1. Yooweeha xeeni yamphwannye Yosefe? Nave aawenrye sai ovilela?

 YOSEFE, yoowo aari mwaana a Yakobe, aahiviriha muxankiho eeherenrye ororomeleya wawe. Muthiyana mmosa aamwiirenle wira: “Murupé ni miyo”. Muthiyana owo aari mwaarawe Potifari, yoowo aari pwiya awe Yosefe, Masi Yosefe aahikhootta orupa ni muthiyana ole. Olelo-va atthu akina pooti wiikohaka so: ‘Exeeni yaamwiirinhe Yosefe okhootta?’ Potifari khaakhanle vate. Yosefe aari epottha etthoko ele, vakhala wira ammukhootta muthiyana ole owo ammukumiherya mixankiho. Hata vari siiso, Yosefe aahimukhootta muthiyana ole nnaamwi aamuthipelela ikwaha sinceene. Exeeni yaamwiirinhe Yosefe omukhootta muthiyana ole? Owo aakhunle so: “Weso, kiniwerya sai wira etthu yotepexa otakhala, kinvehaka Muluku?” — Maph. 39:7-12.

2. Yosefe aasuwela sai wira oraruwa yaari etampi ohoolo wa Muluku?

² Yosefe aasuwela sai wira oraruwa yaari etthu “yotepexa otakhala” vamaithoni va Muluku? Nlamulo Muluku aavanhe awe aisarayeli, omurumeela aka Moise, naahimya so: “Muhiraruwé”, nlamulo nlo aisarayeli yaavahiwe nuuvira iyaakha 200 nuumala Yosefe okhwa. (Okhum. 20:14) Hata vari siiso, Yosefe aanisuwela moota Yehova oonela awe oraruwa. Mwa ntakiheryo, Yosefe aanisuwela wira Yehova ookumiherya ekasamento wira ekhaleke ya atthu anli paahi: mulopwana ni muthiyana. Mweekeekhai, Yosefe aanisuwela moota Yehova aamukhapelenle awe Sara ikwaha piili, yoowo aari piipi awe, okathi aaphavela awe otupheliwa. Nave-tho, Yehova aahimukhapelela Rebeka, yoowo aari mwaarawe Isakhi. (Maph. 2:24; 12:14-20; 20:2-7; 26:6-11) Uupuwelelaka matakiheryo awo, Yosefe aanisuwela etthu yooloka ni yoohiloka vamaithoni va Yehova. Yosefe aanimphenta vanceene Yehova tivonto aalakenle awe opaka itthu saamusivela Yehova.

3. Exeeni ninrowa ahu othokorerya mwaha ola?

³ Niireke nyuwo munniphenta exariya ntoko Muluku oniphenta awe? Aayo. Masi nihiliyaleke wira naatthu oottheka nto naahikhalane  ephoole, hiyo pooti ohapuxiwa ni moonelo wa atthu a mulaponi. (Yes. 5:20; aRom. 12:2) Mwaha ola, nnoothokorerya ele enitaphulela aya okhala mutthu a xariya ohoolo wa Muluku, ni itthu sooreera ninrowa ahu ophwanya mwaha wookhala atthu a xariya. Nuumala-vo, nnooweha itthu tthaaru nikhanle ahu oopaka sinrowa onikhaliherya wuncererya omphenta wahu Yehova ni malamulo awe.

4. Muupuwelo xeeni anamunceene arina aya sa okhala mutthu a xariya?

⁴ Okathi oniromoliwa awe mutthu a xariya, anamunceene animuupuwela mutthu oowiixinnuuha, onaaphukela atthu akina, aahiiso oniixoona okhala mutthu a xariya waavikana atthu akina. Masi Yehova khonisiveliwa ni atthu siiso. Okathi Yesu aari awe valaponi, aahaapwapwela ahooleli a itiini a okathi awe yaakumiherya malamulo oohixariya. (Mus. 7:16; Luka 16:15) Okhala wene, mutthu a xariya khonixoona okhala oosuwelexa waavikana atthu akina, nave khonikumiherya malamulo awe.

5. Moovarihana ni Biibiliya, exeeni ontaphulela aya okhala mutthu a xariya? Nvahe matakiheryo.

⁵ Exariya mukhalelo wooloka. Okhala mutthu a xariya onitaphulela opaka itthu sinimusivela Yehova Muluku. Moovarihana ni Biibiliya, okhala mutthu a xariya onitaphulela weettela malamulo a Yehova Muluku. Mwa ntakiheryo, Yehova aahaatumererya alipa yaamweetta nakoso wira yaahaana orumeelaka “miphimo . . . sa xariya”. (Otum. 25:15) Nttaava na eHeeberi nuulumo noowi “miphimo . . . sa xariya”, nave pooti otaphulela aka “miphimo soororomeleya”. Moolikanasa mukristau oniphavela okhala a xariya vamaithoni wa Muluku, ohaana okhala oororomeleya okathi onimwiira awe nakoso aahiiso onivara awe miteko sikina. Nave mutthu a xariya onniphenta exariya ni khivammusivela aawehaka atthu akina athokoreriwaka moohixariya. Mutthu a xariya onnivaha efaita moonelo wa Yehova okathi onipaka awe soothanla sawe, wira oweryeke “weetta ntoko simphwanela aya atthu a Yehova”. — aKol. 1:10.

6. Exeeni ennikupaliha wira Yehova paahi torina ehakhi yoothanla etthu yooloka ni yoohiloka? (Yesaya 55:8, 9)

⁶ Biibiliya onnimuhimya Yehova okhala mwaneene exariya. Ti maana aya oniitthaniwa awe okhala mathipelo a xariya. (Yer. 50:7) Yehova topattunxe itthu sootheene nto ookhalana ehakhi yoothanla ele eri yooloka ni yoohiloka. Okhala wira naatthu oottheka, ikwaha sikina pooti onixankiha aka wiiwexexa itthu Yehova onihimya awe wira ti sooloka aahiiso ti soohiloka. Masi etthu enrowa onikhaliherya omuroromela Yehova, osuwela wira owo mutthu oohittheka. Nave itthu sootheene onipaka awe ti sooloka. (Mir. 14:12; mmusome Yesaya 55:8, 9.) Nnaamwi niri ene atthu oottheka, hiyo nipattuxiwe nilikanyihiwaka ni Muluku, nto hiyo nnoowerya okhala moovarihana ni malakiheryo a Muluku. (Maph. 1:27) Ninniimananiha vanceene omusiveliha Yehova okhala wira ninnimphenta. — aEef. 5:1.

7. Xeeni vari aya vooloka otthara malakiheryo a Yehova, voohimya sa ele eri yooloka ni yoohiloka? Nave matakiheryo xeeni anooniherya eyo?

⁷ Otthara malakiheryo a Yehova a ele eri yooloka ni yoohiloka enniniphwanyiha mureerelo. Niireke nyuwo munnisuwela nthowa naya? Nrowe nuupuwelele matakiheryo ala manli: “Nuupuwelele wira khula mutthu onimutumiha nakhuwo okhalana mphimo awe aahiiso khula namateka onirumeela ikaruma soovirikana. Exeeni yaarowa okhumelela? Khiwaarowa okhala wiiwanana. Nave muupuwele wira khula empresa enipaka mirette mwa enamuna enisuwela aya ohiya ettharaka malakiheryo akumiheriwe. Exeeni yaarowa okhumelela? Tthiri yaamookhwa aretta anceene”. Matakiheryo ala annooniherya wira otthara malakiheryo anninikhapelela. Mwa enamuna emosa-ru, otthara malakiheryo a Yehova anoonikhapelela.

8. Mareeliho xeeni anrowa aya waakhela muhoolo ale anipaka itthu sooloka?

 ⁸ Yehova onnileiherya waatthuvela ale aniiwelela malakiheryo awe. Owo onileiherya so: “Anaxariya animwakhela elapo yohiyeriw’aya: anrowa okhalaka-mo mahiku othene”. (Esal. 37:29) Nkahaya muupuwele ohakalala anrowa aya ophwanya ale aneettela malamulo a Yehova, vaavo anrowa aya okhala oowiiraana ni a murettele. Yehova oniphavela wira mukhalane oohakalala iwo. Tthiri nookhalana mathowa manceene anniiriha otthara malakiheryo a xariya. Ninrowa wuncererya sai ophenta wahu sooruma sa Yehova? Vano nrowe nithokorerye itthu tthaaru sikhanle oonikhaliherya opaka eyo.

9. Exeeni enrowa onikhaliherya ophenta sooruma sa Yehova?

⁹ Yoopacerya: Mumphenteke ole okumihenrye sooruma iyo. Wira niwerye wuncererya ophenta wahu sooruma sawe, nihaana toko wuncererya omphenta wahu Yehova. Vakhala wira nnimuncererya omphenta wahu Yehova, nnimoonaka okhweya weettela sooruma sawe sa xariya. Mwa ntakiheryo, vakhanle wira Adamu ni Eva yaanimphenta Yehova, yanwerya wiiwelela malamulo awe. — Maph. 3:1-6, 16-19.

10. Exeeni yaamukhalihenrye Abrahamu osuwela saana muupuwelo wa Yehova?

¹⁰ Nto hiyo khanimphavela omutthekela Yehova ntoko Adamu ni Eva. Wira eyo ehiiraneye nihaana wiixutta voohimya sa Yehova, osuwela mikhalelo sawe, ni wiimananiha osuwela saana muupuwelo awe. Opaka itthu iyo, sinoonikhaliherya wuncererya omphenta wahu Yehova. Nrowe nuupuwelele ntakiheryo na Abrahamu, owo aanimphenta Yehova ni murima awe wootheene. Hata okathi yoole ahiiwexexa awe saana soothanla sa Yehova, owo khaatonko ohiya omwiiwelela Yehova. Ohiya-vo, owo aaniimananiha wira omusuwele Yehova. Ninnisuwela eyo okathi Yehova aalakenle awe opwetexa epooma ya oSodoma ni oGomora. Okathi Abrahamu aasuwenle awe eyo, wanipacerya owo uupuwela wira “mulamuli a elapo yothene” amwaapwetexa atthu ooreera murima vamosa ni atthu ootakhala murima. Nto moowiiyeviha Abrahamu aahimukoha Yehova itthu sinceene. Moopixa murima Yehova aahaakhula khula etthu Abrahamu aakoha awe. Nuumala-vo owo aahisuwela wira Yehova onnisuwela khula murima wa mutthu, ni khonikhala-khala aapwetexaka atthu oreera murima vamosa ni ootakhala. — Maph. 18:20-32.

11. Abrahamu oonihenrye sai wira aanimphenta Yehova ni omuroromela?

¹¹ Mwaha woowiiyeviha, Abrahamu aahiixutta etthu yuulupale ni Yehova, okathi aavaanela awe voohimya sa mittetthe sa oSodoma ni oGomora. Mwaha waivaavo, Abrahamu aahincererya omuttittimiha wawe ni omphenta wawe Yehova. Nuuvira iyaakha sinceene, omuttittimiha wawe Yehova waaheehereriwa. Yehova aahinvekela Abrahamu wira onvahe mwanawe mmoseene Isakhi ntoko mukuttho. Okhala wira Abrahamu aanimusuwela saana Muluku awe, nto owo khaatthikenle-tho omukoha itthu sinceene. Etthu aapanke awe Abrahamu waari omwiiwelela Yehova paahi. Hata vari siiso, ninniwerya woona wira Abrahamu aahiriipiwa murima. Hata aariipiwe murima, owo aanuupuwela itthu iixuntte awe ni Yehova. Nave aanisuwela wira Yehova khaarowa opaka etthu yoohixariya nnakhala yootakhala. Biibiliya onihimya wira Abrahamu aanikupali wira Yehova anwerya omuhihimuxa mwanawe Isakhi mookhwaani, vaakhanle wira aamuvanha ntoko mukuttho. (aHeeb. 11:17-19) Abrahamu aanuupuwela siiso okhala wira Yehova aahimuleiherya wira orweela wa Isakhi naamukhumelela nloko nuulupale. Masi okathi ole Isakhi khaarina mwaana. Hata vari siiso, Abrahamu aanimphenta Yehova ni aanikupali wira khula okathi Yehova onnipaka  itthu sooloka. Hata waamuxankinhe opaka eyo Abrahamu aahiiwelela. — Maph. 22:1-12.

12. Ninrowa omutakiha sai Abrahamu? (Esalimo 73:28)

¹² Ninrowa omutakiha sai Abrahamu? Sintoko Abrahamu nihaana ohihiya wiixutta sa Yehova. Nave khula okathi ninrowa ahu opakaka eyo, nnoomwaattamelaka yena ni otepaka omphenta. (Musome Esalimo 73:28.) Niira siiso, murima ahu onoowerya osuwela moota Yehova onuupuwela awe. (aHeeb. 5:14) Napaka eyo okathi ninrowa ahu weehereriwa aka opaka itthu soohiloka, nnoowerya oxintta. Ohiya-vo, nnoowerya osyaka khula muupuwelo waarowa oniirihaka opaka etthu yaarowa omuriipiha murima Yehova, ni ohonona waataana wahu ni yena. Masi etthu xeeni-tho nikhanle ahu oopaka wira nooniherye ophenta wahu exariya ya Yehova?

13. Moota xeeni nikhanle ahu oowiimananiha weettela exariya? (Miruku 15:9)

¹³ Ya nenli: Niimananiheke ophenta miteko sa xariya. Naaphavela aka wira mitika sahu sikhaleke soolipa hiyo nihaana opaka exersisio khula nihiku. Mwa enamuna emosa-ru, naaphavelaka wuncererya ophenta wahu malamulo a xariya a Yehova, nihaana wiimananiha vanceene. Nto nihaana opakaka eyo khula nihiku. Ekeekhai wira Yehova, Muluku ooreera murima ni khokhanle ooniruma opaka itthu nihinwerya ahu. (Esal. 103:14) Yehova onnileiherya wira onnaaphenta “ale anihawela exariya”. (Musome Miruku 15:9.) Okathi ninkhalana ahu yoolukama mmutthenkesoni mwa Yehova, ninnipaka sootheene ninwerya ahu wira niphwanye yoolukama eyo. Nave nihaana opaka etthu emosaru okathi nniimananiha ahu ovara miteko sa xariya. Yehova moopixa murima onoonikhaliherya ophwanya itthu nimphavela ahu. — Esal. 84:6, 8.

14. Anitaphulela-ni moolumo oowi: “yoowara ya eyuuma”? Ni xeeni ninreerela ahu owaraka?

¹⁴ Mooreera murima, Yehova onninuupuxerya wira opaka yootthuna awe khahiyo etthu yoovila. (1 Yoh. 5:3) Ohiya-vo, sooruma sawe sinninikhapelela. Nave ninnisuwela wira nihaana wiikhapelela khula nihiku. Nto muhiliyale owara ikaruma sootheene sa ekhotto sinikhuma wa Muluku, murummwa Paulo oromonle awe. (aEef. 6:14-18) Ekaruma xeeni yaakhapelela  murima wa nakhotto? Yaari “yoowara ya eyuuma enikhapelela epeeto” yeeyo enithoonyerya sooruma sa xariya sa Yehova. Sintoko siisaale yoowara ya eyuuma yaakhapelela aya epeeto ya nakhotto, sooruma sa Yehova sa xariya sinnikhapelela murima ahu wa nthoonyeryo, niire-so, omutthu ahu wa muhina. Tivo, mwiimananiheke wira yoowara anyu ya eyuuma ekhanle exariya, yiireleke mpantta ikaruma sanyu sa ekhotto sinikhuma wa Muluku! — Mir. 4:23.

15. Ninrowa orumeela sai yoowara ya eyuuma?

¹⁵ Munrowa owerya sai orumeela yoowara ya eyuuma? Nnoowerya orumeela yoowara ya eyuuma okathi nimpaka ahu soothanla sahu khula nihiku. Nihinatthi othanla etthu ninrowa ahu olavula, muusika ninrowa ahu owiriyana, eprograma ninrowa ahu wasistiri aahiiso iliivuru ninrowa ahu osoma, vaamureerela wiikoha so: ‘Kiireke kinnikhapelela murima aka? Yehova onoonela sai itthu iyo? Kiireke sintumererya itthu Yehova oninyokha awe, ntoko orupihana woohiloka, owali, ohiphiyeriwa ni wiixinnuuha?’ (aFil. 4:8) Vakhala wira munoopaka soothanla sinivarihana ni itthu sinimusivela Yehova, moohaanyiherya munoowerya osyaka opaka itthu saarowa ohapuxa murima anyu.

16-17. Yesaya 48:18, onnikhaliherya sai woona wira vanniweryaneya wiiwelela sooruma sa Yehova okathi wootheene?

¹⁶ Niireke nyuwo ikwaha sikina munnixanka muupuwelaka wira khamunrowa owerya weettela sooruma sa Yehova khula nihiku? Nrowe niwehe etthu Yehova onlikanyiha awe eri Yesaya 48:18. (Mmusome.) Yehova onnileiherya wira exariya ahu enrowa olikanaka ni “mawimpi a mphareya”. Moota xeeni? Muupuwele wira muri ophareya munaweha maasi manceene a mphareya, aahiiso munaweha mawimpi a mphareya arwaaka ni atthikaka mooheemela. Niireke mwaamuupuwela wira nihiku nlo mawimpi awo yaamukhala-khala amalaka? Nnaari. Mwaha wa xeeni? Mwaha woowi nyuwo munnisuwela wira mphareya khanimala mawimpi ni khula okathi anookhumelelaka mawimpi.

¹⁷ Moolikanasa, miteko sanyu sa xariya pooti olikanaka ni mawimpi a mphareya! Mwa enamuna xeeni? Okathi munuupuwela anyu opaka yoothanla muhaana osuwela wanipacerya ele Yehova onoovekelaweni wira mpake. Nuumala-vo, mmananiheke opaka itthu moovarihana ni yoothanla anyu. Hata yoothanla eyo ekhalaka yoovila, mukupaliki wira Tiithi anyu oophenta a wiirimu, oonimookhaliheryani okhala oolipa oovahakani ikuru ni wookhaliheryani wira mpake itthu sooloka khula nihiku. — Yes. 40:29-31.

18. Xeeni nihinreerela ahu waaphukela atthu akina nittharaka moonelo ahu?

¹⁸ Ya neeraru: Muhaaphukeleke atthu akina. Ninniimananiha vanceene okhala moovarihana ni malamulo a xariya a Yehova. Masi nihaana okhalana ephoole wira nihipacerye wiilikanyiha ni atthu akina, nuupuwelaka wira ninnivara itthu soolokexa waavikana atthu akina. Niheemererye wira miyoonelo sahu siniiriheke waaphukela atthu akina. Nave nihiliyale wira Yehova tori: ‘Namalamulela a elapo yootheene’. (Maph. 18:25) Yehova khoonemerenrye wira naaphukeleke atthu akina. Ti nthowa naya Yesu aahimmye awe so: “Muhiye waaphukela akina, wira Muluku ohoophukeleni”. — Math. 7:1. *

19. Moota xeeni Yosefe oonihenrye awe wira aaniroromela enamuna yoophuka ya Yehova?

¹⁹ Nrowe-tho nithokorerye ntakiheryo na Yosefe. Owo khaaphukenle axuulupale awe mwaha wa itthu soohiloka saamwiirenle aya. Mwa ntakiheryo, axuulupale awe yaahimuhasula Yosefe ni yaahimutumiha ntoko epottha. Nuumala-vo, yaahaleela apapaya wira Yosefe aahikhwa.  Masi nuuvira iyaakha sinceene, Yosefe aahitthikela waaweha amusi awe. Okathi owo Yosefe aari mukhulupale muulupale a wExiitu nave anwerya waahasula axuulupale awe. Mwaha wookhala mukhulupale a wExiitu, Yosefe aahikhalana eparakha yoowunlela ikuhu axuulupale awe. Nnaamwi axuulupale awe Yosefe yaattharunwe ni murima aya wootheene mwaha wa etthu yoohiloka yaapanke aya, awo yaanoova yuupuwelaka wira yena aamwaahukhumu vanceene. Masi Yosefe aahamaaliha axuulupale awe ohimyaka so: “Muhòve! Miyo nkihiyó Muluku”. (Maph. 37:18-20, 27, 28, 31-35; 50:15-21) Yosefe aanisuwela wira Yehova paahi taarina ediretu yoowaaphukela atthu akina.

20-21. Etthu xeeni nihikhanle ahu oopaka? Ni nthowa xeeni?

²⁰ Sintoko Yosefe, nimphavela omuhiya Yehova wira ophuke myaha sahu sootheene. Hiyo khaninwerya osuwela eri vamurimani wa mutthu. Ti nthowa naya nihinwerya ahu osuwela etthu emwiirinhe munna owo aahiiso murokora owo opaka etthu mwa enamuna eyo. Yehova paahi toniwerya ‘otokosa murima’ ahu. (Mir. 16:2) Yehova onnaaphenta atthu ootheene, nave onnintumererya wira naatthukuleleke ‘mirima sahu’ atthu akina. (2 aKor. 6:13) Nto nihaana waaphenta vanceene axinnihu ohiya waaphukela.

²¹ Nave nihaana osyaka waaphukela ale ahikhanle axinnihu. (1 Tim. 2:3, 4) Niireke naamumphukela mmusi ahu nihimyaka so: “Ola khonirowa weemererya ekeekhai?” Nnaari, maana opaka eyo naamooniherya wira naatthu oowiixinnuuha. Yehova onnaavaha okathi “atthu anikhala mapuro ootheene” wira arukunuxe mirima saya. (Mit. 17:30) Muhiliyale wira: atthu yaale aniixoona okhala a xariya waavikana atthu akina toohixariya vamaithoni va Yehova.

22. Exeeni ewiirinheni ophenta exariya?

²² Ophenta wahu malamulo a xariya a Yehova, anniniphwanyiha ohakalala hiyo ni atthu akina, okhala wira ninnilipiha ompatthani ahu ni Yehova ni waakhaliherya atthu akina opaka etthu emosaru. Nto hiyo noolakela ohihiya ‘ophavela vanceene exariya’. (Math. 5:6) Mukupaliki wira Yehova khonliyala wiimananiha wanyu wootheene wira mmusivelihe ni opaka itthu sooloka. Olumwenku wootheene anamunceene annitepa otakhala ni ohiiwelela malamulo a xariya a Yehova. Masi muhikhala-khale muliyalaka etthu ela: Yehova ‘onnaaphenta atthu àxariya’. — Esal. 146:8.