahu othokoreryaka matakiheryo a yoosoma ela mwiikoheke so: ‘Vaakhanle wiira muxankiho ola okiphwannye miyo, kaarowa opaka-ni? Matakiheryo ala anlipiha sai omwaamini waka Yehova? Kinrowa ovarihela sai muteko mookumini mwaka?’

5. Mixankiho xeeni Labano aamukumihenrye awe Yakobe? (Nwehe eteseenyo ya ekaapa.)

⁵ Arumeyi oororomeleya a Yehova a khalai sahaaphwanya mixankiho yahaalipelela aya. Nrowe niwehe ntakiheryo na Yakobe. Paapa awe aahimuruma orowa omuthanla mwaana mmosa mwaamuthiyana a Labano wiira okhale mwaarawe. Maana yaari amusi ni yaanimukokhorela Yehova. Nave apapawe yaahimuleiherya wiira apaka eyo, Yehova ammureeliha vanceene. (Maph. 28:1-4) Nto Yakobe aahimwiiwelela paapa awe. Okhala wiira aahikhuma oKanaani orowaka owannyawe Labano yoowo aarina anamwane axithiyana anli, Liya ni Rakheli. Yakobe aahisiveliwa vanceene ni mwaana ookiseriwa a Labano, Rakheli. Nto Yakobe aaheemererya onvarela muteko Labano, mwa iyaakha 7 wiira omuthele Rakheli. (Maph. 29:18) Mooriipiha murima, khayiho ti yeeyo yiiraneyale. Maana Labano aahinwoka Yakobe omuthelihaka Liya yoowo aari muulupale awe Rakheli. Labano aahimuleela Yakobe wiira ammuthela Rakheli nuuvira esumana emosa, masi akhala wiira aamunvarela-tho muteko iyaakha 7. (Maph. 29:25-27) Nave Labano aahooniherya ohixariya okathi amweetta awe nakoso ni Yakobe. Labano aahimuthokorerya Yakobe moohixariya mwa iyaakha 20! — Maph. 31:41, 42.

6. Mixankiho xeeni-tho sikina samphwannye Yakobe?

⁶ Yakobe aahikhalana-tho mixankiho sikina. Owo aahikhalana emusi yuulupale, masi anaawe khiyaiwanana. Nto mwaha waivaavo awo yaahimutumiha muhima aya iitthaniwa Yosefe ntoko epottha. Nave anamwane anli a Yakobe, Simeyoni ni Levi ohiya paahi oveehiha nsina na emusi aya masi-tho yaahiveehiha nsina na Yehova. Ohiva-vo, Rakheli mwaarawe Yakobe aahikhwa okathi aamuyara awe mwanawe a nenli. Okhala wiira muttetthe ole yaakhala aya yaahikhumelela etala, Yakobe nnaamwi uuluvanle aahithaamela wExiitu. — Maph. 34:30; 35:16-19; 37:28; 45:9-11, 28.

7. Yehova oonihenrye sai wiira aanimphenta Yakobe?

⁷ Nnaamwi Yakobe aarina mixankiho sinceene, owo khaahiyale omwaamini Yehova ni sooleiherya sawe. Nave Yehova aahooniherya wiira aanimphenta Yakobe. Mwa ntakiheryo, nnaamwi Labano anwoke Yakobe ikwaha sinceene, Yehova aahimureeliha onvahaka itthu saamuthowa. Nave Yakobe aahimuxukhurela vanceene Yehova mwaha wootthikela-tho onweha mwanawe amphentexa awe, Yosefe. Maana Yakobe uupuwela wiira Yosefe aahikhwa! Yakobe aahiwerya oxintta mixankiho iye sootheene, okhala wiira aahikhalana waataana woolipa ni Yehova. (Maph. 30:43; 32:9, 10; 46:28-30) Moolikanasa, akhala wiira nnookhalana ompatthani woolipa ni Yehova  nnoowerya oxintta mixankiho nahaalipelela ahu sinniphwanya.

8. Etthu xeeni mwene Davidi aaphavela awe opaka?

⁸ Mwene Davidi khaawenrye opaka itthu sootheene aaphavela awe okathi aamurumeela awe Yehova. Mwa ntakiheryo, Davidi aaniphavela omutekela etemplo Yehova. Nto aahimuleela profeta Natani etthu aaphavela awe opaka. Owo aakhunle so: “Muroke, mwire ntoko sintthunaya murimʼanyu, okhala wira Apwiya [Muluku] ari ni nyuwo”. (1 Wah. 17:1, 2) Moolumo ale yaahimulipiha vanceene Davidi. Woonasa wene, nuumala wiiwa moolumo ale aahipacerya waapaka apalano a moota wooteka etemplo.

9. Davidi aapanke exeeni nuumala oleeliwa ihapari sookhulumula?

⁹ Nuuvira okathi, profeta a Yehova aahitthika oruuhaka ihapari saamukhulumunle Davidi. Nto “ohiyu yole” Yehova aahimuruma Natani orowa omuleela Davidi wiira khaarowa oteka etemplo, masi mmosa a anaawe taarowa oteka. (1 Wah. 17:3, 4, 11, 12) Davidi oonenle sai nuumala wiiwa masu ale? Owo aahimuturuka palano awe. Davidi aahipacerya othukumanya musurukhu ni ikaruma Salomoni aarowa awe opirisariki wiira oteke etemplo. — 1 Wah. 29:1-5.

10. Yehova aamureelinhe sai Davidi?

¹⁰ Yehova aahipaka nivarihano ni Davidi, nuumala omuleela wiira khahiyo taarowa oteka etemplo. Nto Yehova aahimuleiherya Davidi wiira osuulu awe waarowa olamulelaka mahiku ootheene. (2 Sam. 7:16) Elapo esya, okathi wa olamulelo wa iyaakha ekonto emosa, Davidi onoohakalala vanceene nuumala osuwela wiira Mwene Yesu, oniirela mpantta osuulu awe! Yoowiiraneya ela enniniixuttiha wiira hata nihiweryaka opaka itthu sootheene naaphavela ahu wiira nimurumeele Yehova, owo onoonireeliha mwa enamuna nahuupuwela ahu.

11. Makristau a okathi wa arummwa, yaareelihiwe sai nnaamwi Omwene wa Muluku wahaarwaale okathi yaalipelela aya? (Miteko 6:7.)

¹¹ Makristau a okathi wa arummwa, sahaaphwanya mixankiho yahaalipelela aya. Mwa ntakiheryo, awo yaaniphavela wiira Omwene wa Muluku waaruuye, masi awo khiyaasuwela okathi eyo waarowa awe orwa. (Mit. 1:6, 7) Nto exeeni yaapanke aya? Awo yaahikhalela nthiti muteko woolaleerya. Nto okathi yaapaka aya eyo, yaanoona moota Yehova aakhaliherya awe. — Musome Miteko 6:7.

12. Exeeni makristau a okathi wa arummwa yaapanke aya okathi yaakhumelenle aya etala yuulupale?

¹² Waahikhala okathi yaakhumelenle aya etala yuulupale “elapo yootheene”. (Mit. 11:28) Nave makristau a okathi ole, yaahaaphwanya etala eyo. Niireke munniwerya wuupuwelela moota makristau ale yaahaawale aya mwaha wa etala eyo? Tthiri ahooleli a itthoko yaanixanka vanceene sa moota woophwanya eyoolya wiira alyiheke emusi aya. Nave niireke munniwerya wuupuwelela moota yaaxankale aya amiravo ale yaaphavela wuncererya muteko aya woolaleerya? Woonasa wene, awo yaahuupuwela olipelela omala etala ele. Nnaamwi makhalelo yaari oovirikana wa khula mmosa, makristau ale yaahiilimaleliha makhalelo ale masya. Awo khiyaahiyale olaleerya ni yaanihakalala okawana itthu yaarina aya ni anna a oyudeya. — Mit. 11:29, 30.

13. Makristau a okathi wa arummwa, yaareelihiwe sai okathi ole wa etala?

¹³ Makristau ale yaareelihiwe sai okathi ole wa etala? Ale yaakhaliheriwe evahiwaka itthu saathowa, yaahoona moota Yehova aakhaliherya awe. (Math. 6:31-33) Eyo yaahiwiiriha olipiha waataana waya ni anna ni arokora yaakhalihenrye. Nto anna ale yaakhalihenrye yaavahaka itthu saathowa, yaahihakalala mwaha wookhala atthu oovaha. (Mit. 20:35) Yehova aahaareeliha makristau ale ootheene, mwaha  wa wiilimaleliha makhalelo masya nnaamwi yaari ooxankiha.

14. Exeeni yaamwiiranenle Baarnaba ni Paulo, nto yaakhumelenle exeeni? (Miteko 14:21, 22.)

¹⁴ Okathi wa arummwa, makristau yaanilupatthiwa. Ikwaha sinceene eyo yaaniiraneya okathi yahaalipelela aya. Nwehe etthu yaamwiiranenle Paulo ni Baarnaba okathi yoowo yaalaleerya aya muttetthe wa oLiistra. Wanipacerya, awo yaahaakheliwa saana ni atthu yaaniwiriyana ele yaahimya aya. Masi nihiku nenne anamavirikanya yaahirwa anapacerya “waawoka atthu” nave atthu yaale yaamwaakhenle saana Paulo yaahinvonyakasa maluku aphavelaka omwiiva. (Mit. 14:19) Hata vari siiso Baarnaba ni Paulo khiyaahiyale olaleerya mittetthe sikina. Nto exeeni yaakhumelenle? Awo yaahiwerya “waapaka awiixutti anceene”. Ohiya-vo, moolumo aya ni ntakiheryo naya tthiri naahaalipiha anna okathi ole. (Musome Miteko 14:21, 22.) Nnaamwi yaalupatthiwa, Paulo ni Baarnaba khiyaahiyale olaleerya, nto eyo yaahaakhaliherya atthu anceene. Moolikanasa, akhala wiira khannihiya ovara muteko Yehova onirumme awe, onoonivaha mareeliho manceene.

15. Ntakiheryo na munna Macmillan, ninniixuttiha exeeni?

¹⁵ Ohinatthi mwaakha wa 1914, arumeyi a Yehova yuupuwela wiira saamwiiraneya itthu sikina yaalipelela aya. Nrowe niwehe ntakiheryo na munna Alexander Hugh Macmillan. Moolikanasa ni anna akina a okathi ole, owo uupuwela wiira moohipisa aamwaakhela etthuvo ya orowa okhalaka wiirimu. Nto mwaha aalavunle awe Setembro a 1914, owo aahimmye so: “Woonasa wene, ola mwaha aka wookiserya kinilavulaaka wa atthu ootheene”. Masi khahiyo ti yeeyo yiiraneyale, maana aahilavula-tho myaha sikina. Nuuvira okathi munna Macmillan aalempe so: “Akina a hiyo murima waahitepa onikhuma nnuupuwela wiira naarowa wiirimu mwaakha ene yoole wa 1914. Nto naahaana oluttuweliwa ovara muteko wa Muluku”. Tthiri eyo ti etthu munna Macmillan aapanke awe. Maana aaniluttuweliwa olaleerya. Nave munna owo, aahikhalana eparakha ya waalipiha anna yaatthukweliwe mukhatteya mwaha wa ohiirela mpantta itthu sa mulaponi. Nave-tho hata uuluvanle, owo aanirowela mithukumano sootheene. Nto itthu iyo sootheene aapanke awe olipelelaka etthuvo awe saamukhalihenrye sai? Mwaakha wa 1966, munna Macmillan ohinatthi okhwa aalempe so: “Hata ovinre ene okathi, waamini waka khovukunwe”. Tthiri nna ntakiheryo nooloka ninreerela ahu ottharaka, hata okathi yoole nnoona ahu wiira mixankiho sahu khasinimala! — aHeeb. 13:7.

16. Muxankiho xeeni wamphwanye mootutuxerya munna Herbert Jennings ni mwaarawe? (Yakobo 4:14.)

¹⁶ Arumeyi anceene a Yehova olelo-va, sinnaaphwanya iretta yahaalipelela aya. Mwa ntakiheryo, olavulaka yoowiiraneya awe ya mweekumini munna Herbert Jennings  b aahimmye wiira yena ni amwaara awe yaanisiveliwa vanceene muteko wa omisionaariyo oGana. Masi nuuvira okathi yaahimphwanya eretta ya mmuupuweloni eniitthaniwa distúrbio bipolar. Ottittimiheryaka moolumo ari Yakobo 4:14, munna Jennings aahilikanyiha muxankiho awe ole ni “itthu ‘sa meelo’ nahaalipelela ahu”. (Mmusome.) Munna Jennings ohimmye so: “Eretta ele yaahiniiriha okhuma oGana ni waahiya apatthani ahu nirowaka oCanada wiira kalooliwe”. Munna Jennings ni mwaarawe akhaliheriwaka ni Yehova khiyaahiiye omurumeela yena nnaamwi yaarina muxankiho ole.

17. Ntakiheryo na munna Jennings, naakhalihenrye sai anna ni arokora akina?

¹⁷ Yoowiiraneya ya mweekumini ya munna Jennings, ehaakhaliherya anna ni arokora anceene. Mwa ntakiheryo murokora mmosa  olempe so: “Koosoma myaha sinceene, masi mwaha ola wootepa okivara murima vanceene. . . . Nuumala osoma wiira munna Jennings aahaana ohiya yoothanleliwa awe wiira alooliwe, eyo yaahikikhaliherya okhalana moonelo wooloka voohimya sa muxankiho aka”. Nave munna mukina olempe so: “Nuuvira iyaakha 10 kirumeelaka ntoko mutokweene kaahaana ohiya eparakha ele mwaha wa oretta wa mmuupuweloni waakiphwanye. Oretta ole waanikiiriha okhulumuwa vanceene, nto ikwaha sinceene kaaninyoonyeriwa osoma soowiiraneya sa mweekumini sa anna ni arokora. . . . Masi yoowiiraneya ya munna Jennings ni ovilela wawe waahikilipiha vanceene”. Yoowiiraneya ela enniixuttiha wiira hata nikhalanaka mixankiho nahaalipelela ahu, nnoowerya waalipiha anna ni arokora. Ikwaha sikina makhalelo a okumi ahu pooti oturukeyaka mwaha wa mixankiho sinniphwanya nahaalipelela ahu, masi waamini wahu ni ovilela wahu onimwaakhaliherya anna ni arokora. — 1 Ped. 5:9.

18. Ntoko enooniherya aya efootu, ntakiheryo na murokora a oNigeria niwiixuttinheni exeeni?

¹⁸ Oretta wa koronaviiru, ohaakumiherya mixankiho anna ni arokora anceene. Mwa ntakiheryo, murokora mmosa naamukhweli oNigeria, aarina eyoolya vakhaani ni khaarina musurukhu waaphiyerya othume eyoolya. Nihiku nimosa voosiisu mwanawe mwaamuthiyana aahimukoha so: ‘Maama akhala wiira nnimwaapeya musoro ole ekoopho emosa ohanle, meelo ninrowa olya-ni?ʼ Murokora ole aamwaakhunle mwanawe wiira khiyaarina musurukhu nnakhala eyoolya, nto yaahaana omutakiha naamukhweli a oSarefati. Okhala wiira yaanimuroromela Yehova yaahaapeya musoro ole waahanle. (1 Mam. 17:8-16) Nihiku nenne, ahinatthi opacerya ohaavya etthu yaarowa aya olya moottharelana, awo yaahivahiwa eyoolya ni anna. Eyoolya ele yaavahiwa aya yaaniphiyerya olya isumana piili. Murokora ole ohimmye wiira okathi yoole aamuleela awe mwanawe wiira khiyaarina musurukhu wiira athume  yoolya, Yehova iira iiwaka. Yoowiiraneya ela enniixuttiha exeeni? Nniixutta wiira, akhala wiira khaninhiya omuroromela Yehova hata siniphwanyaka mixankiho nahaalipelela ahu, iyo pooti onikhaliherya otepa omwaattamela yena. — 1 Ped. 5:6, 7.

19. Muxankiho xeeni munna Aleksey aarina awe?

¹⁹ Muxankiho mukina onaaphwanya anna anceene olelo-va, ori olupatthiwa. Mwa ntakiheryo, nwehe etthu yaamwiiranenle Aleksey Yershov, onikhala oRussia. Munna ole opatisiwe mwaakha wa 1994, nto okathi ole anna a elapo ele yaari ootaphuwa. Masi nuuvira iyaakha vakhaani, itthu saahiturukeya. Mwaakha wa 2020, makhulupale a elapo ele yaahikela mpaani mwawe ni yaahikuxa mireerelo sawe. Miyeeri vakhaani saattharelana guvernu a elapo ele aahimuhimya munna ole okhala mutthu ootakhala. Nto mwaha ole waahitepa oxankiha mwaha wa iviidiyu, mulopwana mmosa yoowo aavirinhe mwaakha mmosa oothereryaka wiira aamusoma Biibiliya, aawoonihenrye awe makhulupale a elapo ele. Nkahaya muupuwele moota munna Aleksey aariipiwe awe murima!

20. Munna Aleksey aalipinhe sai ompatthani awe ni Yehova?

²⁰ Niireke olupatthiwa wa munna Aleksey waahikumiherya mireerelo? Aayo, maana ompatthani awe ni Yehova waahitepa olipa. Owo onihimya so: “Miyo ni mwaaraka ninninvekela Yehova hoothe ikwaha sinceene. Eyo yookikhaliherya oxintta mixankiho kikhaliheriwaka ni Yehova”. Owo onincererya oriki: “Yoosoma aka ya omwaneene ennikikhaliherya oxintta okhulumuwa. Nave okisivela osoma ni wuupuwelela matakiheryo a arumeyi a Yehova oororomeleya a khalai. Mbiibiliyani sookhala soowiiraneya sinceene sinooniherya efaita erina aya okhala oomaaleleya ni omuroromela Yehova”.

21. Itthu xeeni niixuntte ahu mwaha ola?

²¹ Exeeni niixuntte ahu mwaha ola? Olumwenku ola wootakhala ninkhala ahu, pooti oniphwanyaka mixankiho mookumini mwahu nahaalipelela ahu. Masi nihiixutta wiira Yehova khula okathi onnaakhaliherya ale animuroromela. Maana ti yeeyo enihimya aya yoolepa ya mwaha ahu ola, yeeyo eni: “Naxariya onnèhereriwa nʼuxanka wunjene: vano Muluku onomwakiha mahiku othene”. (Esal. 34:20) Nave nihiixutta wiira ohiya omakelaka owehexexaka mixankiho sinniphwanya, nihaana owehaka owerya Yehova onirumeela awe wiira onikhaliherye. Napaka itthu iyo, nnookhalana moonelo mmosaru murummwa Paulo aarina awe. Owo aahimmye so: “Tthiri, kinniwerya sotheene mwaha wa ole onkivaha ikuru”. — aFil. 4:13.