Makoho Anikohiwa ni Ale Anisoma Irevista Sahu
Moota xeeni mwaha waakumiheriwe erevista Owehaweha ya Junho a 2020 waarina muru oni: “Nsina Nanyu Nivuwihiwe”, otthokihenrye aya etthu enniiriha okupali nsina na Yehova ni okhulupale awe?
Mwaha ole, naahiixutta wiira etthu yuulupale apinaatamu ootheene ni malaikha anireerela aya oopaka, ori ovuwiha nsina nuulupale na Yehova. Hata noonaka wiira olamulelo wa Yehova ti wooloka aahiiso nnaari, masi eyo ennivarihana ni ovuwihiwa nsina nawe. Mwa enamuna emosa-ru, vakhala wiira ninniroromeleya wa Muluku aahiiso nnaari, niiyo-tho eniirela mpantta etthu nnoona ahu okhalana efaita, ori ovuwiha nsina na Yehova.
Xeeni ninttittimiherya ahu wiira nsina na Yehova ni ovuwihiwa wa nsina nlo mwaha muulupale? Nrowe nthokorerye mathowa mararu.
Okhuma oxardim wa wEdeni Satana onnihimya itthu sininanariha nsina na Yehova
Noopacerya, Satana aahinanariha nsina ni mukhalelo wa Yehova, oxardim ya wEdeni. Etthu Satana aamukonhe awe Eva yooniherya wiira Yehova aari Muluku ohinivaha nave malakiheryo aavaha awe Adamu ni Eva, yaari oovila weettela. Satana aahivirikanya ele Yehova aahimmye awe. Owo aahimuhimya Yehova okhala nawoothe. Mwa enamuna eyo owo aahiveeha nsina na Yehova, khukhala “Diabo” nenno nintaphulela “nawoothe”. (Yoh. 8:44) Okhala wiira Eva aahiiwelela soowootha sa Satana, owo aahimukhootta Muluku. Eyo entaphulela wiira owo khaaphavela wiira Yehova okhale mukhulupale awe. (Maph. 3:1-6) Mpakha olelo-va, Satana onniihimya itthu soowoothiwa voohimya sa mukhalelo wa Yehova. Ale anikupali soowootha iyo sa Satana, vannikhweya ohimwiiwelela Yehova. Arumeyi a Yehova annoona okhala ohixariya wuulupale oveehiwa nsina na Yehova. Okhala wiira eyo teniiriha okhumelela mixankiho sootheene sa olumwenku ola.
Ya nenli, wiira okumiherye mureerelo wa soopattuxiwa sootheene, Yehova oolakela ovuwiha nsina nawe, omala-malihaka itthu sootheene onootheriwa awe. Eyo etthu yuulupale vamaithoni va Yehova. Owo ohimmye so: “Miyo kinovuwiha nsina naka nulupale”. (Ezek. 36:23) Yesu aahittittimiherya eyo okathi aahimmye awe etthu arumeyi ootheene a Yehova anireerela aya ovahaka efaita okathi anivekela aya, oriki: “Nvekeleke so: Tiithi ihu muri wiirimu, nsina nanyu nitteelihiwe”. (Math. 6:9) Biibiliya onnittittimiherya ikwaha sinceene efaita erina aya ovuwiha nsina na Yehova. Nrowe nthokorerye matakiheryo ala vakhaani: “Munvahe Yehova ovuwa oniphwanela nsina nawe”. (1 Wah. 16:29; Esal. 96:8) “Nwipele Apwiya ovuwa wa nsina naya”. (Esal. 66:2) “APWIYA, Muluku aka, kinaamuttittimiha nsina nanyu, ni murima aka wootheene”. (Esal. 86:12, Piipiliya Emakhuwa.) Okathi omosa Yehova aalavunle awe wiirimu, yiiraneyale mutemplo oYerusalemu, okathi Yesu aahimmye awe so: “Tiithi, nvuwihe nsina nanyu”. Yehova aakhunle so: “Miyo koovuwiha, nave kinrowa ovuwiha-tho”. — Yoh. 12:28. a
Ya neeraru, okhala wene, itthu Yehova oniphavela awe, sinnivarihana ni nsina nawe. Nkuupuwelani efaita ninrowa aya okhalana nsina na Yehova, nuumala yooweeha yookiserya ya wanikisa wa olamulelo wa Iyaakha Ekonto Emosa wa Kristu. Okathi owo, niireke malaikha ootheene ni apinaatamu, nlelo anrowa othipelelaka okhalana muupuwelo woovirikana voohimya sa ovuwihiwa nsina na Yehova? Wiira niwerye waakhula nikoho nna, nihaana wuupuwelela itthu iya piili sinivarihana: Ororomeleya wa apinaatamu ni olamulelo wa olumwenku ola wootheene. Niireke apinaatamu ootheene anooniherya okhala oororomeleya, nlelo sinimwaaphwanyaka mixankiho sineehererya ororomeleya waya? Nnaari. Awo khanrowa okhalana etampi ni khantthikela-tho weehereriwa. Nave awo anookhalana okumi woohimala. Niireke olamulelo wa olumwenku ola, nlelo onrowa okhala mwaha onrowa waaxankihaka ni waakawanya apinaatamu ni malaikha? Nnaari. Atthu ootheene ni malaikha anoosuwela wiira Yehova paahi torina okhulupale ni owerya wa mahiku ootheene. Nto okathi owo, nsina na Yehova nnookhalana efaita wa atthu ootheene.
Nsina na Yehova nnootteelihiwa moomalela ni itthu sootheene onootheriwa awe sinoomala-mala. Masi nsina na Yehova khaninrowa ohiya okhalana efaita wa arumeyi awe ootheene. Mwaha wa xeeni? Maana animoona wiira Yehova khonrowa ohiya opaka itthu sootikiniha. Okhala wiira Yesu moowiiyeviha ononvaha Yehova owerya wootheene, nto Muluku owo “tonrowa olamulelaka itthu sotheene”. (1 aKor. 15:28) Nuumala-vo, apinaatamu ootheene valaponi anoohakalalaka okhala wiira anoophwanya “otaphuwa woovuwa wa anamwane a Muluku”. (aRom. 8:21) Nto Yehova onoomaleliha etthu aaphavelaxa awe okhuma khalai, ya owiiraaniha anaawe wiirimu ni valaponi. — aEef. 1:10.
Nuumala itthu iya sootheene wiiraneya, emusi ya Yehova wiirimu ni valaponi enrowa woonelaka sai? Moohaanyiherya ninrowa otepaka ophavela ovuwiha nsina na Yehova. Nasaalimo Davidi olempe so: “Mwattottopele Apwiya . . . nsina naya novuwa nittottopeliwe mahiku othene”. (Esal. 72:18, 19) Khula okathi, nnookhalanaka mathowa oovuwiha nsina na Yehova moohimala.
Itthu sootheene onipaka awe sinnivarihana ni nsina nawe. Okathi nnuupuwelela ahu nsina na Yehova, eyo enniniiriha wuupuwelela ophenta orina awe. (1 Yoh. 4:8) Khula okathi, khaninrowa oliyalaka wiira Yehova onipattunxe mwaha wooniphenta, ni mwaha wooniphenta oonivaha mukuttho woowoopola nave mwaha woophenta onnilamulela mwa xariya. Masi khaninrowa ohiya oweha moota Yehova oniphenta awe itthu sootheene opattunxe awe. Nto khula okathi nnootepaka omwaattamela Yehova Tiithi ahu ni ovuwiha nsina nawe. — Esal. 73:28.
