1. Tani yaakhalihenrye opakiwa muloko wa oFilipi?

OKATHI murummwa Paulo, Sila, Luka ni Timootheyo yaaphiyale aya oFilipi, elapo yeeyo yaalamuleliwa ni aRoma, yaahaaphwanya atthu anceene yaaphavela owiriyana ihapari sooreera sa Omwene. Tthiri anna ale axexe ooluttuweliwa yaahaakhaliherya vanceene anna ni arokora yaawo yaabatiziwe niinaano. Awo yaanithukumana vamosa, woonasa wene empa ya murokora iihaniwa Lidia, yoowo aasiveliwa oowaakhela aletto.​—Mit. 16:40.

2. Moohipisa, mixankiho xeeni saakhumelenle muloko wa oFilipi?

² Moohipisa muloko ole wa niinaano waahikumana mixankiho sinceene. Satana aahiwiiriha atthu yahaasiveliwa ekeekhai olupattha vanceene muteko woolaleerya wa Paulo ni apatthani awe. Nto Paulo ni Sila yaahivariwa, owaxuliwa ni murepettho ni yaahitthukweliwa mukhatteya. Nuumala otaphuliwa, Paulo ni Sila yaahirowa waaxukurya awiixutti ale a niinaano wira yaalipihe. Nto moottharelana, Paulo, Sila ni Timootheyo yaahikhuma epooma ele, masi vanikhala ntoko wira Luka aahihala. Anna ni arokora ale a niinaano yaarowa opaka exeeni? Akhaliheriwaka ni munepa wootteela wa Yehova awo yaahivikaniha ovara muteko wa Muluku. (aFil. 2:12) Tthiri Paulo aahikhalana mathowa ooloka yaamwiiriha ohakalala mwaha wa muteko yaavara aya anna ale!

3. Moovarihana ni aFilipi 1:9-11, exeeni Paulo aavekela awe?

³ Iyaakha 10 muhoolo mwaya, Paulo aahilepela ewarakha muloko ole wa oFilipi. Okathi munisoma anyu ewarakha eyo, munimoona wira Paulo aanaaphenta vanceene anna ni arokora. Owo aalempe so: “Miyo kinnophentani nyuwo othene, ntoko Yesu Kristu onophentaweni”. (aFil. 1:8) Ohiya paahi waalepela ewarakha, owo aanaavekelela. Paulo aahinvekela Yehova wira aakhaliherye wuncererya ophentana waya, oweha itthu sootepa otthuneya,  okhala oohittheka, ohaakhumuliha atthu akina ni osareya mihokorokho sa xariya. Olelo-va, hiyo nnoottottela mureerelo moolumo oolipiha a Paulo. Vano nrowe nisome ele Paulo aalepenle awe aFilipi. (Mmusome aFilipi 1:9-11.) Nuumala-vo, ninrowa othokorerya ele Paulo aahimmye awe, ni oweha moota nikhanle ahu oovarihela muteko mookumini mwahu.

4. (a) Moovarihana ni 1 Yohani 4:9, 10, Yehova oonihenrye sai oniphenta wawe? (b) Mpakha vaavi nnimphenta ahu Muluku?

⁴ Yehova ohooniherya oniphenta wawe omurumaka Mwanawe mmoseene orwa valaponi wira onoopole itampi ni okhwa. (Mmusome 1 Yohani 4:9, 10.) Ophenta wuulupale wa Yehova onniniiriha omphenta. (aRom. 5:8) Masi, mpakha vaavi nnooniherya ahu wira ninnimphenta Yehova? Yesu aahaakhula nikoho nno, vaavo aamulenle awe nFarisi wira: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene”. (Math. 22:36, 37) Hiyo khanimphavela omphenta Muluku ni murima wookawanyeya. Ohiya-vo, nimphavela wira khula nihiku omphenta wahu Muluku otepeke wunnuwa ni olipa. Murummwa Paulo aahaaleela aFilipi wira ophenta waya “otepeke wunnuwa nlelo”. Nto, nihaana opaka exeeni wira nlipihe omphenta wahu Muluku?

5. Ninrowa olipiha sai ophenta wahu?

⁵ Wira nimphente Muluku nihaana omusuwela oratteene. Biibiliya onihimya so: “Ole ohinimphenta mukhw’awe, khanimusuwela Muluku, okhala wira Muluku ophentá”. (1 Yoh. 4:8) Murummwa Paulo ohimmye wira omphenta wahu Muluku onimunnuwa ni olipa vaavo nniimananiha ahu okhalana ‘osuwela n’ankhili othene’ a Muluku. (aFil. 1:9) Okathi naapacenrye ahu omusoma Biibiliya, naahipacerya omphenta Yehova nnaamwi nahaasuwela oratteene mikhalelo sawe sooloka. Nto vaavo nintepa ahu omusuwela Yehova, omphenta wahu onootepa wunnuwa ni olipa. Tivonto ori aya wootepa otthuneya omusoma Biibiliya khula nihiku ni wuupuwelela ele ninsoma ahu!​—aFil. 2:16.

6. Moovarihana ni 1 Yohani 4:11, 20, 21, ninrowa wuncererya sai ophenta wahu?

⁶ Omphenta wahu ni murima wotheene Muluku, onooniiriha waaphenta anna ni arokora. (Mmusome 1 Yohani 4:11, 20, 21.) Woonasa wene, nnuupuwela wira vannikhweya waaphenta anna ni arokora, mwaha woowi otheene ahu ninniimananiha otakiha mikhalelo sooloka sa Yehova. Nave ninnitthara ntakiheryo na Yesu, yoowo ophenta wawe waari wuulupale mpakha omwiiriha ovaha okumi awe wira onoopole. Masi hata vari siiso, okathi mukina pooti woonaka ovila ophentana mukina ni mukhwaawe. Wira moone wira eyo ekeekhai, nrowe niwehe ntakiheryo na muloko wa oFilipi.

7. Miruku Paulo anvanhe awe Evodia ni Sintikhe, sinniixuttiha exeeni?

⁷ Muloko ole wa oFilipi yaahikhala arokora anli ooluttuweliwa yiihaniwa Evodia ni Sintikhe, yaawo yaavara vamosa ni murummwa Paulo. Woonasa wene, arokora ale yaaheemererya mixankiho saamukhaani siwiirihaka ohiiwanana. Nto epaphelo aalepenle awe muloko wa oFilipi, Paulo aahinvaha miruku sooluluwanya Evodia ni Sintikhe wira yahaana ‘wiwanana mw’Apwiya’ aahiiso okhalana muupuwelo mmosaru. (aFil. 4:2, 3) Ohiya-vo, Paulo aahivaha miruku muloko ole wotheene oriki: “Mwireke sothene muhàpananaka, muhikhupanyanaka”. (aFil. 2:14) Tthiri, miruku iye sooluluwanya Paulo aavanhe awe saahaakhaliherya ohiya paahi arokora ale anli oororomeleya, masi-tho anna a muloko wotheene olipiha ophentana waya mukina ni mukhwaawe.

8. Exeeni ekhanle ooniiriha woonaka ovila waaphenta anna ni arokora? Nto exeeni enrowa onikhaliherya?

 ⁸ Ntoko Evodia ni Sintikhe, okathi mukina hiyo pooti onixankiha wunnuuherya ophentana wahu mukina ni mukhwaawe, nnapacerya owehexexa paahi soovonya sa anna ni arokora. Khula nihiku, otheene ahu ninnivonya. Nto akhala wira nimmakela oweha soovonya sa anna ni arokora, waaphenta wahu onoovukuwa. Mwa ntakiheryo, akhala wira munna wala murokora onniliyala orattela Empa ya Omwene hiyo pooti onyoonyiwa vanceene. Nto akhala wira nimmakela wuupuwela soovonya sa anna awo ninsuwela ahu, onyoonyiwa wahu onimunnuwa mpakha omala-maliha waaphenta wahu. Naarina ene muxankiho owo ni munna aahiiso murokora mmulokoni, vaamuloka wuupuwela ekeekhai ela: Yehova onnisuwela soovonya sahu ni sa anna ni arokora. Nto hata osuwelaka soovonya sahu, owo onnivikaniha oniphenta ni waaphenta anna ni arokora. Tivonto nihaana omutakiha Yehova naaphentaka ni okhalana moonelo wooloka voohimya sa anna ni arokora. Tthiri vaavo nniimananiha ahu waaphenta, ninnilipiha wiiraana wahu.​—aFil. 2:1, 2.

9. Itthu xeeni sikina siri ‘sotepa ophwanela’ Paulo aalepenle awe aFilipi?

⁹ Munepa wootteela wa Muluku, waahimukhaliherya Paulo waaleela aFilipi ni maKristau otheene wira ‘asuweleke othanla itthu sintepa ophwanela’. (aFil. 1:10) Itthu iyo sintepa ophwanela sinhela muhina otteelihiwa nsina na Yehova, wiiraneya itthu sotheene oleihenrye awe, murettele ni wiiraana mmulokoni. (Math. 6:9, 10; Yoh. 13:35) Akhala wira itthu iyo ti sootepa otthuneya mookumini mwahu, ninnooniherya wira ninnimphenta Yehova.

10. Ninrowa othokoreriwa sai okhala atthu ooreera murima?

¹⁰ Nave Paulo ohimmye wira nihaana okhala oohittheka. Eyo khentaphulela wira nihaana okhala oomalela. Hiyo khaninwerya okhala oohittheka ntoko Yehova Muluku ori awe oohittheka. Masi, Yehova onoonithokorerya okhala oohittheka akhala wira khula nihiku ninniimananiha olipiha ophenta wahu ni osuwela itthu sootepa otthuneya. Enamuna emosa nnooniherya ahu ophenta wahu ori wiimananiha osyaka waakhumuliha atthu akina.

11. Xeeni vari aya vooloka osyaka waakhumuliha atthu akina?

¹¹ Nlopolo ninhimya wira nihaana osyaka waakhumuliha atthu akina ti nootepa otthuneya. Vanweryaneya sai omukhumuliha mutthu? Hiyo pooti omukhumuliha mutthu ni matthekulelo ninthanla ahu, ikuwo sahu ni muteko ninthanla ahu ovara. Woonasa wene, etthu nimpaka ahu khahiyo yoohiloka. Masi akhala wira soothanla sahu sinnixankiha yowuupuxerya ya murima ya atthu akina ni sinniwiiriha opaka etthu yoohiloka, nto eyo etthu yootakhala. Yesu aahimmye wira vaamuloka mutthu owo aatthukeleliwe nxilo nuulupale muxikoni oriheliwa mphareya ohiya omukhumuliha aahiiso omwiiriha munna wala murokora ohiya omurumeela Yehova!—Math. 18:6.

12. Ntakiheryo na anamathelana mapioneero, ninniixuttiha exeeni?

¹² Nwehe moota anamathelana amosa mapioneero yaavarihenle aya muteko malakiheryo a Yesu. Awo yaarumeela muloko mmosa ni anamathelana yaabatiziwe niinano, yaawo yaahuuwale emusi yaheemererya khula etthu. Anamathelana ale yaabatiziwe niinaano yanikupali wira khivanreerela maKristau orowa mapuro siniwehiwa ifilme hata ifilme iyo siri ene sooloka. Awo yaahixanka vanceene nuumala osuwela  wira anamathelana ale mapioneero yaaniweha ifilme. Nto anamathelana ale mapioneero yaahihiya orowa oweha ifilme mpakha ophiya okathi anamathelana ale yaabatiziwe niinaano okhalana yowuupuxerya ya murima yowiixuttihiwa saana wira asuwele ele eri yooloka ni yoohiloka. (aHéb. 5:14) Mwaha woopaka eyo, anamathelana ale mapioneero yaahooniherya wira yaanimphenta munna ni murokora ole ohiya paahi ni moolumo masi-tho ni miteko.​—aRom. 14:19-21; 1 Yoh. 3:18.

13. Vaniweryaneya sai omwiiriha mutthu opaka etampi?

¹³ Enamuna ekina mutthu okhanle awe oomukhumuliha mutthu mukina, ori omwiiriha opaka etampi. Eyo eniiraneya sai? Nkahaya muupuwele ela: Nuuvira okathi munceene iimananihaka, naxikola a Biibiliya onniwerya okasoopa yoolema awe ya ohapaliwa. Nto onnoona wira ohaana ohiya owurya moomalela. Vano onnikela vahoolo momunepani mpakha opatisiwa. Nuuvira okathi, munna mmosa onnimulattula wira atthekule vamosa, nto onamukhanyererya owurya eviinyu ohimyaka wira: “Vano nyuwo mwa muKristau oopatisiwa, Yehova ohoovahani munepa awe wootteela. Musuweleke wira wiihiiha oniirela mpantta yoowiima ya munepa wootteela. Akhala wira munniihiiha, munoowerya owurya vakhaani”. Tthiri vaarowa okhala vooriipiha murima munna ole opatisiwe niinaano wiiwelela miruku iye, maana pooti omwiiriha otthikela ohapaliwa.

14. Mithukumano sinnikhaliherya sai ovarihela muteko miruku siri aFilipi 1:10?

¹⁴ Mithukumano sahu sinninikhaliherya ovarihela muteko mwa inamuna soovirikana miruku sa Paulo siri aFilipi 1:10. Enamuna yoopacerya:  Itthu ninthokorerya ahu mmithukumanoni sinninikhaliherya woona wira muupuwelo wa Yehova tori wootepa otthuneya. Ya nenli: Ninniixutta moota woovarihela muteko ele nniixutta ahu wira nikhale atthu oohittheka. Ni ya neeraru: Sinninikhaliherya waakuviheryana “ophenta n’uvara miteko sorera”. (aHéb. 10:24, 25) Tthiri vaavo anna ni arokora annilipiha aya, omphenta wahu Muluku ni annihu onnitepa wunnuwa khula nihiku. Moohaanyiherya, akhala wira ninnimphenta ni murima wotheene Muluku ni anna, eyo enoonikhaliherya wiimananiha osyaka waakhumuliha atthu akina.

15. Ontaphulela exeeni osareya “mihokorokho sa xariya”?

¹⁵ Paulo aahimuxonttela Muluku wira aakhaliherye aFilipi ‘osareya mihokorokho sa xariya’. (aFil. 1:11) Tthiri “mihokorokho sa xariya” saahela muhina omphenta waya Yehova ni atthu akina, waalaleerya voohimya sa omwaamini waya Yesu ni nlipelelo naya na muhoolo. Nave aFilipi 2:15 Paulo onnipaka nlikanyiho noowi: “Muhana warya ntoko mithuko sa mulaponi”. Nlikanyiho nna ninnuupuxerya ele Yesu aalenle awe awiixutti awe wira yaahaana okhala “muthuko w’olumwenku”. (Math. 5:14-16) Nave Yesu aahaatumererya atthareli awe ‘orowa owiixutiha atthu’. Eyo yaahela muhina ‘okhala anamona . . . mpakha omalenle elapo’. (Math. 28:18-20; Mit. 1:8) Nto hiyo ninnisareya “mihokorokho sa xariya” vaavo nniimananiha ahu ovara muteko woolaleerya, yoowo ori wootepa otthuneya.

16. AFilipi 1:12-14, onooniherya sai wira vanniweryaneya waarya ntoko mithuko hata nrine ene mixankiho? (Nwehe efootu ya ekaapa.)

¹⁶ Moohicikha makhalelo ahu, otheene ahu nnoowerya waarya ntoko mithuko. Okathi mukina, itthu sinkhala ntoko wira sinninikhoottiherya olaleya ihapari sooreera pooti okhala eparakha yuulupale wira nilaleerye. Murummwa Paulo ntakiheryo nuulupale, okathi aari  awe empa aatthukweliwe awe oRoma, owo aahaalepela ewarakha aFilipi. Tthiri nnaamwi Paulo aatthukweliwe mukhatteya, owo khaahiyale waalaleerya maguarda ni ale yaamuxukurya. Murummwa Paulo aahivikaniha oluttuweliwa olaleerya hata aarina mixankiho. Nto eyo yaahaakhaliherya anna olipiha murima ni “olaleya masu a Muluku n’ikuru, ehòvaka etthu”.​—Mmusome aFilipi 1:12-14; 4:22.

17. Anna ni arokora akina aniwerya sai ovikaniha olaleerya hata vaxankihaka opaka eyo?

¹⁷ Anna ni arokora anceene annooniherya olipa murima ntoko Paulo. Awo anikhala ilapo anikhoottiheriwa aya olaleerya mootaphuwa aahiiso olaleerya empa ni empa. Masi hata vari siiso, awo anniphavelasa inamuna wira alaleye ihapari sooreera. (Math. 10:16-20) Elapo emosa, mutokweene a esirkwiitu aahimuleela khula namalaleerya okhalana “muttetthe awe” woolaleerya, eyo piiyo, waalaleerya amusi awe, anamwaattamanani awe, ale ansomana awe oxikola, onivarana awe muteko ni atthu onaasuwela awe. Eriyari ya myaakha miili, miloko sa esirkwiitu ele saahincerereya vanceene. Woonasa wene, elapo munikhala anyu munnilaleerya mootaphuwa. Masi hata vari siiso, anna ni arokora ale ooluttuweliwa anniniixuttiha etthu yuulupale. Etthu ene tiila: Okathi wotheene nihaana waavya inamuna wira nilaleerye moomalela. Akhala wira nnoopaka eyo, nikupaliki ni murima wotheene wira Yehova onoonivaha ikuru ni onikhaliherya olaleerya hata vaxankihaka opaka eyo.​—aFil. 2:13.

18. Nihaana olakela opaka exeeni?

¹⁸ Okathi ola wootepa otthuneya ninkhala ahu, nivikanihe wiimananiha ovarihela muteko miruku siri epaphelo Paulo aalepenle awe aFilipi. Nihaana oweha itthu sootepa otthuneya, okhala oohittheka, osyaka waakhumuliha atthu akina ni osareya mihokorokho sa xariya. Akhala wira nnoopaka eyo, nnoowerya wuncererya ophenta wahu ni nnoowerya onvuwiha Tiithi ihu a wiirimu, Yehova.