Matheyo onittittimiherya itthu saamukhumelenle Yosefe okathi onilavula awe sa oyariwa wa Yesu. Mwa ntakiheryo, Matheyo onnilavula moonelo wa Yosefe nuumala osuwela wira Maria aahirupala, oloha wawe, vaavo aaleeliwa awe ni nlaikha ele yiiraneyale ni moota aatthanre awe malakiheryo a nlaikha. (Matheyo 1:19-25) Nave onnilavula moota nlaikha naamuloponle aya Yosefe moolohani wira otthyawele wEjiitu ni emusi awe ni moota iiwelenle awe yoolopola ele. Matheyo onnihimya-tho wira Yosefe aahiloha nlaikha nimuleelaka wira otthikele elapo awe wIsarayeli. Nave onnihimya wira aahitthikela ni khukhala ni emusi awe oNazarethi. (Matheyo 2:13, 14, 19-23) Ikapiitulu piili soopacerya sa Evangelyo awe, Matheyo onnilavula nsina na Yosefe ikwaha 8, masi nsina na Maria onilavula ikwaha xexe paahi.

Luka onittittimiherya itthu saamukhumelenle Maria. Mwa ntakiheryo, onnilavula okathi Maria aaxukuriwa awe ni nlaikha Gabriyeli, aaronwe awe omuxukurya mmusi awe Elizabeti ni moolumo awe oomuttottopela Yehova. (Luka 1:26-56) Nave onnilavula ele Simeyoni aamulenle awe Maria voohimya sa ohaawa waarowa omphwanya Yesu. Nuumala-vo, Luka onnilavula okathi Yesu ni emusi awe aaxukunrye awe etemplo, orina ene iyaakha 12. Nave, okathi owo, Luka onnilavula moolumo a Maria, ohiya moolumo a Yosefe, ohimyaka wira Maria aahixanka vanceene ni itthu siiraneyale. (Luka 2:19, 34, 35, 48, 51) Ikapiitulu piili sa Evangelyo awe, Luka onnilavula nsina na Maria ikwaha 12, masi na Yosefe onilavula ikwaha tthaaru paahi. Tivonto, Matheyo onilavula vanceene voohimya sa Yosefe ni itthu aapanke awe. Masi Luka onilavula vanceene voohimya sa Maria ni itthu aapanke awe.

Nave, evangelyo ya Matheyo ni Luka ennilavula nloko na Yesu mwa enamuna yoovirikana. Matheyo onnilavula nloko na Yosefe, ooniheryaka wira Yesu aari mwaana omphwanya a Yosefe, ni wira aahikhalana ehakhi ya omwene wa Davidi. Nthowa xeeni? Nthowa noowi Yosefe aari osuulu wa Mwene Davidi orweela mwa Salomoni, mwaana a Davidi. (Matheyo 1:6, 16) Masi, Luka onilavula nloko na Maria ooniheryaka wira Yesu aahikhalana ehakhi ya omwene wa Davidi, ntoko mutthu a “vathí-va munlokoni mwa Davidi”. (aRoma 1:3) Nthowa xeeni? Nthowa noowi, Maria aari osuulu wa Mwene Davidi yoowo aamuyanre Nathami. (Luka 3:31) Masi, xeeni Luka ohimuhimyaka Maria okhala mwaana a Heli, paapa awe? Okhala wira soolempwa sa khalai saalavula alopwana paahi. Tivonto, vaavo Luka onimulavula Yosefe, onnimuhimya okhala mwaana a Heli, nto atthu yaanisuwela wira Yosefe aari mutthepa awe Heli.​—Luka 3:23.

Otthokiheriwa wa nloko na Yesu evangelyo ya Matheyo ni Luka, ethoonyeryo yoowi Yesu aari Mesiya yoowo aaleiheriwe ni Muluku. AFarisi ni aSaduki yaanisuwela ni khiyaavaanyiha wira Yesu aari osuulu wa Mwene Davidi. Moolumo a Matheyo ni Luka voohimya sa nloko na Yesu, annilipiha waamini wahu ni anniniiriha okupali wira anatiri a Muluku nlelo ahiiraneyale, animwiiraneya tthiri.