1. Exeeni maKristau anireerela aya opaka wira yaphwanye etthuvo aya?

MAKRISTAU annitthimaka wira yaphwanye ekumi yoohimala. Woonasa wene, nyuwo mpacenrye niinaano otthimaka, masi akina a hiyo apacenrye khalai. Hata nipacenrye ene khalai aahiiso niinaano, otheene ahu nihaana ovikaniha otthimaka wira naphwanye etthuvo ahu. Murummwa Paulo aahaavaha malakiheryo maKristau yaakhala oFilipi wira ahihiye otthimaka. Okathi yaakhenle aya ewarakha ya Paulo, maKristau makina a oFilipi yiira akhumme ene khalai omurumeela Yehova. Awo yaanitthimaka mwa enamuna yooloka, masi hata vaari siiso, Paulo aahiwuupuxerya etthu yootepa otthuneya yaarowa waakhaliherya. Etthu ene tiila: Wira atthimake mpakha omukanoni, yaahaana otthimaka avilelaka. Tthiri Paulo aaphavela wira maKristau a oFilipi atthareke ntakiheryo nawe, atthimakelaka ‘omukanoni, wira aphwanye otthuveliwa’.​—aFil. 3:14.

2. Xeeni ohimyaka wira Paulo aavanhe miruku aFilipi okathi wooreerela?

² Tthiri murummwa Paulo aahaavaha miruku okathi wooreerela maKristau a oFilipi. Atthu a oFilipi yaanaalupattha anna okhuma okathi muloko ole waapakiwe aya. Mwaakha wa 50, Paulo ni Sila yaahiiwelela nlattulo na Muluku naahimya wira “murwé oMasedonia”. (Mit. 16:9) Okathi yaaphiyale aya, Paulo ni Sila yaahimphwanya muthiyana iihaniwa Lidia. Moohakalaliha Lidia “aniwiriyana masu orattene”, nto “Apwiya yahimutthukula murima wira aiwexexe” ihapari sooreera. (Mit. 16:14) Moohipisa, Lidia ni atthu otheene a etthoko awe, yaahibatiziwa. Masi Diabo khaikhuranne, maana moohipisa aahipacerya waakumiherya maxakha. Alopwana a epooma ele yaahinvara Paulo ni Sila khumuroiha wa makhulupale ahimyaka wira yaanyakuliha atthu a epooma ele. Nto mwaha wowootheriwa iwo, Paulo ni Sila yaahimanakasiwa ni yaahitthukweliwa mukhatteya, muhoolo mwaya yaahoomoliwa epooma ele. (Mit. 16:16-40) Niireke awo yaahikhulumuwa? Nnaari! Ankhi anna ni arokora a muloko ole wa niinaano? Moohakalaliha awo  nave yaahivilela ni yaahilipa vanceene oweha ntakiheryo murummwa Paulo ni Sila yaavanhe aya!

3. Paulo aalakenle opaka exeeni ni makoho xeeni ninrowa ahu othokorerya?

³ Paulo aahilakela ohikhulumuwa wala wooceya. (2 aKor. 4:16) Nave aanisuwela wira ahaana ovikaniha omurumeela Yehova owehexexaka etthuvo awe. Ntakiheryo na murummwa Paulo, ninniixuttiha exeeni? Matakiheryo xeeni a atthu a mahiku ala annikhaliherya woona wira vanniweryaneya ovikaniha ovilela hata nihaawaka? Nlipelelo nahu na muhoolo, ninnikhaliherya sai ovikaniha otthimaka?

4. Paulo aavikaninhe sai ovara muteko wa Yehova hata okathi wooxankiha?

⁴ Nkahaya muupuwele makhalelo a Paulo okathi aalepenle awe epaphelo aFilipi. Owo aari empa aatthukweliwe awe oRoma, nto khaawerya orowa olaleerya empa ni empa. Masi hata vaari siiso, Paulo aanaalaleerya atthu ale yaarwa omuxukurya ni aanilepela iwarakha miloko soorakamela oRoma. Moolikanasa, olelo-va, mwaha wa makhalelo ahiniweemererya, anna ni arokora akina khaniwerya okhuma owannyeya wira yalaleerye. Masi, hata arina ene mixankiho, awo annaalaleerya ale anaaxukurya. Ohiya-vo, awo annaalepela iwarakha soolipiha atthu nihinaaphwanya ahu owannyeya okathi ninlaleerya ahu.

5. Moovarihana ni aFilipi 3:12-14, exeeni yaamukhalihenrye Paulo ohooceya?

⁵ Paulo kheemerenrye itthu aapanke awe khalai sikhale sooloka aahiiso soohiloka simwiirihaka ohiwehexexa muteko anvarela awe Yehova. Tthiri owo aahimmye wira “kinniliyala sihanle ottuli”, nto eyo yaahimukhaliherya ‘otthimakela siri oholo’, eyo piiyo, otthimakela omukanoni mpakha ophwanya etthuvo. (Mmusome aFilipi 3:12-14.) Itthu xeeni saarowa omooceeliha Paulo ovikaniha otthimaka? Yoopacerya: Paulo aahivara itthu sinceene etiini ya aYuda, masi nnaamwi vaari siiso, Paulo aanoona itthu iyo aapanke awe ntoko “ikokhola”. (aFil. 3:3-8) Ya nenli: Nnaamwi khalai aalupattha maKristau, owo khaamakela wiivaha nthowa mpakha omwiiriha wooceya. Ya neeraru: Paulo khuupuwela wira itthu sotheene ampakenle awe Yehova saahiphiyerya vahinareerela ovikaniha wiimananiha. Paulo aanimananiha olaleerya hata aalupatthiwa, otthukweliwa, omaniwa, osama mmaasini ni hata okathi mukina aahaakhalana yoolya wala yoowara. (2 aKor. 11:23-27) Tthiri nnaamwi aapanke itthu sinceene ni aahaawale vanceene, Paulo aahilakela ovikaniha ovara muteko wa Yehova. Hiyo nihaana okhalana moonelo mmosaru ntoko wa Paulo.

6. Itthu xeeni “sihanle ottuli” woonasa wene ninreerela ahu oliyala?

⁶ Ninrowa otthara sai ntakiheryo na Paulo ni ‘oliyala sihanle ottuli’? Anna ni arokora akina annixanka mwaha wa itampi apanke aya khalai. Akhala wira ti siiso, muhaana opaka eprograma ya omusoma Biibiliya voohimya sa mukuttho wowoopola wa Kristu. Nto okathi munimusoma anyu, muhaana wuupuwelela ele munsoma anyu ni ovekela. Opaka eyo enimookhaliheryani omaliha wiivaha nthowa. Tthiri mukupaliki wira munoowerya omaliha oxanka mwaha wa itampi Yehova oolevelenlaaweni. Nwehe etthu ekina nniixutta ahu ni ntakiheryo na Paulo. Anna ni arokora akina, aahiya muteko wa mulaponi yaaliviwa aya musurukhu munceene wira avikaniheke okhaliherya Omwene. Akhala wira nyuwo moopaka eyo, enamuna emosa enrowa wookhaliheryani ori ‘oliyala itthu sihanle ottuli’ ni ohiwehexexa itthu sa werutthuni, woonasa wene muhiyale anyu siviraka. (Moth. 11:4-6; Mus. 7:10) Itthu “sihanle ottuli” pooti ohela muhina itthu sooloka nipanke ahu mmutthenkesoni mwa Yehova ni mixankiho niwenrye  ahu ovilela khalai. Ekeekhai wira, wuupuwela moota Yehova onireelinhe awe khalai onnilipiha waataana wahu ni Tiithi ahu a wiirimu. Masi, nihiikhuraaneke nuupuwelaka wira itthu ninvarenle ahu khalai soophiyerya.​—1 aKor. 15:58.

7. (a) Moovarihana ni 1 aKorinto 9:24-27, nihaana opaka exeeni wira niphiye omukanoni? Nvahe nlikanyiho.

⁷ Paulo aaniiwexexa saana moolumo a Yesu ani: “Mwikhanyereriheke”. (Luka 13:23, 24) Owo aanisuwela wira aahaana omutakiha Kristu, iimananihaka mpakha wanikisa wa okumi awe. Tivonto aalikanyinhe awe makhalelo a maKristau ni otthimaka. (Mmusome 1 aKorinto 9:24-27.) Ale anitthimaka anniwehexexa opuro anrowa aya. Mwa ntakiheryo, olelo-va atthu ale antthimaka mpooma, annivira iphiro oneettiwa nakoso aahiiso sinipakiwa itthu sikina. Nkahaya muupuwele akhala wira mulipa-ootthimaka onneemela okathi vakhaani wira owehe itthu iyo. Akhala wira onniphavela waakhela etthuvo, owo khonrowa opaka eyo! Mwa enamuna emosaru, vaavo nintthimaka ahu wira naphwanye etthuvo ahu eri ekumi yoohimala, nihaana osyaka oweha itthu saarowa oniiriha ohiphiya omukanoni. Tthiri nihaana opaka ele Paulo aapanke awe, eyo piiyo, owehexexa etthuvo ni wiimananiha wira naphwanye. Akhala wira nnoopaka eyo, nikupaliki ni murima wotheene wira nnootthuveliwa!

8. Mixankiho xeeni miraru ninrowa ahu othokorerya?

⁸ Nrowe niwehe mixankiho miraru sikhanle oonikhulumula. Mixankiho sene tiiya: (1) Ohiiraneya itthu naalipelela ahu, (2) owereyasiwa aahiiso wuuluvala ni (3) mixankiho sinviriha okathi munceene. Etthu enrowa onikhaliherya vanceene, ori woona moota anna akina awenrye aya ovilela mixankiho iyo.​—aFil. 3:17.

9. Exeeni ekhanle oonikhumelela akhala wira kheniiraneya ele naalipelela ahu?

⁹ Ohiiraneya itthu naalipelela ahu. Otheene ahu ninnilipelela wiraneya itthu sotheene Yehova oleihenrye awe. Okhalana moonelo owo khahiyo vootthekeya, maana profeta Habakuki aahihimya wira aaphavela woona moota Yehova aarowa awe omaliha mixankiho oYuda. Yehova khampwapwenle mwaha woopaka eyo, masi aamulenle wira: “Mulipeleleke”. (Hab. 2:3) Masi, okathi mukina hiyo pooti woonaka wira itthu  ninlipelela ahu sinnipisa wiiraneya. Eyo pooti oniiriha ohikhalela nthiti weettela ekeekhai aahiiso onyoonyeriwa ovara miteko sa Muluku. Nave pooti onriipiha murima. (Mir. 13:12) Eyo yaahiwiiraneela anna oowoottihiwa iyaakha sa 1914. Anna anceene oowoottihiwa yuupuwela wira yaamurowa waakhela etthuvo aya wiirimu mwaakha ene yoole. Mooriipiha murima eyo khiyiiraneyale, nto exeeni yaakhalihenrye anna oororomeleya okathi ole yahiiraneyale aya ele yaalipelela aya?

10. Exeeni yaapanke aya anamathelana amosa okathi yahiiraneyale aya ele yaalipelela aya?

¹⁰ Nwehe ntakiheryo na Royal ni Pearl Spatz, anamathelana oororomeleya yaakumanne muxankiho owo. Munna Royal Spatz aabatiziwe 1908 orina ene iyaakha 20. Munna ole aanikupali ni murima wotheene wira moohipisa aarowa waakhela etthuvo awe wiirimu. Nto 1911, okathi munna Royal aamuuryale awe Pearl aahimuleela wira: “Tthiri moosuwela etthu enrowa wiiraneya 1914. Akhala wira nnoothelana, ohaana okhala moowaakuveya!” Vano 1914 aahiphiya ni ele yaalipelela aya khiyiiraneyale. Niireke eyo yaahiwiiriha anamathelana ale ohiya otthimaka? Nnaari. Maana etthu yaatepa aya ovaha efaita waari omurumeela Muluku ni opaka yootthuna awe, ohiya owehexexa etthuvo aya paahi. Awo yaahilakela otthimaka avilelaka. Eyo ti etthu yaalakenle aya opaka mpakha omaliha muteko aya valaponi. Tthiri onnaattamela okathi Yehova onrowa awe otteeliha nsina nawe, wooniherya okhulupale awe, omaleliha itthu sotheene oleihenrye awe ni oruuha olamulelo wooloka. Masi mukupaliki ni murima wotheene wira itthu iyo sinimwiiraneya okathi Yehova othanlale awe. Nlipelelaka ophiya okathi owo, nrowe nivikanihe oluttuweliwa ovara muteko wa Muluku, ni oheemererya okhulumuliwa ni itthu naalipelela ahu sihiiraneyale.

11-12. Xeeni vanireerela aya ovikaniha hata niwereyasiwaka aahiiso nuuluvanle ene? Nvahe ntakiheryo.

¹¹ Owereyasiwa aahiiso wuuluvala. Atthu ale antthimaka ahaana okhalana okumi wooloka ni ikuru sinceene. Moovirikana ni atthu awo, khivantthuneya okhalana okumi wooloka aahiiso ikuru sinceene wira nvikanihe wunnuwa momunepani. Tthiri anna ni arokora anceene annivikaniha oluttuweliwa hata yuuluvanle ene aahiiso awereyasiwaka. (2 aKor. 4:16) Mwa ntakiheryo, nwehe yowiiraneya ya Munna Arthur Secord. * Owo aarina iyaakha 88 ni aarumeela oBetheli iyaakha 55 ni khaareere owereiwa. Nihiku nimosa, nfirimeera aamukhaliherya aahiphiya ekhaama awe wira omukhapelele. Owo aahinweha munna ole khuhimya wira: “Munna Arthur, khamureere weetta mikwaha soorakama mmurumeelaka Yehova”. Masi munna Arthur khaawehexexa itthu aapanke awe khalai. Owo  aahinweha nfirimeera ole, otheyaka khuhimya so: “Aayo, ekeekhai. Masi etthu yootepa otthuneya khahiyo itthu nipanke ahu khalai, ti ele nimpaka ahu okhuma olelo mpakha muhoolo”.

¹² Woonasa wene, mpacenrye khalai omurumeela Yehova, masi vano okumi anyu khoniweemereryani opaka itthu ntoko mwaaphavela anyu. Akhala wira eyo enniwiiraneelani, muhikhulumuwe. Mukupaliki wira Yehova onnivaha efaita itthu sotheene mpanke anyu khalai. (aHéb. 6:10) Muupuwelaka ele eniiraneya niinaano-va, musuweleke wira omphenta Yehova khonlipa ni itthu nimpaka ahu mmutthenkesoni mwawe. Ninnooniherya wira ninnimphenta Yehova vaavo ninkhalana ahu moonelo wooloka ni opaka itthu sotheene ninwerya ahu moovarihana ni makhalelo a ekumi ahu. (aKol. 3:23) Yehova onnisuwela itthu ninwerya ahu opaka ni nihinwerya ahu, tivonto khonnivekela itthu nihinwerya ahu.​—Mar. 12:43, 44.

13. Exeeni yaamwiiranenle Anatoly ni Lidiya? Yowiiraneya aya ennikhaliherya sai ovikaniha omurumeela Yehova hata nrina ene mixankiho?

¹³ Mixankiho sinviriha okathi munceene. Anna ni arokora akina annivilela mixankiho ni olupatthiwa okhuma khalai. Mwa ntakiheryo, Anatoly Melnik, * a oMoldávia, aarina iyaakha 12 okathi paapa awe aatthukweliwe awe khuroihiwa mapuro waavariwa muteko mookhanyereriwa oSibéria. Opuro ole waahirakamela ikiloomo 7.000 ni oMoldávia. Nuuvira eyaakha emosa, Anatoly, maama awe, piipi awe ni taata awe yaahiroihiwa oSibéria. Muhoolo mwaya, awo yaaniwerya orowela mithukumano epooma yaamukhaani, masi yaahaana weetta ikiloomo 30 wira aphiye opuro ole. Ohiya-vo, awo yaahaana ovilela eneevi ni oriirya waavikana zero grau. Moottharelana, Anatoly aahiviriha iyaakha 3 ori ene mukhatteya ni aari ottaiwene wa amwaarawe aniihaniwa Lidiya ni mwanaya mwaamuthiyana aarina eyaakha emosa paahi. Hata yaarina mixankiho iyo mwa iyaakha sinceene, Anatoly ni emusi awe aahivikaniha otthimaka. Olelo-va, Anatoly orina iyaakha 82 ni onirumeela Ekomisau ya Efiliyaali ya wÁsia Central. Mpakeke ele Anatoly ni Lidiya yaapanke aya, eyo piiyo, wiimananiha ovara muteko wa Yehova ni ovilela ntoko siisaale mwaavilenle anyu khalai.​—aGal. 6:9.

14. Paulo aahaana opaka exeeni wira ophwanye etthuvo awe?

¹⁴ Paulo aanikupali wira anwerya omaliha otthimaka wawe ni waakhela etthuvo awe. Okhala wira aari muKristau oowoottihiwa, Paulo aanilipelela ophwanya ‘otthuveliwa ìhaneliwawe ni  Muluku’. Masi, owo aanisuwela wira aahaana wiimananiha vanceene wira ophiye “omukanoni”. (aFil. 3:14) Wira aakhaliherye aFilipi ovikaniha owehexexa etthuvo aya, owo aahipaka nlikanyiho nikina.

15. Paulo aarumenle sai ntakiheryo na okhalana elapo wira aatumererye aFilipi ovikaniha wiimananiha?

¹⁵ Murummwa Paulo aahiwuupuxerya aFilipi wira elapo aya yaari wiirimu. (aFil. 3:20) Xeeni vaari aya vooloka wuupuxeriwa eyo? Okathi ole, atthu anceene yaanivaha efaita okhala a elapo ya oRoma. * Masi maKristau ale oowoottihiwa yaarowa waakhela elapo yootepa oloka ovikana oRoma, yeeyo yaarowa waaphwanyiha mareeliho manceene. Tthiri nalikanyiha ni olamulelo wa wiirimu, elapo ya oRoma khahiyo etthu! Tivonto Paulo aatumerenrye awe aFilipi wira: “Mwetteke sana pahi, ntoko simphwanelelaya ehapari yorera ya Kristu”. (aFil. 1:27) Ntoko maKristau oowoottihiwa a okathi ole, olelo-va maKristau arina nlipelelo na okhala wiirimu ntakiheryo nooloka na atthu aniimananiha wira yaphwanye etthuvo.

16. Moovarihana ni aFilipi 4:6, 7, nihaana opaka exeeni moohicikha nlipelelo nahu?

¹⁶ Hata nrina ene nlipelelo na okhala wiirimu aahiiso mparayiisu valaponi, nihaana ovikaniha wiimananiha wira naphwanye etthuvo ahu. Nihimakeleke oweha itthu nihiyale ahu ottuli. Nave niheemererye nnakhala etthu emosa eniirihaka ohiya omurumeela Yehova. (aFil. 3:16) Hata itthu ninlipelela ahu sipisaka wiiraneya, aahiiso niwereyasiwaka, nuuluvanle ene wala mixankiho sahu sipisaka omala nihitepeke ‘wukhuwa mwaha w’etthu p’itthu’. Masi nihaana omuxonttela Muluku wira onivahe murettele onvikana muupuwelo ahu.​—Mmusome aFilipi 4:6, 7.

17. Mwaha onittharelana, ninrowa othokorerya exeeni?

¹⁷ Ntoko siisaale atthu ale antthimaka aniimananiha aya vanceene wira aphiye omukanoni, hiyo nave nihaana owehexexa mukano ahu, eyo piiyo, etthuvo ahu ya okumi woohimala. Tthiri Yehova oonileiherya itthu soohakalaliha muhoolo. Nto nihaana ovikaniha wiimananiha moovarihana ni makhalelo ahu. Masi, nihaana opaka exeeni wira nivikanihe otthimaka mwa enamuna yookhalela ni ohitthikela ottuli? Mwaha onittharelana, onrowa onikhaliherya ‘osuwela othanla itthu sintepa ophwanela’.​—aFil. 1:9, 10.