1-2. Mwaha ola, ninrowa othokorerya exeeni?

MUNOONELA sai vaavo enipisa aya ophiya etthu ya faita munlipelela anyu? Niireke munninyoonyiheya? Woonasa wene moonelo anyu onoolikana ni moonelo onihimmwa Miruku 13:12, yoowo onihimya wira: “Otepa owehererya onniripiha murima”. Masi munoonela sai vaavo munisuwela anyu wira aakhala mathowa ooloka yiirinhe opisa etthu eyo munlipelela anyu? Woonasa wene eyo enoowiirihani opixa murima mulipelelaka etthu eyo ophiya.

² Mwaha ola, ninrowa wuupuwela malakiheryo a mBiibiliyani yaawo anrowa onikhaliherya owehererya ‘moopixa murima’. (Mik. 7:7) Nuumala-vo ninrowa oweha mikhalelo miili ninreerela ahu omulipelela Yehova moopixa murima. Nto wanikisa, ninrowa oweha mareeliho Yehova aaleihenrye awe atthu otheene animulipelela moopixa murima.

3. Yoolepa ya Miruku 13:11, enniixuttiha exeeni?

³ Eliivuru ya Miruku 13:11, enniniixuttiha okhala atthu oopixa murima. Yoolepa eyo enihimya so: “Mihakhu siphwanyiwe ni wakuva sinolakaseya: seiye sinttotteliwa vakhani-vakhani sinimunjerereya”. Niireke mooweha etthu yoolepa ela enniixuttiha aya? Mutthu a ankhili onnipaka itthu moopixa murima, nto vakhaani-vakhaani itthu iyo onipaka awe sinnikhumela saana.

4. Malakiheryo ari Miruku 4:18, anttittimiherya exeeni?

⁴ Yoolepa ya Miruku 4:18, enihimya so: “Mukhalelo w’atthu òloka onlikana ni warya wa nsuwa: onkhumelela oxaka, khunnuwa mpakha othana eriyari”. Moolumo ala anihimya enamuna Yehova onaakhaliherya awe arumeyi awe wiiwexexa ele oniphavela awe. Owo onipaka eyo vakhaani-vakhaani. Masi yoolepa ela enninikhaliherya woona marukunuxo mukristau onipaka awe mookumini mwawe wira omusiveliheke Yehova. Wunnuwa mwa omunepani khahiyo etthu eniiraneya moowakuveya, onnivira  okathi munceene. Akhala wira nnimwiimananiha omusoma Biibiliya, weettela malakiheryo nniixutta ahu mBiibiliyani ni weettela malakiheryo ninvahiwa ahu ni mutthenkeso wa Yehova, vakhaani-vakhaani nnoowerya otakiha mikhalelo sa Kristu. Nave nnimuncererya omusuwela wahu Muluku. Nrowe nithokorerye nlikanyiho Yesu aapanke awe ninnikhaliherya wiiwexexa oratteene.

5. Nlikanyiho xeeni Yesu aapanke awe ninnikhaliherya woona wira onnivira okathi wira mutthu opaka marukunuxo?

⁵ Yesu aahipaka nlikanyiho wira otthokiherye moota muhupi wa Omwene oninnuwa aya vamurimani va atthu ale anisiveliwa itthu sooloka. Owo aahimmye so: “Epyo ennimela, enannuwa. Masi owo [mulipa-oowaala] khonisuwela moota eniiraneya aya. Vakhaani-vakhaani, etthaya enniimiha mihokorokho mekhaya-ru. Enipacerya okhuma mutathi, nuumala-vo nnakhumelela nikala, nto wookiseryani waya, sinnikhumela ipyo vanikalani”. (Mar. 4:27, 28) Ni moolumo ala Yesu aaphavela ohimya exeeni? Yesu aaphavela otthokiherya wira ntoko siisaale mwiri oninnuwa awe vakhaani-vakhaani, nave okela vahoolo wa mutthu oneemererya muhupi wa Omwene oniiraneya vakhaani-vakhaani. Mwa ntakiheryo vaavo naxikola a Biibiliya onipacerya awe omwaattamela Yehova, vakhaani-vakhaani ninniwerya oweha marukunuxo onipaka awe mookumini mwawe. (aEef. 4:22-24) Ekeekhai wira Yehova, toniiriha ipyo iyo wunnuwa.—1 aKor. 3:7.

6-7. Enamuna Yehova aapattunxe awe elapo enniixuttiha exeeni?

⁶ Itthu sotheene Yehova onipaka awe, onipaka moopixa murima. Owo onniviriha okathi wootheene onireerela wira opake etthu eyo uupuwelaka moota okhanle awe oovuwiha nsina nawe ni waakhaliherya atthu akina. Mwa ntakiheryo nwehe moota Yehova aapattunxe awe elapo vakhaani-vakhaani wira aavahe apinaatamu.

⁷ Olavulaka moota Yehova opattunxe awe elapo, Biibiliya onihimya wira Yehova aahokola “mukhoyi w’ophima”, nave ‘ahithipa malitti aya ni ahilipiha maripu’. (Yobi 38:5, 6) Nave  Yehova aahiviriha okathi ovareryaka itthu aapattunxe awe. (Maph. 1:10, 12) Niireke munniwerya wuupuwela moota malaikha yaahakalanle aya vaavo yanweha aya Yehova opattuxaka itthu? Tthiri malaikha ale yaahitthapa vanceene! Maana Biibiliya onihimya wira waahikhala okathi ‘malaikha othene yatteliwe aya murima n’utthapa’. (Yobi 38:7) Etthu xeeni nniixutta ahu? Yehova aahiviriha iyaakha imilyau sinceene wira omalihe itthu aapattuxa awe. Maana aapattuxa vakhaani-vakhaani nto nuumala oweha itthu sotheene aapattunxe awe, Yehova ahoona wira sotheene “sari sorera sana”.—Maph. 1:31.

8. Etthu xeeni ninrowa ahu othokorerya?

⁸ Matakiheryo nithokorenrye ahu ittima sivinre annooniherya oratteene wira malakiheryo a Muluku anniniixuttiha wira nihaana opixa murima. Vano nrowe niwehe mikhalelo miili nikhanle ahu oomulipelela Yehova moopixa murima.

9. Mukhalelo xeeni nikhanle ahu oomulipelela Yehova?

⁹ Woonasa wene nihaana omulipelela Yehova wira aakhule mavekelo ahu. Okathi mukina, hiyo ninninvekela Yehova wira onivahe ikuru sinrowa onikhaliherya ovilela muxankiho ahu wala onikhaliherye oxintta sootteettheya sahu. Pooti woonaka wira Yehova onnipisa waakhula mavekelo ahu. Nto hiyo pooti wiikoha so: ‘Xeeni Yehova ohinaakhula awe moowaakuveya mavekelo ahu otheene?’

10. Xeeni vari aya vooloka opixa murima vaavo ninvekela ahu?

¹⁰ Yehova onniniwiriyana oratteene vaavo nninvekela ahu. (Esal. 65:3) Maana mavekelo nimpaka ahu annimooniherya Yehova wira ninnimwaamini. (aHeeb. 11:6) Vaavo ninvekela ahu, Yehova onnivaha ephoole wira owehe akhala wira ninvekenle ni murima wotheene. Akhala wira nnimwiimananiha opaka itthu moovarihana ni nivekelo nahu ni ele eniphavela awe. (1 Yoh. 3:22) Nto vaavo nninvekela ahu Yehova wira onikhaliherye oxintta itthu soohiloka naapaka ahu wala sootteettheya sahu nihaana opixa murima ni wiimananiha opaka marukunuxo. Yesu aahooniherya oratteene wira mavekelo ahu makina khiyaarowa waakhuliwaka ni Yehova moowaakuveya. Nto aahintumererya oriki: “Muthipeleleke oveka, munoovahiwa. Muthipeleleke ophavelasa, munoophwanya. Muthipeleleke omana mukhora, munoohuleliwa. Otheene ale aniveka, anoovahiwa. Nave otheene ale aniphavelasa, anoophwanya, ni otheene ale animana mukhora, anoohuleliwa”. (Math. 7:7, 8) Vaavo nintthara ahu miruku sa ‘othipelela ovekela’ nikupaliki ni murima ahu wotheene wira Tiithi ihu a wiirimu onooniwiriyana ni onimwaakhula mavekelo ahu.—aKol. 4:2.

11. Akhala wira nnoona wira mavekelo ahu annipisa wakhuliwa, aHeeberi 4:16 onrowa onikhaliherya sai?

¹¹ Vaavo nnoona ahu wira Yehova onnipisa waakhula mavekelo ahu, nihaana wuupuwela wira Yehova ooleiherya wira onimwaakhula mavekelo ahu “okathi wooreerela”. (Mmusome aHeeberi 4:16.) Nto akhala wira mavekelo ahu khanaakhuliwa ntoko naaphavela ahu, nihuupuweleke wira Yehova oroovonya. Mwa ntakiheryo atthu anceene aaviriha iyaakha sinceene avekelaka wira Omwene wa Muluku orwe ni opwetexe olumwenku ola wootakhala. Nave Yesu ooniixuttiha wira nihaana ovekela wira Omwene wa Muluku orwe. (Math. 6:10) Tthiri yaarowa okhala etthu ya elolo ohiya omwaamini Yehova mwaha woowi wanikisa khophiyale ntoko naaphavela ahu! (Hab. 2:3; Math. 24:44) Etthu ninreerela ahu opaka ori omulipelela Yehova ni onvekela nikupaliki wira onimwaakhula mavekelo ahu. Tthiri wanikisa onoophiya okathi wooreerela mwaha woowi Yehova oothanla “nihiku nene ni ewoora ene” onrowa awe opwetexa olumwenku ola, nto eyo enimwaaphwanyiha  mureerelo atthu otheene.—Math. 24:36; 2 Ped. 3:15.

12. Okathi xeeni vanivila aya opixa murima?

¹² Woonasa wene nihaana opixa murima wira nivilele othokoreriwa moohixariya. Olumwenku ola ninkhala ahu, atthu anceene annaathokorerya voohiloka atthu akina akhala wira alopwana wala athiyana, nikhuli, nloko, soolema wala elapo ayariwa aya. Atthu akina annithokoreriwa voohiloka mwaha woorakala wala ohikhala saana mmuupuweloni. Anamoona a Yehova anceene annithokoreriwa voohiloka mwaha wa sookupali saya sinikhuma mBiibiliyani. Nto akhala wira ninnithokoreriwa voohiloka, mwa inamuna iyo nihiliyale moolumo Yesu aalavunle awe oriki: “Ole onivilela mpakha wookiseryani, tonrowa woopowa”. (Math. 24:13) Etthu xeeni munireerela anyu opaka mwasuwela wira mutthu mmosa a mmulokoni oopaka etampi yuulupale? Nuumala waaleela axitokweene etthu eyo yiiraneyale, niireke munoohiya mwaha owo mmatatani mwaya wira anoophuka saana ni munoolipelela moopixa murima mukupaliki wira anoophuka mwaha owo moovarihana ni ele Yehova oniphavela awe? Akhala wira eyo enookhumelela musuweleke wira axitokweene anoopaka etthu. Etthu xeeni? Nrowe niwehe.

13. Etthu xeeni Yehova oniphavela awe wira axitokweene apakeke akhala wira okhala mutthu opanke etampi yuulupale?

¹³ Vaavo axitokweene ansuwela aya wira ookhala mutthu mmulokoni opanke etampi yuulupale, awo annaavekela “ankhili anikhuma wiirimu” wira akhalane moonelo wa Yehova. (Yak. 3:17) Yoolakela ya axitokweene omukhaliherya mutthu owo opanke etampi yuulupale ‘otthikela ephiro yooreera’. (Yak. 5:19, 20) Nave awo annipaka sotheene aniwerya aya wira akhapelele muloko ni waamaaliha ale akumiheriwe mixankiho. (2 aKor. 1:3, 4) Vaavo axitokweene anithokorerya aya myaha sinivarihana ni itampi suulupale, awo ahaana ovarerya itthu sotheene siiraneyale. Nto pooti ovira okathi munceene. Axitokweene awo annivekela, anninvaha miruku sinikhuma mBiibiliyani ni annimpwapwela mutthu owo opanke etampi eyo yuulupale. (Yer. 30:11) Ekeekhai wira axitokweene khamphavela opisa othokorerya mwaha owo, masi-tho khaniphavela opaka yoothanla moowakuveya. Tthiri vaavo axitokweene anithokorerya aya myaha mwa enamuna yooloka, muloko wotheene onnittottela mureerelo. Hata axitokweene athokoreryaka oratteene mwaha owo, ole opakeliwe itthu soohiloka nlelo pooti woona owereya. Akhala wira ti nyuwo mwiireliwe etthu eyo yoohiloka etthu  xeeni enrowa wookhaliheryani ovukula woona owereya?

14. Akhala wira ookhala munna owiirenleni etthu yoohixariya, ntakiheryo xeeni na mBiibiliyani ninrowa wookhaliheryani?

¹⁴ Niireke ookhala munna wala murokora a mmulokoni otonko owiirelani etthu yoohixariya? Akhala wira ti siiso, Biibiliya onimookhaliheryani vanceene. Biibiliya ookhalana matakiheryo manceene anniixuttiha wira nihaana omulipelela Yehova wira onoophuka muxankiho owo. Mwa ntakiheryo, Yosefe aahithokoreriwa moohixariya ni axinna awe masi owo kheemerenrye etampi ya axinna awe emwiirihaka okhala mutthu ootakhala murima. Ohiya-vo, owo aahivikaniha ovara muteko wa Yehova ni aanipixa murima ovilelaka. (Maph. 39:21) Nuuvira okathi Yosefe aahiwerya waalevelela axinna awe, nto Yehova aahimureeliha Yosefe. (Maph. 45:5) Nimutakihaka Yosefe hiyo ninnihakalala vaavo nimmwaattamela ahu Yehova nikupaliki wira owo onoophuka itthu soohixariya nniireliwa ahu.—Esal. 7:18; 73:28.

15. Etthu xeeni yaamukhalihenrye murokora mmosa oliyala itthu soohixariya iireliwe awe?

¹⁵ Ekeekhai wira okathi mukina itthu soohiloka nniireliwa ahu khahiyo suulupale nalikanyiha ni itthu soohiloka iireliwe awe Yosefe. Tthiri wiireliwa itthu soohiloka onninriipiha murima otheene ahu. Hata niireliwaka itthu soohiloka ni munna wala mutthu mukina ohinimurumeela Yehova, etthu yooloka ninreerela ahu opaka ori weettela malakiheryo a mBiibiliyani. (aFil. 2:3,4) Nwehe etthu yaamwiiranenle murokora mmosa. Murokora ole ahoona wira mutthu mmosa aavarana awe muteko, aanimulavula voohiloka. Ohiya ophuka mwaha ole mookhummwa murima, murokora ole aahuupuwela ntakiheryo na Yesu. Okathi Yesu aaruwaniwa awe owo khaaruwana. (1 Ped. 2:21, 23) Uupuwelaka ntakiheryo na Yesu, murokora ole aahiliyala itthu sotheene iireliwe awe. Nto muhoolo mwaya murokora ole ahoona wira mutthu ole aavarana awe muteko aahikhalana mixankiho sinceene sa okumi awe ni aaniriipiwa murima. Vano murokora ole ahoona wira mutthu ole aavarana awe muteko khahiyo aroolakelela ohimya itthu saamuriipinhe murima. Murokora ole aahikhalana murettele ni aahihakalala mwaha wa opixa murima.

16. Akhala wira yookhala etthu enooxankihani, etthu xeeni enrowa woomaalihani? (1 Pedru 3:12)

¹⁶ Akhala wira nyuwo munnixanka mwaha wa wiireliwa itthu soohixariya wala etthu ekina,  muupuweleke wira Yehova ori “vakhiviru n’ale òtemwa”. (Esal. 34:19) Mukupaliki ni murima wotheene wira Yehova onnoophentani mwaha wa opixa wanyu murima ni munvahereryeke mixankiho sanyu sotheene. (Esal. 55:23) Musuweleke wira Yehova Mphuki a olumwenku wotheene nto khiivo etthu ohinoona awe. (Mmusome 1 Pedru 3:12.) Akhala wira mookhalana muxankiho muhinwerya anyu omaliha etthu yooloka mukhanle anyu oopaka ori omulipelela Yehova wira ophuke muxankiho anyu.

17. Moovarihana ni Yesaya 30:18, etthu xeeni Yehova onileihenrye awe?

¹⁷ Moohipisa, Tiithi ihu a wiirimu onoonireeliha vanceene orumeelaka Omwene awe. Yesaya 30:18, onihimya so: “Apwiya annowehereryani wira yoleveleleni: awo animwemela wira yomoreleni ikharari. Tthiri Apwiya ti Muluku òmoriwa ikharari: òreriwa t’ale anetta emuroromelaka Muluku”. Ale ahinihiya omulipelela Yehova animwaakhela mareeliho niinaano-va ni animwaakhela mareeliho muhoolo elapo esya.

18. Mareeliho xeeni ninlipelela ahu?

¹⁸ Nuumala ophiya elapo esya, atthu a Muluku khanrowa okhalana mixankiho arina aya olelo-va. Itthu soohixariya aniireliwa aya ni woona owereya khonrowa okhala-tho. (Wiis. 21:4) Okathi owo, khaninrowa olipelelaka vanceene itthu nimphavela ahu maana khula mutthu onookhalana itthu oniphavela awe. (Esal. 72:16; Yes. 54:13) Tthiri vannooneya wira Yehova, onoonireeliha vanceene!

19. Xeeni Yehova onnilokiherya awe niinaano-va?

¹⁹ Okathi ola vakhaani ohanle, vaavo Yehova onnikhaliherya awe oxintta mikhalelo soohiloka ni okhalana mikhalelo sa eKristau, eyo enooniherya wira Yehova onoonilokiherya wira nakhaleke elapo esya nilamuleliwaka ni yoowo. Nto muhikhulumuwe ni muhihiye omurumeela Yehova maana sookhala itthu sinceene soohakalaliha ninlipelela ahu muhoolo. Nto nihihiye omulipelela Yehova moopixa murima wira omalelihe muteko awe!