1. Exeeni Yehova oniphavela awe wa hiyo?

 NIHIKU nootepa ohakalaliha wa anamathelana, nihiku nenne animuyara aya mwaana oopacerya. Nnaamwi anamuyari amphentaka vanceene mwaana owo, awo khanlipelela wiira onrowa ovikanihaka okhala mwaana okathi wootheene. Nto vaakhanle wiira eyo yaamwiiraneya, awo yaamuxankiheyaka. Moolikanasa, nnaamwi Yehova ohakalalaka vanceene vaavo nimpacerya ahu wiixutta ekeekhai, owo khoniphavela wiira nimaleleke vaavo. (1 aKor. 3:1) Ohiya-vo, owo oniphavela wiira nikhale makristau ‘anuupuwela ntoko atthu aalupale’. — 1 aKor. 14:20.

2. Makoho xeeni ninrowa ahu othokorerya mwaha ola?

² Ontaphulela exeeni okhala mukristau orina waamini woolipa? Exeeni enreerela ahu opaka wiira nikhale makristau arina waamini woolipa? Osoma ikeekhai sa mbiibiliyani, onrowa onikhaliherya sai olipiha ompatthani ahu ni Yehova? Ninrowa osyaka sai muupuwelo woowi ninnisuwela itthu sinceene? Mwaha ola, nnimwiiwa waakhuliwa waya makoho ala.

ONTAPHULELA EXEENI OKHALA MUKRISTAU ORINA WAAMINI WOOLIPA?

3. Ontaphulela exeeni okhala mukristau orina waamini woolipa?

³ Mbiibiliyani nuulumo na ekereku nitaphuleliwe noowi “mutthu muulupale”, pooti otaphulelaka mutthu orina “waamini woolipa”. a (1 aKor. 2:6) Sintoko siisaale mwaana oninnuwa awe mpakha okhala mutthu muulupale, nave hiyo nnoowerya okhalana waamini woolipa naahihiye olipiha ompatthani ahu ni Yehova. Nto napaka eyo, nnookhala makristau arina waamini woolipa. Hata nirina ene waamini woolipa, niireke khivanreerela wuncererya omwaamini wahu Yehova? (1 Tim. 4:15) Ootheene  ahu waahela muhina amiravo, nnoowerya okhala makristau arina waamini woolipa. Masi ninrowa osuwela sai wiira nookhalana waamini woolipa?

4. Exeeni enooniherya wiira mukristau ookhalana waamini woolipa?

⁴ Mukristau orina waamini woolipa, tuule onikhala moovarihana ni malakiheryo a Yehova, ohithanlaka malamulo okhanle awe oweettela aahiiso nnaari. Ekeekhai wiira na atthu oottheka ni ikwaha sikina nnanfalyariki. Hata vari siiso, mukristau orina waamini woolipa khula okathi onnuupuwelela ni onnipaka itthu moovarihana ni ele Yehova oniphavela awe. Owo oowara omutthu musya ni onniimananiha khula okathi wuupuwela nto Yehova onuupuwela awe. (aEef. 4:22-24) Owo ohiixutta moota woopaka soothanla sooloka, uupuwelaka malamulo ni malakiheryo a Yehova. Mwa enamuna eyo, owo khonipirisari elista ya ireekera wiira othanle etthu okhanle awe oopaka. Okathi onipaka awe soothanla, owo onniimananiha wiira opake moovarihana ni waamini wawe. — 1 aKor. 9:26, 27.

5. Mixankiho xeeni sikhanle omphwanya mukristau ohirina waamini woolipa? (aEefeso 4:14, 15)

⁵ Ohiya-vo, mukristau ohirina waamini woolipa, pooti omora ottharaka “soowiixuttiha sowoothiwa” sinihimmwa ni ale anilaleya mihupi soowoothiwa aahiiso owokiwa ni anamavirikanya. b (Mmusome aEefeso 4:14, 15.) Mukristau ohirina waamini woolipa, pooti waakhalelaka nrima atthu akina, okumiherya ohiiwanana mmulokoni, okhala mutthu oowaakuva oveeheya mwaha wa itthu atthu akina anipaka aya aahiiso omorela muraakho waarowa omwiiriha opaka etampi yuulupale. — 1 aKor. 3:3.

6. Xeeni mukristau ohirina waamini woolipa onlikanihiwa awe ni wunnuwa wa mwaana? (Nwehe efootu.)

⁶ Ntoko niwenha ahu, Biibiliya onnimulikanyiha mutthu orina waamini woolipa ni mutthu oninnuwa mmuthinto wa weerutthuni. Mwaana, onniprisari okhaliheriwa ni atthu aalupale okhala wiira khonsuwela etthu. Mwa ntakiheryo, mmuupuwele maama oninvarela mwaana awe moono okathi anitupha aya estaraata enivira ikaaro. Vaavo mwaana owo oninnuwa awe, maama owo onnimweemererya wiira otupheke estaraata mekhawe. Masi maama owo khonrowa ohiya omuupuxerya mwaana awe, wiira ohaana oweha mipantta soomiili sa estaraata ohinatthi otupha ni okhalana ephoole ni ikaaro. Mwaana owo annuwa vale, onoosuwela etthu  yoopaka ohinatthi otupha estaraata. Moolikanasa ni mwaana onipirisari okhaliheriwa ni mutthu muulupale, wiira osyake itthu soowoopiha, nave mukristau ohirina waamini woolipa, ohaana okhaliheriwa ni mukristau orina waamini woolipa wiira osyake khula etthu yaarowa ohonona ompatthani awe ni Yehova ni oweryeke opaka soothanla sooloka. Masi mukristau orina waamini woolipa, onoorowa osuwela moota woopaka soothanla sooloka ottharaka malakiheryo a mbiibiliyani ni okhalana moonelo wa Yehova. Nuumala-vo, mukristau owo onoowerya ovarihela muteko itthu siixuntta awe.

7. Xeeni mukristau orina waamini woolipa onipirisari awe okhaliheriwa ni atthu akina?

⁷ Niireke eyo entaphulela wiira mukristau orina waamini woolipa khonrowa opirisari okhaliheriwa ni mutthu mukina? Nnaari. Anna ni arokora arina waamini woolipa, ikwaha sikina annipirisari okhaliheriwa. Masi mukristau ohirina waamini woolipa, oniphavela wiira atthu akina amuleeleke etthu yoopaka wala opakeliwa soothanla. Moovirikana ni vo, mukristau orina waamini woolipa onnaavekela miruku atthu akina arina waataana wooloka ni Yehova. Nave onnisuwela wiira Yehova oniphavela wiira khula mutthu ‘oteexeke muritti awe’. — aGal. 6:5.

8. Mwa enamuna xeeni makristau arina waamini woolipa ari aya oovirikana mukina ni mukhwawe?

⁸ Ootheene ahu, naatthu oovirikana mwa muthinto wa weerutthuni. Mwa enamuna emosa-ru, makristau arina waamini woolipa aakhalana mikhalelo soovirikana. Akina toosuwela, tooreera murima, toolipa murima, toovaha ni toomoriwa ikharari. Makristau manli arina waamini woolipa, pooti okhalana muxankiho mmosa-ru masi anapaka soothanla soovirikana moovarihana ni malakiheryo a mbiibiliyani. Eyo enniiraneya ni khula mutthu, moovarihana ni moota iixuttinha awe murima awe. Ti maana aya, vahinreerela aya ophukelana mukina ni mukhwawe mwaha wa soothanla soovirikana apanke aya. Nave awo ahaana wiimananiha ophavela okumiherya murettele. — aRom. 14:10; 1 aKor. 1:10.

EXEENI NINREERELA AHU OPAKA WIIRA NIKHALANE WAAMINI WOOLIPA?

9. Niireke waamini woolipa onikhumelela mekhaya-ru? Mutthokiherye.

⁹ Okhala wene, vaavo okathi onivira aya mwaana onninnuwa, masi moovirikana ni mwaana, okhala mukristau orina waamini woolipa, khonikhumelela mekhaya-ru. Mwa ntakiheryo, anna ni arokora a muloko wa oKorinto, yaahaakhela ihapari sooreera, yaahipatisiwa, yaahaakhela munepa woowaarya ni yaahiixutta itthu sinceene ni murummwa Paulo. (Mit. 18:8-11) Masi akina a yaawo, nnaamwi yaavirinhe iyaakha sinceene apatisiwe ene, nlelo khiyaarina waamini woolipa. (1 aKor. 3:2) Exeeni nikhanle ahu oopaka wiira eyo ehiniiraneele?

10. Exeeni nikhanle ahu oopaka wiira nikhalane waamini woolipa? (Yuda 20)

¹⁰ Wiira nikhalane waamini woolipa, nihaana ophavelasa. Ale ‘anitthara itthu sihinsuwela aya’, vanoovila okhalana waamini woolipa. (Mir. 1:22) Masi hiyo khanimphavela okhala ntoko ale nnaamwi yinnunwe ene, anaaroromela axipapaya wiira yaapakeleke soothanla. Ohiya-vo, hiyo nookhalana muritti wa ophavela okhala mukristau orina waamini woolipa ni olipiha ompatthani ahu ni Yehova. (Mmusome Yuda 20.) Vakhala wiira nyuwo munniimananiha okhala mukristau orina waamini woolipa, muhihiye onvekela Yehova wiira oovaheeni “ophavela ni owerya ovara muteko”. — aFil. 2:13.

11. Mwa enamuna xeeni Yehova onnikhaliherya awe wiira nikhale makristau arina waamini woolipa? (aEefeso 4:11-13)

¹¹ Yehova khoniphavela wiira nikhalane waamini woolipa, nihikhaliheriwaka. Ale ari amakampusi ni alipa-oowiixuttiha mmulokoni mwa ekristau, anniimananiha waakhaliherya anna ni  arokora okhalana “waamini omosa-ru”. Nave anninikhaliherya olipiha waamini wahu, ni okhala atthu “ookhoomala ntoko siri awe Kristu”. (Mmusome aEefeso 4:11-13.) Nave Yehova, onninivaha munepa woowaarya wiira onikhaliherye okhalana “muupuwelo wa Kristu”. (1 aKor. 2:14-16) Ohiya-vo, Muluku oorumiha olempwa Ivangelyo ixexe seiyo sinnikhaliherya oweha moota Yesu uupuwela awe, aalavula awe ni moota aavara awe muteko okathi aalaleerya awe. Vakhala wiira nnootakiha moota Yesu uupuwela awe ni aavara awe itthu, eyo enoonikhaliherya okhala makristau arina waamini woolipa.

EFAITA ERINA AYA EYOOLYA ENNIKHALIHERYA OLIPIHA WAAMINI WAHU

12. “Soowiixuttiha soopacerya sinimuhimya Kristu”, sinihela muhina exeeni?

¹² Wiira nroweke vahoolo aahiiso nikhalane waamini woolipa, khivanitthuneya osuwela paahi “soowiixuttiha soopacerya sinimuhimya Kristu”. Mwa ntakiheryo, soowiixuttiha sikina soopacerya sinihela muhina ottharuwa, waamini, opatisiwa ni ohihimuxiwa wa alipa-ookhwa. (aHeeb. 6:1, 2) Iya soowiixuttiha vakhaani soopacerya, khula mukristau onireerela awe osuwela ni waamini. Ti maana aya, murummwa Pedru aarumenle awe soowiixuttiha iyo okathi aalaleerya awe muttitthi muulupale wa atthu, nihiku na Pentekoositi. (Mit. 2:32-35, 38) Wiira nikhale mutthareli a Kristu, nihaana osuwela soowiixuttiha iyo. Mwa ntakiheryo, murummwa Paulo aahooniherya eyo, okathi aatthokihenrye awe wiira mutthu okhale mutthareli a Yesu, ohaana okupali yoowiixuttiha ya nlipelelo na ohihimuxiwa wa alipa-ookhwa. (1 aKor. 15:12-14) Masi wiira nikhale makristau arina waamini woolipa, nihaana osuwela itthu sinceene ohiya paahi soowiixuttiha soopacerya.

13. Exeeni nikhanle ahu oopaka wiira nittottele mureerelo eyoolya yoolipa eniromoliwa aHeeberi 5:14? (Nwehe efootu.)

¹³ Moovirikana ni soowiixuttiha soopacerya, eyoolya yoolipa aahiiso ikeekhai sa mbiibiliyani, sinihela muhina ohiya paahi malamulo a Yehova, masi-tho malakiheryo awe yaawo annikhaliherya osuwela moonelo ni moota onuupuwela awe. Wiira nittottele mureerelo eyoolya eyo ennikhaliherya olipiha waamini wahu, nihaana osoma, wuupuwelela ni ovarihela muteko ele  eniixutta ahu mu Nuulumo na Muluku. Okathi nimpaka ahu eyo, hiyo ninniixutta opaka soothanla sinimuhakalaliha Yehova. c — Mmusome aHeeberi 5:14.

14. Moota xeeni Paulo aakhalihenrye awe makristau a oKorinto okhalana waamini woolipa?

¹⁴ Makristau ahirina waamini woolipa, ikwaha sikina vannaavila wuupuwelela ni otthara malakiheryo ari mbiibiliyani okathi anipaka aya soothanla. Akina anuupuwela wiira okhala wiira khanikhanle nlamulo na mbiibiliyani, pooti opaka etthu enaasivela. Akina pooti ophavelasaka mathowa, masi vahireerelaka. Mwa ntakiheryo, makristau a oKorinto yaahinvekela murummwa Paulo wiira okumiherye nlamulo vakhala wiira vaanireerela olya eyoolya yaavahiwa amuluku eethiru. Ohiya waaleela etthu yaakhanle aya oopaka, owo aahaatthokiherya efaita erina aya orumeela saana murima wiixuttihiwe ni aahaaleela wiira aakhalana ‘ediretu ya opaka soothanla’. Paulo aahaakhaliherya akorinto ale arumeelaka malakiheryo a mbiibiliyani. Nto eyo yammukhaliherya khula mutthu opaka soothanla ni murima wooloka ni ohaakhumuliha atthu akina. (1 aKor. 8:4, 7-9) Okathi aapaka awe eyo, Paulo aakhaliherya makristau a oKorinto okhalana waamini woolipa. Mwa enamuna eyo, yanwerya orumeela muupuwelo aya ohiya waalipelela atthu akina wala ophavelasa mathowa.

15. Moota xeeni Paulo aakhalihenrye awe makristau aHeeberi olipiha waamini waya?

¹⁵ Hiyo ninniixutta etthu yuulupale ni itthu murummwa Paulo aalepenle awe makristau aHeeberi. Akina khiyaarina waamini woolipa, ti maana aya ‘yaatthikenle aya ophavela waamwa nipele, ohiya olya eyoolya yoolipa’. (aHeeb. 5:12) Awo, khiyeemerenrye inamuna isya Yehova aarumenle awe wiira awiixuttihe. (Mir. 4:18) Mwa ntakiheryo, nuumala Yesu okhwa, Nlamulo na Moise khinaavareleya-tho muteko. Masi makristau makina ayuda, yaanithipelela weettela Nlamulo nno na Moise, nnaamwi saavinre iyaakha 30 nuumala omala-malihiwa orweela wa mukuttho wa Yesu. (aRom. 10:4; Tito 1:10) Niireke iyaakha iye 30 khisaaphiyerya wiira makristau ale ayuda eturuke enamuna yuupuwela aya? Khula mutthu aasoma ekarta Paulo aaroihenle awe aHeeberi, anwerya okupali wiira eyo eyoolya yoolipa yaarowa waakhaliherya olipiha waamini waya. Ekarta eyo yaamwaakhaliherya woona enamuna  esya ni yooloka ya omukokhorela Yehova. Nave yaamwaakhaliherya olipa murima wiira ahihiye olaleerya nnaamwi yaalupatthiwa ni ayuda. — aHeeb. 10:19-23.

MUSYAKEKE WIIROROMELA MOOTEPANA

16. Exeeni enreerela ahu opaka wiira nikhalane waamini woolipa?

¹⁶ Hiyo nihaana wiimananiha vanceene wiira nikhalane waamini woolipa ni ohihiya ovukuwaka. Eyo entaphulela wiira nihaana osyaka wiiroromela mootepana. (1 aKor. 10:12) Nihaana ‘wiivarerya’ wiira noone vakhala wiira ninnikela vahoolo. — 2 aKor. 13:5.

17. Moota xeeni ekarta Paulo aalepenle awe akolosi, yooniherya aya efaita erina aya ohihiya okhalana waamini woolipa?

¹⁷ Ekarta murummwa Paulo aalepenle awe akolosi, aahittittimiherya-tho efaita erina aya okhalana waamini woolipa. Makristau a oKolosi yaahikhalana waamini woolipa, masi hata vari siiso Paulo aahaalopola woopiha orina aya weettihiwa ni muupuwelo wa atthu ahinimusuwela Muluku. (aKol. 2:6-10) Nave-tho Epaafara, yoowo aasuwela oratteene anna a muloko ole, aanaavekelela vanceene wiira ‘waanikisa waya, alipe moomalela’ aahiiso akhalane waamini woolipa. (aKol. 4:12) Eyo enniixuttiha exeeni? Paulo ni Epaafara, yaanisuwela wiira mutthu ohaana wiimananiha vanceene ni okhaliheriwa ni Muluku wiira ohihiye olipiha waamini wawe. Awosa yaaphavela wiira, makristau a oKolosi ahihiye olipiha waamini waya nnaamwi saaphwanya mixankiho sinceene.

18. Exeeni ekhanle omwiiraneela mukristau orina waamini woolipa? (Nwehe efootu.)

¹⁸ Murummwa Paulo aahaalepela aheeberi wiira hata mukristau orina waamini woolipa, pooti ohonona waataana wawe ni Yehova. Nave murima wa mukristau, pooti okhala wootutumwala ohinawerya ottharuwa soottheka sawe nave Yehova ohinawerya omulevelela. Moohakalaliha, makristau aheeberi khahiyo yaari siiso. (aHeeb. 6:4-9) Ankhi ale ahiyale olaleerya ni orowela mithukumano aahiiso ale akumihiwe mmulokoni? Awo toowiiyeviha ni annittharuwa soottheka saya yooniheryaka ovirikana ni atthu yaale Paulo aahimmye awe ahinrowa oleveleliwa ni Muluku. Ekeekhai wiira, nuumala awo omutthikela Yehova anniprisari nikhaliheryo nawe. (Ezek. 34:15, 16) Axitokweene a mmulokoni, woonasa wene anoopaka mareheryo amuthanlaka munna orina waamini woolipa wiira omukhaliherye munna aahiiso murokora owo, olipiha waataana wawe ni Yehova.

19. Yoolukama xeeni ninreerela ahu okhalana?

¹⁹ Akhala wiira nyuwo munniimananiha wiira mukhale mukristau orina waamini woolipa, munoowerya ophwanya yoolukama eyo! Muhihiye wiixutta ikeekhai sa mbiibiliyani ni itthu sikina voohimya sa Yehova. Vakhala wiira mwa mukristau orina waamini woolipa, muhihiye waamini wanyu ovukuwaka.