NIIREKE yookhala etthu mwaaphavela anyu opaka mmulokoni muhinawerya niinaano-va? Woonasa wene, eparakha orina awe munna mukina a mmulokoni. Nave pooti wira yoothanleliwa muniphavela anyu aahiiso eparakha mwaarina anyu khalai. Masi vano mwaha woowuuluvala, owereyasiwa, othoiwa musurukhu wala miritti sa vatthokoni sinnivukula itthu mukhanle anyu oopaka. Nave mwaha wa marukunuxo anipakiwa mmutthenkesoni mwa Yehova, pooti wira moohiya yoothanleliwa mwaavara anyu okhuma khalai. Moohicikha etthu, woonasa wene munuupuwela wira khamunwerya opaka itthu mwaaphavela anyu wira mukhaliherye muteko wa Muluku. Tthiri akhala wira itthu iyo sinniwiiraneelani, pooti wira okathi mukina munninyoonyiheya. Hata vari siiso, exeeni enrowa wookhaliheryani ohitepa okhulumuwa ni onyoonyiheya? Munrowa owerya sai ovikaniha okhala mutthu oohakalala?

Ntakiheryo na Yohani Mbatiza, ninniniixuttiha ovikaniha ohakalala. Yohani aahikhalana iparakha sinceene soohakalaliha, woonasa wene okumi awe wotheene aavara muteko wa Yehova ni khaasuwela etthu yaarowa omukhumelela. Yohani khaasuwela wira anviriha iyaakha sinceene otthukweliwe ene mukhatteya, ovikana iyaakha aavirinhe awe olaleeryaka. Hata vaari siiso, Yohani aahivikaniha okhala mutthu oohakalala ni aahikhalana moonelo wooloka okumi awe wotheene. Exeeni yaamukhalihenrye? Ninrowa ovikaniha sai ohakalala hata ninyoonyiheyale ene?

Elimwe ya 29 nuumala Yesu oyariwa, Yohani aahipacerya ovara muteko aavahiwe awe ni Yehova voohimya sa Mesiya, oriki: “Murukunuxe mirima sanyu, mana Omwene wa wirimu ori vakhiviru”. (Math. 3:2; Luka 1:12-17) Atthu anceene yaaheemererya muhupi wa Yohani. Tthiri atthu anceene yaaheetta mikhwaha soorakama wira yanwiriyane Yohani. Nave anamunceene yaahittharuwa itampi saya khupatisiwa. Moolipa murima, Yohani aahaalopola ahooleli a itiini wira yamphukeliwa akhala wira khiyaarowa ottharuwa itthu soohiloka yaapaka aya. (Math. 3:5-12) Yohani aahipaka etthu yootepa otthuneya okathi aalaleerya awe vaavo ampatinse awe Yesu 29 EC. Nto okhuma mwaakha ole orowa muhoolo, Yohani aahaaleela atthu akina wira amutthareke Yesu, yoowo aari Mesiya aaleiheriwe.​—Yoh. 1:32-37.

Ottottopelaka muteko wa vameekhaaya wa Yohani, Yesu aahimmye so: “Kinolèlani ekhweli wira: mw’atthu othene ayariwe, khakhumelenle mukina  mulupale onvikana Yohani Mbatiza”. (Math. 11:11) Moohaanyiherya Yohani aanihakalala mwaha wa mareeliho otheene aavahiwe awe. Moolikanasa ni Yohani, anna anceene olelo-va aaphwanya mareeliho manceene. Nwehe ntakiheryo na Munna Terry. Owo ni mwaarawe oniihaniwa Sandra aaviriha iyaakha 50 avaraka muteko wa Muluku wa okathi wotheene. Terry ohimmye so: “Kaahikhalana iparakha sinceene. Kaarumeela ntoko pioneero, koorumeela oBetheli, opioneero wa vameekhaaya, mutokweene a esirkwiitu, mutokweene a edistritu, nave vano kootthikela okhala pioneero a vameekhaaya”. Tthiri ninnihakalala vaavo ninvahiwa ahu iparakha mmutthenkesoni mwa Yehova, masi nihaana wiimananiha okhala atthu oohakalala ntoko niwenhe ahu ntakiheryo na Yohani Mbatiza okathi makhalelo ahu anturukeya aya.

Etthu yaamukhalihenrye Yohani Mbatiza ovikaniha ohakalala, okhala wira aanixukhurela iparakha aarina awe. Nkahaya nwehe ntakiheryo nimosa. Nuumala ompatisa Yesu, muteko wa Yohani Mbatiza waahivukuwa masi muteko wa Yesu waanincerereya. Vano awiixutti a Yohani yaahixanka mpakha orowa omuleela Yohani wira: “Yowo onnabatiza atthu: othene anrowa wa yowo!” (Yoh. 3:26) Vano Yohani aahiwaakhula wira: “Mwara t’awawe ole omuthenle. Vano mpatthani awe mutheli onnimuhola pahi, onninwiriyana atteliwaka murima ni nsu na mutheli. Otteliwa waka murima ti wenno: ni vano ti womalela”. (Yoh. 3:29) Nave Yohani khuupuwela wira muteko awe khiwaarina efaita mwaha woowi muteko wa Yesu ti waari muulupale ovikana wawawe. Ohiya-vo, Yohani aahivikaniha okhala mutthu oohakalala mwaha woowi aanivaha efaita okhala “mpatthani awe mutheli”.

Moonelo wooloka wa Yohani waahimukhaliherya ovikaniha ohakalala nnaamwi muteko awe waari woovila. Mwa ntakiheryo, okhuma oyariwa wawe, Yohani aari Munaziri, nto khaawurya eviinyu. (Luka 1:15) Olavulaka okumi wookhweya wa Yohani, Yesu aahimmye so: “Ohorwa Yohani Mbatiza, atthukwa ni ahawurya sohapala”. Masi, Yesu ni arummwa awe khiyaarina etthu yiinanela aya mwaha woowi awo khahiyo yammanne natiri ntoko Munaziri. (Math. 11:18, 19) Yohani khaapaka miiriirya, owo aanisuwela wira awiixutti a Yesu waahela muhina ale yaamutthara Yohani yaahivahiwa owerya woopaka itthu iyo. (Math. 10:1; Yoh. 10:41) Ohiya omakela wuupuwela vanceene voohimya sa ovirikana waakhanle eriyari ya atthareli a Yohani ni a Yesu, Yohani aahivikaniha ovara muteko awe.

Akhala wira nnoovikaniha ovaha efaita muteko ninvara ahu vano mmutthenkesoni mwa Yehova, nnoovikaniha okhala atthu ohakalala. Terry nimulavunle ahu wanipacerya onihimya so: “Kaaniimananiha ovara saana khula yoothanleliwa kaavahiwa aka”. Nto vaavo onuupuwela awe itthu opanke awe okathi ari awe muteko wa Muluku wa okathi wotheene, owo oni: “Miyo nkinthanana mwaha wa itthu kipanke aka, masi kinuupuwela itthu soohakalaliha kaarina aka”.

Nnoowerya wuncererya ohakalala wahu akhala wira ninnuupuwela etthu eniiriha muteko wa Muluku wa okathi wotheene okhala wa vameekhaaya. Tthiri eparakha yuulupale “ovara vamosá . . . [ni] Muluku”. (1 aKor. 3:9) Okhapelela etthu ya faita ennikhaliherya etthu eyo ovikaniha okhala yooreera. Mwa enamuna emosaru, wira nivikanihe okhala atthu oohakalala nihaana wuupuwela eparakha nrina ahu ya ovara muteko vamosa ni Muluku. Nave eyo, enoonikhaliherya ohilikanyiha muteko nninvarela ahu Muluku ni muteko wa atthu akina ni osyaka wuupuwelaka wira muteko ahu khorina efaita nalikanyiha ni muteko wa atthu akina.​—aGal. 6:4.

Woonasa wene, Yohani aanisuwela wira muteko awe khiwaarowa okhala wa okathi munceene, masi pooti wira khaasuwela wira waarowa omala mootutuxerya. (Yoh. 3:30) Mwaakha 30 EC, nuuvira myeeri 6 okhuma okathi ole ampatinse awe Yesu, Yohani aahitthukweliwa mukhatteya ni Mwene Herodi. Hata aatthukweliwe, Yohani aahivikaniha owiixuttiha atthu. (Mar. 6:17-20) Exeeni yaamukhalihenrye ovikaniha okhala mutthu oohakalala hata aarina mixankiho? Mwaha woowi aanivikaniha oweha itthu sootepa otthuneya, eyo piiyo, itthu somunepani.

Nlelo ori ene mukhatteya, Yohani aahiiwa wira muteko woolaleerya wa Yesu waamutepa wuncerereya. (Math. 11:2; Luka 7:18) Yohani aanisuwela wira  Yesu aari Mesiya aaleiheriwe, masi aaniikoha aakhala wira Yesu ammaliherya iprofesia sotheene saamuhimya Mesiya. Okhala wira Mesiya aarowa okhala Mwene, niireke olamulelo wa Yesu waarowa opacerya moohipisa? Niireke aammutaphula Yohani mukhatteya? Ophavelaka osuwela itthu sikina voohimya sa Yesu, Yohani aahaaruma atthareli awe orowa omukoha Yesu wira: “Ti nyuwo ole ontthuna orwa, walá nimwalitteke mukina?” (Luka 7:19) Nuumala ohokolowa, Yohani aanaawiriyana oratteene vaavo awiixutti awe yaahimya aya miiriirya sa waapenuxa atthu Yesu aapaka awe. Nto Yesu aahaaleela orowa omuleela Yohani wira: “Alipa-òhona, vano annona; alipa-òrakala, vano annetta orattene; anamakuttula annirerihiwa; alipa-òhiwa, vano annìwa; atthu akhwiye annihihimuxiwa; alipa-òhawa annilalèriwa ehapari yorera”.​—Luka 7:20-22.

Itthu Yohani aawiiwale awe awiixutti awe saahimulipiha vanceene. Iyo saahimulipiherya wira Yesu aanimaleliha iprofesia saamuhimya Mesiya. Nnaamwi Yesu aahaamutaphunle Yohani mukhatteya, Yohani aanisuwela wira muteko awe waahikhalana efaita yinceene. Tthiri nnaamwi aarina mixankiho, Yohani aahikhalana mathowa ooloka wira ovikaniheke okhala mutthu oohakalala.

Nimutakihaka Yohani, akhala wira nnimwiimananiha ovara muteko nnoowerya ovikaniha ovilela nihakalalaka ni opixa murima. (aKol. 1:9-11) Nnoowerya ovilela nimusomaka Biibiliya ni wuupuwelela ele ninsoma ahu. Eyo enoonikhaliherya osuwela wira muteko nninvarela ahu Muluku khahiyo wa mahala. (1 aKor. 15:58) Sandra ohimmye so: “Osoma ekapiitulu emosa khula nihiku, wookikhaliherya omwaattamela Yehova. Nave wookikhaliherya ohitepa owehexexa soophavela saka”. Oweha itthu anna ni arokora anivara aya mmutthenkesoni mwa Yehova wira akhaliherye Omwene, onninikhaliherya ohitepa wuupuwela soophavela sahu. Sandra onnivikaniha ohimyaka wira: “Oweha eprograma ya JW Broadcasting^® onnikikhaliherya waattamela mutthenkeso wa Yehova ni onnikikhaliherya ovikaniha ohakalala ni yoothanleliwa aka”.

Okathi vakhaani Yohani Mbatiza aalalenrye awe, owo aalaleerya “asareiyene eroho n’ikuru ntoko Eliya”, nave ntoko Eliya, Yohani aari “mutthu ntoko hiyo”. (Luka 1:17; Yak. 5:17) Akhala wira nnootthara ntakiheryo na Yohani niwehexexaka itthu somunepani, hiyo nave nnoowerya ovikaniha ohakalala nivaraka muteko wa Muluku moohicikha ele eniiraneya.