1, 2. (a) Ninsuwela sai wira vanniweryaneya owara omutthu wa naanaano? (b) Mikhalelo xeeni sa omutthu wa naanaano ninrowa ahu othokorerya aKolosi 3:10-14?

MOOLUMO oowi “mutthu musyá” ni “omutthu wa nanano” annirumeeliwa Biblia Solempwa sowarya. (aÉfeso 4:24; aKolosi 3:10) Moolumo awo anihimya omutthu yoole ‘opattuxiwe olikanyihiwaka ni Muluku’. Niireke vanniweryaneya owara omutthu musya? Aayo. Maana Yehova ohaapaka apinaatamu ailattanihaka mwaneene, tivonto, nnoowerya otakiha mikhalelo sawe.​—Maphattuwelo 1:26, 27; aÉfeso 5:1.

² Ekeekhai wira mwaha woorava etampi, ikwaha sikina otheene ahu ninnikhalana soophavela soohiloka. Nave opuro onikhala ahu pooti onihapuwela. Masi, moomoriwa ikharari Yehova onninikhaliherya wira nikhale atthu animuhakalaliha. Wira niwerye opaka eyo, nrowe nithokorerye mikhalelo siniirela mpantta omutthu wa naanaano. (Mmusome aKolosi 3:10-14.) Nuumala-vo, ninrowa woona moota wowooniherya mikhalelo iyo okathi woolaleerya.

3. Tiivi eri enamuna emosa ya omutthu wa naanaano?

³ Murummwa Paulo otthokihenrye wira ohikhalana nthalu, enamuna yuulupale ya omutthu musya. Owo olempe so: “Khavo-tho muYuda walá mmalapo, khavo òwìnnuwihiwa nnákhala òhinnuwihiwa, khavo khatoro nnari mulipa-òwali, khivo epottha nnakhala òtaphuwa”. * (Nwehe enoota.) Mmulokoni, khuuvo mutthu onireerela wiixoona okhala ootepa otthuneya waavikana akina mwaha wa nikhuli nawe, elapo oyariwa awe aahiiso okhulupale orina awe mmuttettheni. Nthowa xeeni? Nthowa noowi, Biibiliya onihimya wira atthareli otheene a Kristu ‘amosaru’.​—aKolosi 3:11; aGalasia 3:28.

4. (a) Arumeyi a Yehova yaathokoreryeke sai atthu akina? (b) Etthu xeeni ekhanle oohonona wiiraana wa maKristau?

⁴ Owara omutthu musya onninikhaliherya waattittimiha ni waalemeliha atthu otheene, moohicikha nikhuli aahiiso makhalelo aya. (aRoma 2:11) Ilapo sikina, vannivila opaka eyo. Mwa ntakiheryo, khalai, wÁfrica do Sul, guvernu aahaakawela atthu a khula nikhuli opuro aya. Anamunceene elapo ele, waahela muhina Anamoona a Yehova, nlelo anikhala mapuro awo. Nikhuuru Noolamulela naahaatumererya anna ale wira ‘atthukulelaneke murim’aya’. Tivonto, Outubro a 2013, waahipakiwa murehereryo waakhalihenrye anna a makhuli oovirikana osuwelana saana mukina ni mukhwaawe.​—2 aKorinto 6:13.

5, 6. (a) Murehereryo xeeni waapakiwe wÁfrica do Sul waakhalihenrye wiiraana wa atthu a Muluku? (Nwehe elatarato yoopacerya.) (b) Exeeni yaakhumelenle?

⁵ Anna yaahipaka murehereryo wira wanimala wa esumana, Anamoona a muloko onlavuliwa nttaava nikina aahiiso a nikhuli nikina atthekuleke vamosa. Anna ni arokora yaakhuma miloko iye, yaanilaleerya vamosa, othukumana vamosa ni oxukuryana mmawannyeya. Miloko sinceene saahiirela mpantta murehereryo ole, nto efiliyaali yaahaakhela irelatoorio soohakalaliha. Masi, ale ahikhanle Anamoona yaahitikinihiwa. Mwa ntakiheryo, muhooleli mmosa a etiini aahimmye so: “Nnaamwi kihikhanle Namoona a Yehova, kinoona wira nyuwo mootthokiha saana muteko anyu woolaleerya, ni khamurina nthalu”. Anna ni arokora yoonenle sai murehereryo ole?

⁶ Murokora onilavula nttaava Xhosa, yoowo oniihaniwa Noma, aahixanka vaavo aalattunle awe Anamoona a muloko onlavuliwa Enkelexi. Masi, nuumala olaleerya ni Namoona mukunya, aahimulattula owannyawe, nto oxanka wawe waahimala. Owo onihimya wira: “Kihoona wira, awo  atthu ntoko hiyo!” Tivonto, vaavo anna ni arokora a muloko enlavuliwa Enkelexi yaaronwe aya olaleerya ni anna a muloko ninlavuliwa nttaava Xhosa, murokora Noma aahaalattula anna akina wira yalye owannyawe. Owo aahihakalala vanceene onweha mukunya yoowo aari mutokweene a muloko, okilaathiki vakaaxani. Axukhurelaka murehereryo ole, anna ni arokora anceene, ahaapaka apatthani asya ni annivikaniha waasuwela atthu a makhalelo oovirikana.

7. Xeeni okathi wotheene nintthuneya ahu wooniherya othunku?

⁷ Olumwenku ola wa Satana, arumeyi a Yehova anrowa okhalanaka mixankiho. Ntoko, ohikhalana muteko, owereyasiwa, olupatthiwa, ihasara sa ephattu, opweteiwa mireerelo saya mwaha wa otupheliwa aahiiso ihasara sikina. Nto mixankiho iyo pooti omphwanya khula mmosa a hiyo. Nave-tho, wira niwerye okhaliheryana okathi wa mixankiho, nihaana woonelana othunku. Tthiri othunku onooniiriha waathokorerya atthu akina mowaareerela murima. (aÉfeso 4:32) Mikhalelo iyo siniirela mpantta omutthu musya. Nave sinoonikhaliherya omutakiha Muluku ni waamaaliha atthu akina.​—2 aKorinto 1:3, 4.

8. Itthu xeeni sooloka sikhanle ookhumelela akhala wira ninniwoonela othunku ni waareerela murima atthu otheene a mmulokoni? Nvahe ntakiheryo.

⁸ Ninrowa waareerela sai murima atthu oohaawa ni ale anikhuma elapo ekina, yaawo anrwa muloko ahu? Nihaana owaakhela, waapaka opatthani ni owiiriha woona wira annaakheliwa mmulokoni. (1 aKorinto 12:22, 25) Mwa ntakiheryo, Dannykarl aahikhuma oFilipina orowaka oJapão. Okhala wira aari a elapo ekina, owo khaathokoreriwa saana ni atthu aavarana awe muteko. Nihiku nimosa aahirowela mithukumano sa Anamoona a Yehova. Dannykarl onihimya wira: “Nnaamwi atthu anceene muthukumano ole yaari a oJapão, awo yaahikaakhela saana, nto yaakhala ntoko atthu kaasuwenle aka khalai”. Oreera murima wa anna waahimukhaliherya omwaattamela Yehova. Nuuvira okathi Dannykarl aahibatiziwa, nto olelo-va mutokweene a mmulokoni. Axitokweene akhwaawe, annisiveliwa woona wira owo ni mwaarawe oniitthaniwa Jennifer, anniirela mpantta muloko ole. Axitokweene awo anihimya so: “Dannykarl ni Jennifer aakhweiherya okumi aya ntoko mapioneero ni annivaha ntakiheryo nooloka mwaha woopweha Omwene nipuro noopacerya”.​—Luka 12:31.

9, 10. Nvahe matakiheryo, anooniherya itthu sooloka sinikhumelela vaavo ninwoonela ahu othunku atthu nnaalaleerya ahu.

⁹ Tthiri ninnikhalana eparakha ya ‘owirela sorera atthu othene’, vaavo nnaalaleerya ahu ihapari sooreera sa Omwene. (aGalasia 6:10) Anamoona a Yehova anceene anniwoonela othunku anamurwa vaavo aniixutta aya nttaava na atthu awo. (1 aKorinto 9:23) Wiimananiha waya onnikumiherya mireerelo. Mwa ntakiheryo, murokora pioneera a wAustralia oniitthaniwa Tiffany, aahiixutta eSwahili wira akhaliheryeke muloko enlavuliwa eSwahili epooma ya oBrisbane. Nnaamwi wanvila wiixutta nttaava, Tiffany aahihakalala vanceene. Owo onihimya wira: “Olaleerya muloko onlavuliwa nttaava nikina, onniphwanyiha ohakalala.  Onlikana ni weetta mukwaha masi ori ene elapo awe. Maana munnisuwela sookumanana sa anna a olumwenku wotheene ni woona wiiraana wahu”.

¹⁰ Emusi emosa ya oJapão, yoopaka etthu emosaru. Mwanaya mwaamuthiyana oniihaniwa Sakiko onihimya so: “Ikwaha sinceene, vaavo ninlaleerya ahu ninnaaphwanya atthu anikhuma oBrasil. Nto vaavo ninwooniherya ahu soolepa ntoko Wisupulula 21:3, 4 aahiiso Esalimo 37:10, 11, 29, nimurumeelaka Biibiliya a Ekunya, awo annivaha ephoole ni ikwaha sikina annimoroxa maithori”. Mwaha woowoonela othunku ni ophavela waakhaliherya anamurwa ale, emusi ele yaahipacerya wiixutta Ekunya. Awo aakhaliherya opakiwa muloko wa Ekunya. Nto, mwa iyaakha sinceene, awo ahaakhaliherya anamurwa anceene okhala arumeyi a Yehova. Sakiko onihimya wira: “Waahivira okathi munceene wira niixutte Ekunya, masi wiimananiha wahu waahireelihiwa vanceene. Vano ninnimuxukhurela Yehova”.​—Musome Miteko 10:34, 35.

11, 12. (a) Xeeni vanitthuneya ahu okhalana moonelo wooloka wira niware omutthu musya? (b) Exeeni enrowa onikhaliherya okhala oowiiyeviha?

¹¹ Okhala wira nimphavela onvuwiha Yehova ohiya ottottopeliwa ni atthu akina, hiyo ninniimananiha owara omutthu musya. Muupuweleke wira hata nlaikha noomalela naahiixinnuwiha mpakha ottheka. (Mulikanyihe ni Ezekiyeli 28:17.) Okhala wira na atthu oohimalela, vannivila osyaka wiixinnuwiha. Hata vari siiso, nnoowerya owara wiiyeviha. Nto, exeeni enrowa onikhaliherya opaka eyo?

¹² Etthu emosa enrowa onikhaliherya owara wiiyeviha ti osoma khula nihiku Nuulumo na Muluku ni wuupuwelela ele enisoma ahu. (Otumererya 17:18-20) Tthiri ti vootthuneya wuupuwelela ele Yesu eniixuttinha awe ni otthara ntakiheryo nooloka onivanhe awe na wiiyeviha. (Matheyo 20:28) Yesu aari mutthu oowiiyeviha mpakha orapiha inawu sa awiixutti awe. (Yohani 13:12-17) Etthu ekina enitthuneya ahu opaka ori ovekela munepa wa Yehova. Munepa awe onoonikhaliherya owanana wiixoona okhala ootepa otthuneya waavikana atthu akina.​—aGalasia 6:3, 4; aFilipi 2:3.

13. Wiiyeviha oniphwanyiha mareeliho xeeni?

 ¹³ Musome Miruku 22:4. Yehova oniphavela wira nikhaleke atthu oowiiyeviha. Maana wiiyeviha onnikumiherya mareeliho manceene. Vaavo vaniiyeviha ahu, muloko onnitepa okhalana murettele ni wiiraana. Nave, Yehova onrowa onireerelaka murima. Murummwa Pedru aahimmye so: “Musareyeke wiyeviha, murumelanaka, okhala wira ‘Muluku onnakhotta atthu òwisona, masi onnavaha eparakha atthu òwiyeviha’”.—1 Pedru 5:5.

14. Ti pani ori ntakiheryo noolokexa na wiiyeviha ni opixa murima?

¹⁴ Olumwenku ola, akhala wira mutthu toomaala ni oopixa murima onooniwa ntoko mulolo. Masi eyo khahiyo ekeekhai. Maana mikhalelo iyo sinkhuma wa Yehova, Yoowo ori ootepa owerya olumwenku wotheene. Nave tori ntakiheryo noolokexa na mutthu oomaala ni oopixa murima. (2 Pedru 3:9) Mwa ntakiheryo, nkuupuwelani moota Yehova ampixenrye awe murima Abrahamu ni Lothi okathi aawaakhula awe orumeelaka nlaikha Nawe. (Maphattuwelo 18:22-33; 19:18-21) Nave nkahaya muupuwele ela: mwa iyaakha sinivikana 1.500, Yehova aahipixerya murima nloko noohiiwelela na aIsarayeli.​—Ezekiyeli 33:11.

15. Ntakiheryo xeeni Yesu ovanhe awe na omaala ni opixa murima?

¹⁵ Yesu aari mutthu “òmàla”. (Matheyo 11:29) Owo aanipixerya murima sootteettheya sa awiixutti awe. Okathi aalaleerya awe, Yesu aanithokoreriwa moohixariya ni aanivaanyihiwa. Masi owo aari oomaala ni oopixa murima mpakha okhwa wawe. Okathi Yesu oona awe owereya vanceene vamwirini va nihaaxeryo, aahinvekela Tiithi awe wira aalevelele atthu ale yaamukhomenle. Yesu aahimmye so: “Khansuwela sinìraya”. (Luka 23:34) Nave, hata okathi Yesu aaxankale awe aahiiso oona awe owereya, owo aahivikaniha okhala oomaala ni oopixa murima.​—Mmusome 1 Pedru 2:21-23.

16. Ninrowa wooniherya sai omaala ni opixa murima?

¹⁶ Paulo oohimya enamuna emosa nikhanle ahu oowooniherya omaala ni opixa murima vaavo aalempe awe wira: “Nvilelaneke, mulevelelaneke imara sothene muntthekelananyu. Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu”. (aKolosi 3:13) Wira niwerye waalevelela atthu akina, nihaana okhala oomaala ni oopixa murima. Eyo enookhaliherya ovikaniha okhala oowiiraana mmulokoni.

17. Xeeni okhala oomaala ni oopixa murima ori aya wootthuneya?

¹⁷ Yehova oniphavela wira nikhaleke oomaala ni naapixeryeke murima atthu akina. Mikhalelo iyo ti sootthuneya akhala wira ninniphavela okhala elapo esya. (Matheyo 5:5; Yakobo 1:21) Vaavo ninkhala ahu oomaala ni oopixa murima, ninninvuwiha Yehova ni waakhaliherya atthu akina opaka etthu emosaru.​—aGalasia 6:1; 2 Timótheyo 2:24, 25.

18. Ophenta ni ohikhalana nthalu onivarihana sai?

¹⁸ Mikhalelo sotheene nithokorenrye ahu sinivarihana ni ophenta. Mwa ntakiheryo, murummwa Yakobo aahaalopola annawe okhala wira yaanaathokorerya saana athaaciri masi khiyaawoonela vatthu amasikhini. Nave otthokihenrye wira eyo khenivarihana ni yooruma ya Muluku eni: “Mwaphenteke akhw’inyu ntoko sinìphentanyu”. Nave aahincererya oriki: “Mwathanlaka atthu, munnittheka”. (Yakobo 2:8, 9) Akhala wira ninnaaphenta atthu, khaninrowa waathanya atthu awo mwaha wa osoma waya, nikhuli aahiiso makhalelo aya. Nto eyo enoonikhaliherya ohaathanla atthu. Tivonto, nihaana waaphenta atthu otheene.

19. Xeeni vanitthuneya ahu owara ophenta?

¹⁹ Nave, ole omphenta “t’òvilela, t’òwarumela akhw’awe” ni “khanìkuxererya”. (1 aKorinto 13:4) Tthiri, wira niwerye waalaleerya atthu ihapari sooreera, nihaana okhala oopixa murima, ooreera murima ni oowiiyeviha. (Matheyo 28:19) Mikhalelo iyo sinninikhaliherya wataana ni anna ni arokora otheene a mmulokoni. Nto, vaavo otheene ahu nnooniherya ahu ophenta, muloko ahu onimwiiraana ni ninrowa onvuwihaka Yehova. Nave atthu akina animoona wiiraana wahu, nto eyo pooti owiiriha ophavela osuwela ekeekhai. Tivonto, otthokiheryaka sa owara omutthu musya, Biibiliya onimaliha so: “Wovikana sothene iya, mukuxe murima w’ophenta, weiwo ommaleliha orera murima”.​—aKolosi 3:14.

20. (a) Makoho xeeni nintthuneya ahu wiikoha ni nthowa xeeni? (b) Etthu xeeni yookuxa murima ninlipelela ahu?

²⁰ Wira niwerye wiikhaliha atthu a naanaano, nihaana wiikoha so: ‘Marukunuxo xeeni kinitthuneya aka opaka wira kivikanihe owara omutthu musya?’ Nihaana onvekela Yehova ni omuxonttela wira onikhaliherye. Nave-tho, nihaana wiimananiha vanceene oturuka muupuwelelo woohiloka wira niwerye ‘okela Momweneni mwa Muluku’. (aGalasia 5:19-21) Nave nihaana wiikoha so: ‘Kiireke kinnivikaniha olokiherya muupuwelo aka wira kimusiveliheke Yehova?’ (aÉfeso 4:23, 24) Okhala wira na atthu oohimalela, nihaana ovikaniha wiimananiha owara omutthu musya. Ninrowa opakaka eyo mahiku otheene. Tthiri, onrowa okhala woohakalaliha okathi atthu othene valaponi, anrowa aya owara omutthu musya ni otakiha moomalela mikhalelo sa Yehova!