1. Eparayiisu eyo ya nthoonyeryo exeeni, ni exeeni nikhanle ahu oolakela opaka?

 OLELO-VA, valaponi yookhala eparayiisu ya nthoonyeryo memmo anamunceene anikhala aya ni murettele ni aniluttuweliwa aya ovara itthu sooreera. Nto ale ari mparayiisu mmo, aalakela ohikhuma. Nave aniphavela wiira atthu anceene akhaleke naawo opuro owo wooreera. Eparayiisu eyo exeeni? Eyo eparayiisu ya nthoonyeryo, eyo piiyo, okokhorela weekeekhai! a

2. Atthu anikhala sai mparayiisu ya nthoonyeryo?

² Olumwenku ola wootheene, Satana osariha itthu soohiloka ntoko onyokhana, otakhala ni itthu soowoopiha. Masi Yehova owenrye sai opaka eparayiisu eyo ya nthoonyeryo, arumeyi awe anikhala aya ni murettele ni moowiirana? (1 Yoh. 5:19; Wiis. 12:12) Muluku ahu oophenta, onnisuwela wiira ninkhala olumwenku ola wootakhala. Tivonto, onnivaha awe itthu nimprisari ahu wiira nilipihe omwaamini wahu ni wiira nihihiye omurumeela ni murettele. Biibiliya onnilavula sa eparayiisu ya nthoonyeryo ntoko ‘ntthyawelo’ ni “ematta ehinimala maasi”. (Yes. 4:6; 58:11) Akhaliheriwaka ni Yehova, ale anikhala mparayiisu mmo annikhalana murettele ni ovareleleya, nnaamwi ari ene mahiku ookiserya ni ooxankiha. — Yes. 54:14; 2 Tim. 3:1.

3. Eprofesia eri Yesaya ekapiitulu 65, yiiraneyale sai okathi wa ayuda?

³ Yehova aahimurumeela profeta Yesaya, wiira ohimye moota okumi waarowa aya okhala mparayiisu mmo ya nthoonyeryo. Wiira mphwanye itthu aahimmye awe, nyuwo pooti osoma eliivuru ya Yesaya ekapiitulu 65. Okathi woopacerya yiiraneyale aya eprofesia eri ekapiitulu eyo, waari mwaakha wa 537 Ohinatthi Kristu Orwa. Okathi yoowo ayuda yaataphuliwa aya oBabiloonia weiwo yaakhalihinwa  aya ipottha ni yaatthikenle aya owannye aya. Yehova aahaareeliha arumeyi awe ni aahaakhaliherya otthikela oteka epooma ya oYerusalemu yeeyo yaanyaanyinwe. Ayuda yaahiiriha epooma ele okhala yooreera wiira akhaleke, ni yaahiteka etemplo opuro yoowo yaamukokhorela aya Yehova, wIsarayeli. — Yes. 51:11; Zak. 8:3.

4. Eprofesia eri Yesaya ekapiitulu 65, yiiraneyale sai ni arumeyi a Yehova a mahiku ala?

⁴ Wiiraneya wa nenli wa eprofesia ya Yesaya, waapacenrye mwaakha wa 1919 Nuumala Kristu Orwa. Mwaakha yoowo arumeyi a Yehova a mahiku ahu ala yaapacenrye aya okhuma oBabilonia Muulupale. Nuumala-vo, yaahipacerya wuncerereya eparayiisu ya nthoonyeryo ni opakiwa miloko sa ekristau. Alopwana ni athiyana khalai yaarina mweettelo woohiloka ni wootakhala, yaahipacerya oluttuweliwa olaleya Omwene, okhalana mikhalelo sooloka ni ‘owara omutthu musya, opattuxiwe moovarihana ni ele Muluku oniphavela awe’. (aEef. 4:24) Mareeliho manceene profeta Yesaya aahimmye awe, ninrowa oweha yiiraneyaka muhoolo, elapo esya. Masi ale anikhala eparayiisu eyo ya nthoonyeryo, anniphwanya mareeliho mwa inamuna soovirikana. Nrowe nthokorerye xeeni vari aya vooloka okhala eparayiisu ya nthoonyeryo ni xeeni nihinreerela ahu okhuma.

MOOTA ANOONELA AYA ALE ANIKHALA MPARAYIISU YA NTHOONYERYO

5. Moovarihana ni moolumo ari Yesaya 65:13, mareeliho xeeni nimphwanya ahu mparayiisu-mmo?

⁵ Aakhalana okumi wooloka ni eyoolya yinceene. Eprofesia ya Yesaya, ennooniherya wiira okumi wa ale anikhala mparayiisu mmo woovirikana vanceene ni okumi wa ale ahinikhala-mu. (Mmusome Yesaya 65:13.) Yehova onnaavaha khula etthu arumeyi awe ovikana iye aniprisari aya wiira ahihiye omurumeela yena. Owo oonivaha munepa awe woowaarya, Nuulumo nawe, ni iliivuru sinimutthokiherya Biibiliya seiyo sinnikhaliherya olipiha waamini wahu. Nto itthu iyo sinninikhaliherya ‘olya, . . . owurya, . . . ni [otteeliwa murima]’. (Munwehe-tho Wiisuupulula 22:17.) Makhalelo ahu aavirikana ni makhalelo a atthu ahinikhala mparayiisu mmo. Okhala wiira atthu awo ahinikhala-mu, ‘annivoliwa etala . . . annivoliwa ntthona . . . ni [annuuliwa muru]’. Awo annoona wiira sookhala itthu sinaahaleela mweekumini mwaya, maana kharina opatthani ni Yehova. — Am. 8:11.

6. Moovarihana ni Yoweli 2:21-24, mareeliho xeeni Yehova onnivaha awe ni ninrowa ottottela sai mureerelo?

⁶ Profeta mukina Yoweli, aanirumeela itthu ninrumeela ahu khula nihiku ntoko eyoolya, eviinyu ni makhura ophavelaka onooniherya wiira Yehova toovaha. Nto ti maana aya onnivaha awe khula etthu nimpirisari ahu wiira nilipihe waamini wahu. (Yow. 2:21-24) Yehova onnipaka eyo omurumeelaka Biibiliya, iliivuru sahu sinimutthokiherya Biibiliya, esaite jw.org, mithukumano sa mmulokoni, asembeleya ni akonkresu. Vakhala wiira nnoottottela mureerelo itthu sootheene Yehova onnivaha awe, nnookhalana eyoolya yoowaatta yeeyo enrowa onikhaliherya olipiha ompatthani ahu ni yena.

7. Exeeni enniiriha ‘otthapa votteeliwa murima’? (Yesaya 65:14)

⁷ Otthapa ni otteeliwa murima. Atthu a Muluku anoowerya ‘otthapa votteliwa murima’ mwaha woowi awo atthu ooxukhuru. (Mmusome Yesaya 65:14.) Hiyo ‘ninnitthapa votteeliwa murima’ mwaha wa ikeekhai sa mbiibiliyani sinnilipiha ni nlipelelo nirina ahu mwaha wa mukuttho wa Kristu. Ohiya-vo, nnootepaka ohakalala vaavo ninvaanela ahu ni anna ni arokora voohimya sa mareeliho awo oovara murima! — Esal. 34:8; 133:1-3.

8. Mikhalelo xeeni miili suulupale sinisuwanyeiha eparayiisu ya nthoonyeryo?

⁸ Eparayiisu ya nthoonyeryo, ennisuwanyeya mwaha wa mikhalelo miili suulupale, eyo piiyo, ophenta ni wiiraana wa atthu a Yehova. Enamuna  eyo ya ‘wiiraana’ ennooniherya moota okumi onrowa awe okhala elapo esya, vaavo arumeyi a Yehova anrowa aya otepaka ophentana ni wiiraana ovikana olelo-va. (aKol. 3:14) Murokora mmosa, onnitthokiherya etthu yaamusivenle nihiku noopacerya aasuwenle awe Anamoona a Yehova. Owo ohimmye so: “Okhala wene, miyo nkaahakalala, hata amusi aka khiyaahakalala. Ekwaha yoopacerya kaawenhe aka ophenta weekeekhai, waari ophentana wa Anamoona a Yehova”. Khula mutthu oniphavela otthapa ni otteeliwa murima, ohaana osuwela eparayiisu ya nthoonyeryo, eyo piiyo, okokhorela weekeekhai. Atthu pooti ohimya itthu soohiloka voohimya sa Anamoona a Yehova, masi hiyo ninnisuwela wiira nookhalana nsina nooloka, ni nookhalana mweettelo wooloka vamaithoni va Muluku vamosa ni anna ni arokora. — Yes. 65:15.

9. Moovarihana ni Yesaya 65:16, 17, exeeni enrowa wiiraneya ni itthu sinnikumiherya mixankiho?

⁹ Oohixankiheya ni oomaaleleya. Yesaya 65:14 onniniixuttiha etthu eniwiiraneela ale anithanla ohiirela mpantta eparayiisu ya nthoonyeryo. Awo ‘annikhuwela vowereiwa murima ni anninyakula mwaha wopwexiwa murima aya’. Ekeekhai wiira arumeyi a Muluku sinimwaaphwanyaka mixankiho sinceene. Masi hata vari siiso, ninnisuwela wiira moohipisa mixankiho iyo “sinoliyaliwa khuluwi”, nave Yehova onoomala-maliha. (Mmusome Yesaya 65:16, 17.) Vakhaani-vakhaani, Yehova onoomaliha mixankiho sahu sootheene, nave hata miyuupuwelo soohiloka khaninrowa okhalana-tho.

10. Xeeni munoona anyu okhala eparakha yuulupale okhala vamosa ni anna ni arokora? (Nwehe efootu.)

¹⁰ Hata mahiku ala, ninniphwanya ohakalala vaavo ninrowela ahu mithukumano, maana iwo sinniniiriha omaaleleya ni ninniwerya oliyala mixankiho sinikumiheriwa ni olumwenku ola wootakhala. Vaavo nnooniherya ahu mikhalelo sinikumiheriwa ni munepa woowaarya ntoko ophenta, otteeliwa murima, murettele ni oreera murima, ninnikhaliherya okhaliha murettele ni omaaleleya mparayiisu ya nthoonyeryo. (aGal. 5:22, 23) Ootheene ahu, nookhalana eparakha yuulupale ya wiirela mpantta mutthenkeso wa Muluku. Ale ahinikhuma mparayiisu ya nthoonyeryo, moohipisa animoona siiraneyaka iprofesia sinceene sa Muluku sa ‘opattuxa erimu esya ni elapo esya’.

11. Moovarihana ni Yesaya 65:18, 19, munoonela sai mwaha woosuwela wiira Yehova ookumiherya eparayiisu ya nthoonyeryo?

¹¹ Ooxukhuru ni oohakalala. Yesaya oohimya-tho etthu ekina enniiriha okhala ‘ootthapa ni oopuha’ mparayiisu mmo ya nthoonyeryo. Owo ohimmye wiira etthu enniiriha otthapa ni opuha okhala wiira eparayiisu eyo ekumiheriwe ni Yehova. (Mmusome Yesaya 65:18, 19.) Mitthenkeso sikumiheriwe ni olumwenku ola, khasiniwiixuttiha  atthu voohimya sa Muluku. Tivonto Yehova onnirumeela awe wiira naakhaliheryeke atthu awo okhuma mitthenkeso iyo, ni wiira yiireleke mpantta eparayiisu ya nthoonyeryo yeeyo eri yootepa ohakalaliha! Ninnixukhurela vanceene mareeliho ootheene nimphwanya ahu mwaha wa wiirela mpantta okokhorela weekeekhai, nave nimphavela wiira atthu a olumwenku wootheene aphwanye mareeliho awo. — Yer. 31:12.

12. Munoonela sai okathi munisoma anyu yooleiherya eri Yesaya 65:20-24, ni mwaha wa xeeni?

¹² Niireke khamunitthapa ni oxukhurela, okathi munuupuwela anyu yoolipelela murina anyu mwaha wa wiirela mpantta eparayiisu ya nthoonyeryo? Mwiivaheke okathi vakhaani wiira muupuwelele moota okumi onrowa awe okhala elapo esya ya Muluku! Biibiliya onileiherya so: “Weiwo khanikhala-tho mwanamwane onkhwa ni mahiku vakhani: nnákhala òwuluvala òhimalelihiwa mahiku awe”. Hiyo ninrowa ‘oteka ipa sahu, nikhaleke memmo: ninrowa ophatteya miri s’evidera nilyeeke mihokorokho sahu’. Hiyo khaninrowa ‘ovaraka muteko mahala ene . . . maana ninrowa okhala nloko norerihiwa n’Apwiya’. Yehova onnileiherya wiira onoonivaha okumi weekeekhai, woovareleleya ni woohakalaliha. Owo ohimmye wiira “ehinatthi okìhana, miyo kinowakhula”, onoopaka eyo okhala wiira onnisuwela etthu khula mutthu oniprisari awe. Nave Yehova ‘onimwaavahaka yolya atthu othene onaaphenta awe’. — Yes. 65:20-24; Esal. 145:16.

13. Yesaya 65:25, onihimya exeeni sa marukunuxo atthu anipaka aya nuumala wiixutta ekeekhai?

¹³ Oovareleleya ni a murettele. Atthu anceene khalai yaari ootakhala murima, oowali ni oohiroromeleya, akhaliheriwaka ni munepa woowaarya aapaka marukunuxo mweekumini mwaya. (Mmusome Yesaya 65:25.) Nuumala wiimananiha vanceene, awo aawerya orula omutthu wa khalai. (aRom. 12:2; aEef. 4:22-24) Ekeekhai wiira ikwaha sikina ninnivonya mwaha wookhala atthu oottheka. Masi Yehova oowiiraaniha “atthu a mikhalelo sotheene” yaawo animphenta yena ni aniphentana mukina ni mukhwaawe. Tivonto ninwerya ahu okhalana murettele ni wiiraana. (Tito 2:11) Tthiri ola mwiiriirya onipakiwa paahi ni Muluku oowerya sootheene!

14. Yoowiiraneya ya munna ola enooniherya sai wiira moolumo ari Yesaya 65:25, teekeekhai?

¹⁴ Niireke vanniweryaneya mutthu orula omutthu awe wa khalai? Nrowe nthokorerye etthu yiiraneyale ni mmiravo mmosa yoowo aatthukweliwe mukhatteya ikwaha sinceene, aarupihana moohiloka ni aari ootakhala okathi aarina awe iyaakha 20. Owo aahitthukweliwa mwaha wa wiiya ikaaro, okela mpamwanya ni ikrime sikina. Okhala wene, owo vaanimusivela onyakulihana ni atthu akina. Nuumala wiiwa ikeekhai sa mbiibiliyani ni opacerya orowela mithukumano sa Anamoona a Yehova, owo aahikupali wiira oophwanya etthu ya faita yuulupale mweekumini mwawe, eyo piiyo, eparayiisu ya nthoonyeryo. Nuumala opatisiwa, khula okathi aanuupuwelela moota moolumo ari Yesaya 65:25 yiiraneyale aya mweekumini mwawe. Owo aahihiya okhala mutthu oowoopiha ni ootakhala ntoko kharamu, ni aahikhala mutthu a murettele ntoko epwittipwitthi.

15. Xeeni ninreerela ahu waakhaliheryaka atthu akina wiira yiirenle mpantta emusi yoowiiraana, nave ninrowa opaka sai eyo?

¹⁵ Yesaya 65:13 onipacerya ohimyaka so: “Tivó mwiwe sinihimyaya Apwiya Muluku”. Nave eversiikulu 25 enimaliha ehimyaka so: “Anihimya t’Apwiya”. Hiyo noosuwela wiira sooleiherya sa Yehova khula okathi sinniiraneya. (Yes. 55:10, 11) Nto eyo enninikupaliha wiira eparayiisu ya nthoonyeryo, etthu yeekeekhai. Yehova ohiiraaniha emusi yeeyo enimukokhorela ni ehinlikananiwa. Hiyo arumeyi a Yehova, ninniwerya okhalana murettele nnaamwi niri ene olumwenku ola wootakhala, maana noovalaanyiwa. (Esal. 72:7) Tivonto ninreerela ahu waakhaliheryaka atthu anceene, wiira yiirele mpantta emusi ela yoowiiraana ya olumwenku wootheene.  Nnoowerya opaka eyo, akhala wiira nnimwiimananiha ovara muteko wa waapaka awiixutti. — Math. 28:19, 20.

WAAKHALIHERYA AKINA WIIRELA MPANTTA EPARAYIISU YA NTHOONYERYO

16. Exeeni enrowa waakhaliherya atthu akina ophavela okela mparayiisu mwa nthoonyeryo?

¹⁶ Khula mmosa a hiyo onoowerya opaka ele oniwerya awe wiira aakhaliherye akina okela eparayiisu ya nthoonyeryo. Nnoowerya opaka eyo, nimutakihaka Yehova. Owo khonimukhanyererya mutthu wiirela mpantta mutthenkeso awe. Ohiya-vo, owo ‘onnaaruuha’ atthu ooreera murima. (Yoh. 6:44; Yer. 31:3) Nuumala wiixutta voohimya sa Yehova ni mikhalelo sawe, mutthu ooreera murima onniimananiha okhala mpatthani awe. Masi moota xeeni makhalelo ahu ni mweettelo ahu, sinrowa aya waakhaliherya atthu akina okela eparayiisu ya nthoonyeryo?

17. Ninrowa owiiriha sai atthu akina okela eparayiisu ya nthoonyeryo?

¹⁷ Enamuna emosa nikhanle ahu owiiriha atthu akina okela eparayiisu ya nthoonyeryo, ori waathokoreryaka anna ni arokora mwa niphento ni mooreera murima. Okathi mutthu onipacerya awe orowela mithukumano empa ya Omwene, nimphavela omuthokorerya ntoko yaathokoreriwa aya atthu ale yaarweela mithukumano muloko wa oKorinto. Awo yaanisiveliwa ni moota yaathokoreriwa aya mpakha ohimya so: “Mweekeekhai, Muluku ori ni nyuwo”. (1 aKor. 14:24, 25; Zak. 8:23) Nto wiira eyo yiiraneye, nihaana ohihiya otthara malakiheryo a ‘othokoreryana ni murettele’ mukina ni mukhwaawe. — 1 aTes. 5:13.

18. Exeeni enrowa waakhaliherya atthu akina okela eparayiisu ya nthoonyeryo?

¹⁸ Khula okathi nihaana waathokorerya anna ni arokora ntoko Yehova onaathokorerya awe. Hiyo nnoopaka eyo, akhala wiira nnoowehexexaka mikhalelo saya sooloka ohiya ifaalya saya. Maana moohipisa, ifaalya iyo sinoomala-mala. Nihaana  ophukaka mixankiho ni anna ni arokora awo mwa niphento. Biibiliya onihimya wiira “mureerelaneke murima, moonelaneke othunku, mulevelelaneke ni murima wotheene”. (aEef. 4:32) Mwa enamuna emosa-ru, etthu enrowa waakhaliherya atthu akina okela eparayiisu ya nthoonyeryo, woona moota anithokoreriwa aya. b

MUHIKHUME MPARAYIISU YA NTHOONYERYO

19. a) Moovarihana ni ekaaxa eni: “ Awo Yaahikhuma ni Yaahitthika”, exeeni atthu akina ahimmye aya nuumala otthikela mparayiisu ya nthoonyeryo? b) Exeeni nlakenle ahu opaka? (Nwehe efootu.)

¹⁹ Moohaanyiherya ninnihakalala vanceene mwaha woowiirela mpantta eparayiisu ya nthoonyeryo! Olelo-va, eparayiisu eyo ti yootepa oreera ni anniirela mpantta atthu anceene ovikana khalai. Okhala wene hiyo ninnixukhurela vanceene mwaha wa Yehova onivaha eparayiisu eyo ya vameekhaaya. Akhala wiira mutthu oniphavela okhala oohakalala, oomaaleleya ni oovareleleya, ohaana wiirela mpantta eparayiisu eyo ni ohikhuma-tho! Masi nihaana okhalana ephoole okhala wiira Satana onniimananiha opaka sootheene oniwerya awe wiira oniwoke ni onikumihe mparayiisu mmo. (1 Ped. 5:8; Wiis. 12:9) Nihikhala-khale neemereryaka wiira owo opaka eyo. Nto nihaana wiimananiha okhapelela oratteleya, oreera ni murettele nirina ahu mparayiisu mmo ya nthoonyeryo.