MWAHA ONITHOKORERIWA 33
Yehova Onnaakhapelela Arumeyi Awe
“Apwiya [Yehova] t’anasuka ale aniwova”. — ESAL. 33:18.
NSIPO 4 Yehova “ti Makampusi Aka”
ELE NINROWA AHU WIIXUTTA *
1. Xeeni Yesu anvekenle awe Yehova wira aakhapeleleke awiixutti awe?
OHIYU aarowa awe wiiviwa, Yesu aahinvekela Tiithi awe etthu ya efaita yinceene. Yesu aahinvekela Yehova wira aakhapeleleke awiixutti awe. (Yoh. 17:15, 20) Ekeekhai wira okathi wootheene Yehova onnaakhapelela arumeyi awe. Hata vari siiso, Yesu aanisuwela wira arumeyi awe yaamulupatthiwaka vanceene ni Satana. Nave Yesu aanisuwela wira awiixutti awe yaahaana okhaliheriwa ni Yehova, wira awerye oxintta mixankiho sinikumiheriwa ni Satana.
2. Moovarihana ni Esalimo 33:18-20, xeeni vahinreerela aya woova mixankiho?
2 Olelo-va, olumwenku ola onilamuleliwa ni Satana, onnaakumiherya mixankiho sinceene makristau a ekeekhai. Okathi mukina hiyo ninnikumana mixankiho sinnikhulumula ni sineehererya omuroromela wahu Yehova. Masi ntoko ninrowa ahu oweha mwaha ola khivanreerela woova. Yehova onninikhapelela ni owo onnisuwela mixankiho nrina ahu ni okathi wootheene onniphavela onikhaliherya. Nrowe niwehe matakiheryo manli a mBiibiliyani anooniherya wira “Apwiya [Yehova] t’anasuka ale aniwova”. — Musome Esalimo 33:18-20.
YEHOVA ONNINIKHALIHERYA OKATHI NNOONA AHU WIRA NIRI MEKHIHU
3. Okathi xeeni nikhanle ahu oowiixoona wira nri mekhihu?
3 Ekeekhai wira nniirela mpantta emusi ya Yehova. Masi okathi mukina hiyo pooti wuupuwelaka wira niri mekhihu. Mwa ntakiheryo, amiravo pooti wuupuwelaka wira ari mekhaya okathi anaatthokiherya aya anaxikola akhwaaya sookupali saya aahiiso anithaamela aya muloko mukina. Atthu akina anniriipiwa murima ni okhulumuwa nto pooti wuupuwelaka wira aniwanana mekhaya mixankiho iyo. Awo pooti ohiphavela waaleela atthu akina, yuupuwelaka wira atthu awo, khanrowa wiiwexexa muxankiho aya. Nave okathi mukina hiyo pooti wuupuwelaka wira khuuvo mutthu onnikhapelela. Nto okathi nnoona ahu wira niri mekhihu, moohicikha etthu enniiriha okhalana moonelo owo, hiyo pooti wuupuwelaka wira noonyanyaliwa ni pooti oxanka. Yehova khoniphavela wira nuupuweleke siiso. Exeeni ennikupaliha eyo?
4. Etthu xeeni yaamwiiriha profeta Eliya ohimya wira: “Miyo kihanle mekhaka”?
4 Nwehe yoowiiraneya ya Eliya yoowo aari murumeyi oororomeleya a Yehova. Yezabeli aaphavela omwiiva Eliya, nto owo aahitthyawa mahiku 40 wira oopole okumi awe. (1 Mam. 19:1-9) Okathi Eliya iipinthe awe munikhukuni, aahimuleela Yehova wira: “Miyo kihanle mekhaka”. (1 Mam. 19:10) Masi yaahikhala maprofeta makina maana Obadiya aahaattukuttherya maprofeta 100 wira ahiiviwe ni Yezabeli. (1 Mam. 18:7, 13) Nto etthu xeeni yaamwiiriha Eliya wuupuwelaka wira aari mekhawe? Woonasa wene owo uupuwela wira maprofeta ale Obadiya aavinthe awe, yaahiiviwa. Nave pooti wira aanuupuwela wira aari mekhawe mwaha woowi atthu akina khiyaamukhalihenrye omukokhorela Yehova nuumala owo wooniherya wira Yehova paahi tori Muluku a ekeekhai omwaako Karmelo. Nave-tho, woonasa wene Eliya uupuwela wira khuuvo mutthu aasuwela muxankiho aarina awe ni khuuvo mutthu aamuthokorerya. Moovirikana ni apinaatamu, Yehova aahisuwela etthu yaamwiiriha Eliya wuupuwela wira aari mekhawe ni aanisuwela moota woomukhaliherya.
Wuupuwela moota Yehova aamukhapelenle awe Eliya, onnikhaliherya sai okathi nnuupuwela ahu wira nri mekhihu? (Nwehe ittima 5-6)
5. Yehova aamukhalihenrye sai Eliya woona wira khaakhanle mekhawe?
5 Yehova aahipaka itthu sinceene wira omukhaliherye Eliya. Yehova aahimutumererya Eliya ni aahimuhiya ohimya moonelo awe. Ikwaha piili Yehova aahimukoha Eliya oriki: “Eliya nyu, munìra-ni vo?” (1 Mam. 19:9, 13) Yehova aahinwiriyana oratteene Eliya ikwaha iye piili aamutthukulenle awe murima awe. Nto Yehova aahimwaakhula Eliya omooniheryaka wira okathi wootheene ari ni yena ni omooniheryaka wira ookhalana owerya wuulupale. Nave, Yehova aahimulipiha Eliya omuleelaka wira yaahikhala aisarayeli anceene oororomeleya. (1 Mam. 19:11, 12, 18) Moohaanyiherya, Eliya aahilipa vanceene okathi aamutthukulenle awe murima awe ni amwiiwa awe Yehova aakhulaka itthu sootheene aahimya awe. Nuumala-vo, Yehova aahinvaha miteko sinceene Eliya wira ovareke. Yehova ahinvekela Eliya wira amuthanle Hazayeli wira okhale mwene a oSiria ni Yehu okhale mwene a wIsarayeli ni omuthanla Eliseyo wira okhale profeta. (1 Mam. 19:15, 16) Mwaha wa onvaha miteko iye, Yehova aahimukhaliherya Eliya owehexexa itthu sooloka. Yehova aahinvaha Eliya, mpatthani a ekeekhai, profeta Eliseyo. Ankhi nyuwo, Yehova onrowa wookhaliheryani sai okathi munuupuwela anyu wira muri mekhinyu?
6. Etthu xeeni mukhanle anyu oovekela akhala wira munoona wira muri mekhinyu? (Esalimo 62:9)
6 Yehova onnoolattulani wira munvekeleke. Yehova onniweha mixankiho sootheene murina anyu ni onoowiriyana mavekelo anyu ni waakhula khula okathi. (1 aTes. 5:17) Yehova onnimusivela vanceene owiriyana mavekelo a arumeyi awe. (Mir. 15:8) Itthu xeeni mukhanle anyu onvekela Yehova okathi munuupuwela anyu wira muri mekhinyu? Mmutthukuleleke murima anyu Yehova ntoko Eliya aapanke awe. (Musome Esalimo 62:9.) Mmuleeleke Yehova mixankiho sanyu ni moonelo anyu. Munvekeleke Yehova wira ookhaliheryeni ovilela mixankiho ni moonelo wooloka. Mwa ntakiheryo, akhala wira munnoovelela waalaleerya anaxikola akhwiinyu, munvekeleke Yehova wira oovaheeni olipa murima. Nave munvekeleke Yehova wira oovaheeni ankhili anrowa wookhaliheryani otthokiherya sookupali sanyu mooreerela murima. (Luka 21:14, 15) Akhala wira muniwanana miyuupuwelo soohiloka, munvekeleke Yehova wira ookhaliheryeni owerya ovaanela ni makristau arina waamini woolipa. Nyuwo pooti onvekela Yehova wira omukhaliherye mutthu munrowa anyu omuleela mixankiho sanyu wira owerye woowiriyanani ni osuwela muxankiho anyu. Mmutthukuleleke murima anyu Yehova, ni nweheke moota Yehova onaakhula awe mavekelo anyu ni mweemereryeke okhaliheriwa ni atthu akina. Akhala wira munoopaka eyo, khamunrowa wuupuwelaka wira muri mekhinyu.
Niireke munniimananiha olaleerya vanceene ni olaleerya ni anna ni arokora oovirikana? (Nwehe ettima 7)
7. Ntakiheryo na Mauricio, niwiixuttinheni exeeni?
7 Yehova oonivaha muteko wa efaita yinceene wira nivareke. Nto Yehova, onnivaha efaita itthu sootheene munipaka anyu mmulokoni ni muteko woolaleerya. (Esal. 110:3) Xeeni ovara miteko iyo onrowa aya wookhaliheryani ohitepa wuupuwela wira muri mekhinyu? Nwehe ntakiheryo na mmiravo mmosa oniihaniwa Mauricio. * Moohipisa nuumala opatisiwa, mpatthani awe muulupale vakhaani-vakhaani aahipacerya ohiya ekeekhai. Mauricio onihimya so: “Onweha mpatthani aka vakhaani-vakhaani ohiyaka omurumeela Yehova, eyo yaahikiriipiha murima vanceene. Nto kaahipacerya wanyiherya akhala wira kanwerya ohihiya omurumeela Yehova ni wiirela mpantta emusi awe. Miyo kuupuwela wira kaari mekhaka ni khuuvo mutthu aawerya osuwela muxankiho aka”. Exeeni yaamukhalihenrye Mauricio? Owo onitthokiherya so: “Miyo kaahincererya muteko aka woolaleerya. Nto eyo yaahikikhaliherya ohiisuupuwela mmansaka paahi ni ohiya okhalana miyuupuwelo soohiloka. Olaleerya ni anna ni arokora waanikihakalaliha ni waahikikhaliherya ohuupuwela wira kiri mekhaka”. Hata nihiweryaka olaleerya niri ene hoothe ni anna ni arokora, nnoowerya olaleerya ni anna awo nimurumeelaka telefoni ni olepa ikarta. Nto eyo pooti onilipiha vanceene. Etthu xeeni-tho ekina yaamukhalihenrye Mauricio? Owo onincererya oriki: “Miyo kaahipacerya wuncererya miteko kaavara aka mmulokoni. Kaanilokiherya oratteene ipantta kaavahiwa aka mmulokoni. Ipantta iyo, saahikikhaliherya woona wira Yehova, anna ni arokora annikivaha efaita yinceene”.
YEHOVA ONNINIKHALIHERYA OKATHI WA MIXANKIHO
8. Mixankiho pooti oniiriha exeeni?
8 Okhala wira ninkhala mahiku ookiserya, ootheene ahu sinooniphwanyaka mixankiho. (2 Tim. 3:1) Masi hata nisuwelaka wira sinooniphwanya mixankiho, iyo pooti onikhumelela mootutuxerya. Mwa ntakiheryo, hiyo pooti othoiwa musurukhu, oniphwanya oretta muulupale, aahiiso okhweliwa mutthu namphenta ahu vanceene. Mixankiho iyo pooti onikhulumula vanceene akhala wira sinninikhumelela moottharelana aahiiso okathi omosa-ru. Masi nihiliyale wira Yehova onniweha mixankiho sootheene nirina ahu, nto owo onoonikhaliherya ovilela mixankiho iyo moolipa murima.
9. Mixankiho xeeni Yobi aarina awe?
9 Muupuwele moota Yehova aamukhalihenrye awe murumeyi awe oororomeleya iihaniwa Yobi. Okathi omosa-ru paahi, Yobi saahimphwanya mixankiho sinceene ni sookhulumula. Nihiku nimosa paahi saahimukhumelela Yobi ihasara sinceene. Wanipacerya, inama sawe sootheene saahiiyiwa, nuumala-vo arumeyi awe yaahiiviwa nave etthu ekina yootepexa otakhala yaahikhumelela, eyo piiyo, anaawe aaphentexa awe yaahikhwa. (Yobi 1:13-19) Moohipisa nlelo oonaka owereya mwaha wa itthu iye saamukhumelenle, Yobi yaahimphwanya eretta yoohirya yeeyo yaahononne erutthu awe. (Yobi 2:7) Tthiri Yobi aahiriipiwa murima vanceene mpakha ohimya wira: “Kophweliwa n’ikumi aka ela: nkinikhala-tho mahiku othene”. — Yobi 7:16.
Yehova orumeelaka itthu opattunxe awe, aahimooniherya Yobi wira aanimphenta ni omukhapelela (Nwehe ettima 10)
10. Yehova aamukhalihenrye sai Yobi wira ovilele mixankiho sawe? (Nwehe elatarato ya ekaapa.)
10 Yehova aaniweha mixankiho sootheene Yobi aarina awe. Nave Yehova aanimphenta vanceene Yobi. Nto aahimukhaliherya wira owerye ovilela mixankiho iyo. Mwa ntakiheryo, Yehova aahivaanela ni Yobi ni aahimuupuxerya wira ookhalana ankhili anceene ni onnaakhapelela ni waaphenta vanceene arumeyi awe. Nave aahimwiixuttiha etthu orumeelaka inama soovirikana. (Yobi 38:1, 2; 39:9, 13, 19, 27; 40:15; 41:1, 2) Nave-tho Yehova aahimuruma mulopwana oororomeleya iihaniwa Elihu wira omulipihe ni ommaalihe Yobi. Nave-tho Yehova aahimuruma Elihu wira onvahe miruku Yobi. Nto Elihu aahimukhaliherya Yobi ohiya wiisuupuwela mmensawe paahi ni wuupuwela wira hiyo na atthu acikhaani nailikanyiha ni Yehova yoowo ori Mpattuxa a olumwenku wootheene. (Yobi 37:14) Yehova aahinvaha muteko Yobi maana aahimuruma waavekelela apatthani awe ale araru oowootha yaawo yaapanke etampi. (Yobi 42:8-10) Nto Yehova onrowa onikhaliherya sai okathi ninkumana ahu mixankiho?
11. Biibiliya onnimaliha sai okathi ninkhalana ahu mixankiho?
11 Olelo-va Yehova khonilavula ni hiyo ntoko aalavunle awe ni Yobi. Masi hata vari siiso, owo onnilavula ni hiyo omurumeela aka Biibiliya. (aRom. 15:4) Nlipelelo Yehova onnivaha awe na muhoolo, ninninimaaliha vanceene. Nrowe niwehe malakiheryo vakhaani a mBiibiliyani anrowa onikhaliherya vanceene okathi wa mixankiho. Mwa ntakiheryo, omurumeelaka Biibiliya, Yehova onninlipiherya wira khuuvo muxankiho onrowa owerya ‘onivalaanyiha ni ophenta wawe’. (aRom. 8:38, 39) Nave Biibiliya onninlipiherya wira: “Apwiya [Yehova] anniwattamela othene ale anavekela”. (Esal. 145:18) Nave-tho, Yehova onihimya wira akhala wira nnoomuroromela nnoowerya ovilela khula muxankiho ni hata nihaawaka nnoowerya ophwanya ohakalala weekeekhai. (1 aKor. 10:13; Yak. 1:2, 12) Biibiliya onninuupuxerya wira khula muxankiho ninkumana ahu niinaano-va ti wa okathi vakhaani nalikanyiha ni okumi woohimala ninrowa ahu ophwanya muhoolo. (2 aKor. 4:16-18) Yehova ooleiherya wira onompwetexa ole onikumiherya mixankiho ori Satana Diabo ni atthu ootheene animukhaliherya. (Esal. 37:10) Niireke nyuwo moohela mmuru soolepa sa mBiibiliyani soomaaliha, sinrowa wookhaliheryani ovilela mixankiho sinrowa oniphwanya muhoolo?
12. Etthu xeeni Yehova onnivekela awe wira nipakeke wira nittottele mureerelo nikhaliheryo Biibiliya onnivaha awe?
12 Yehova oniphavela wira navyeke okathi wira nimusomeke Biibiliya khula nihiku ni wuupuwelela ele ninsoma ahu. Okathi nneettela ahu itthu ninsoma ahu, waamini wahu onnilipa ni ompatthani ahu ni Yehova onnitepa olipa. Nave Yehova onnaavaha munepa awe woowaarya atthu ale anooniherya wira annimuroromela Biibiliya. Nto munepa woowaarya pooti “onivaha owerya onivikana wa mutthu” wira nivilele mixankiho.— 2 aKor. 4:7-10.
13. Malakiheryo ninvahiwa ahu ni “murumeyi oororomeleya ni a ankhili” annikhaliherya sai ovilela mixankiho?
13 Okhaliheriwaka ni Yehova, “murumeyi oororomeleya ni a ankhili” onnipaka myaha, iviidiyu ni isipo sinnikhaliherya olipiha waamini wahu ni ohihiya owehaweha. (Math. 24:45) Nto nihaana ottottela mureerelo malakiheryo awo ootheene ninvahiwa ahu ni Yehova. Okathi vakhaani ovinre, murokora mmosa a wEstados Unidos oohimya moota onixukhurela awe malakiheryo awo ootheene ninvahiwa ahu. Owo onihimya so: “Kooviriha iyaakha 40 kimurumeelaka Yehova. Nto okathi owo wootheene waamini waka oheehereriwa mwa inamuna sinceene”. Murokora ole aahikhalana mixankiho sinceene. Mwa ntakiheryo, mulopwana mmosa eettiha ekaaro ohapaliwe ene aahimphita khumwiiva piipi awe, nave-tho anamuyari awe yaahikhwa, ni yena aahiphwanyaniwa kanser ikwaha piili. Nto etthu xeeni yaamukhalihenrye ovilela itthu iyo sootheene? Owo oni: “Yehova onnikikhapelela okivahaka malakiheryo yaawo ninvahiwa ahu ni murumeyi oororomeleya ni a ankhili, nto eyo ennikikhaliherya vanceene ovilela. Moonelo aka onoolikana ni wa Yobi yoowo aahimmye so: ‘Kinolaleya ohittheka waka mpakha okhwa’”. — Yobi 27:5.
Ninrowa waakhaliherya sai anna ni arokora a mmulokoni? (Nwehe ettima 14)
14. Yehova onaaruma sai anna ni arokora wira anikhaliherye okathi wa mixankiho? (1 aTesaloonika 4:9)
14 Yehova, onniwiixuttiha arumeyi awe ophentana ni okhaliheryana okathi wa mixankiho. (2 aKor. 1:3, 4; mmusome 1 aTesaloonika 4:9.) Attharaka ntakiheryo na Elihu, anna ni arokora anniphavela vanceene onikhaliherya okathi wa mixankiho. (Mit. 14:22) Nwehe yoowiiraneya ya Diane. Iyawe aahiwereiwa vanceene nto anna ni arokora a mmulokoni yaahimukhaliherya olipiha waamini wawe. Owo onihimya so: “Okathi ole khivaakhweyale, masi hata vari siiso, myeeri iye sootheene naahiwerya oweha moota Yehova aanikhaliherya awe. Anna ni arokora a mmulokoni, yaahiivahererya onikhaliherya apakaka ele aniwerya aya. Anna anceene yaaninixukurya, onilikarela ni onikhupaarela, nto itthu iya sahinikhaliherya vanceene ovilela. Nto okhala wira nkinsuwela weettiha ekaaro, anna yaahiivahererya onikuxa okathi naarowa ahu omuthukumanoni ni muteko woolaleerya”. Tthiri eparakha yuulupale wiirela mpantta emusi ela yuulupale ya Yehova yoophenta vanceene.
NINNIXUKHURELA VANCEENE OPHENTIWA NI YEHOVA
15. Etthu xeeni ennikupaliha wira nnoowerya oxintta mixankiho?
15 Ootheene ahu sinooniphwanyaka mixankiho. Masi ntoko niixuntte ahu mwaha ola, hiyo khaninkhala-khala niwananaka mixankiho iyo mekhihu. Ntoko tiithi oophenta, okathi wootheene Yehova onrowa onikhapelela aka maana owo ori ni hiyo ni onniniiwa nanvekela aka nave khula okathi onniphavela onikhaliherya. (Yes. 43:2) Nto nikupaliki ni murima wootheene wira nnoowerya ovilela khula muxankiho. Okhala wira Yehova onninivaha khula etthu nimphavela ahu wira niwerye ovilela ntoko: Ovekela, anna ni arokora yaawo anniphenta vanceene, Biibiliya ni malakiheryo ninvahiwa ahu ni mutthenkeso awe.
16. Nihaana opaka exeeni wira nikhapeleliwe ni Yehova?
16 Hiyo ninnimuxukhurela vanceene Muluku mwaha woowi onninithokorerya ni onikhapelela vanceene. Ntoko enihimya aya Esalimo 33:21: “Otthapa wahu wothene onkhuma wa Muluku”. Nto nnimooniherya wira ninnimuxukhurela vanceene Yehova, okathi ninttottela ahu mureerelo itthu sootheene onnivaha awe wira onikhaliherye. Hiyo nave, nihaana opakaka mpantta ahu, niire so, nihaana wiimananiha omwiiwelela Yehova nipakaka ele enoona awe okhala yooloka. Niira siiso nikupaliki wira Yehova onoonikhapelelaka okathi wootheene! — 1 Ped. 3:12.
NSIPO 30 Muluku Aka, Moopoli Aka, ni Tiithi Aka
^ Olelo-va, wira niwerye ovilela mixankiho sinniphwanya nihaana okhaliheriwa ni Yehova. Nto mwaha ola onoonuupuxerya wira okathi wootheene Yehova onnaakhapelela arumeyi awe. Nave owo onnisuwela mixankiho khula mutthu onikumana awe ni onninikhaliherya oxintta mixankiho iyo.
^ Masina makina aaturukiwa.