1. Otheene ahu nimphavela wira amusi ahu yaapanke exeeni?

NIIREKE mookhalana amusi nlelo ahinimusuwela nnaakhala omphenta Yehova? Akhala wira ti siiso, woonasa wene mookhalana moonelo mmosaru ntoko wa murokora oniihaniwa Sifa. * Owo ohimmye so: “Okathi kiixuntte aka ekeekhai, kaaphavela wira amusi aka otheene esuwele wira nakhaleke vamosa mParayiisu. Otepexa wene kaaphavela wira kimurumeeleke Yehova vamosa ni iyaka oniihaniwa Saiti ni mwanihu mwaamulopwana”.

2. Mwaha ola, ninrowa waakhula makoho xeeni?

² Hiyo khaninwerya waakhanyererya amusi ahu weemererya ihapari sooreera. Masi nihaana waakhaliherya weemererya ihapari sooreera. (2 Tim. 3:14, 15) Xeeni vanireerela aya waalaleerya amusi ahu? Xeeni nintthuneya ahu wiimananiha osuwela moonelo aya? Nihaana opaka exeeni wira naakhaliherye amusi ahu omusuwela ni omphenta Yehova? Anna a mmulokoni anrowa onikhaliherya sai? Mwaha ola, ninrowa waakhula makoho awo.

3. Moovarihana ni 2 Pedru 3:9, xeeni vanireerela aya waalaleerya amusi ihu?

³ Moohipisa, Yehova onoopwetexa olumwenku ola wootakhala. Masi otheene ale aniphavela ekumi yoohimala animoopowa. (Mit. 13:48) Moohaanyiherya, ninniviriha okathi munceene naalaleeryaka atthu nihinaasuwela ahu anikhala muttetthe ahu. Nto nihaana opaka etthu emosaru wira naakhaliherye amusi ihu omusuwela ni omurumeela Yehova. Tthiri Tiithi ihu oophenta Yehova, khomphavela “wira mutthu apweteye, nnákhala mmosá. Ontthunexawe wira atthu othene erukunuxe murima”.​—Mmusome 2 Pedru 3:9.

4. Woonasa wene, yoovonya xeeni nimpaka ahu okathi nnaalaleerya ahu amusi ahu?

 ⁴ Nihaana osuwela wira yookhala enamuna yooloka ni yoohiloka ya waalaleerya atthu ihapari sooreera sinoopola ikumi. Mwa ntakiheryo, vaavo nnaalaleerya ahu atthu nihinaasuwela ahu, ninnilavula mooreerela murima ni mwa nttittimiho. Nto nihaana opaka eyo, okathi nnaalaleerya ahu amusi ihu.

5. Nihaana wuupuwela exeeni nihinatthi waalaleerya amusi ahu?

⁵ Vaavo nnuupuwela ahu enamuna naalalenrye ahu amusi ihu ekwaha yoopacerya, anamunceene a hiyo ninnixanka nnuupuwela wira naahaana waalaleerya mwa enamuna ekina. Murummwa Paulo oonivaha miruku iya sini: “Okathi p’ukathi molumo anyu ekhaleke òrera ni owèleliwa ni makha: musuwele omwakhula khula mutthu ntoko vanrerelaya”. (aKol. 4:5, 6) Ti vooloka wuupuwela miruku iyo sa Paulo okathi nnaalaleerya ahu amusi ahu. Maana, akhala wira khanimpaka eyo, hiyo pooti waaramusa ohiya waakhaliherya owiriyana ihapari sooreera.

6-7. Nvahe ntakiheryo nnooniherya wira ti vootthuneya omoonela othunku ole nithelanne ahu ohinimurumeela Yehova.

⁶ Nwooneleke othunku. Sifa nimulavunle ahu wanipacerya ohimmye so: “Wanipacerya kaamakela omuleela iyaka myaha sa mBiibiliyani paahi. Nto khinaalavula myaha sa khula nihiku”. Masi iyawe Sifa oniihaniwa Saiti khaasuwela itthu sinceene sa mBiibiliyani ni khaiwexexa ele Sifa aamuleela awe. Nto Saiti uupuwela wira khula etthu Sifa aalavula awe yaavarihana ni etiini awe. Nave uupuwela wira mwaarawe iirela mpantta etiini yootakhala ni anwokiwa.

⁷ Tthiri Sifa onneemererya wira aaniviriha okathi munceene ohiyu ni wanikisa wa esumana ori ene ni anna ni arokora omithukumanoni,  muteko woolaleerya ni atthekulaka. Sifa onihimya so: “Okathi mukina vaavo Saiti aarwa awe owaani, khamphwanya mutthu”. Tthiri, Saiti aaniphavela oviriha okathi ni mwaarawe ni mwanawe. Nto okhala wira khaasuwela atthu Sifa eettana awe, Saiti uupuwela wira apatthani aya amwaarawe yaari ootepa otthuneya onvikana yena. Nto Saiti aaphavela omwalana ni Sifa. Niireke munniweha inamuna Sifa aakhanle awe oomoonela othunku iyawe?

8. Moovarihana ni 1 Pedru 3:1, 2, exeeni enrowa waavara murima amusi ahu?

⁸ Mwaavaheke ntakiheryo nooloka. Okhala wene, ele nimpaka ahu ennaavara murima amusi ahu ovikana moolumo ahu. (Mmusome 1 Pedru 3:1, 2.) Nuuvira okathi, Sifa aahisuwela ekeekhai eyo. Owo oni: “Kaahisuwela wira Saiti aanikiphenta vanceene ni khaaphavela omwalana ni miyo. Nto nuumala osuwela wira aahimpaka palano wira omwalane ni miyo, kaahoona wira kaahaana ovarihela muteko ele Yehova onihimya awe sa ekasamento. Ohiya omakela olavula vanceene, kaahoona wira etthu yootepa otthuneya waari onvaha ntakiheryo nooloka ohiya omakela omulaleerya”. Nto Sifa aahihiya omukhanyererya Saiti olavula myaha sa mBiibiliyani ni aahipacerya ovaanela myaha sa khula nihiku. Vano Saiti aahoona wira mwaarawe aari mutthu a murettele ni mwanawe aahikhalana mweettelo wooloka. (Mir. 31:18, 27, 28) Okathi Saiti oonale awe wira malakiheryo a mBiibiliyani yaanikhaliherya vanceene etthoko awe, owo aahipacerya weemererya muhupi wa mBiibiliyani.​—1 aKor. 7:12-14, 16.

9. Xeeni vari aya vooloka ovikaniha waakhaliherya amusi ihu?

⁹ Nvikanihe waakhaliherya amusi anyu. Yehova oonivaha ntakiheryo nooloka na ovikaniha waakhaliherya atthu. Owo aamakela waavaha eparakha atthu awe wira awiriyane ihapari sooreera  sinoopola. (Yer. 44:4) Nave murummwa Paulo aahimutumererya Timootheyo ohihiyererya waakhaliherya atthu akina. Mwaha wa xeeni? Mwaha woowi, akhala wira ampaka eyo, owo ni ale yanwiriyana yaamoopowa. (1 Tim. 4:16) Hiyo nave, ninnaaphenta vanceene amusi ahu, nto nimphavela wira yiixutte ekeekhai ya mBiibiliyani. Nuuvira okathi, miteko ni moolumo a Sifa yaahikhaliherya vanceene etthoko awe. Vano Sifa onnihakalala vanceene omurumeela Yehova vamosa ni iyawe. Nto otheene aya mapioneero ni Saiti onirumeela ntoko mutokweene a mmulokoni.

10. Xeeni vari aya vooloka opixa murima?

¹⁰ Mpixeke murima. Vaavo nniixutta ahu ni wiiwelela malamulo a Muluku, ninnipaka marukunuxo mookumini mwahu wira nikhaleke moovarihana ni sookupali sahu. Nto amusi ahu pooti waavila weemererya sookupali sahu sa niinaano. Mwa ntakiheryo, etthu yoopacerya anoona aya tiila: annoona wira khaninkhaliherya-tho isatakha ni khanniirela mpantta epoliitika. Nto eyo pooti owiiriha amusi ahu opacerya oninyokha. (Math. 10:35, 36) Masi nihikhala-khale nihiyaka waakhaliherya. Akhala wira nnoohiya waakhaliherya osuwela sookupali sahu, vanrowa okhalaka ntoko wira khanreerela ophwanya ekumi yoohimala. Nto nisuweleke wira Yehova khonivanhe ehakhi yoohimya akhala wira mutthu owo onniphwanela ophwanya okumi woohimala aahiiso nnaari. Maana onivanhe muteko Yesu aavara awe. (Yoh. 5:22) Akhala wira nnoopixa murima, woonasa wene amusi ahu anooniwiriyana.—Nwehe ekaaxa eni: “ Murumeeleke Esaiti Ahu Wira Mwiixuttihe”.

11-13. Enamuna Alice aathokorerya awe anamuyari awe ewiixuttinheni exeeni?

¹¹ Mukhaleke ooreera murima, masi muhaahiye amusi anyu aturukaka soothanla sanyu. (Mir. 15:2) Nkahaya nwehe ntakiheryo na Alice. Owo iixuntte ekeekhai okhalaka ottaiwene wa anamuyari awe, yaawo yahaakupali wira Muluku ookhala ni yaakhaliherya vanceene epoliitika. Alice aahisuwela wira aahaana waaleela itthu soohakalaliha iixuntte awe. Owo onihimya so: “Akhala wira munoopisa waaleela amusi anyu marukunuxo mpanke anyu ni sookupali sanyu, eyo enoowiiriha otepa oxanka”. Alice aahiimananiha ophwanya myaha oona awe wira samwaakhaliherya vanceene anamuyari awe. Nto aahaalepela ewarakha anamuyari awe aaleelaka myaha iyo sa mBiibiliyani ni aahaavekela moonelo aya, okupaliki wira samwaasivela myaha iye ntoko saamusivela aya. (1 aKor. 13:1-13) Alice aahaaxukhurela vanceene anamuyari awe mwaha woomuhuwa ni aahaavaha itthu. Okathi aaxukurya awe anamuyari awe, Alice aaniimananiha omukhaliherya maama awe ovara miteko sa vate. Wanipacerya, vaavo Alice aalenle awe anamuyari awe sookupali sawe awo, khiyaasiveliwe.

¹² Okathi Alice aari awe ni anamuyari awe, aahivikaniha omusoma Biibiliya khula nihiku. Alice onihimya so: “Omusoma Biibiliya khula nihiku waahimukhaliherya maama aka woona wira Biibiliya etthu yootepa otthuneya mookumini mwaka”. Nave paapa awe Alice aahipacerya omusoma Biibiliya wira osuwele etthu yaaturunke muupuwelo wa mwanawe, nave aamusoma ophavelaka ophwanya itthu soohiloka. Alice onnivikaniha oriki: “Kaahinvaha Biibiliya paapa aka, nave kaahilepa moolumo vakhaani mBiibiliyani mmo”. Exeeni yaakhumelenle? Ohiya ophwanya itthu soohiloka, paapa awe Alice aahisiveliwa vanceene ele aasoma awe mBiibiliyani.

¹³ Vaavo ninkhala ahu ooreera murima ni ohaahiya amusi ahu aniirihaka oturuka yoothanla ahu, ninniwerya ovilela olupatthiwa. (1 aKor. 4:12b) Mwa ntakiheryo, Alice aahiwerya ovilela olupatthiwa ni maama awe. Owo oni: “Okathi kaapatisiwe aka, Maama aka aahikihimya okhala  ‘mwaana oohiiwananeya’”. Nto Alice aapanke exeeni? Owo onnaakhula oriki: “Nkaahiyale olavula sa etiini aka esya ni mwa nttittimiho kaahaatthokiherya wira kaahilakela okhala Namoona a Yehova ni nkaahiyale amusi aka akiirihaka oturuka yoothanla aka. Kaahiimananiha omooniherya maama aka wira kinnimphenta vanceene. Oowanli ahu naahinla ni kaahimwaapeela yoolya yoosiva. Okhuma nihiku nne, maama aka aahoona wira Biibiliya ookikhaliherya okhala mutthu ooreera murima”.

14. Xeeni vari aya vooloka ohiweemererya amusi anyu aturukaka yoothanla anyu ya omurumeela Yehova?

¹⁴ Pooti ovira okathi wira amusi ahu asuwele oratteene wira ninnivaha efaita omurumeela Yehova. Mwa ntakiheryo, okathi Alice aalakenle awe okhala pioneera ohiya ovara muteko anamuyari awe yaaphavela aya wira ovareke, maama awe aahitthikela wunla vanceene. Masi Alice aahivikaniha ovarexexa yoolakela awe. Owo onihimya so: “Akhala wira munniweemererya amusi anyu oturuka yoothanla anyu, woonasa wene awo anrowa omakelaka wookhanyereryani oturuka soothanla sanyu”. Masi akhala wira munnaareerela murima ni munnivarexexa soothanla sanyu, munimwaakhaliherya amusi anyu woowiriyanani. Eyo ti etthu yaamwiiranenle Alice. Olelo-va, Alice ni anamuyari awe mapioneero ni paapa awe onirumeela ntoko mutokweene a mmulokoni.

15. Moovarihana ni Matheyo 5:14-16 ni 1 Pedru 2:12, “miteko . . . sorera” sinaakhaliherya sai amusi ahu?

¹⁵ Yehova onnirumeela “miteko . . . sorera” sa arumeyi awe wira aakhaliherye atthu akina omusuwela. (Mmusome Matheyo 5:14-16; 1 Pedru 2:12.) Akhala wira ole muthelanne anyu khahiyo  Namoona a Yehova, niireke onnaasuwela anna a mmulokoni? Sifa nimulavunle ahu wanipacerya, aahaalattula owannyawe anna ni arokora wira iyawe aasuwele oratteene. Saiti onnuupuwela moota munna mmosa aamukhalihenrye awe waasuwela oratteene Anamoona a Yehova. Owo onihimya so: “Munna ole aahikumiha ifeeriya nihiku nimosa omutekoni wawe wira orwe owannyaka onweha boola ni miyo. Eyo yaahikikhaliherya woona wira atthu ale tooloka ni onnaasivela ovara itthu sikina”.

16. Xeeni vari aya vooloka waalattula amusi ahu orowela mithukumano sahu?

¹⁶ Enamuna emosa nikhanle ahu oowaakhaliherya amusi ahu ori waalattula orowela mithukumano sahu. (1 aKor. 14:24, 25) Muthukumano woopacerya Saiti aarowenle awe waari Wuupuwela Okhwa wa Yesu, maana waapakiwe nuumala Saiti ophera muteko awe ni waari mwaamukhaani. Owo onihimya so: “Miyo nkinuupuwela saana etthu yaalavuliwe muthukumano ole, masi mweettelo wa atthu ale waahikisivela vanceene. Awo yaahirwa okikhomasa ni okikhupaarela vanceene. Nto kaahoona wira atthu ale tooreera murima”. Anamathelana amosa yaahimukhaliherya vanceene Sifa, awo yaanimukhaliherya mwanawe mmithukumanoni ni muteko woolaleerya. Nto okathi iyawe Sifa aaphavela awe osuwela sookupali sa mwaarawe, Sifa aahinvekela munna ole wira omusomiheke Biibiliya Saiti.

17. (a) Xeeni vahinreerela aya wiivaha nthowa? (b) Xeeni vahinreerela aya ohiya waakhaliherya amusi ahu?

¹⁷ Ninnilipelela wira amusi ahu anoopacerya omurumeela Yehova. Masi muhiliyale wira hata niimananihaka vanceene waakhaliherya amusi ahu okhala arumeyi a Muluku, awo pooti oheemererya ekeekhai. Akhala wira eyo enimwiiraneya nihiivaheke nthowa mwaha wa yoothanla aya. Maana khaninwerya waakhanyererya atthu weemererya sookupali sahu. Masi akhala wira amusi anyu animoona wira munnihakalala mwaha woomurumeela Yehova, eyo pooti waakhaliherya vanceene. Muhiliyale waavekelela. Mwaareereleke murima okathi munlavulana anyu. Nave muhikhala-khale muhiyaka waakhaliherya. (Mit. 20:20) Xontte, mukupaliki ni murima wotheene wira Yehova onooreeliha wiimananiha wanyu. Nto akhala wira amusi anyu anoothanla woowiriyanani, awo animoopowa!