1-3. Xeeni okathi mukina anna ale anivara muteko wa okathi wotheene anikhalana aya marukunuxo a yoothanleliwa aya?

ROBERT NI MARY JO aaviriha iyaakha 21 ari ene mamisionaario, nuuvira okathi anamuyari a Robert ni a Mary yaahipacerya owereyasiwa. Awo anihimya so: “Naahihakalala orowa waakhapelela anamuyari ahu. Masi hata vaari siiso, naahiriipiwa murima ohiya ovara muteko waanisivela”.

² William ni Terrie yaarumeela elapo ekina. Awo anihimya so: “Okathi naasuwenle ahu wira okumi ahu khiwaaneemererya otthikela elapo naathanleliwa ahu, naahinla vanceene. Okhala wene, waaninsivela omurumeela Yehova elapo ekina, masi khinaawerya-tho opaka eyo”.

³ Aleksey aarumeela oBetheli. Owo onihimya so: “Naanisuwela wira awanani ahu yaaphavela owala eBetheli naarumeela ahu. Masi okathi yiiraneyale aya eyo, otheene ahu nahaana okhuma. Tthiri eyo yaari yooriipiha murima”.

4. Mwaha ola, ninrowa othokorerya makoho xeeni?

⁴ Nave nkahaya nwuupuwele anna ni arokora anceene ni ale yaarumeela oBetheli yaawo avahiwe yoothanleliwa esya. * Ohiya yoothanleliwa yaasivela vanceene onnaaxankiha anna ni arokora awo oophentiwa. Exeeni enrowa waakhaliherya hata akumananaka mixankiho? Khula mmosa a hiyo onrowa waakhaliherya sai? Waakhuliwa wa makoho awo, anoonikhaliherya okathi wa marukunuxo.

5. Mixankiho xeeni sikhanle ookhumelela mwaha wa yoothanleliwa esya?

⁵ Hata nirumeelaka oBetheli wala niri ene mapioneero aahiiso mamisionaario,  nnoowerya waapaka apatthani anceene ni wiixutta waaphenta atthu a mapuro ninrumeela ahu. Nto okathi ninkhuma ahu ninniriipiwa murima vanceene. Ninninkheliwa ni oxanka mwaha wa anna ni arokora ale naahiyale ahu, otepexa wene akhala wira nikhumme mwaha wa olupatthiwa. (Math. 10:23; 2 aKor. 11:28, 29) Onnixankiha orowa ovara muteko wa Muluku elapo ekina mwaha woowi nihaana olimalela soolema isya. Nave pooti oxankiheya akhala wira nintthikela owaani. Robert ni Mary anihimya so: “Hiyo khinaalimalenle saana soolema ni waaninivila olaleerya ni nttaava nahu. Nto okhala wira naarumeela elapo ekina mwa iyaakha sinceene, naakhala ntoko anamurwa elapo ahu”. Muxankiho mukina ori othuma itthu nahaalipelela ahu. Eyo pooti onixankiha, ohikhalana nlipelelo ni okhulumuwa. Etthu xeeni enrowa onikhaliherya?

6. Ninrowa olipiha sai waataana wahu ni Yehova?

⁶ Mulipihe waataana wanyu ni Yehova. (Yak. 4:8) Ninrowa owerya sai opaka eyo? Nnoowerya opaka eyo nimuroromelaka Yehova ni murima wotheene, yoowo ‘oniwìwa ale aninvekela’. (Esal. 65:3) Nave Esalimo 62:9 enihimya so: “Mwahimerye [Apwiya] ovelavela wanyu wothene”. Nto Yehova “onniwerya onìrela itthu sulupalexa, sintepa ovikana iye sininvekela ahu ni sintthokelelahu”. (aÉf. 3:20) Yehova khonnivaha paahi ele nninvekela ahu. Nto akhala wira nookhalana muxankiho, Yehova pooti ophuka mwa enamuna nahuupuwela ahu.

7. (a) Etthu xeeni enrowa onikhaliherya olipiha waataana wahu ni Yehova? (b) Moovarihana ni aHéberi 6:10-12, exeeni enrowa okhumelela navikaniha omurumeela Yehova moororomeleya?

⁷ Etthu ekina enrowa onikhaliherya olipiha waataana wahu ni Yehova, ori omusoma Biibiliya khula nihiku ni wuupuwelela ele ninsoma ahu. Munna mmosa yoowo aarumeela ntoko misionaario ohimmye so: “Nvikanihe omulompa Muluku khula esumana ni olokiherya mithukumano, ntoko mwaapaka anyu okathi mwaari anyu yoothanleliwa anyu”. Nave nvikanihe okhaliherya muteko woolaleya ihapari sooreera ni miteko sikina sa muloko anyu musya. Yehova onniwuupuwela ale anivikaniha omurumeela moororomeleya hata ahiweryaka opaka itthu yaapaka aya khalai.​—Mmusome aHéberi 6:10-12.

8. Moolumo ari 1 Yohani 2:15-17, annikhaliherya sai okhweiherya okumi ahu?

⁸ Mukhweiheryeke okumi anyu. Muhikhala-khale mweemereryaka mixankiho sa olumwenku wa Satana ‘sivuvuryaka’ ovara miteko sa Muluku. (Math. 13:22) Muheemereryeke itthu anihimya aya atthu ale ahinimurumeela Yehova ntoko apatthani anyu ni amusi anyu  yaawo anootumereryani ophavelasa mihakhu olumwenku ola wa Satana ohanle vakhaani omala. (Mmusome 1 Yohani 2:15-17.) Mmuroromeleke Yehova. Owo onnileiherya onivaha itthu sotheene nimphavela ahu sikhale somunepani, mmuupuweloni ni sa werutthuni “okathi wophwanelela”.​—aHéb. 4:16; 13:5, 6.

9. (a) Moovarihana ni Miruku 22:3, 7, xeeni vari aya vooloka osyaka okopha vahireerelaka? (b) Exeeni enrowa onikhaliherya opaka soothanla sooloka?

⁹ Musyakeke okopha vahireerelaka. (Musome Miruku 22:3, 7.) Marukunuxo pooti oniiriha orumeela musurukhu munceene, nto eyo pooti oniiriha okopha. Wira musyake okopha musurukhu munceene, muhikopheke mphavelaka othuma itthu muhinrowa anyu orumeela. Okathi ninkhalana ahu mixankiho ntoko waakhapelela amusi ahu aniwereiwa, vannivila osuwela musurukhu ninreerela ahu okopha. Okathi owo, muupuweleke wira muhaana oweliherya “mavekelo anyu wa Muluku mmulompaka, munvaraka metto”. Nto opaka eyo, enimookhaliheryani opaka soothanla sooloka. Yehova onimwaakhula mavekelo anyu oovahakani “murettele . . . onvikana osuwela wa mutthu, onosuka mirima sanyu n’iroho sanyu”. Mwiira siiso, munoowerya othokorerya muxankiho anyu moomaaleleya.​—aFil. 4:6, 7; 1 Ped. 5:7.

10. Munrowa waapaka sai apatthani asya?

¹⁰ Mukhalaneke waataana wooloka ni apatthani ni amusi anyu. Ti vooloka waaleela moonelo anyu apatthani anyu a vamurimani, otepexa wene ale yaavirinhe mixankiho ntoko sawinyu. Opaka eyo, pooti wookhaliheryani okhala saana. (Mus. 4:9, 10) Apatthani mwaarina anyu yoothanleliwa ya khalai, anoovikaniha okhala apatthani anyu. Nto yoothanleliwa anyu esya, muhaana waapaka apatthani asya. Muhiliyale ela: Wira mukhalane apatthani ooloka, nyuwo-tho muhaana okhala mpatthani ooloka. Munrowa owerya sai waapaka apatthani asya? Mwaaleeleke atthu akina mareeliho Yehova oovanhaweni wira yoone ohakalala wanyu mwaha woomurumeela Yehova. Atthu akina mmulokoni pooti ohisuwela nthowa naya onoosivelaayani ovara muteko wa Muluku wa okathi wotheene. Masi akina anniphavela osuwela itthu sinceene sa muteko wa Muluku wa okathi wotheene, nto awo pooti okhala apatthani anyu ooloka. Okathi omosaru, mukhalaneke ephoole wira atthu akina ahoovuwihekeni mwaha wa itthu sooloka mpanke anyu mmutthenkesoni mwa Yehova. Nave muhilavuleke itthu soohiloka sookhumelenleni.

11. Muhaana opaka exeeni wira ekasamento anyu evikaniheke ohakalala?

¹¹ Okathi mukina, anamathelana pooti ohiya ovara muteko wa Muluku wa okathi wotheene mwaha woowi amuthiyana wala amulopwana onoowereiwa. Akhala wira eyo yowiiraneelani, muhinvaheke nthowa ole muthelanne anyu aahiiso muhiivaheke nthowa muupuwelaka wira moomunyoonyiha iyanyu wala mwaarinyu. Muupuweleke wira oowanli anyu muri ntoko “mutthu mmosá pahi” ni moomuleiherya Yehova wira munookhapelelanaka  moohicikha ele enrowa okhumelela. (Math. 19:5, 6) Nave anamathelana pooti ohiya yoothanleliwa aya mwaha woowi amuthiyana oorupala moohilakelela. Akhala wira eyo yowiiraneelani, mmooniherye mwaninyu wira tootepa otthuneya ovikana yoothanleliwa mwaarina anyu. Okathi wotheene, mmuleeleke mwaninyu wira yoovaha enikhuma wa Muluku. (Esal. 127:3-5) Okathi omosaru, mmuleeleke mareeliho mphwannye anyu okathi mwaavara anyu muteko wa Muluku wa okathi wotheene. Opaka eyo pooti omukhaliherya mwaninyu okela muteko wa Muluku wa okathi wotheene.

12. (a) Ninrowa waakhaliherya sai ovikaniha ovara muteko aya anna ale anivara muteko wa Muluku? (b) Ninrowa waakhaliherya sai olimalela marukunuxo yaakhumelenle?

¹² Ti voohakalaliha woona wira miloko sinceene ni anna anceene annaakhaliherya ale anivara muteko wa Muluku wa okathi wotheene. Akina onnaasivela waatumererya anna awo ovikaniha ovara muteko wa Muluku athanleliwa aya. Anna akina annaakhaliherya anna awo yaavahaka musurukhu aahiiso waakhaliherya amusi aya arina mixankiho. Okathi anipaka aya eyo, annaakhaliherya anna awo ovikaniha ovara muteko aya opuro ari aya. (aGal. 6:2) Niireke aakhala anna avahiwe yoothanleliwa esya ari muloko anyu? Akhala wira ti siiso, muhuupuweleke wira yaamuhivara saana muteko aya aahiiso apanke etthu yoohiloka. * Ohiya opaka eyo, mwaakhaliheryeke wira alimalele marukunuxo awo yaakhumelenle. Nto nwaakheleke ni matata manli anna ni arokora awo oophentiwa ni mwaattottopeleke mwaha wa muteko wooloka avanre aya hata okumi aya ohiweemereryaka ovara itthu sinceene. Nave mwiimananiheke waasuwela oratteene ni muttotteleke mureerelo itthu ansuwela aya ni sookumanana saya.

13. Itthu xeeni sikina nikhanle ahu oopaka wira naakhaliherye ale avahiwe yoothanleliwa esya?

 ¹³ Wanipacerya, anna ni arokora avahiwe yoothanleliwa esya pooti ophavela nikhaliheryo nanyu wira aphwanye empa, ekaaro, muteko ni itthu sikina sinaathowa. Woonasa wene, awo pooti ophavelaka osuwela moota itthu sineetta aya, mwa ntakiheryo moota wooliva mpoosito wala mireerelo sikina. Masi etthu yootepa otthuneya tiila: awo khaniphavela wooneliwa othunku paahi, masi nihaana weererya osuwela makhalelo aya. Pooti wira mmusi aya onoowereyasiwa. Nave anna awo pooti oriipiwa murima mwaha wookhweliwa ole yaamphenta aya. * Musuweleke wira hata ahilavulaka, pooti wira anniriipiwa murima mwaha woowi ahaayeleela apatthani ni muteko yaathanleliwe aya yoowo waasivela vanceene. Pooti ovira okathi wira moonelo owo omale aahiiso alimalele makhalelo aya masya.

14. Anamalaleerya yaamukhalihenrye sai murokora mmosa olimalela yoothanleliwa awe esya?

¹⁴ Musuweleke wira ntakiheryo nanyu nooloka pooti waakhaliherya anna ni arokora awo olimalela yoothanleliwa aya esya. Murokora mmosa aarumeela elapo ekina mwa iyaakha sinceene ohimmye so: “Yoothanleliwa aka ya khalai, kaahikhalana soosoma sa Biibiliya sinceene khula nihiku. Masi yoothanleliwa aka ya niinaano, onnikivila okhalana eparakha nnakhala ya omutthukula Biibiliya aahiiso wooniherya eviidiyu kaalaleeryaka. Nto anamalaleerya a muloko aka wa niinaano annikilattula orowa opaka irevisita saya ni wiiriha soosoma sa Biibiliya. Okathi kaawenhe aka oluttuweliwa ni olipa murima wa anna ni arokora ale okathi yiiriha aya soosoma sa Biibiliya sinkela vahoolo, eyo yaahikikhaliherya okhalana moonelo wooloka. Nave kaahiixutta moota woopaceriha ovaanela ni axineene etthoko muttetthe ole musya kaari aka. Itthu iyo sotheene sookikhaliherya otthikela ohakalala”.

15. Munrowa okhumela sai saana yoothanleliwa anyu esya?

¹⁵ Nyuwo munoowerya okhumela saana yoothanleliwa anyu esya. Muhikhala-khale muupuwelaka wira muteko mwaavara anyu khalai waari woohiloka aahiiso khamurina efaita. Mwiimananiheke woona moota Yehova onookhaliheryaweni ni muluttuweliweke olaleerya. Nave mwaatakiheke  maKristau a eseekulu yoopacerya. Khula opuro yaarowa aya ‘yanilaleya ehapari yorera ya masu’. (Mit. 8:1, 4) Wiimananiha wanyu olaleya ihapari sooreera pooti okumiherya mireerelo sinceene. Mwa ntakiheryo, mapioneero yaarumeela elapo emosa yaahoomoliwa, nto yaahithaamela elapo ekina yaattamenle. Elapo ele, yaahithowa anamalaleerya yaalavula nttaava na elapo ele yoomoliwe aya. Nto myeeri vakhaani paahi saahipakiwa igrupu sa nttaava mapioneero ale yaalaleerya aya ni saahinnuwa mowaakuveya.

16. Exeeni enrowa wookhaliheryani ophwanya ohakalala yoothanleliwa anyu esya?

¹⁶ “Otteliwa murima onrwa w’Apwiya t’unkhala ikuru sanyu”. (Neh. 8:10) Ekeekhai wira yoothanleliwa ahu pooti onisivela vanceene. Masi ohakalala wahu onlipa ni omurumeela Yehova, ohiya yoothanleliwa ninvara ahu. Tivonto, nvikanihe olipiha waataana wanyu ni Yehova ni munvekeleke ankhili, malakiheryo ni nikhaliheryo. Muupuweleke wira mwaanisiveliwa yoothanleliwa anyu ya khalai mwaha woowi mwaaniimananiha ni murima wotheene waakhaliherya atthu a mapuro awo. Nto nvikanihe wiimananiha yoothanleliwa anyu esya, mwiira siiso, munimoona wira nlelo Yehova onnoophentani ni wookhaliheryani.—Mus. 7:10.

17. Exeeni nikhanle ahu oowuupuwela sa yoothanleliwa ahu olelo-va?

¹⁷ Muhiliyale wira omurumeela wahu Yehova ti wa mahiku otheene, masi yoothanleliwa ahu ti ya okathi vakhaani. Maana elapo esya, woonasa wene otheene ahu yoothanleliwa ahu enooturukeya. Aleksey, yoowo nimulavunle ahu wanipacerya wa mwaha ola, onnikupali wira itthu sotheene sinimukhumelela vano sinoomukhaliherya muhoolo. Owo onihimya so: “Okhuma khalai kinnikupali wira Yehova ni elapo esya itthu sekeekhai, masi saakhala ntoko wira siri ottaiwene. Nto vano, kinnoona wira Yehova ori vakhiviru vaka ni elapo esya eri vakhiviru”. (Mit. 2:25) Tivonto, hata yoothanleliwa anyu eturukeyaka, nvikanihe olipiha waataana wanyu ni Yehova. Owo khonikhala-khala oonyanyalakani. Okathi wotheene onimookhaliheryani wira nvikaniheke ohakalala vaavo munvara anyu muteko awe moohicikha yoothanleliwa anyu aahiiso opuro munirumeela anyu.​—Yes. 41:13.