1. Exeeni Davidi aahimmye awe voohimya sa wiiyeviha wa Yehova?

NIIREKE Yehova toowiiyeviha? Aayo. Mwene Davidi aahimmye so: “Nyuwo, Apwiya, munnikakiha, munnikivaha ikuru: munnikijaliha, [ni wiiyeviha wanyu] munnikilipiha”. (2 Sam. 22:36; Esal. 18:36) Okathi aahimmye awe moolumo awo, woonasa wene Davidi uupuwela okathi profeta Samuweli aaronwe awe etthoko ya paapa awe Davidi wira omuthanle mwene a muhoolo a nloko na Isarayeli. Davidi aari mwaana ookiserya oyariwa, masi ti yoowo aathanliwe ni Yehova wira omuranttele Mwene Sawuli.—1 Sam. 16:1, 10-13.

2. Mwaha ola, ninrowa woona exeeni?

² Moohaanyiherya Davidi aarina moonelo mmosaru a mulipa-oolepa Esalimo 113. Omuhimyaka Yehova, owo aalempe so: “Apwiya annimwemexa masikhini vantthupini varyawe: annimukumiha mulipa-òthoiwa ori osalani . . . [anamukilaathiha] vamosá n’atthu òttittimiheya”. (Esal. 113:6-8) Mwaha ola, wanipacerya ninrowa woona inamuna Yehova oonihenrye awe wiiyeviha ni etthu ntakiheryo nawe ninniixuttiha aya. Nuumala-vo, ninrowa woona etthu nniixutta ahu ni wiisuumaaliha wa Mwene Sawuli, profeta Daniyeli ni Yesu.

3. Yehova onnithokorerya sai ni eyo enooniherya exeeni?

³ Vaavo ninweha ahu moota Yehova onaathokorerya awe apinaatamu oohimalela, ninniixutta itthu sinceene. Khahiyo paahi Yehova onneemererya omukokhorela, masi-tho onninthokorerya okhala apatthani awe. (Esal. 25:14) Wira vaweryaneye okhala apatthani awe, Yehova oonivaha Mwanawe wira nileveleliwe itampi sahu. Moohaanyiherya Yehova toothunku ni oomoriwa ikharari. Eyo enooniherya wira Yehova, Muluku oowiiyeviha.

4. Etthu xeeni Yehova onivanhe awe, ni nthowa xeeni?

⁴ Nwehe etthu ekina enooniherya wira Yehova toowiiyeviha. Okhala wira tori Mpattuxa, Yehova anwerya onipattuxa mwa enamuna nahaarowa  ahu opaka soothanla, niire so, okhala ntoko maakina. Masi Yehova khopanke eyo. Owo onipattunxe iilikanyihaka mwaneene ni oonivaha eparakha ya othanla mootaphuwa, nnaamwi nisuwelaka wira naatthu ooyeva ni oohilipa nailikanyiha ni yena. Nave Yehova khoniphavela wira nimurumeeleke mwaha wookhanyereriwa, masi nimurumeeleke mwaha womphenta ni woona mareeliho nimphwanya ahu mwaha womwiiwelela. (Otum. 10:12; Yes. 48:17, 18) Ti vooloka omukokhorela Yehova, yoowo ori Muluku oowiiyeviha vanceene!

5. Yehova onniixuttiha sai okhala oowiiyeviha? (Nwehe elatarato ya ekaapa.)

⁵ Yehova onniniixuttiha wiiyeviha mwa enamuna onaathokorerya awe atthu akina. Khuuvo mutthu moolumwenkuni orina ankhili ni osuwela onvikana Yehova. Hata vari siiso, owo onneemererya ovahiwa malakiheryo ni atthu akina. Mwa ntakiheryo, Yehova aahimweemererya Mwanawe omukhaliherya opaka itthu sikina. (Mir. 8:27-30; aKol. 1:15, 16) Nave, hata Yehova ori ene Oowerya sotheene, owo onnaavaha okhulupale atthu akina. Mwa ntakiheryo, Yehova oomuthanla Yesu wira okhale Mwene a Omwene awe ni ohaavaha okhulupale apinaatamu 144.000 wira yalamuleleke ni Yesu. (Luka 12:32) Ekeekhai wira Yehova oomwiixuttiha Yesu wira okhale Mwene ni Mukhulupale Aanamukuttho. (aHéb. 5:8, 9) Nave Yehova onniwiixuttiha ale anrowa olamulelaka ni Yesu. Masi Yehova khoniweha-weha khula etthu anipaka aya wira avare saana muteko aya. Ohiya-vo, Yehova onnikupali wira anoopaka yootthuna awe.—Wis. 5:10.

6-7. Ntakiheryo xeeni Yehova onivanhe awe voohimya sa waavaha miritti atthu akina?

⁶ Tiithi ahu a wiirimu Yehova khaareerela okhaliheriwa ni atthu akina, masi hata vari siiso onnaavaha miteko wala miritti atthu akina. Hiyo nave nihaana opaka etthu emosaru! Mwa ntakiheryo, niireke nyuwo mwa muhooleli a etthoko wala mutokweene? Akhala wira ti siiso, mmutakiheke Yehova, mwaavahaka miteko atthu akina  ni muhiweha-weheke khula etthu anivara aya ni moota anipaka aya muteko owo. Akhala wira munootthara ntakiheryo na Yehova, nyuwo munoohakalalaka oweha miteko sinvariwa, munoowiixuttiha atthu akina ni waakhaliherya woororomelani. (Yes. 41:10) Etthu xeeni ekina aniixutta aya voohimya sa Yehova ale arina okhulupale?

⁷ Biibiliya onnooniherya wira Yehova onniphavela osuwela moonelo ni muupuwelo wa malaikha. (1 Mam. 22:19-22) Ankhi nyuwo anamuyari, munrowa otthara sai ntakiheryo na Yehova? Vaareerelaka mwaakoheke aniinyu moota woopaka itthu sikina vatthokoni vanyu. Nto akhala wira moonelo aya ti wooloka, mpakeke etthu ntoko ahimmye aya.

8. Yehova ampixenrye sai murima Abrahamu ni Sara?

⁸ Enamuna ekina Yehova onooniherya awe wira toowiiyeviha ori opixa murima. Mwa ntakiheryo, Yehova onnaapixerya murima arumeyi awe vaavo animukoha aya etthu emwiirinhe opaka yoothanla eyo. Owo aahinwiriyana oratteene vaavo Abrahamu aahimmya awe wira vaarowa okhala voohixariya Yehova opwetexa mittetthe sa oSodoma ni oGomora. (Maph. 18:22-33) Niireke munnuupuwela moota Yehova aamuthokorenrye awe mwaarawe Abrahamu iihaniwa Sara? Sara aahitheya vaavo Yehova aahimmye awe wira aamurupala nnaamwi uuluvanle. Hata vaari siiso, Yehova khoonale wira aahiveehiwa ni khaananarinwe. (Maph. 18:10-14) Ohiya-vo, Yehova aahimuthokorerya Sara mwa nttittimiho.

9. Anamuyari ni axitokweene anrowa otthara sai ntakiheryo na Yehova?

⁹ Niireke nyuwo mwa namuyari wala mutokweene? Akhala wira ti siiso, munrowa otthara sai ntakiheryo na Yehova? Nkahaya muupuwele etthu mwaarowa anyu opaka akhala wira mwaninyu wala anna a mmulokoni annookohani etthu ewiirinheni opaka yoothanla. Niireke munrowa waakuvela wiixaakiha? Wala munrowa wiimananiha osuwela etthu emwiirinhe opaka eyo? Vaavo ale arina okhulupale anitakiha aya wiiyeviha wa Yehova, imusi ni anna a mmulokoni annittottela mureerelo. Mpakha-va, nihoona moota nikhanle ahu ootakiha wiiyeviha wa Yehova. Vano ninrowa woona etthu nniixutta ahu voohimya sa wisuumaaliha nthokoreryaka matakiheryo ari mBiibiliyani.

10. Yehova onniixuttiha sai?

¹⁰ Yehova, yoowo ori “Mwixuttihi” ahu Muulupale, oonivaha matakiheryo mBiibiliyani anniixuttiha itthu sinceene. (Yes. 30:20, 21) MBiibiliyani ninniphwanya matakiheryo a atthu yaarina mikhalelo sinimusivela Muluku, ohela muhina wisuumaaliha. Nave Biibiliya onnihimya matakiheryo a atthu yahaarina mikhalelo iyo ni etthu yaakhumelenle. Nto vaavo ninthokorerya ahu ni wuupuwelela matakiheryo awo, ninniixutta itthu sinceene.—Esal. 37:37; 1 aKor. 10:11.

11. Ntakiheryo noohiloka na Sawuli ninniixuttiha exeeni?

¹¹ Nkahaya muupuwele etthu yaamwiiranenle Mwene Sawuli. Wanipacerya, Sawuli aari mmiravo oowiisuumaaliha. Owo aanisuwela wira saahikhala itthu ahaasuwela awe ni ahaawerya awe opaka, nave aahikhootta ovahiwa miritti sinceene. (1 Sam. 9:21; 10:20-22) Masi nuuvira okathi, Sawuli aahikhala mutthu oowiixinnuwiha. Moohipisa nuumala okhala mwene, owo aahipacerya wooniherya wira aari oowiixinnuwiha. Okathi omosa, Sawuli aahihiya opixa murima vaavo aamulipelela awe profeta Samuweli. Ohiya wiisumaaliha ni omuroromela Yehova ni opaka etthu wira owaakiherye atthu awe, Sawuli aahipaka etthu aheemereriwa awe opaka, eyo piiyo, onvaha Yehova mukuttho woopahiwa. Okhala wira aahipaka eyo, Sawuli kheemereriwa-tho ni Yehova ni nuuvira okathi aahikhoottiwa okhala mwene. (1 Sam. 13:8-14) Moohaanyiherya ntakiheryo na Sawuli ninniniixuttiha wira nihikhala-khale niixinnuwihaka.

12. Daniyeli oonihenrye sai wira aari oowiisuumaaliha?

¹² Moovirikana ni ntakiheryo noohiloka na Sawuli, nwehe ntakiheryo nooloka na profeta Daniyeli. Okumi awe wotheene, Daniyeli aari murumeyi a  Muluku oowiiyeviha ni oowiisuumaaliha. Okathi wotheene aaniphavela ni aanitthara malakiheryo a Yehova. Mwa ntakiheryo, okathi aarumeeliwe awe ni Yehova wira otaphulele oloha wa Nabukhodonosori, Daniyeli khaphavenle ovuwihiwa mwaha wootaphulela. Ohiya opaka eyo, moowiisumaaliha aahinvaha Yehova ovuwa wotheene. (Dan. 2:26-28) Etthu xeeni nniixutta ahu? Akhala wira ninnittottopeliwa mwaha woolavula saana mwaha wala mwaha wookhumela saana naalaleeryaka, nihaana onvaha Yehova ovuwa wotheene, ohiya ophavela ovuwihiwa hiyo. Nihaana wiisuumaaliha ni osuwela wira khinaarowa owerya opaka etthu nihikhaliheriwaka ni Yehova. (aFil. 4:13) Vaavo nimpaka ahu eyo, ninnimutakiha ohiya paahi Daniyeli, masi-tho Yesu. Moota xeeni?

13. Etthu xeeni nniixutta ahu voohimya sa Yesu eri Yohani 5:19, 30?

¹³ Nnaamwi ori ene Mwaana oomalela a Muluku, Yesu aahooniherya wira aanimuroromela moomalela Yehova. (Mmusome Yohani 5:19, 30.) Yesu khonakhala-khale uupuwelaka okuxa okhulupale wa Tiithi awe a wiirimu. Yoolepa ya aFilipi 2:6, Biblia Solempwa sa Muluku, enihimya wira Yesu “khakhanyerenrye ottittimihiwa ntoko Muluku”. Ntoko Mwaana oowiiwelela, Yesu aanisuwela wira sookhala itthu ahaawerya awe opaka ni aanittittimiha okhulupale wa Tiithi awe.

14. Okathi aavekeliwa awe opaka etthu ahaawerya awe, Yesu aapaka exeeni?

¹⁴ Muupuweleke etthu Yesu aapanke awe okathi murummwa Yakobo ni Yohani vamosa ni maama aya yaaronwe aya onvekela okhulupale Yesu. Moohipisa, Yesu aahaaleela moowiiwanyeya wira Tiithi awe a wiirimu paahi taarowa othanla akhala wira mukina aamukilaathi moono woolopwana mukina moono woothiyana Momweneni. (Math. 20:20-23) Yesu aanisuwela wira saahikhala itthu aahaawerya awe ni aanisuwela mikano sawe. Tthiri Yesu aari mutthu oowiisuumaaliha. Nave khaapaka etthu ahaarummwale awe ni Tiithi awe. (Yoh. 12:49) Ninrowa otthara sai ntakiheryo nooloka na Yesu?

15-16. Ninrowa ovarihela sai muteko malakiheryo ari 1 aKorinto 4:6?

¹⁵ Hiyo nnoowerya otthara ntakiheryo na wiisuumaaliha wa Yesu nivarihelaka muteko malakiheryo a mBiibiliyani ari 1 aKorinto 4:6, yaawo ani: “Mwixutte ohipwaha mikano” wala opaka itthu ovikana iye silempwale. Nto akhala wira ninnivekeliwa miruku nihaana osyaka ohimya paahi moonelo ahu wala ohimya ele nnuupuwela ahu nihinatthi wuupuwela oratteene ni otokosa mwaha owo. Ohiya opaka eyo, nihaana omooniherya  mutthu owo miruku sa mBiibiliyani ni ele iliivuru sahu sinimutthokiherya Biibiliya sinihimya aya. Niira siiso, nnimooniherya wira ninnisuwela wira sookhala itthu nihinsuwela ahu ni ninnisuwela mikano sahu. Wiisuumaaliha onninikhaliherya osuwela wira malamulo “a xariya” a Muluku Oowerya Sotheene tooloka ovikana muupuwelo ahu.—Wis. 15:3, 4.

¹⁶ Vaavo ninkhala ahu atthu oowiisuumaaliha ninninvuwiha Yehova. Masi yookhala etthu ekina yuulupale enniiriha wiisuumaaliha. Vano nrowe niwehe moota wiiyeviha ni wiisuumaaliha onniphwanyiha aya ohakalala ni onnikhaliherya aya okhalana waataana wooloka ni atthu akina.

17. Xeeni atthu oowiisuumaaliha ni oowiiyeviha anihakalala aya?

¹⁷ Vaavo nniiyeviha ahu ni wiisuumaaliha, nnoohakalalaka vanceene. Mwaha wa xeeni? Mwaha woowi nnoosuwelaka wira sookhala itthu ninsuwela ahu ni itthu nihinwerya ahu opaka. Nave nnoosuwelaka mikano sahu, okhala ooxukhuru ni ohakalala vaavo ninkhaliheriwa ahu ni atthu akina. Mwa ntakiheryo, nkahaya muupuwele okathi Yesu aapenunxe awe anamakuttula 10. Namakuttula mmosa paahi taatthinke wira omuxukhurele Yesu mwaha wompenuxa oretta ole wootakhala ni woohiirya. Mulopwana ole khaarowa owerya wiipenuxa mekhawe ohikhaliheriwe ni Yesu. Wiiyeviha ni wiisuumaaliha wa mulopwana ole waahimwiiriha orowa oxukhurela ni onvuwiha Muluku mwaha wookhaliheriwa mwa enamuna ele.—Luka 17:11-19.

18. Wiiyeviha ni wiisuumaaliha onnikhaliherya sai waataana ni atthu akina? (ARoma 12:10)

¹⁸ Atthu oowiiyeviha ni oowiisuumaaliha annaataana ni atthu akina ni vannaakhweela waapaka apatthani asya. Mwaha wa xeeni? Mwaha woowi atthu ntoko awo annaakuva woona mikhalelo sooloka sa atthu akina ni annaaroromela. Nave atthu oowiiyeviha ni oowiisuumaaliha annihakalala vaavo anaaweha aya atthu akina akhumelaka saana  wala avahiwaka iparakha sikina. Nave-tho annaattottopela ni waattittimiha atthu awo.—Mmusome aRoma 12:10.

19. Xeeni vari aya vooloka owanana nrima?

¹⁹ Moovirikana ni atthu oowiiyeviha ni oowiisuumaaliha, atthu oowiixinnuwiha khaniphavela waattottopela atthu akina, awo aniphavela wira attottopeliweke paahi. Awo anniilikanyiha ni atthu akina, nto eyo enniwiiriha ophavela oxinttana. Nave ohiya owiixuttiha ni waavaha okhulupale, atthu oowiixinnuwiha anuupuwela so: “Mwaphavelaka wira etthu eyo ekhumele saana, muhaana opaka mmensinyu”. Otakhala waya, okhala wira atthu awo anuupuwela wira etthu yooloka ti ele enipakiwa ntoko aniphavela aya. Ohiya-vo, atthu oowiixinnuwiha annaakhalela nrima atthu akina vaavo anaaweha aya akhumelaka saana. (aGal. 5:26) Atthu oowiixinnuwiha khanikhalana apatthani a okathi munceene. Nto akhala wira ninnoona wira noopacerya wiixinnuwiha, nihaana onvekela Yehova wira onikhaliherye ‘wùlula osuwela wahu’ ni okumiha muupuwelo owo wowiixinnuwiha vamurimani vahu. Niira siiso, nrima khaninrowa omaka vamurimani vahu.—aRom. 12:2.

20. Xeeni vari aya vooloka okhala oowiiyeviha ni oowiisuumaaliha?

²⁰ Tthiri ninnimuxukhurela Yehova mwaha woonivaha ntakiheryo nawe! Ninniweha wiiyeviha wa Yehova mwa enamuna onathokorerya awe arumeyi awe ni nihaana omutakiha. Nave nimphavela otthara matakiheryo a mBiibiliyani a atthu yaari oowiisumaaliha, yaawo yaarina eparakha ya weetta ni Muluku. Niira siiso, nnoomuttittimihaka ni onvuwiha Yehova ntoko oniphwanela awe. (Wis. 4:11) Nave ninrowa weetta ni Tiithi ahu a wiirimu, yoowo onaaphenta atthu oowiiyeviha ni oowiisuumaaliha.