1. Xeeni vari aya vooloka waakoha anna ni arokora moota yiixuntte aya “ekeekhai”?

 “MWIIXUNTTE sai ekeekhai?” Moohaanyiherya nyuwo muhaakhula ikwaha sinceene nikoho nla. Nla nikoho noopacerya nimpaka ahu okathi nimmusuwela ahu munna aahiiso murokora. Tthiri ninnihakalala osuwela moota anna awo ni arokora apacenrye aya omusuwela Yehova ni omphenta. Nave hiyo ninnihakalala waasuweliha anna awo etthu eniirinhe opacerya omphenta Yehova. (aRom. 1:11) Ovaanela siisa onninikhaliherya wuncererya ophenta wahu ekeekhai. Nave eyo enoonikhaliherya ohihiya ‘weettela ekeekhai’ eyo piiyo, ohihiya okhalana mweettelo onimusivela Yehova. — 3 Yoh. 4.

2. Mwaha ola ninrowa othokorerya exeeni?

² Mwaha ola ninrowa oweha mathowa makina anniiriha ophenta ekeekhai. Nuumala-vo, nnoothokorerya moota nikhanle ahu owooniherya wira ninniphenta ekeekhai. Nave mwaha ola onoonikhaliherya omuxukhurela Yehova mwaha woowiixutta ekeekhai. (Yoh. 6:44) Nave-tho enimuncererya osiveliwa wahu owiixuttiha akina ekeekhai.

3. Nthowa xeeni noopacerya ninniiriha ophenta ekeekhai?

³ Aakhala mathowa manceene anniiriha ophenta ekeekhai. Nthowa noopacerya, okhala wira ninnimphenta Yehova yoowo ori mwaneene ekeekhai. Biibiliya oonikhaliherya osuwela wira Yehova, Muluku oowerya sootheene opattunxe erimu ni elapo. Masi-tho onniniixuttiha wira yena, Tiithi onnikhapelela. (1 Ped. 5:7) Nave ninnisuwela wira Muluku ‘tòmoriwa ikharari ni òvilela, òpisa onanariwa, òrera murima ni òroromeleya’. (Okhum. 34:6) Ohiya-vo, Yehova onniphenta  exariya. (Yes. 61:8) Yehova khommusivela aaniweha aka nihaawaka, ti nthowa naya onileiherya awe wira onoomaliha mixankiho sahu moohipisa. (Yer. 29:11) Hiyo ninnilipelela ophiya okathi owo! Eyo ti etthu enniiriha omphenta aka vanceene Yehova.

4-5. Exeeni yaamwiirinhe murummwa Paulo olikanyiha nlipelelo nahu ni nankura?

⁴ Mathowa xeeni makina anniiriha ophenta ekeekhai? Mwaha woowi ekeekhai enninivaha nlipelelo. Nrowe nithokorerye ntakiheryo nimosa. Ekeekhai ya mBiibiliyani enihela muhina nlipelelo nahu na muhoolo. Otthokiherya aka efaita erina aya okhalana nlipelelo, murummwa Paulo aahimmye so: “Nookhalana nlipelelo nla, nenno nri ntoko nankura a okumi ahu”. (aHeeb. 6:19) Ntoko siisaale nankura onimukhaliherya awe parku wira ohipittuwe okathi wa munamukhaya, nlipelelo nahu na mBiibiliyani ninninikhaliherya ovilela okathi sinnikhumelela aya mixankiho.

⁵ Ekeekhai wira murummwa Paulo aahimya nlipelelo nenlo makristau oothanliwa arina aya, noorowa okhalaka wiirimu. Hata vari siiso, nlipelelo nlo ninnaahimya makristau anrowa okhalaka valaponi. (Yoh. 3:16) Ninnihakalala osuwela wira ootheene ahu nookhalana nlipelelo noophwanya okumi woohimala.

6-7. Wiixutta ekeekhai voohimya sa muhoolo omukhalihenrye sai Yvonne?

⁶ Nithokorerye yoowiiraneya emosa ya murokora Yvonne. Owo iixuntte ekeekhai wunnunwe ene nto okathi aari awe mwaana aanoova okhwa. Yvonne onnuupuwela moolumo aatonko awe osoma yaawo yaamwiiriha woova okhwa, yaahimya so: “Nihiku nlo nnoorupa nihivenye-tho”. Nave owo onnincererya ohimyaka so: “Moolumo awo yaanikiriipiha murima vanceene mpakha kihinawerya ophwanya ikhove, nto miyo kaanuupuwela so: ‘Kiireke okumi okhanle ti yoola?, Xeeni kiri aka mulaponi?’ Miyo nkaaphavela okhwa!”

⁷ Muhoolo mwaya, nuumala Yvonne wunnuwa aahaasuwela Anamoona a Yehova. Vano owo onihimya so: “Kookhalana nlipelelo nookhala mahiku ootheene mParayiisu valaponi”. Wiixutta ekeekhai omukhalihenrye sai murokora ole? Owo onnincererya oriki: “Vano kinnirupa, maana nkinoova-tho okhwa”. Tthiri vannooneya wira Yvonne onniphenta ekeekhai. Nave Yvonne onnimusivela vanceene olaleerya ni waaleela atthu akina ihapari sooreera sa muhoolo. — 1 Tim. 4:16.

8-9. (a) Nlikanyiho Yesu aahimmye awe, etthu xeeni mulopwana ole aapanke awe nuumala ophwanya muhakhu waavithiwe? (b) Nto nyuwo munoonela sai ekeekhai?

⁸ Ihapari sooreera sa Omwene wa Muluku, sinihela muhina ikeekhai sa mBiibiliyani. Yesu aahilikanyiha Omwene wa Muluku ni muhakhu ovithiwe. Matheyo 13:44, Yesu aahimmye so: “Omwene wa wiirimu onlikana ni muhakhu ovithiwe mmatta, yoowo mulopwana mmosa ophwannye awe, ovitha. Vano, otteeliwe ene murima, onnirowa otumiha itthu sotheene sirina awe, onathuma ematta eyo”. Nwehe wira mulopwana ole khahiyo aaphavelasa muhakhu. Hata vari siiso, nuumala ophwanya owo aahipaka itthu sikina, okhala wira aahitumiha itthu sootheene aarina awe. Mwaha wa xeeni? Mwaha woowi, mulopwana ole aanisuwela wira muhakhu ole waahikhalana efaita yinceene ovikana itthu sootheene aalenve awe.

⁹ Moolikanasa ni mulopwana ole, nyuwo munnivaha efaita vanceene ekeekhai. Ninnisuwela wira olumwenku ola khiivo etthu  ekhanle aya oonivaha, enlikana ni ohakalala orina ahu mwaha woomurumeela Yehova, ni nlipelelo na okumi woohimala momweneni mwa Muluku. Eparakha yuulupale okhalana ompatthani ni Yehova ovikana itthu nilenve ahu. Nave eparakha yuulupale omusiveliha Yehova “mwa itthu sotheene”. — aKol. 1:10.

10-11. Exeeni yaamwiirinhe Michael opaka marukunuxo maalupale mookumini mwawe?

¹⁰ Anna ni arokora akina, aaleva itthu sinceene wira amusivelihe Yehova. Anna akina aahiya miteko soovuwa sa mulaponi ni aahiya ophavelasa mihakhu. Nave akina aapaka marukunuxo maalupale okathi yaasomihiwa aya Biibiliya. Nrowe niwehe ntakiheryo na munna Michael, yoowo iixuntte ekeekhai wunnunwe ene. Okathi aari awe mmiravo owo aamwiixutta karaati. Owo ohimmye so: “Kaanimwiixutta karaati wira kikhalane okumi wooloka. Ikwaha sikina kaanoona wira kaari mutthu ootupexa waavikana atthu akina”. Nuumala Michael wiixuttihiwa Biibiliya owo aahiixutta moota Yehova oonela awe otakhala. (Esal. 11:5) Michael, ohimmye so: “Anna yaakisomiha Biibiliya khiyaatonko okiirela wira kaahaana omuhiya omwiixutta karaati, masi khiyaahiyale okisomiha Biibiliya”.

¹¹ Okathi Michael, aixuntte awe voohimya sa Yehova, omphenta wawe waanitepa wunnuwa. Etthu yahaareere omusivela vanceene, waari osuwela wira Yehova onniwoonela othunku arumeyi awe. Muhoolo mwaya, owo aahoona wira aahaana opaka marukunuxo maalupale mookumini mwawe. Owo ohimmye so: “Omuhiya karaati yaari etthu yoovilexa kaahiyale aka mookumini mwaka”. Nave owo onnincererya ohimyaka so: “Kaanisuwela wira omuhiya karaati etthu yaarowa omusiveliha Yehova, nave kaanikupali wira omurumeela yena yaari etthu yoolokexa ovikana itthu sikina kaalenve aka”. Michael aahoona wira ekeekhai aixuntte awe yaari ya efaita yinceene, nto eyo yaahimwiiriha opaka marukunuxo maalupale mookumini mwawe. — Yak. 1:25.

12-13. Wiixutta ekeekhai ya mBiibiliyani emukhalihenrye sai Mayli?

¹² Ooniheryaka efaita erina aya ekeekhai, Biibiliya onnilikanyiha ekeekhai ni muthuko onaarya weepiphini. (Esal. 119:105; aEef. 5:8) Mayli yoowo onikhala elapo ya wAzerbaijão, onnixukhurela vanceene mwaha woowiixutta ekeekhai ya mBiibiliyani. Mayli ohuuwale etthoko anamuyari awe yaarina aya itiini soovirikana. Paapa awe eettela etiini ya emaka nave maama awe eettela etiini ya eyuda. Owo ohimmye so: “Nnaamwi kaakupali wira Muluku ookhala, saahikhala myaha saakixankiha. Mwa ntakiheryo, kaaniikoha so: ‘Xeeni ninhaawa ahu nuumala-vo nnarowa opahiwa omooroni?’ Anamunceene yaahimya wira Muluku tonikumiherya itthu sootheene valaponi. Nto miyo kaaniikoha so: ‘Kiireke Muluku tonikumiherya ohaawa wootheene wa valaponi? Ni kiireke Muluku onnimusivela aawehaka apinaatamu ahaawaka?’”

¹³ Mayli khaahiyale ophavelasa waakhuliwa wa makoho awe. Muhoolo mwaya aahisomihiwa Biibiliya nave aahikhala Namoona a Yehova. Owo ohimmye so: “Omusoma Biibiliya, wookikhaliherya okhalana moonelo wooloka ni okhala mutthu oomaaleleya”. Sintoko Mayli, ninnimuxukhurela Yehova mwaha wooniihana ‘mweepiphini mwaari ahu, wira nikele moowaaryani mwawe mooreerexa’. — 1 Ped. 2:9.

14. Ninrowa olipiha sai ophenta wahu ekeekhai? (Nwehe ekaaxa eni: “ Matakiheryo Makina.”)

¹⁴ Ala matakiheryo vakhaani paahi anooniherya efaita erina aya ekeekhai ya  mBiibiliyani. Moohaanyiherya, nyuwo munnuupuwela matakiheryo makina. Hiyo pooti otokosa mathowa makina anniiriha ophenta ekeekhai okathi wa yoosoma ahu. Vaavo nintepa ahu ophenta ekeekhai nnimooniherya aka ni miteko sahu.

15. Ninrowa wooniherya sai wira ninniphenta ekeekhai?

¹⁵ Ninnooniherya wira ninniphenta ekeekhai, vaavo nimmusoma ahu Biibiliya khula nihiku ni iliivuru sinimutthokiherya Biibiliya. Hata nipacenrye ene khalai omurumeela Yehova, nihihiye omusoma Biibiliya ni iliivuru sikina sinimutthokiherya Biibiliya. Erevista yoopacerya ya A Sentinela, yeeyo yaakumiheriwe Julho a 1879, yaahilikanyiha ekeekhai ni ifilori siri vamiiwani. Wira mutthu ophwanye ifilori iyo, ohaana ovaha ephoole orowa aka opuro siri aya ifilori iyo. Nuumala ophwanya efilori emosa onniphavelasa ifilori sikina. Maana onnisuwela wira opaka eyo, enoomukhaliherya ophwanya ifilori sikina. Moolikanasa, nihaana ohihiya ophavelasa ikeekhai sikina. Wira niwerye opaka eyo, nihaana okhalana nthiti ophavelasa ikeekhai  iyo. Nto opaka eyo, vanipirisari wiimananiha vanceene okhala wira opaka eyo khivanikhweya. Nto wiimananiha iwo onoonikhaliherya vanceene.

16. Enamuna xeeni yoomusoma Biibiliya munirumeela anyu? (Miruku 2:4-6)

¹⁶ Anamunceene khonaasivela osoma. Hata vari siiso, Yehova onnintumererya “ophavelasa miruku” wira niwerye wiiwexexa ekeekhai. (Musome Miruku 2:4-6.) Okathi nniimananiha ahu opaka eyo, ninniphwanya mireerelo. Munna mmosa oniitthaniwa Corey onihimya wira okathi onimusoma awe Biibiliya, onnitokosa khula eveersiikulu onisoma awe. Owo onitthokiherya so: “Kinnisoma inoota sootheene, kinnitokosa kirumeelaka ireferensia cruzada, nuumala-vo kinnitokosa-tho. Orumeela enamuna eyo ennikikhaliherya vanceene!” Hata nirumeelaka enamuna ela aahiiso ekina, nnimooniherya wira ninnivaha efaita ekeekhai vakhala wira nnimwiivaha okathi ni wiimananiha wira nimusome Biibiliya. — Esal. 1:1-3.

17. Onitaphulela exeeni weettela ekeekhai? (Yakobo 1:25)

¹⁷ Wuncererya ekeekhai niixuntte ahu khivanikhweya. Nave nihaana weettela ekeekhai niire-so, ovarihela muteko itthu nniixutta ahu mookumini mwahu. Napaka eyo nnookhalana ohakalala weekeekhai. (Mmusome Yakobo 1:25.) Ninrowa osuwela sai vakhala wira ninneettela ekeekhai? Ntoko munna mmosa ohimmye awe, nihaana wiivarerya oratteene wira nisuwele mapuro ninkhumela ahu saana, ni mapuro ninreerela ahu olokiherya. Murummwa Paulo ohimmye so: “Hata nironwe ene vahoolo, nitepeke weetta ephiro emosa-ru”. — aFil. 3:16.

18. Xeeni nihinreerela ahu ‘ohihiya weettela ekeekhai’?

¹⁸ Tthiri ninniphwanya mireerelo sinceene vaavo nihinhiya ahu weettela “ekeekhai!” Nave ohiya paahi oniphwanyiha mureerelo, ninnimuhakalaliha Yehova vamosa ni anna. (Mir. 27:11; 3 Yoh. 4) Moohaanyiherya nookhalana mathowa manceene anniiriha ophenta ekeekhai ni weettela ekeekhai.