1. Moota xeeni yaatthokiheyale aya atthu a Yehova eseekulu yoopacerya?

 OKATHI Yehova onaaruma awe muteko arumeyi awe, owo oniphavela wiira avareke mootthokiheya. (1 aKor. 14:33) Mwa ntakiheryo, Yehova oniphavela wiira ihapari sooreera sa Omwene silaleiwe elapo yootheene. (Math. 24:14) Nave Yehova onvaha Yesu muritti wa ohoolela muteko owo. Yesu onnipaka ele oniwerya awe wiira muteko owo okhale wootthokiheya. Nave eseekulu yoopacerya, yaahithanliwa axitokweene wiira yeettiheke miloko. (Mit. 14:23) OYerusalemu, weiwo naari aya nikhuuru noolamulela, yaahikhala ekurupu ya arummwa ni axitokweene, yaawo yaakumiherya malakiheryo ni opaka soothanla seiyo miloko saakhanle aya ootthara. (Mit. 15:2; 16:4) Yookhumelela aya, okhala wiira atthu a mmulokoni “yaanitepa olipihiwa waamini waya, nave khula nihiku atthu yaanincerereya”. — Mit. 16:5.

2. Okhuma mwaakha wa 1919, Yehova onaakhaliherya sai arumeyi awe olipiha waamini waya?

² Olelo-va, Yehova khonihiya waatthokiha atthu awe. Okhuma mwaakha wa 1919, Yesu onnirumeela ekhurupu yaamukhaani ya alopwana oothanliwa, wiira ahooleleke ni otthokiha muteko woolaleerya ni waavaha eyoolya enlipiha waamini wa atthareli awe. a (Luka 12:42) Vannooneya wiira Yehova onnireeliha muteko alopwana awo anivara aya. — Yes. 60:22; 65:13, 14.

3-4. a) Mutthokiherye moota ninttottela ahu mureerelo mwaha wookhala atthu ootthokiheya. b) Exeeni ninrowa ahu othokorerya mwaha ola?

³ Nahaakhanle atthu ootthokiheya, khinaarowa owerya ovara muteko Yesu onirumme awe. (Math. 28:19, 20) Mwa ntakiheryo, nkuupuwelani sahaakhanle mittetthe nithanleliwe ahu wiira nilaleeryeke. Khula mutthu aarowa olaleeryaka opuro oniphavela  awe. Nave mittetthe sikina, saamulaleeriwaka vanceene ovikana sikina. Niireke munnuupuwela mareeliho nimphwanya ahu mwaha wookhala atthu ootthokiheya?

⁴ Okathi aari awe valaponi, Yesu aahaatthokiha atthareli awe nave mpakha olelo-va, owo onipaka eyo. Mwaha ola, nnoothokorerya ntakiheryo Yesu ovanhe awe, ni moota mutthenkeso wa Yehova onitthara aya ntakiheryo nawe. Nave nnoothokorerya moota nikhanle ahu oottittimiha ni ororomela mutthenkeso owo.

MUTTHENKESO AHU ONITTHARA NTAKIHERYO NA YESU

5. Enamuna xeeni nikhanle ahu ootthara ntakiheryo na Yesu? (Yohani 8:28)

⁵ Yesu ohiixuttihiwa ni Tiithi awe a wiirimu etthu yoopaka ni yoohimya. Ottharaka ntakiheryo na Yesu, mutthenkeso wa Yehova onnimurumeela Biibiliya wiira oniixuttihe etthu eri yooloka ni yoohiloka. Nave onniniixuttiha okhala moovarihana ni ele Yehova oniphavela awe. (Mmusome Yohani 8:28; 2 Tim. 3:16, 17) Mutthenkeso wa Yehova khula okathi onninuupuxerya omusoma Biibiliya ni weettela ele eniixutta ahu. Opaka eyo enrowa onikhaliherya sai?

6. Enamuna xeeni ninttottela ahu mureerelo okathi nimmusoma ahu Biibiliya?

⁶ Ninnittottela mureerelo okathi nimmusoma ahu Biibiliya nirumeelaka iliivuru sinimutthokiherya. Mwa ntakiheryo, hiyo pooti olikanyiha ele ninsoma ahu mbiibiliyani ni malakiheryo ninvahiwa ahu mmutthenkesoni. Nave ororomela wahu mutthenkeso wa Yehova, onnincerereya okathi ninweha ahu wiira malakiheryo awo anikhuma mbiibiliyani. — aRom. 12:2.

7. Muhupi xeeni Yesu aalaleya awe, nave mutthenkeso wa Yehova onitthara sai ntakiheryo nawe?

⁷ Yesu aanilaleya “ihapari sooreera sa Omwene wa Muluku”. (Luka 4:43, 44) Ohiya-vo, Yesu aahaaruma awiixutti awe wiira yaahaana olaleya ihapari sooreera sa Omwene. (Luka 9:1, 2; 10:8, 9) Ootheene ale anitthara malakiheryo a Yehova olelo-va, annilaleya ihapari sa Omwene, moohicikha mapuro anikhala aya aahiiso miritti sirina aya mmutthenkesoni.

8. Eparakha xeeni nirina ahu?

⁸ Eparakha yuulupale nirina ahu waalaleerya atthu akina voohimya sa Nuulumo na Muluku! Masi eparakha eyo khahiyo ya atthu pure. Mwa ntakiheryo, okathi Yesu aari awe valaponi, owo kheemerenrye wiira malaikha ootakhala elavuleke voohimya sa yena. (Luka 4:41) Olelo-va, enniiraneya etthu emosa-ru. Ohinatthi mutthu wiirela mpantta muteko woolaleerya ni atthu a Yehova, owo ohaana owehiwa aaphwanelelaka eparakha eyo. Nnimooniherya wiira ninnivaha efaita eparakha eyo, akhala wiira nnimwiimananihaka opaka ele eniwerya ahu wiira nilaleerye. Sintoko Yesu, yoolakela ahu ori waala epyo ya Omwene vamurimani wa atthu ni owiixuttiha ikeekhai sa mbiibiliyani. — Math. 13:3, 23; 1 aKor. 3:6.

9. Moota xeeni mutthenkeso onivaha aya efaita nsina na Muluku?

⁹ Yesu aaniwiixuttiha atthu akina nsina na Muluku. Nivekelo Yesu ampakenle awe Tiithi awe, owo aahimmye so: “Miyo kihaasuweliha nsina nanyu”. (Yoh. 17:26) Ottharaka ntakiheryo na Yesu, mutthenkeso wa Yehova onnipaka sootheene oniwerya awe, wiira waakhaliherye atthu osuwela nsina na Muluku. Enamuna emosa onipaka awe eyo, ori omukumiherya Biibiliya a Elapo Esya a Soolempwa Soowaarya. Otaphuleliwa wa Biibiliya oomalela aahiiso oohimalela, onniphwanyaneya mattaava oowiiraka 270. Mpantta oni Apendise A4 ni A5 wa Biibiliya owo, onnikhaliherya oweha mathowa ene yiirinhe oheliwa nsina na Yehova mbiibiliyani. Nave Apendise C oniphwanyaneya Biibiliya a Estudo, ookhalana mathowa makina anooniherya wiira nsina na Muluku  ninniphwanyaneya Soolempwa sa Ekereku sa Ekristau ikwaha soowiiraka 237.

10. Exeeni nniixutta ahu ni etthu muthiyana a oMianmar aahimmye awe?

¹⁰ Sintoko Yesu, hiyo nimphavela waakhaliherya atthu akina, vaaweryaneyaka osuwela nsina na Muluku. Muthiyana mmosa a oMianmar yoowo aarina iyaakha 67, okathi asuwenle wiira nsina na Muluku ti Yehova, aahipacerya wunla. Owo onihimya so: “Miyo nkaatonko wiiwa nsina na Muluku. . . . Nyuwo mookiixuttiha etthu ya faita mookumini mwaka”. Ntoko niwenhe ahu yoowiiraneya ela, okathi atthu aniixutta aya nsina na Muluku, eyo pooti owiiriha oturuka okumi aya.

MUHIHIYE WOONIHERYA WIIRA MUNNIROROMELA MUTTHENKESO WA YEHOVA

11. Axitokweene anooniherya sai wiira anniroromela mutthenkeso wa Yehova? (Nwehe efootu.)

¹¹ Mwa enamuna xeeni axitokweene akhanle aya oowooniherya wiira anniroromela mutthenkeso wa Muluku? Okathi anaakhela aya malakiheryo, axitokweene ahaana osoma ni ephoole ni wiimananiha wiira avariheleke muteko. Mwa ntakiheryo, ohiya paahi waakhela malakiheryo a moota woopaka mithukumano mmulokoni ni ovekela, awo annaakhela malakiheryo a moota wookhapelela ipwittipwitthi sa Kristu. Vaavo axitokweene anitthara aya malakiheryo anivahiwa aya ni mutthenkeso, anna ni arokora annoona wiira anniphentiwa ni annikhapeleliwa ni Yehova.

12. a) Xeeni ninreerela ahu owiiwelelaka anna annihoolela? (aHeeberi 13:7, 17) b) Xeeni ninreerela ahu owehexexaka mikhalelo sooloka sa anna annihoolela?

¹² Okathi onaakhela ahu malakiheryo ni axitokweene, nihaana wiimananiha otthara. Akhala wiira nnoopaka eyo, vanookhala vookhweya axitokweene ovara saana muteko ni weettiha muloko. Biibiliya onnileela wiira nihaana owiiwelela ale annihoolela moohinlaseya. (Mmusome aHeeberi 13:7, 17.) Masi ikwaha sikina pooti okhala vooxankiha opaka eyo. Mwaha wa xeeni? Mwaha woowi axitokweene awo annihoolela atthu oottheka. Nto vakhala wiira ninrowa owehexexaka ifaalya saya, nihinaweha mikhalelo saya sooreera, ohimya ekeekhai ninrowa omukhaliheryaka nwanani ahu. Mwa enamuna xeeni? Nwanani ahu, oniphavela wiira naanyiheryeke wiira Yehova onnirumeela mutthenkeso awe wiira oneettiheke. Vakhanle wiira nanwehexexaka ifaalya sa anna annihoolela, ohimya ekeekhai naarowa wuupuwelaka itthu soohiloka voohimya sa mutthenkeso ahu. Nto eyo yaamuniiriha waanyiheryaka mutthenkeso wa Yehova. Exeeni ninreerela ahu opaka wiira niwerye nisuwele ni okhootta soowoothiwa sinilaleiwa ni awanani ahu?

MUHAAHIYE ATTHU AKINA AHONONAKA OROROMELA WANYU MUTTHENKESO WA YEHOVA

13. Moota xeeni awanani a Muluku animananiha aya ohonona mutthenkeso wa Yehova?

¹³ Ale aninvirikanya Muluku, aniphavela wiira itthu sooloka sa mutthenkeso wa Yehova, sikhaleke ntoko soohiloka. Mwa ntakiheryo, nihiixutta mbiibiliya wiira Yehova oniphavela wiira arumeyi awe akhalaneke mweettelo wooloka, ni asyakeke opaka itthu saarowa ohonona waataana waya ni yena. Nave Yehova ohimmye wiira akhala mutthu onipaka itampi ni ohinattharuwa, ohaana okumihiwa mmulokoni. (1 aKor. 5:11-13; 6:9, 10) Okhala wiira ninniiwelela nlamulo nlo, awanani ahu anihimya wiira khannaapixerya murima atthu akina, nnaaphukela vootakhala ni khinnaaphenta atthu.

14. Ti pani onimwarya-mwarya itthu soowoothiwa voohimya sa mutthenkeso wa Yehova?

¹⁴ Mmusuwele ori nwanani a mutthenkeso wa Yehova. Satana Diabo tonimwarya-mwarya soowoothiwa voohimya sa mutthenkeso wa Yehova.  Owo “nawoothe ni topacenrye wootha”. (Yoh. 8:44; Maph. 3:1-5) Nto khanintikinihiwa osuwela wiira Satana, onnaarumeela atthu wiira amwarya-mwarye soowoothiwa voohimya sa mutthenkeso wa Yehova. Eyo ti etthu yaamwiiranenle Yesu vamosa ni makristau oopacerya.

15. Itthu xeeni makhulupale a itiini yaamoothenrye aya Yesu vamosa ni awiixutti awe?

¹⁵ Yesu yoowo ori Mwaana a Muluku, aari oohittheka ni aanipaka miiriirya soovara murima okathi aari awe valaponi. Masi hata vari siiso, Satana aanaarumeela atthu akina wiira amwarya-mwarye itthu soowoothiwa voohimya sa Yesu. Mwa ntakiheryo, makhulupale a itiini yaanaaleela atthu wiira Yesu oomola malaikha ootakhala okhaliheriwaka ni Satana yoowo ori “namalamulela a malaikha ootakhala”. (Mar. 3:22) Okathi Yesu aalamuliwa awe, makhulupale a itiini yaahimootherya wiira oveehiha nsina na Muluku ni yaahiwoka mittitthi sa atthu wiira emwiivihe Yesu. (Math. 27:20) Okathi awiixutti a Yesu yaalaleerya aya ihapari sooreera, awanani aya “yaahaawoka ale yahaakhanle ayuda, khuwiiriha waanyokha anna”. (Mit. 14:2, 19) Sentinela a 1 a Dezembro a 1998, otthokiheryaka yoolepa ya Miteko 14:2, ohimmye so: “Okhala wiira yaanikhootta ihapari iye saalaleiwa, ayuda ale yahaamini yaanipaka ikampaanya wiira yaaveehe awiixutti ale yaalaleya ni owiiriha ayuda akina, okhalana moonelo woohiloka voohimya sa ekristau”.

16. Etthu xeeni ninreerela ahu wuupuwelelaka, akhala wiira nnimwiiwa itthu soowoothiwa voohimya sa mutthenkeso wa Yehova?

¹⁶ Mpakha olelo-va, Satana khonihiya omwarya-mwarya itthu soowoothiwa. Owo ‘onnaahapuxa atthu anikhala elapo yootheene ya vathi’. (Wiis. 12:9) Okathi muniiwa anyu itthu soowoothiwa voohimya sa mutthenkeso wa Yehova ni anootheriwa aya anna anihoolela,  muupuweleke moota nwanani a Muluku aamuthokorenrye awe Yesu vamosa ni awiixutti awe eseekulu yoopacerya. Sintoko Biibiliya aahimmye awe, atthu yaamwaalupatthaka ni owootherya itthu soohiloka arumeyi a Muluku. (Math. 5:11, 12) Khaninrowa okupali sowoothiwa iyo vakhala wiira nnoomusuwela ti pani onikumiherya ni vakhala wiira nnoopaka ele eniwerya ahu wiira niikhapelele moowaakuveya. Nto nipakeke exeeni wiira niikhapelele?

17. Exeeni ninreerela ahu opaka wiira nikhootte myaha soowoothiwa? (2 Timootheyo 1:13) (Nwehe ekaaxa eni: “ Etthu Mukhanle Anyu Oopaka Mwaiwa Itthu Soowoothiwa”.)

¹⁷ Muhivaheke ephoole itthu soowoothiwa. Murummwa Paulo oonivaha malakiheryo voohimya sa etthu nikhanle ahu oopaka akhala wiira nnimwiiwa itthu soowoothiwa. Owo aahimuleela Timootheyo wiira ‘aalopole oratteene atthu akina, wira ahiixuttiheke itthu soowoothiwa’. (1 Tim. 1:3, 4; 4:7) Mwa ntakiheryo, mwaana pooti ottotta etthu yoohiloka emonre ni ohela mwaano mwaha woohisuwela. Masi mutthu muulupale onisuwela etthu yoohiloka, khokhanle oopaka eyo. Ninnisyaka myaha soowothiwa okhala wiira ninnimusuwela ti pani onikumiherya. Hiyo ninwiriyana paahi “moolumo ooreera” ni a ekeekhai. — Mmusome 2 Timootheyo 1:13.

18. Ninrowa wooniherya sai wiira ninniroromela mutthenkeso wa Yehova?

¹⁸ Mwaha ola, noothokorerya inamuna tthaaru, seiyo mutthenkeso wa Yehova onipaka awe omutakihaka Yesu. Sookhala inamuna sikina nnooniherya ahu wiira ninnimutakiha Yesu. Nto wiira nisuwele nihaana ovahaka ephoole okathi nimmusoma ahu Biibiliya. Tivonto, mwaakhaliheryeke atthu akina a muloko anyu ottittimiha ni ororomela mutthenkeso wa Yehova. Mmurumeeleke Yehova moororomeleya ni moowiirana ni mutthenkeso awe, yoowo onirumeela awe olelo-va wiira opake ele oniphavela awe. (Esal. 37:28) Ootheene ahu nihihiye ovaha efaita, eparakha erina ahu ya ovara vamosa ni atthu oophenta ni oororomeleya a Yehova.