1. Exeeni enrowa wookhaliheryani osiveliwaka osoma iprofesia sa mbiibiliyani?

 MUNNA mmosa oniitthaniwa Ben ohimmye so: “Okisivela osoma iprofesia sa mbiibiliyani”. Ankhi nyuwo vannoosivelani osoma iprofesia? Aahiiso munoona wiira oxankiha osoma iprofesia sa mbiibiliyani? Masi, akhala wiira munimwiiwexexa etthu emwiirinhe Muluku orumiha olempwa iprofesia iyo mbiibiliyani, nyuwo vanimoosivelakani osoma.

2. Exeeni ninrowa ahu othokorerya mwaha ola?

² Mwaha ola, nnoothokorerya xeeni ninreerela ahu wiixuttaka iprofesia sa mbiibiliyani ni moota nikhanle ahu oopaka eyo. Nnoothokorerya iprofesia piili sa eliivuru ya Daniyeli, nave nnooweha moota wiiwexexa iprofesia iyo sikhanle aya oonikhaliherya.

3. Exeeni ninreerela ahu opaka naaphavelaka wiiwexexa iprofesia sa mbiibiliyani?

³ Wiira niwerye wiiwexexa iprofesia sa mbiibiliyani, nihaana okhaliheriwa. Mwa ntakiheryo, nkuupuwelani muri ene ni mpatthani anyu murowaka opuro muhitonko anyu ophiya. Masi mpatthani anyu owo, onnisuwela saana opuro owo ni onnisuwela ephiro mukhanle anyu oovira. Moohaanyiherya okhalana mpatthani siiso aamookhaliheryani vanceene. Yehova ori ntoko mpatthani owo maana onnisuwela opuro niri ahu moovarihana ni Biibiliya ni itthu sinrowa wiiraneya muhoolo. Nto naaphavelaka wiiwexexa iprofesia sa mbiibiliyani nihaana wiiyeviha ni onvekela Yehova wiira onikhaliherye. — Dan. 2:28; 2 Ped. 1:19, 20.

4. Xeeni Yehova oruminhe awe olempwa iprofesia iyo mbiibiliyani? (Yeremiya 29:11.) (Nwehe efootu.)

⁴ Ntoko anamuyari aniphavela mureerelo wa anaaya, Yehova  oniphavela wiira apinaatamu akhalane murettele muhoolo. (Mmusome Yeremiya 29:11.) Masi moovirikana ni anamuyari, Yehova pooti onihimeerya itthu sinrowa wiiraneya muhoolo ni khula okathi owo onihimya itthu seekeekhai. Ti nthowa naya owo orumme awe olempwa iprofesia iyo mbiibiliyani, wiira niweryeke osuwela itthu sinrowa wiiraneya muhoolo. (Yes. 46:10) Iprofesia iyo sa mbiibiliyani yoovaha ya Yehova. Masi ninrowa osuwela sai akhala wiira iprofesia iyo sa mbiibiliyani sinimwiiraneya?

5. Yoowiiraneya ya Max eniwiixuttiha exeeni amiravo?

⁵ Amiravo anceene olelo-va, anisoma iskola atthu anceene animuttittimiha aya vakhaani aahiiso ahinimuttittimiha aya Biibiliya. Nto itthu atthu awo anipaka aya aahiiso anihimya aya, pooti oowiiriha amiravo makristau waaniheryaka itthu anikupali aya. Nwehe etthu yiiraneyale ni munna oniitthaniwa Max. Owo onihimya so: “Okathi kaari aka mmiravo, miyo kaahipacerya waaniherya akhala wiira anamuyari aka yaakixuttiha etiini yeekeekhai aahiiso akhala wiira Biibiliya onikhuma wa Muluku”. Nto exeeni yaapanke aya anamuyari a munna Max? Owo onihimya so: “Awo yaari oomaaleleya masi kaanisuwela wiira vamurimani waya yaari ooxankiheya”. Anamuyari awe Max yaahaakhula makoho awe ootheene voohimya sa Biibiliya, nave owo aahipaka etthu. Owo onihimya so: “Miyo kaanisoma ni otokosa iprofesia sa mbiibiliyani ni kaaniixutta ni amiravo akina”. Exeeni yiiraneyale muhoolo mwaya? Owo onihimya-tho so: “Miyo kaanikupali wiira Biibiliya onikhuma wa Muluku!”

6. Exeeni mukhanle anyu oopaka vakhala wiira munnaanyiherya ele Biibiliya enihimya awe, ni mwaha wa xeeni?

⁶ Ntoko Max, akhala wiira munnipacerya waaniherya itthu Biibiliya onihimya awe saari sa ekeekhai, muhixanke. Muhaana opaka etthu moowakuveya okhala wiira waaniherya onlikana ni murawa. Naahikhalane ephoole, murawa pooti ohonona etthu ya faita yuulupale. Wiira nimala-malihe itthu nnaanyiherya ahu sikhanle oohonona waamini wahu, nihaana wiikoha so: ‘Kiireke kinnikupali ele Biibiliya onihimya awe voohimya sa muhoolo?’ Masi akhala wiira nlelo munnaanyiherya, muhaana osoma iprofesia sa mbiibiliyani siiraneyale. Munrowa owerya sai opaka eyo?

7. Itthu xeeni saamukhalihenrye Daniyeli osoma iprofesia? (Daniyeli 12:10.) (Nwehe efootu.)

⁷ Daniyeli oovaha ntakiheryo nooloka na moota woosoma iprofesia sa mbiibiliyani. Daniyeli aahikhalana mathowa ooloka yaamwiiriha osoma iprofesia. Okhala wiira, owo aaphavela osuwela ekeekhai. Nave Daniyeli aari oowiiyeviha, ni aanisuwela wiira Yehova ammukhaliherya wiiwexexa vakhala wiira aamukhalana opatthani woolipa ni yena ni omwiiwelelaka. (Dan. 2:27, 28; Mmusome Daniyeli 12:10.) Daniyeli aahooniherya wiira aari oowiiyeviha okhala wiira aaniroromela wiira aamukhaliheriwa ni Yehova. (Dan. 2:18)  Nave Daniyeli aanitokosa ni ephoole. Owo aanipaka eyo orumeelaka soolempwa saakhanle okathi ole. (Yer. 25:11, 12; Dan. 9:2) Ninrowa omutakiha sai Daniyeli?

8. Xeeni atthu akina ahinikupali aya iprofesia sa mbiibiliyani, masi exeeni ninreerela ahu opaka?

⁸ Exeeni eniwiirihani osoma iprofesia? Niireke mwaha wooophavela osuwela ekeekhai? Akhala wiira ti siiso, Yehova onimookhaliheryani. (Yoh. 4:23, 24; 14:16, 17) Masi sookhala itthu sikina siniwiiriha atthu akina ophavela osoma iprofesia sa mbiibiliyani. Atthu awo annimusoma Biibiliya, aphavelaka wooniherya wiira khonikhuma wa Muluku. Awo anuupuwela wiira akhala wiira Biibiliya khonikhuma wa Muluku khivanireerela otthara itthu onihimya awe. Nto awo pooti othanla etthu anoona aya okhala yooloka ni yoohiloka. Ti nthowa naya hiyo ninreerela ahu omusomaka Biibiliya ni mathowa ooloka. Ohiya-vo, wookhala mukhalelo muulupale ninreerela ahu okhalana vakhala wiira nimphavela wiiwexexa iprofesia sa mbiibiliyani.

9. Mukhalelo xeeni ninreerela ahu okhalana wiira niiwexexe iprofesia sa mbiibiliyani? Mutthokiherye.

⁹ Mukhaleke oowiiyeviha. Yehova onnaakhaliherya ale oowiiyeviha. (Yak. 4:6) Nto naaphavelaka wiiwexexa iprofesia sa mbiibiliyani, ninvekeleke Yehova. Nave, nihaana okhala oowiiyeviha wiira neemererye nikhaliheryo ninvahiwa ahu ni murumeyi oororomeleya ni ya ankhili. Yoowo Yehova onimurumeela awe wiira onivahe iliivuru okathi wooreerela. (Luka 12:42) Yehova Muluku ootthokiheya, ti maana aya onaarumeela awe anna wiira anikhaliheryeke wiiwexexa ikeekhai sa mbiibiliyani. — 1 aKor. 14:33; aEef. 4:4-6.

10. Yoowiiraneya ya Esther, eniwiixuttihani exeeni?

¹⁰ Musomeke ni ephoole. Mpaceryeke othanla eprofesia enoosivelani ni mutokoseke yeeyo. Eyo ti etthu aapanke awe murokora oniitthaniwa Esther. Owo aaphavela osuwela voohimya sa eprofesia yaalavula sa orwa wa Mesiya. Owo onihimya so: “Okathi kaarinaka iyaakha 15, kaanitokosa iprofesia voohimya sa Yesu saalempwale khalai. Okathi kaasommeka iroolu saaphwanyiwe ephareya yookhwa, tthiri kaahoona wiira iroolu iyo saalempwale khalai ohinatthi Yesu orwa valaponi. Eyo enooniherya wiira tthiri iprofesia iyo saakhuma wa Muluku”. Esther onihimya so: “kaahaana osoma ikwaha sinceene mwaha mmosa-ru wiira kiiwexexe saana. Masi vano kinnikupali wiira itthu Biibiliya onihimya awe ti seekeekhai”. Nuumala osoma iprofesia sinceene sa mbiibiliyani, Esther onnihakalala ni ohoona wiira wiimananiha wawe woomukhaliherya!

11. Xeeni vanreera aya wiiwexexa iprofesia sa mbiibiliyani?

¹¹ Okathi ninweha ahu wiira iprofesia sikina sa mbiibiliyani sihiiraneya, omuroromela wahu Yehova onnilipa nave ninniiwelela malakiheryo onnivaha awe. Hata nenna-va siniphwanyaka mixankiho, iprofesia sa mbiibiliyani sinninikhaliherya owehexexa nlipelelo nahu na muhoolo. Nrowe niwehe iprofesia piili silempwe ni Daniyeli seiyo siniiraneya  nenna-va. Wiiwexexa iprofesia iyo sinoonikhaliherya opaka soothanla sooloka.

12. Inawu saari “wokina wa eyuma, wokina w’oloko” sintaphulela-ni? (Daniyeli 2:41-43.)

¹² Mmusome Daniyeli 2:41-43. Daniyeli aahitaphulela yooloha mwene Nabukodonosori aawenhe awe elatarato yaarina inawu saari “wokina wa eyuma, wokina w’oloko”. Nalikanyiha eprofesia ela ni iprofesia sikina siri eliivuru ya Daniyeli ni Wiisuupulula, ninnoona wiira inawu iyo sintaphulela olamulelo wa Grã-Bretanha ni Estados Unidos. Maloko yaawo yiiraanale khukhala olamulelo wa olumwenku wootheene olelo-va. Olavulaka sa olamulelo owo, Daniyeli aahimmye wiira ‘wamukhala wokina wolipa, wokina wowolowa’. Xeeni Daniyeli aahimmye awe siiso? Okhala wiira atthu pure anlikanyihiwa ni oloko, khanwerya opaka itthu ntoko owerya wa eyuuma. b

13. Eprofesia ela enniixuttiha exeeni?

¹³ Ninniixutta itthu sinceene ni elatarato Daniyeli aatthokihenrye awe, otepexa wene inawu sa elatarato eyo. Etthu yoopacerya okhala wiira, ninnoona wiira Estados Unidos ni Grã-Bretanha annooniherya owerya waya mwa inamuna soovirikana. Mwa ntakiheryo, Estados Unidos ni Grã-Bretanha saari ikurupu saaxinttale Ekhotto Yoopacerya ni Yanenli ya Olumwenku Wootheene. Masi ikuru sa olamulelo owo sinnivukuwa ni sinrowa otepaka ovukuwa, okhala wiira atthu khaniiwanana ni khansiveliwa ni ikuvernu saya. Etthu ekina niixuntte ahu, okhala wiira olamulela wa Anglo-Americana onrowa okhala wookiserya ehinatthi ekuvernu ya Muluku opwetexa ikuvernu sootheene sa apinaatamu. Maloko makina annimananiha omala-maliha olamulelo owo, masi awo khanrowa owerya. Masi, “nluku” nenlo ninthoonyerya Omwene wa Muluku ninrowa omala-maliha olamulelo owo, okathi ninrowa aya opwexa inawu sa elatarato eyo seiyo sinthoonyerya olamulelo wa Anglo-Americana. — Dan. 2:34, 35, 44, 45.

14. Wiiwexexa eprofesia ya inawu sa elatarato saari wookina wa oloko ni wookina wa eyuuma, onnikhaliherya sai opaka soothanla sooloka?

¹⁴ Nyuwo munnikupali eprofesia ya Daniyeli voohimya sa inawu sa oloko ni eyuuma wiira ti yeekeekhai? Munnikupali wiira eprofesia eyo enniiraneya olelo-va? Akhala wiira munnikupali, eyo enookhaliherya ekumi anyu. Khamunrowa ophavelasaka itthu sinceene sa olumwenku ola aahiiso muhakhu, maana munnisuwela wiira itthu iyo moohipisa sinoomala-mala. (Luka 12:16-21; 1 Yoh. 2:15-17) Nave wiiwexexa eprofesia ela, onimookhaliheryani woona wiira muteko woolaleerya ni wiixuttiha wookhalana efaita yuulupale. (Math. 6:33; 28:18-20) Nuumala osoma eprofesia ela, mwiikoheke so: ‘Kiireke soothanla saka sinnooniherya wiira kinnikupali wiira Omwene wa Muluku onoopwetexa ikuvernu sootheene sa apinaatamu?’

15. Ti pani ori mwene a onorti ni a osuuli olelo-va? (Daniyeli 11:40.)

¹⁵ Mmusome Daniyeli 11:40. Daniyeli ekapiitulu 11 onnaalavula mamwene manli, aahiiso makhulupale a ipoliitika yaawo aniwanela olamulela olumwenku wootheene. Nalikanyiha eprofesia ela ni iprofesia sikina sa mbiibiliyani, ninnoona wiira “mwene a òkuusini” aahiiso mwene a onorti onitaphulela  Rússia ni ale animukhaliherya. Nave mwene “a ònikela epheyo” aahiiso osuuli onitaphulela olamulelo wa olumwenku wootheene wa Anglo-Americana. c

16. Mixankiho xeeni sinaaphwanya ale anilamuleliwa ni mwene a onorti?

¹⁶ Arumeyi a Yehova yaawo anilamuleliwa ni mwene a onorti annihaawa mwaha wa olupatthiwa. Anna ni arokora akina annimaniwa ni annitthukweliwa mukhatteya mwaha wa waamini waya. Masi ohiya okhulumuwaka, olupatthiwa iwo onnilipiha waamini. Mwaha wa xeeni? Mwaha woowi anna awo annisuwela wiira olupatthiwa iwo onimaleliha iprofesia siri eliivuru ya Daniyeli. d (Dan. 11:41) Osuwela eyo, pooti onikhaliherya olipiha nlipelelo nahu ni ohihiya omwaamini Yehova.

17. Arumeyi a Muluku anikhala ilapo sinilamuleliwa ni mwene a osuuli aneehereriwa sai?

¹⁷ Khalai, mwene a osuuli aanaalupattha arumeyi a Yehova. Mwa ntakiheryo, okhuma mwaakha 1900 mpakha mwaakha wa 1950,  anna anceene yaahitthukweliwa mwaha woohiirela mpantta itthu sa mulaponi, nave anaaya yaahoomoliwa oskola mwaha wa etthu emosa-ru. Masi mahiku ala, waamini wa arumeyi a Yehova yaawo anilamuleliwa ni mwene a osuuli onneehereriwa mwa enamuna ekina. Mwa ntakiheryo, okathi wa mwaathanle mukristau pooti weehereriwa okhaliherya epartiitu emosa aahiiso muhooleli a epartiitu. Owo khahiyo onrowa ovotari, masi vamurimani vawe pooti wuupuwelaka wiira fataari epartiitu ekina ovikana ekina. Naaphavelaka ohiirela mpantta moomalela itthu sa olumwenku, nihaana okhalana ephoole ni itthu nnuupuwela ahu! — Yoh. 15:18, 19; 18:36.

18. Nooneleke sai okathi mwene a onorti ni osuuli aniwana-wana aya? (Nwehe efootu.)

¹⁸ Ale ahinikupali iprofesia sa mbiibiliyani, pooti oxanka okathi mwene a onorti oniwana-wana awe ni mwene a osuuli. (Dan. 11:40) Mamwene awo manli, aakhalana ikapwitthi sinwerya omala-maliha okumi wootheene valaponi. Masi ninnisuwela wiira Yehova khonrowa weemererya wiira eyo yiiraneye. (Yes. 45:18) Hiyo khaninxaka ni etthu enrowa wiiraneya muhoolo, ohimya ekeekhai, owana-wana wa mwene a onorti ni mwene a osuuli onnilipiha waamini wahu. Maana ennooniherya wiira wanikisa wa olumwenku ola ohanle ophiya.

19. Exeeni ninreerela ahu okupaliki voohimya sa iprofesia sa mbiibiliyani?

¹⁹ Hiyo khaninsuwela moota iprofesia sikina sa mbiibiliyani sinrowa aya wiiraneya. Hata profeta Daniyeli, khaiwexexa iprofesia sikina aalempe awe. (Dan. 12:8, 9) Masi mwaha woohisuwela moota sinrowa aya wiiraneya iprofesia sikina, eyo khentaphulela wiira khasinrowa wiiraneya. Nikupaliki wiira Yehova onoonikhaliherya osuwela etthu ninreerela ahu wiiwexexa waphiya okathi wooreerela, ntoko siisaale iirale awe khalai. — Am. 3:7.

20. Eprofesia xeeni yoohakalaliha enrowa wiiraneya moohipisa, nto exeeni ninreerela ahu ohihiya opaka?

²⁰ Olaleiwa wa “murettele ni ovareleleya”,onimwiiraneya. (1 aTes. 5:3) Nuumala-vo, ikuvernu sa epoliitika sinootuphela ni opwetexa itiini soowootha. (Wiis. 17:16, 17) Muhoolo mwaya, animwaatuphela arumeyi a Yehova. (Ezek. 38:18, 19) Soowiiraneya iyo, sinookumiherya ekhotto ya Armagedoni. (Wiis. 16:14, 16) Nikupaliki wiira itthu iya sootheene sinimwiiraneya moohipisa. Nilipelelaka eyo wiiraneya, nihihiye wooniherya omuxukhuru Tiithi ahu a wiirimu, nisomaka iprofesia sa mbiibiliyani ni waakhaliherya atthu akina opaka etthu emosa-ru.