1. Eparakha xeeni nrina ahu?

EPARAKHA yuulupale wiirela mpantta muloko wa Yehova. Tthiri hiyo ninkhala eparayiisu ya omunepani erina atthu a murettele ni oohakalala. Masi, tuuvi ori opuro anyu mmulokoni?

2. Nlikanyiho xeeni Paulo aarumenle awe iwarakha sawe sinceene?

² Nlikanyiho murummwa Paulo aarumenle awe iwarakha sawe sinceene ninniniixuttiha etthu yuulupale. Khula ewarakha aalempe awe, Paulo aahilikanyiha muloko ni erutthu ya apinaatamu. Nave aahaalikanyiha atthu a mmulokoni ni mipantta sa erutthu.—aRom. 12:4-8; 1 aKor. 12:12-27; aÉf. 4:16.

3. Mwaha ola, itthu xeeni tthaaru ninrowa ahu wiixutta?

³ Mwaha ola, ninrowa othokorerya itthu tthaaru nniixutta ahu ni ntakiheryo na murummwa Paulo. Yoopacerya, ninrowa woona wira khula mmosa a hiyo ookhalana opuro * awe mmutthenkesoni mwa Yehova. Ya nenli, ninrowa woona etthu nikhanle ahu oopaka akhala wira nnuupuwela wira khaninrumeeliwa mmulokoni. Ya neeraru, ninrowa woona wira nihaana oluttuweliwa ovara muteko ahu nivahiwe ahu ni Muluku mmulokoni.

4. ARoma 12:4, 5, onniixuttiha exeeni?

⁴ Etthu yoopacerya nniixutta ahu ni nlikanyiho na Paulo tiila: Khula mmosa a hiyo ookhalana opuro wa faita mweemusini mwa Yehova. Paulo aapacerinhe nlikanyiho nawe ohimyaka wira:  “Mwerutthuni emosá hiyo nokhalana itthu sinjene: khula emosá mwa itthu iya ennivara muteko aya. Siso hiyo, nri atthu anjene, ninnikhala erutthu emosá mwa Kristu, ninnùpana mutthu ni mukhw’awe ntoko itthu s’erutthu”. (aRom. 12:4, 5) Paulo aaphavela oniixuttiha exeeni? Aaphavela oniixuttiha wira nnaamwi otheene ahu nrina ene miteko soovirikana mmulokoni, otheene ahu nookhalana efaita yinceene.

5. “Sovaha” xeeni Yehova onivanhe awe mmulokoni?

⁵ Vaavo anilavuliwa aya ale arina opuro mmulokoni, woonasa wene etthu yoopacerya munuupuwela anyu, muniwuupuwela ale anihoolela mmulokoni. (1 aTes. 5:12; aHéb. 13:17) Ekeekhai wira omurumeelaka Kristu, Yehova oonivaha “sovaha sawe” mmulokoni. (aÉf. 4:8) “Sovaha” iyo anihela muhina anna a Nikhuuru Noolamulela, anamakhaliherya a Nikhuuru Noolamulela, anna a Ekomisau ya Efiliyaali, axitokweene a esirkwiitu, anna aniixuttiha ixikola sa omwene, axitokweene a mmulokoni ni arumeyi oorumeela. Anna awo otheene athanliwe ni munepa wootteela wira akhapeleleke ipwittipwitthi sawe ni olipiha muloko.—1 Ped. 5:2, 3.

6. Moovarihana ni 1 aTesalonika 2:6-8, anna athanliwe ni munepa wootteela anipaka exeeni?

⁶ Anna annithanliwa ni munepa wootteela wira avareke miteko soovirikana mmutthenkesoni. Ntoko siisaale erutthu erina aya ipantte soovirikana ntoko matata ni inawu sinivara aya muteko wira siphwanyihe mureerelo erutthu yotheene, anna anithanliwa ni munepa wootteela anniimananiha ovara muteko wira aphwanyihe mureerelo muloko. Awo khanipaka itthu iyo wira avuwihiweke ni atthu akina. Ohiya-vo, awo anniimananiha wira alipihe waamini wa anna ni arokora mmulokoni. (Mmusome 1 aTesalonika 2:6-8.) Ninnimuxukhurela vanceene Yehova mwaha woonivaha anna awo oomunepani anihela nipuro noopacerya soophavela sa atthu akina ohiya sawaya.

7. Mareeliho xeeni anna anivara muteko wa Muluku wa okathi wotheene arina aya?

⁷ Anna akina a mmulokoni annithanliwa wira arumeeleke ntoko mamisionaario, mapioneero a vameekhaaya aahiiso mapioneero ookilaatheya. Tthiri anna ni arokora anceene olumwenku wotheene annithanla olaleerya ni waapaka awiixutti okhala muteko aya wa okathi wotheene. Mwaha woopaka eyo, awo ahaakhaliherya atthu anceene okhala atthareli a Kristu Yesu. Nnaamwi anna awo anivara muteko wa okathi wotheene ahirina itthu sinceene sa werutthuni, Yehova onnaareeliha aavahaka itthu sinceene sooloka. (Mar. 10:29, 30) Hiyo ninnaaphenta anna ni arokora awo ni ninnixukhurela okhala wira aniirela mpantta muloko.

8. Xeeni anamalaleerya otheene arina aya efaita vamaithoni va Yehova?

⁸ Niireke anna arina miritti wala anivara muteko wa Muluku wa okathi wotheene ti yaawo paahi arina opuro mmulokoni? Nnaari! Khula namalaleerya a ihapari sooreera onnivahiwa efaita ni Muluku ni atthu akina a mmulokoni. (aRom. 10:15; 1 aKor. 3:6-9) Eyo ekeekhai okhala wira yoolakela ekina yuulupale ya muloko ori waapaka awiixutti a Pwiya ahu Yesu Kristu. (Math. 28:19, 20; 1 Tim. 2:4) Atthu otheene aniirela mpantta muloko, akhale anamalaleerya oopatisiwa ni oohipatisiwa anniimananiha ohela nipuro noopacerya muteko woolaleerya.—Math. 24:14.

9. Xeeni nnaavaha ahu efaita arokora maKristau?

⁹ Yehova ohaavaha arokora maKristau opuro wa faita mmulokoni. Tthiri Yehova onnaavaha efaita athiyana ootheliwa, aximai, anaamukhweli ni arokora oohitheliwa yaawo aniimananiha omurumeela moororomeleya. Biibiliya onnaalavula ikwaha sinceene athiyana yaamusivelinhe Muluku. Awo annuupuweliwa mwaha woovaha ntakiheryo nooloka na ankhili, waamini, oluttuweliwa, olipa-murima, ovaha ni ovara  muteko wooloka. (Luka 8:2, 3; Mit. 16:14, 15; aRom. 16:3, 6; aFil. 4:3; aHéb. 11:11, 31, 35) Ninnimuxukhurela vanceene Yehova mwaha woonivaha mmulokoni athiyana awo maKristau arina mikhalelo sooloka!

10. Exeeni enniiriha waavaha efaita anna oowuuluvala?

¹⁰ Nave eparakha yuulupale okhalana anna oowuuluvala mmulokoni. Miloko sikina aakhala anna ni arokora oowuuluvala avirinhe okumi aya wotheene amurumeelaka Yehova. Anna akina oowuuluvala yiixuntte niinano ekeekhai. Hata vari siiso, anna anceene oowuuluvala anniwanana mixankiho sa okumi mwaha woowi ahuuluvala. Mixankiho iyo sinnivukula muteko anivara aya mmulokoni ni muteko woolaleerya. Moohaanyiherya, anna awo oowuuluvala annipaka itthu sotheene aniwerya aya wira alaleerye ni annirumeela ikuru saya sotheene wira yaalipihe ni owiixuttiha atthu akina! Tthiri ninnittottela mureerelo itthu yiixuntte aya. Vekeekhai, Yehova ni hiyo ninnaavaha efaita yinceene anna ni arokora oowuuluvala.—Mir. 16:31.

11-12. Munoonela sai ntakiheryo na amiravo a muloko anyu?

¹¹ Nkahaya nwuupuwele amiravo. Awo annikumana mixankiho sinceene, maana aninnuwa olumwenku onilamuleliwa ni Satana Diabo ni sihireere miyuupuwelo soohiloka. (1 Yoh. 5:19) Othene ahu ninnilipa vaavo nnaaweha ahu amiravo akomentariki mmithukumanoni ni okathi wotheene yaakiheryaka moolipa murima waamini waya muteko woolaleerya. Xontte, nyuwo amiravo musuweleke wira mookhalana nipuro na faita yinceene mmulokoni mwa Yehova.—Esal. 8:3.

¹² Masi anna ni arokora akina onnaavila okupali wira aakhalana nipuro na faita mmulokoni. Exeeni enrowa omukhaliherya khula mmosa a hiyo okupali wira ookhalana opuro mmulokoni? Nrowe niwehe.

13-14. Exeeni eniwiiriha anna ni arokora anceene mmulokoni wuupuwela wira kharina efaita?

¹³ Etthu ya nenli nniixutta ahu nlikanyiho na Paulo enninuupuxerya muxankiho anna ni  arokora anceene arina aya olelo-va. Maana anna ni arokora anceene onnaavila okupali wira aakhalana efaita mmulokoni. Paulo aalempe so: “Nnawu nahimya wira: ‘Miyo nkihiyó ntata: tivo nkihiyó erutthu’: hatá nihimyaka siso, nnawu nlo khannihiya okhala epantte y’erutthu. Siso-tho niyaru nahimya wira: ‘Miyo nkihiyó nitho: tivo, nkihiyó erutthu’, niyaru nlo, hatá nihimyaka siso, khannihiya okhala epantte y’erutthu”. (1 aKor. 12:15, 16) Exeeni Paulo aaphavela awe oniixuttiha?

¹⁴ Akhala wira munniilikanyiha ni atthu akina mmulokoni, nyuwo munoopacerya wuupuwelaka wira khamurina efaita mmulokoni. Atthu akina mmulokoni pooti okhala awiixuttihi ooloka, oosuwela otthokiha itthu wala oosuwela waamaaliha ni waalipiha atthu akina. Woonasa wene, nyuwo pooti wuupuwelaka wira khamunrowa okhalana mikhalelo awo arina aya. Mwa enamuna ekina, eyo enooniherya wira mwa mutthu oowiiyeviha ni oowiisuumaaliha. (aFil. 2:3) Masi muhaana okhalana ephoole. Akhala wira munimakela wiilikanyiha ni atthu akina yaawo anisuwela itthu sinceene, nyuwo pooti omakela onyoonyiheya. Eyo pooti owiirihani wuupuwela wira khamurina nipuro mmulokoni ntoko Paulo ohimmye awe. Exeeni enrowa wookhaliheryani oxintta moonelo owo?

15. Moovarihana ni 1 aKorinto 12:4-11, etthu xeeni ninreerela ahu osuwela voohimya sa iparakha nrina ahu?

¹⁵ Nkahaya muupuwele ela: Eseekulu yoopacerya Yehova aahaavaha maKristau makina eparakha ya opaka miiriirya akhaliheriwaka ni munepa wootteela, masi khahiyo wira maKristau otheene yaavahiwe eparakha emosaru. (Mmusome 1 aKorinto 12:4-11.) Tthiri Yehova aahaavaha iparakha soovirikana, masi hata vari siiso khula muKristau aahikhalana efaita yinceene. Olelo-va hiyo khanrina soovahiwa sa opaka miiriirya. Masi, malakiheryo ale yaavahiwe aya annivareleya muteko olelo-va. Otheene ahu khahiyo ninsuwela itthu simosaru, hata vari siiso, otheene ahu nookhalana efaita vamaithoni va Yehova.

16. Miruku xeeni murummwa Paulo ovanhe awe ninreerela ahu ovarihela muteko?

 ¹⁶ Ohiya wiilikanyiha ni maKristau makina, nihaana otthara malakiheryo a murummwa Paulo ani: “Khula mutthu athokoreryeke mwettelo awe: òna vale wira onniwerya wittottopa, aittottopeke mekhaweru, nto ahìlikanyiheké n’atthu akina”.—aGal. 6:4.

17. Ninrowa ottottela sai mureerelo natthara miruku Paulo onivanhe awe?

¹⁷ Akhala wira nnootthara miruku sa Paulo ni oweha miteko ninvara ahu, nnimoona wira nookhalana mikhalelo ni ninnisuwela itthu atthu akina ahinsuwela aya. Mwa ntakiheryo, mutokweene pooti ohisuwela olavula oratteene myaha, masi yena pooti osuwela owiixuttiha oratteene atthu ihapari sooreera. Wala mutokweene mukina pooti ohisuwela otthokiha itthu ntoko axitokweene akina mmulokoni, masi owo pooti okhala mutokweene ooreera murima, oophenta, oosuwela ovaha miruku ni onsuwela oratteene waalipiha anna ni arokora. Nave yena pooti osuweliwa okhala mutokweene onsuwela owaakhela aletto. (aHéb. 13:2, 16) Vaavo ninweha ahu mikhalelo sooloka nrina ahu ni itthu ninsuwela ahu, nnoohakalalaka osuwela wira ninnikhaliherya muloko. Nave nnoosyaka waakhalela nrima anna ninwoona ahu wira aakhalana mikhalelo nihirina ahu.

18. Ninrowa okhala sai awiixuttihi ooloka?

¹⁸ Moohicikha opuro nrina ahu mmulokoni, otheene ahu nihaana ophavela olokiherya muteko wa Muluku ninvara ahu ni mikhalelo sahu. Yehova onninikhaliherya opaka eyo, orumeelaka mutthenkeso awe, owo onniniixuttiha. Mwa ntakiheryo, mithukumano sa eriyari ya esumana, ninnivahiwa malakiheryo annikhaliherya olokiherya inamuna sahu sa olaleerya. Niireke munnivarihela muteko malakiheryo awo ninvahiwa ahu?

19. Munrowa owerya sai orowela Exikola ya Anamalaleerya a Omwene?

¹⁹ Exikola ya Anamalaleerya a Omwene, enamuna ekina nniixuttihiwa ahu. Atthu anrowela exikola ela ti anna ni arokora ari muteko wa Muluku wa okathi wotheene arina iyaakha 23 mpakha 65. Woonasa wene, nyuwo munuupuwela wira khamunikhala-khala murowelaka. Ohiya opaka elista ya mathowa aniwiirihani ohirowela exikola eyo, mpakeke elista ya itthu siniwiirihani ophavela orowela. Nuumala-vo, mumpakeke palano onrowa wookhaliheryani okhalana itthu sinivekeliwa wira murowele exikola eyo. Mukhaliheriwaka ni Yehova ni wiimananiha wanyu, munoowerya ophwanya soolukama munuupuwela anyu wira khimwaawerya.

20. Etthu xeeni nniixutta ahu eri aRoma 12:6-8?

²⁰ Etthu ya neeraru nniixutta ahu nlikanyiho na murummwa Paulo eri aRoma 12:6-8. (Mmusome.) Iveersu iya, murummwa Paulo onnitthikela wooniherya wira khula mutthu mmulokoni sookhala itthu onsuwela awe. Masi vano, owo onnittittimiherya wira nihaana orumeela itthu iyo ninsuwela ahu wira naalipihe anna ni arokora a mmulokoni.

21-22. Ntakiheryo na Robert ni Episcopo, ninniixuttiha exeeni?

²¹ Nkahaya muupuwele ele emwiiranenle munna ninrowa ahu omwiihanaka Robert. Nuumala oviriha iyaakha vakhaani orumeelaka elapo ekina, aahithanleliwa orumeela eBetheli ya elapo awe. Nnaamwi aasuwela wira khaapanke etthu yoohiloka wira eturukiwe yoothanleliwa awe, munna ole ohimmye so: “Saahivira myeeri sinceene kihihakalalaka, maana kuupuwela wira nkaavara saana yoothanleliwa aka ya khalai. Nto waahikhala okathi koona aka wira kaahaana  ohiya orumeela oBetheli”. Robert aawenrye sai otthikela ohakalala? Mutokweene mukhwaawe aahimuupuxerya munna ole wira Yehova onnirumeela soothanleliwa sahu sa khalai wira nirumeeleke saana yoothanleliwa ahu ya niinaano. Nto, Robert aahoona wira aahaana ohiya oweha itthu sikhumelenle khalai wira owehexexeke etthu okhanle awe oopaka niinaano-va orowa muhoolo.

²² Munna Felice Episcopo aahikhalana muxankiho mmosaru aarina awe Robert. Episcopo ni mwaarawe yaahirowela exikola ya oGileadi mwaakha wa 1956, nuumala-vo yaahithanleliwa muteko wa osirkwiitu oBolívia. Vano mwaakha wa 1964 yaahimuyara mwaana mwaamulopwana. Episcopo onihimya so: “Vaahinixankiha ohiya yoothanleliwa yaanisivela vanceene. Waahivira mwaakha ntero kiikhupanyeryaka. Masi kikhaliheriwaka ni Yehova, kaahituruka moonelo aka kinapacerya owehexexa muritti wa niinaano ntoko namuyari”. Niireke muxankiho anyu onoolikana ntoko wa Robert wala Episcopo? Niireke murookhulumuwa mwaha woowi yoothanleliwa anyu ya niinaano khenlikana ni yoothanleliwa anyu ya khalai? Akhala wira ti siiso, exeeni enrowa wookhaliheryani ohakalala? Muhaana osyaka wuupuwela itthu sa khalai, nto nwehexexeke ele mukhanle anyu oopaka niinaano-va wira mmurumeele Yehova ni anninyu. Nave muluttuweliweke ni murumeeleke itthu munisuwela anyu wira mwaakhaliherye atthu akina. Mwiira siiso, munoohakalalaka ni munoolipiha muloko.

23. Nihaana oviriha okathi nipakaka exeeni? Makoho xeeni ninrowa ahu waakhula mwaha onittharelana?

²³ Otheene ahu nookhalana efaita vamaithoni va Yehova. Owo oniphavela wira niireleke mpantta emusi awe. Akhala wira nnoophavelasa okathi wira nuupuwelele ele nikhanle ahu oopaka wira naalipihe anna ni arokora ni wiimananiha wira nivare saana muteko ahu, nnoosyaka wuupuwela wira khanrina nipuro mmulokoni! Masi, ninwoonela sai atthu akina mmulokoni? Ninrowa wooniherya sai wira ninnittittimiha nipuro avahiwe aya ni Yehova mmulokoni? Mwaha onittharelana, ninrowa waakhula makoho awo.