1. Itthu xeeni amiravo anceene awenrye aya opaka?

 KHULA mwaakha, amiravo anceene annipatisiwa. Akhala wira mwa mmiravo opatisiwe niinaano, mukupaliki ni murima wootheene wira anna ni arokora annihakalala vanceene, nave Yehova onnitthapa mwaha wa yoothanla mpanke anyu. (Mir. 27:11) Nkahaya muupuwele itthu nwenrye anyu opaka. Woonasa wene nyuwo mooviriha iyaakha sinceene mmusomaka Biibiliya. Nto okathi mwaamusoma anyu, muhiixutta wira Biibiliya Nuulumo na Muluku. Opaka eyo, ehookhaliheryani omusuwela ni omphenta Yehova. Tthiri omphenta iwo Yehova woowiirihani wiivahererya ni opatisiwa. Nto ninnooxukhurelani vanceene mwaha wa opaka yoothanla eyo ya efaita yuulupale.

2. Mwaha ola, ninrowa othokorerya exeeni?

 ² Tthiri muhinatthi opatisiwa, waamini wanyu waaheehereriwa mwa inamuna sinceene. Masi hata vari siiso, mulipeleleke wira muhoolo sinimoophwanyani sooweeha-tho sikina. Okhala wira Satana onoopaka sootheene oniwerya awe wira ovukule omphenta wanyu Yehova ni woohiihani omurumeela. (aEef. 4:14) Nto muheemererye eyo ewiiraneelakani. Etthu xeeni enrowa wookhaliheryani ohihiya omuroromela Yehova ni opaka ele mwaamuleihenrye anyu okathi mwaivahererya anyu? Muhaana orowa vahoolo, niire so, ohihiya olipiha waamini wanyu ni ompatthani anyu ni Yehova. (aHeeb. 6:1) Nto munrowa owerya sai opaka eyo? Eyo ti etthu ninrowa ahu othokorerya mwaha ola.

3. Makristau ootheene ahaana opaka exeeni nuumala opatisiwa?

³ Nuumala opatisiwa, ootheene ahu nihaana otthara miruku murummwa Paulo aavanhe awe makristau a wEefeso. Owo aahaatumererya  okhala makristau arina “waamini” woolipa. (aEef. 4:13) Ni moolumo makina, hiyo nihaana ohihiya ‘okela vahoolo’. Okathi nnuupuwela ahu moota mwaana oninnuwa awe, eyo enniniiriha wiiwexexa etthu murummwa Paulo aaphavela awe ohimya. Ekeekhai wira mwaana mwaamukhaani onnaahakalaliha vanceene anamuyari awe. Masi owo khokhanle oovikaniha okhala mwaana mahiku ootheene maana ohaana wunnuwa. Owo ohaana ohiya “makhalelo otheene a onamwane”. (1 aKor. 13:11) Etthu emosaru enniiraneya ni makristau. Nuumala opatisiwa, awo ahaana okela vahoolo, niire so, olipiha waamini waya. Nrowe niwehe malakiheryo vakhaani anrowa onikhaliherya opaka eyo.

4. Mukhalelo xeeni onrowa wookhaliheryani olipiha waamini wanyu? Mutthokiherye. (aFilipi 1:9)

⁴ Mulipiheke omphenta wanyu Yehova. Ekeekhai wira munnimphenta vanceene Yehova. Masi nyuwo pooti wuncererya omphenta wanyu. Moota xeeni? Murummwa Paulo aahitthokiherya enamuna emosa nikhanle ahu oopaka eyo, aFilipi 1:9. (Mmusome.) Murummwa Paulo aahinvekela Muluku wira ophenta wa makristau ale waahaana ‘otepa wunnuwa’. Nto vannooneya wira vanniweryaneya wuncererya omphenta wahu Muluku. Ninrowa owerya sai opaka eyo? Nihaana wuncererya okhalana “osuwela weekeekhai ni ankhili oomalela”. Okathi nimmusuwela ahu oratteene Yehova, ninnitepa omphenta ni ovaha efaita mikhalelo sawe ni enamuna onipaka awe itthu. Nto eyo enoonikhaliherya opakaka itthu sinimusivela Yehova ni okhootta opaka itthu sinimunanara. Nave ninniimananiha osuwela ele Yehova oniphavela awe nto ninapaka yeeyo.

5-6. Ninrowa wuncererya sai omphenta wahu Yehova? Mutthokiherye.

⁵ Omphenta wahu Yehova onoolipa vanceene vakhala wira nnimwiimananiha omusuwela oratteene Mwanawe. Maana Yesu aahitakiha oratteene mikhalelo sa Tiithi awe. (aHeeb. 1:3) Etthu enrowa onikhaliherya omusuwela oratteene Yesu, ori osoma ivangelyo xexe siri mBiibiliyani. Akhala wira khamunimusoma Biibiliya khula nihiku, munoonela sai opacerya omusoma olelo? Nto okathi munimusoma anyu, mwiimananiheke osuwela oratteene mikhalelo sa Yesu. Atthu khiyoova omwaattamela aahiiso okhala hoothe ni Yesu. Nave anamwane yaanisiveliwa okhala ni Yesu, nto owo aaniwinxaatherya matata. (Mar. 10:13-16) Yesu aari mutthu oophenta ni ooreera murima. Nave awiixutti awe khiyoova omuleela ele yuupuwela aya. (Math. 16:22) Okhala wira Yesu aanimutakiha oratteene Tiithi awe, vannooneya wira Yehova toophenta, ooreera murima ni ookhweya olavulana. Nave hiyo pooti onvekela Yehova nimutthukulelaka murima ahu ni nikupaliki wira khonrowa oniphukela mwaha woomuleela moonelo ahu. Yehova onniniphenta ni onikhapelela.— 1 Ped. 5:7.

⁶ Yesu aaniwoonela othunku atthu. Murummwa Matheyo ohimmye so: “Okathi aawehale awe mittitthi sa atthu, aahoonela othunku, okhala wira saari ntoko ipwittipwitthi soovulalihiwa ni soonyanyaliwa, sihirina makampusi aya”. (Math. 9:36) Nto Yehova onoonela sai? Nwehe ele Yesu aahimmye awe oriki: “Siiso-tho, Tiithi aka ori wiirimu, khoniphavela wira hata mmosa a acikhaani ala, orimeele”. (Math. 18:14) Moolumo ala anninitteeliha murima, maana annooniherya wira Yehova onniniphenta vanceene. Tthiri okathi nimmusuwela ahu oratteene Yesu, omphenta wahu Yehova onnincerereya.

7. Oviriha okathi muri ene ni anna ni arokora arina ompatthani wooloka ni Yehova, onrowa wookhaliheryani sai?

⁷ Etthu ekina enrowa onikhaliherya wuncererya ophenta wahu ni olipiha waamini wahu, ori oviriha okathi niri ene ni anna ni arokora arina ompatthani wooloka ni Yehova. Nweheke moota anna ni arokora awo anihakalala aya. Awo khanithanana mwaha woothanla omurumeela Yehova. Nto mwaavekeleke wira yooleeleni mareeliho aphwanya aya mwaha woomurumeela Yehova. Okathi munipaka anyu yoothanla yuulupale, mwaavekeleke miruku anna ni arokora awo. Tthiri “yattá anvaha miruku sorera, onokhala oreriwa”. — Mir. 11:14.

8. Munrowa opaka exeeni akhala wira moopacerya waanyiherya itthu Biibiliya oniixuttiha awe?

 ⁸ Mmalihe itthu munaanyiherya anyu. Ntoko niwenhe ahu  ettima 2, Satana onniimananiha wira oohiiheni olipiha waamini wanyu. Nto enamuna emosa Satana onipaka awe eyo, ori owiirihani waanyiherya itthu sikina Biibiliya oniixuttiha awe. Mwa ntakiheryo, okathi mukina nyuwo pooti opacerya wuupuwela wira itthu siroothatuwa. Woonasa wene, okathi mwaari anyu mwaana khimwaavaha efaita yoowiixuttiha eyo. Masi vano munnunwe anyu pooti wira munniixuttihiwa oxikola wira itthu siroothatuwa. Nave, itthu maprusoore anyu anihimya aya wira akhaliherye yoowiixuttiha yoowi itthu siroothatuwa, pooti okhala ntoko wira ti seekeekhai ni sooloka. Woonasa wene etthu eniwiiriha maprusoore anyu awo okupali eyo, okhala wira khatonko osoma itthu sinooniherya wira ookhala Mpattuxa. Nto ti vooloka wuupuwela oratteene moolumo ari Miruku 18:17, yaawo anihimya so: “Ompajerya olavula omilattuni onnòniwa okhalana exariya: masi onneemela nwanani awe, khumukhottela”. Ohiya waakuvela okupali itthu muniiwa anyu ni muniixuttihiwa anyu oxikola, mwaavyeke okathi wira musome oratteene ele Biibiliya onihimya awe. Nave mutokoseke oratteene mwaha owo iliivuru sahu sinimutthokiherya Biibiliya. Nave-tho, nvaaneleke ni anna ni arokora yaawo khalai yaakupali wira itthu siroothatuwa. Nyuwo pooti waakoha anna ni arokora awo etthu yaakhalihenrye okupali wira ookhala Mpattuxa onnithokorerya. Tthiri ovaanela iwo onimookhaliheryani okupali wira ookhala Mpattuxa.

9. Yoowiiraneya ya Melissa ewiixuttinheni exeeni?

⁹ Murokora oniihaniwa Melissa, aahitokosa oratteene soopattuxiwa. Itthu aatokonse awe saahimukhaliherya waamini ele Biibiliya oniixuttiha awe. * Owo onihimya so: “Oxikola moota maprusoore anilavula aya sa yoowiixuttiha ya othatuwa, pooti owiirihani wuupuwelaka wira itthu iyo ti seekeekhai. Wanipacerya, kaanoovelela otokosa itthu kanyiherya aka, maana nkaaphavela osuwela waakhuliwa wa makoho aka mwaha woowi koova wira kaamoona wira maprusoore aka yaahikhalana erasau. Nto kaahuupuwela wira Yehova khoniphavela wira nimwaaminiki mwaha woowiiwa paahi nihisuwelaka ele eri yeekeekhai. Nto kaahipacerya otokosa wira kimalihe itthu kaanyiherya aka. Nto nuumala-vo, kaahisoma eliivuru eni: Existe um Criador Que Se Importa com Você? ni ibroxura sini: A Vida — Teve um Criador? ni A Origem da Vida — Cinco Perguntas Que Merecem Resposta. Nto kaahiphwanya etthu kaaphavela aka  okhuma khalai. Mooriipiha murima miyo kaahaana opaka eyo khalai ene”.

10-11. Etthu xeeni enrowa wookhaliheryani okhalana mweettelo wooloka? (1 aTesaloonika 4:3, 4.)

¹⁰ Mukhootteke orupihana woohiloka. Okathi wa omiravo, yoophavela ya orupihana pooti okhala yuulupale. Nto nyuwo pooti okhanyereriwa aka orupihana woohiloka. Eyo ti etthu Satana oniphavela awe wira mpakeke. Etthu xeeni enrowa wookhaliheryani okhootta yooweeha eyo? (Mmusome 1 aTesaloonika 4:3, 4.) Okathi muninvekela anyu Yehova, mmutthukuleleke murima anyu ni mmuleeleke itthu sootheene munuupuwela anyu. Nto okathi owo mmuleeleke ekeekhai ni munvekeleke wira ookhaliheryeni ovilela muxankiho owo. (Math. 6:13) Muhiliyale wira Yehova oniphavela wookhaliheryani, ohiya woophukelani. (Esal. 103:13, 14) Etthu ekina enrowa wookhaliheryani ori omusoma Biibiliya khula nihiku. Melissa nimulavunle ahu, onnihimya etthu yaamukhalihenrye oxintta wuupuwela itthu soohiloka. Owo onihimya so: “Omusoma Biibiliya khula nihiku wookikhaliherya oxintta miyuupuwelo soohiloka. Nave wookikhaliherya wuupuwela wira miyo ka mutthu a Yehova nto kaaphavela wira Yehova iireleke mpantta okumi aka”. — Esal. 119:9.

¹¹ Muheereryeke ophuka mixankiho sanyu mekhinyu paahi. Nto mwaaleeleke anamuyari anyu mixankiho sanyu. Ekeekhai wira khivanikhweya waaleela anamuyari anyu myaha sanyu. Masi, musuweleke wira ti vooloka opaka eyo. Melissa onihimya so: “Kaahinvekela Yehova wira okivahe olipa murima. Nuumala-vo, kaahimuleela paapa aka muxankiho aka. Kaanisuwela wira Yehova aanihakalala vanceene mwaha wa yoothanla aka”.

12. Munrowa opaka sai soothanla sooloka?

¹² Mweetteleke malakiheryo a mBiibiliyani. Okathi muninnuwa anyu, anamuyari anyu animoohiyakani wira mpakeke soothanla sanyu. Masi musuweleke wira sookhala itthu sinceene munireerela anyu wiixutta. Nto etthu xeeni mukhanle anyu oopaka wira muhihonone ompatthani anyu ni Yehova? (Mir. 22:3) Murokora oniitthaniwa Kari, oohimya etthu yaamukhalihenrye opaka soothanla sooloka. Owo aahoona wira mukristau orina waamini woolipa, khonprisari weettihiwaka ni malamulo okathi onipaka awe khula etthu mookumini mwawe. Kari onihimya so: “Kaahoona wira kaahaana osuwela moonelo wa Yehova ohiya ohela mmuru malamulo ni ireekera sinceene”. Nto okathi munimusoma anyu Biibiliya mwiikoheke so: ‘Mpantta ola kinisoma aka, onkiixuttiha exeeni voohimya sa moota Yehova onoonela awe mwaha ola? Mpantta ola kinisoma aka, kiireke aakhala malakiheryo anrowa okikhaliherya opaka soothanla sooloka? Kinrowa ophwanya mureerelo xeeni akhala wira kinimweettela malakiheryo ala?’ (Esal. 19:8; Yes. 48:17, 18) Akhala wira munoomusoma Biibiliya ni wuupuwelela malakiheryo muniphwanya anyu, vanimookhweelaka-ni opaka soothanla sinrowa omusivelaka Yehova. Okathi munrowa anyu olipihaka waamini wanyu, khamunrowa oprisariki okhalana nlamulo aahiiso ereekera ya khula etthu mookumini mwanyu. Maana munoosuwelaka moonelo wa Yehova voohimya sa khula mwaha.

13. Apatthani arina waamini woolipa, anrowa wookhaliheryani sai? (Miruku 13:20)

¹³ Mwaathanleke apatthani animphenta Yehova. Ntoko niwenhe ahu, apatthani anyu pooti wookhaliheryani olipiha waamini wanyu. (Musome Miruku 13:20.) Murokora mmosa oniitthaniwa Sara aahipacerya oriipiwa murima. Sara onihimya so: “Miyo kaahaapaka apatthani ooloka okathi kaaphavela aka aahiiso okathi ole wooreerela. Khula esumana kaanilokiherya erevista Owehaweha ni murokora mmosa a mmulokoni. Nave mpatthani aka mukina aahikikhaliherya opaceriha ovaha ikomentaario mmithukumanoni. Tthiri apatthani aka ooloka yaahikikhaliherya ovaha efaita yinceene yoosoma aka ya Biibiliya ni ovekela. Nto ompatthani aka ni Yehova waanilipa ni kaahitthikela ohakalala vanceene”.

14. Exeeni yaamukhalihenrye Juliano waapaka apatthani ooloka?

 ¹⁴ Munrowa owerya sai waapaka apatthani arina waamini woolipa? Munna onitthaniwa Juliano, onirumeela ntoko mutokweene ohimmye so: “Okathi kaari aka mmiravo, kaaniimananiha waapaka apatthani ooloka anna kaakhumana aka muteko woolaleerya. Apatthani aka ale yaanikhalela nthiti olaleerya, nto eyo yaahikikhaliherya osiveliwa muteko woolaleerya. Nave apatthani aka awo yaahikikhaliherya okhalana yoolukama ya okela muteko wa Muluku wa okathi wootheene. Nave-tho, kaahoona wira kaanipweteiwa waapaka apatthani ooloka, mwaha woowi apatthani aka yaari ale yaarinaka iyaakha simosaru paahi. Nto vano kinirumeela aka oBetheli nno, kinnivikaniha waapaka apatthani ooloka. Ntakiheryo naya nooloka, ninnikikhaliherya opaka soothanla sooloka ntoko matthekulelo ni annikikhaliherya ohihiya olipiha ompatthani aka ni Yehova”.

15. Etthu xeeni Paulo, aamuloponle awe Timootheyo? (2 Timootheyo 2:20-22)

¹⁵ Ankhi akhala wira munoona wira mmulokoni aakhala atthu akina ahikhanle apatthani ooloka? Murummwa Paulo aanisuwela wira makristau makina a okathi awe khiyaarina ompatthani wooloka ni Yehova. Nto ti nthowa naya aamuhimenrye awe Timootheyo wira oheetteke ni atthu awo. (Mmusome 2 Timootheyo 2:20-22.) Ompatthani ahu ni Yehova wookhalana efaita yinceene. Nto nihimweemererye mutthu, aahiiso etthu ehononaka ompatthani ahu ni Yehova. Maana khanreere wiimananiha wira nipake ompatthani owo ni Yehova. — Esal. 26:4.

16. Soolukama xeeni munireerela anyu okhalana?

¹⁶ Mukhalaneke soolukama sooloka. Mukhalaneke soolukama sooloka sinrowa wookhaliheryani olipiha waamini wanyu ni wookhaliheryani okhala mukristau ooloka. (aEef. 3:16) Mwa ntakiheryo, nyuwo pooti okhalana yoolukama ya opaka yoosoma anyu ya omwaneene ni omusoma Biibiliya khula nihiku. (Esal. 1:2, 3) Aahiiso pooti woonaka wira muhaana onvekela Yehova ikwaha sinceene ni opaka mavekelo ooloka. Nave, nyuwo pooti woonaka wira muhaana wiihiiha wira muthanleke matthekulelo ooloka ni orumeela oratteene okathi anyu. (aEef. 5:15, 16) Tthiri Yehova onnihakalala vanceene okathi onoowehaweni mwiimananihaka okela vahoolo.

17. Etthu xeeni munrowa anyu ophwanya okhala wira munimwaakhaliherya atthu akina?

¹⁷ Waakhaliherya atthu akina, onimookhaliheryani  okhala mukristau oolipa. Yesu aahimmye so: “Ovaha onnitepa ohakalaliha ovikana ovahiwa”. (Mit. 20:35) Moohaanyiherya, vanooloka nyuwo orumeela okathi anyu ni ikuru sanyu wira mwaakhaliherye atthu akina. Mwa ntakiheryo, nyuwo pooti oviriha okathi mwaakhaliheryaka anna ni arokora oowuuluvala ni anna aniwereiwa a muloko anyu. Nave, nyuwo pooti waakhaliherya othuma mireerelo saya omerkaatu, aahiiso waakhaliherya osuwela waarumeela apareelyu eletrooniku ntoko telefoni ni akomputatoore. Akhala wira nyuwo mwa mmiravo opatisiwe, pooti okhalana yoolukama ya okhala murumeyi ookhaliherya wira mwaakhaliheryeke anna ni arokora a muloko anyu. (aFil. 2:4) Nave munimooniherya wira munnaaphenta atthu ahikhanle a mmulokoni mwaalaleeryaka ihapari sooreera sa Omwene. (Math. 9:36, 37) Akhala wira makhalelo anyu anniweemereryani, nyuwo pooti okela muteko wa Muluku wa okathi wootheene.

18. Ovara muteko wa Muluku wa okathi wootheene, onrowa wookhaliheryani sai olipiha waamini wanyu?

¹⁸ Okela muteko wa Muluku wa okathi wootheene, onimookhaliheryani vanceene olipiha waataana wanyu ni Yehova. Mwa ntakiheryo, okhala pioneero ookilaatheya onimookhaliheryani orowela Exikola ya Anamalaleerya a Omwene, orumeela oBetheli aahiiso okhaliherya oteka ipa sinirumeeliwa ni mutthenkeso ahu. Mwali mmosa pioneera oniitthaniwa Kaitlyn ohimmye so: “Etthu yaakikhalihenrye olipiha waamini waka nuumala opatisiwa, waari oviriha okathi kilaleeryaka hoothe ni anna ni arokora a mmulokoni. Nto ntakiheryo naya nooloka nookikhaliherya wuncererya omusuwela waka Biibiliya ni olokiherya enamuna aka ya wiixuttiha”.

19. Mareeliho xeeni munrowa anyu ophwanya, akhala wira munoolipiha waamini wanyu?

¹⁹ Okathi munitepa anyu olipiha waataana wanyu ni Yehova, munoophwanya mareeliho manceene. Mwa ntakiheryo, nyuwo khamunrowa oyiihaka okathi anyu mahala ene, moomolaka itthu sihirina efaita. (1 Yoh. 2:17) Nave khamunrowa wiiphwanyiha maxakha mwaha wa opaka soothanla sooloka. Ohiya-vo, nyuwo munoohakalalaka ni munoophwanya itthu muniphavela anyu. (Mir. 16:3) Ntakiheryo nanyu nooloka, nnimwaakhaliherya vanceene anna ni arokora, akhale amiravo aahiiso oowuuluvala. (1 Tim. 4:12) Nave-tho, nyuwo munoohakalalaka ni okhalana murettele mwaha woosuwela wira Yehova mpatthani anyu ni munnimusiveliha vanceene.— Mir. 23:15, 16.