1. Moovarihana ni aHeeberi 12:1, exeeni ninreerela ahu opaka wiira niwerye otthimaka mpakha oponta?

 BIIBILIYA onnilikanyiha okumi wa makristau ntoko mutthu onitthimaka. Ale anitthimaka mpakha ophiya oponta animwaakhela okumi woohimala. (2 Tim. 4:7, 8) Niimananiheke wiira nihihiye otthimaka, maana nihanle ophiya oponta. Murummwa Paulo, aahiwerya otthimaka mpakha ophiya oponta. Owo onnileela etthu nikhanle ahu oopaka wiira nave hiyo niwerye. Onihimya so: “Nirihe itthu sotheene sinnilemela. . . . Nave nitthimakeke nivilelaka mukwaha nithanleliwe ahu ni Muluku”. — Mmusome aHeeberi 12:1.

2. Onitaphulela exeeni oriha “itthu sotheene sinnilemela”?

² Okathi Paulo aahimmye awe wiira “nirihe itthu sotheene sinnilemela”, niireke eyo entaphulela wiira makristau ahaana ohikuxa etthu enilemela? Nnaari, owo aaphavela ohimya wiira nihaana ohiya itthu sootheene soolemela sihirina efaita. Okhala wiira itthu iyo pooti oniriipihaka murima ni onikhulumula. Naaphavelaka ohihiya otthimaka nihaana woona akhala wiira khanitenxe miritti sihirina efaita, akhala wiira nooteexa, nihaana ohiya moowaakuveya. Masi sookhala itthu sikina soolemela ninreerela ahu oteexa, maana naahikuxe eyo pooti otaphulelaka wiira noohiya otthimaka. (2 Tim. 2:5) Masi itthu exeeni iyo ninreerela ahu oteexa?

3. a) Moovarihana ni aGalasia 6:5, exeeni ninreerela ahu oteexa? b) Exeeni ninrowa ahu othokorerya mwaha ola, ni mwaha wa xeeni?

³ Mmusome aGalasia 6:5. Paulo oohimya itthu nikhanle ahu ooteexa. Owo ohimmye wiira “khula mutthu onrowa oteexa muritti awe”. Paulo aaphavela ohimya wiira ootheene ahu nookhalana muritti ninreerela ahu oteexa ohoolo wa Yehova. Mwaha ola,  nnooweha etthu enihela muhina oteexa “muritti” owo, ni moota nikhanle ahu oopaka eyo. Nave nnooweha miritti soolemela nikhanle ahu oteexa moohisuwela ni nnimwiixutta moota nikhanle ahu ooriha. Oteexa miritti nimphavela ahu ni ohiya sihirina efaita, onoonikhaliherya ohihiya otthimaka mpakha ophiya oponta.

4. Xeeni yooleiherya ahu ya omurumeela Yehova mahiku ootheene ohikhanle aya muritti woolemela? (Nwehe efootu.)

⁴ Yooleiherya ahu ya omurumeela Yehova mahiku ootheene. Okathi naivaherenrye ahu wa Yehova, naahileiherya wiira naarowa omurumeelaka yena ni opaka yootthuna awe mahiku ootheene. Nihaana omaleliha yooleiherya ahu. Etthu nimuleihenrye ahu Yehova ti ya faita yuulupale. Masi khahiyo muritti woolemela. Yehova onipattunxe wiira nipakeke ele oniphavela awe. (Wiis. 4:11) Owo onipattunxe ailikanyihaka yena ni oniphavela wiira nimusuwele ni nimurumeeleke. Ti nthowa naya ninwerya ahu omwaattamela yena nave opaka ele oniphavela awe etthu yootepa ohakalaliha. (Esal. 40:8) Ohiya-vo, okathi nimpaka ahu ele Muluku oniphavela awe ni omwiiwelela mwanawe, eyo ‘enninlipiha’. — Math. 11:28-30.

5. Exeeni enrowa wookhaliheryani omaleliha yooleiherya anyu? (1 Yohani 5:3.)

 ⁵ Munrowa oteexa sai muritti owo? Itthu iya piili sinimookhaliheryani. Yoopacerya, muhihiye olipiha omphenta wanyu Yehova. Munoowerya opaka eyo, muupuwelelaka itthu sootheene Yehova oopakenle aweni ni mareeliho onrowa awe woovahani muhoolo. Okathi omphenta wanyu Muluku onincerereya aya, vanimookhweelakani omwiiwelela. (Mmusome 1 Yohani 5:3.) Yanenli, mmutakiheke Yesu. Owo aniwerya opaka etthu Muluku aaphavela awe, maana aaninvekela Yehova wiira amukhaliherye ni aniwehexexa mareeliho aakhela awe. (aHeeb. 5:7; 12:2) Ntoko Yesu, munvekeleke Yehova ikuru ni muhiliyaleke nlipelelo na okumi woohimala. Akhala wiira munimuncererya omphenta wanyu Yehova ni omutakiha Yesu, munoowerya omaleliha yooleiherya anyu ya omurumeela Yehova mahiku ootheene.

6. Xeeni ninreerela ahu okhapelelaka miritti nrina ahu mweemusini? (Nwehe efootu.)

⁶ Miritti nrina ahu mweemusini. Okathi nintthimaka ahu mukwaha ola, nihaana omphentaka Yehova ni Yesu ovikana waaphenta amusi ahu. (Math. 10:37) Masi eyo khentaphulela wiira nihaana okhootta miritti nrina ahu mweemusini, nuupuwelaka wiira sinoonihiiha omusiveliha Muluku ni Kristu. Moovirikana ni vo, Muluku ni Yesu annivekela wiira nihaana okhapelela miritti nrina ahu mweemusini. (1 Tim. 5:4, 8) Napaka eyo, nnootepaka ohakalala. Yehova oniphavela wiira mulopwana ni mwaarawe aphentaneke ni attittimihaneke. Nave anamuyari yaaphenteke anaaya ni anamwane awiiweleleke anamuyari aya. — aEef. 5:33; 6:1, 4.

7. Exeeni nikhanle ahu oopaka wiira niwerye omaleliha miritti sahu mweemusini?

⁷ Munrowa oteexa sai muritti owo? Etthu yooloka ori wiiwelela malakiheryo a mbiibiliyani, moohicikha akhala wiira mwa mulopwana oothela, aahiiso muthiyana ootheliwa wala mwaana. Muhipakeke itthu sinoosivelani paahi aahiiso silimaleliwe opakiwa muttetthe anyu wala atthu akina anoovekelayani opaka. (Mir. 24:3, 4) Murumeeleke saana iliivuru sahu sinimutthokiherya Biibiliya. Iliivuru iyo sinnihimya etthu nikhanle ahu oopaka wiira nivarihele muteko malakiheryo a mbiibiliyani. Mwa ntakiheryo, myaha siri mpantta oni “Ajuda Para a Família” sinnooniherya mixankiho sinaaphwanya anamathelana, anamuyari ni amiravo. b Mwiimananiheke ovarihela muteko ele Biibiliya onihimya awe, hata amusi anyu akina ahiphavelaka opaka eyo. Mwiira siiso, amusi anyu anoottottelaka mureerelo nave nyuwo munimwaakhela mareeliho anikhuma wa Yehova. — 1 Ped. 3:1, 2.

8. Exeeni enrowa onikhumelela mwaha wa soothanla sahu?

⁸ Weemererya itthu sinikhumelela mwaha wa soothanla sahu. Yehova oonivaha eparakha ya opaka soothanla mootaphuwa. Owo oniphavela wiira nipakeke soothanla sooloka nave nihakalaleke ni soothanla iyo. Masi, akhala wiira nnoopaka soothanla soohiloka, Yehova khonrowa onikhapelela mwaha wa mixankiho sinrowa okhumelela. (aGal. 6:7, 8) Nto nihaana weemererya mixankiho sinikhumelela mwaha wa soothanla sahu, olavula etthu nihuupuwenle aahiiso opaka etthu naakuveyasaka. Muupuwelo ahu pooti oniphukelaka moovarihana ni etthu nipanke ahu. Masi osuwela wiira nihaana weemererya mixankiho sinikhumelela mwaha wa soothanla sahu, eyo pooti oniiriha ohimya soottheka sahu, olokiherya ni ohitthikela opaka. Opaka itthu iya sinoonikhaliherya ohihiya otthimaka.

9. Exeeni mukhanle anyu oopaka, akhala wiira moopaka yoothanla yoohiloka? (Nwehe efootu.)

 ⁹ Munrowa oteexa sai muritti owo? Akhala wiira mootoko opaka yoothanla yoohiloka masi muttharuwa, exeeni mukhanle anyu oopaka? Musuweleke wiira khamukhanle oolokiherya etthu evinre. Muhihononeke okathi anyu ni ikuru sanyu mmananihaka olokiherya etthu yoohiloka mwaapanke anyu aahiiso waavaha nthowa atthu akina. Ohiya-vo, mweemereryeke wiira moovonya ni mmananiheke opaka itthu sooloka moovarihana ni makhalelo anyu a niinano. Masi akhala wiira munniivaha nthowa mwaha wa etthu mpanke anyu, mukhaleke oowiiyeviha, munvekeleke Yehova, mweemereryeke wiira moottheka ni nvekeleke oleveleliwa. (Esal. 25:11; 51:3, 4) Mwaavekeleke ale mwaatthekenle anyu wiira yooleveleleni, ni vaareerelaka mwaavekeleke axitokweene wiira yookhaliheryeni. (Yak. 5:14, 15) Mwiixutteke etthu ni soovonya sanyu ni mwiimananiheke wiira muhitthikele opaka soottheka simosa-ru. Akhala wiira munoopaka itthu iya, mukupaliki wiira Yehova onoowoonelani othunku ni onimookhaliheryani. — Esal. 103:8-13.

10. Xeeni wuupuwelelaka etthu nihinrowa ahu owerya ophwanya ori aya muritti woolemela? (aGalasia 6:4.)

¹⁰ Muhuupuweleke wiira itthu sipanke anyu saamukhaani. Akhala wiira nnoolikanyiha itthu nimpaka ahu ni iye anipaka aya atthu akina, eyo pooti oniriipiha murima. (Mmusome aGalasia 6:4.) Akhala wiira khula okathi nnimwiilikanyihaka ni atthu akina, eyo pooti oniiriha okhala nanrima ni ophavelaka oxinttana. (aGal. 5:26) Naimananihaka opaka etthu anipaka aya atthu akina masi makhalelo ahu ahineemereryaka, eyo pooti olikana ni oteexa muritti nihinwerya ahu. Nave “owehererya woopisa, owereiha murima”. Tthiri ti vooriipiha murima olipelela etthu ninsuwela ahu wiira khaninrowa ophwanya! (Mir. 13:12, Piipiliya Emakhuwa.) Akhala wiira nnimuupuwelelaka etthu nnoona ahu wiira khaninrowa ophwanya, eyo pooti oniiriha ohiya otthimaka. — Mir. 24:10.

11. Exeeni enrowa wookhaliheryani ohuupuwela itthu muhinrowa anyu ophwanya?

¹¹ Munrowa owerya sai orula muritti owo? Muhimananiheke opaka etthu muhiniwerya anyu ovikana iye Yehova onivekela awe. Okhala wiira owo khonilipelela wiira munvahe etthu muhirina anyu. (2 aKor. 8:12) Mukupaliki wiira Yehova khonilikanyiha ele munipaka anyu ni etthu enipaka aya atthu akina. (Math. 25:20-23) Yehova onnivaha efaita miteko munivara anyu ni murima wootheene, waamini wanyu ni ovilela wanyu. Mukhaleke oowiiyeviha ni mukupaliki wiira khamunrowa owerya ovara itthu sootheene mwaaphavela anyu nenna-va, mwaha wa iyaakha sanyu, okumi anyu, aahiiso makhalelo anyu. Ntoko Barizilayi muheemereryeke miritti munoona anyu wiira khamunrowa owerya mwaha wa okumi anyu aahiiso iyaakha sanyu. (2 Sam. 19:35, 36) Ntoko Moise, nvekeleke okhaliheriwa ni vaaweryaneyaka mwaavaheke miritti atthu akina. (Okhum. 18:21, 22) Wiiyeviha onimookhaliheryani ohuupuwela itthu munoona anyu wiira khamunrowa ophwanya, sinrowa wookhulumulani siwiirihakani ohiya otthimaka.

12. Niireke nihaana wiivaha nthowa mwaha wa soothanla soohiloka sa atthu akina? Mutthokiherye.

¹² Muhiivaheke nthowa mwaha wa soothanla sa atthu akina. Hiyo khanikhanle oowaapakela soothanla atthu akina aahiiso waakhapelela mwaha wa mixankiho sinikhumelela mwaha wa soothanla saya. Mwa ntakiheryo, okathi mwaana onithanla awe ohiya omurumeela Yehova. Yoothanla eyo, pooti owiiriha anamuyari oriipiwa murima vanceene. Nto akhala wiira anamuyari anniivaha nthowa mwaha wa soothanla sa mwanaya, owo pooti okhala muritti woolemela. Masi Yehova, khoniphavela wiira anamuyari ateexeke muritti owo. — aRom. 14:12.

13. Okathi anamwane sinaaphwanya aya mixankiho mwaha wa soothanla saya, anamuyari yooneleke sai?

 ¹³ Munrowa orula sai muritti owo? Muhiliyale wiira Yehova onvaha khula mmosa eparakha yoopaka soothanla mootaphuwa. Owo onnimuhiya khula mutthu wiira opakeke yoothanla awe. Eyo enihela muhina othanla omurumeela aahiiso nnaari. Yehova nave onnisuwela wiira anamuyari anamattheka, masi oniphavela wiira mwiimananiheke opaka ele muniwerya anyu. Soothanla anamwane anipaka aya muritti aya khahiyo wa anamuyari. (Mir. 20:11) Hata vari siiso, ntoko paapa aahiiso maama, woonasa wene nyuwo pooti wuupuwelaka wiira moopaka etthu yoohiloka. Munvekeleke Yehova mmuleelaka moonelo anyu ni nvekeleke wiira ooleveleleni. Musuweleke wiira, khamuniwerya otthikela ottuli wiira mwalokiherye itthu sivinre. Nave Yehova khonilipelela wiira munoomukhapelelaka mwaninyu mwaha wa soothanla soohiloka onipaka awe. Nto akhala wiira mwaninyu onnithanla otthikela omurumeela Yehova, musuweleke wiira owo onoomwaakhela ni murima wootheene. — Luka 15:18-20.

14. Xeeni wiivaha nthowa khula okathi ori aya muritti ninreerela ahu orula?

¹⁴ Wiivahaka nthowa khula okathi. Okathi nimpaka ahu etampi hiyo ninniivaha nthowa. Masi Yehova khoniphavela wiira nuupuweleke siiso khula okathi. Owo muritti ninreerela ahu orula. Ninrowa orula sai? Nave ninrowa osuwela sai akhala wiira ninniivaha nthowa? Akhala wiira nnoohimya soottheka sahu, wiittaruxa ni wiimananiha opaka ele ninwerya ahu wiira nihitthikele, nave nikupali wiira Yehova onilevelela. (Mit. 3:19) Yehova oniphavela wiira nihitthikele wiivaha nthowa akhala wiira nnoopaka itthu iya sootheene. Owo onnisuwela wiira wiivaha nthowa moota owo pooti oniriipihaka murima. (Esal. 31:10) Akhala wiira nnootepaka oriipiwa murima, eyo pooti oniiriha ohiya otthimaka. — 2 aKor. 2:7.

15. Exeeni enrowa onikhaliherya ohiivahaka nthowa mootepana? (1 Yohani 3:19, 20.) (Nwehe efootu.)

¹⁵ Munrowa orula sai muritti owo? Akhala wiira nlelo munnitepa wiivaha nthowa, muupuweleleke  ‘olevelela’ weekeekhai wa Yehova. (Esal. 130:4) Yehova onnaaleiherya ale aniittharuxa moomalela ohimyaka so: “Nkinrowa-tho wupuwela itampi saya”. (Yer. 31:34) Eyo entaphulela wiira Yehova khonrowa woophukelani mwaha wa soottheka sanyu sa khalai. Nto mwaavirihaka mixankiho mwaha soottheka sanyu, muhuupuweleke wiira Yehova khoolevelenleni. Nave muhiivaheke nthowa akhala wiira soottheka sanyu sa khalai soowiirihani oyeleela iparakha sanyu mmulokoni. Yehova khonuupuwelela soottheka sanyu sa khalai, nave nyuwo khivanireerela wuupuwelelaka. — Mmusome 1 Yohani 3:19, 20.

16. Ntoko mulipa onitthimaka, exeeni ninreerela ahu wuupuwelaka?

¹⁶ Okhala wiira munootthimaka, muhaana opaka eyo “wira nwerye waakhela etthuvo”. (1 aKor. 9:24) Nnoowerya opaka eyo akhala wiira nnimwiiwexexa ovirikana okhanle, miritti ninreerela ahu orula ni miritti ninreerela ahu oteexa. Mwaha ola, nooweha matakiheryo vakhaani a itthu ninreerela ahu oteexa ni iye ninreerela ahu orula. Masi sookhala itthu sikina. Yesu aahimmye wiira naamuxankaka ni “olya vanceene ni owurya vanceene ni oxankela itthu siniphavela ahu”. (Luka 21:34) Yoolepa ela ni sikina, sinimookhaliheryani oweha marukunuxo munireerela anyu opaka wiira muhihiye otthimaka ni mwaakhele okumi woohimala.

17. Exeeni ennikupaliha wiira nnoowerya otthimaka mpakha waakhela etthuvo?

¹⁷ Nikupaliki wiira nnoowerya otthimaka mpakha oxintta, okhala wiira Yehova onoonivaha ikuru nimpirisari ahu. (Yes. 40:29-31) Nto muhikhulumuwe! Mmutakiheke murummwa Paulo, yoowo aapanke sootheene aawerya awe wiira aakhele etthuvo. (aFil. 3:13, 14) Musuweleke wiira khuuvo onrowa otthimaka ekontha anyu, masi mukhaliheriwaka ni Yehova munoowerya. Yehova onimookhaliheryani oteexa miritti munireerela anyu okuxa ni ohiya iye sikhanle oowookumiheryani mixankiho. (Esal. 68:19) Tthiri, mukhaliheriwaka ni Yehova munoowerya otthimaka mpakha wanikisa ni waakhela etthuvo!