1. Exeeni yaawiirinhe ababilonia osiveliwa ni Daniyeli?

 PROFETA Daniyeli aari mmiravo, okathi ababilonia yaamukunxe aya elapo aayariwe awe oYerusalemu, amuroihaka oBabilonia ntoko epottha. Masi nnaamwi Daniyeli aari mmiravo, atthu ale yanvanre yaahisiveliwa vanceene nuuwo. Alopwana ale yaahoona wiira Daniyeli aari “òrera ni òhirakala”, nave aayariwe etthoko ya atthu oovuwa. (1 Sam. 16:7) Ti nthowa naya ababilonia yaaphavenle aya omwiixuttiha Daniyeli wiira okhaleke vatthokoni va mwene. — Dan. 1:3, 4, 6.

2. Yehova aamoonela sai Daniyeli? (Ezekiyeli 14:14.)

² Yehova aanimphenta Daniyeli, masi ohiya mwaha wooreera wawe aahiiso mwaha wooyariwa etthoko ya atthu oottittimihiwa. Masi amphenta mwaha wa makhalelo awe ni yoothanla aapanke awe nnaamwi nlelo aari mmiravo. Woonasa wene Daniyeli aarina iyaakha 20 paahi, okathi Yehova aamulikanyinha awe ni Nowe ni Yoobi, yaawo yaamurumenle Yehova mwa iyaakha sinceene. (Maph. 5:32; 6:9, 10; Yob. 42:16, 17; mmusome Ezekiyeli 14:14.) Nave Yehova khaahiyale omphenta Daniyeli okumi awe wootheene. — Dan. 10:11, 19.

3. Mwaha ola ninrowa othokorerya exeeni?

³ Mwaha ola, nnooweha mikhalelo miili aarina awe Daniyeli, saamwiiriha Yehova omphentaka. Wanipacerya, nnooweha mikhalelo iyo miili ni okathi ene Daniyeli oonihenrya awe. Moottharelana nnooweha itthu saamukhalihenrye Daniyeli okhalana mikhalelo iyo. Nuumala-vo, nnooweha moota nikhanle ahu oomutakiha. Nnaamwi yoosoma ela eroiheliwaka vanceenexa amiravo, masi ootheene ahu nnoowerya wiixutta etthu ni ntakiheryo na Daniyeli.

4. Daniyeli ooniherye sai olipa murima? Nvahe ntakiheryo.

⁴ Atthu oolipa murima annoova, masi khaneemererya wiira woova iwo waahiihe opaka itthu sooloka. Daniyeli aari  mmiravo oolipa murima. Nrowe niwehe ikwaha piili Daniyeli oonihenrya awe olipa murima. Ekwaha yoopacerya, yiiraneyale woonasa wene sivinre ene iyaakha piili nuumala ababilonia opwetexa oYerusalemu. Mwene Nabukodonosori a oBabilonia aahiloherya elatarato yuulupale. Owo aahihimya wiira anwiivakasa asuweli ootheene, omuhela muhina Daniyeli, vakhala wiira khiyaarowa omuleela etthu aalonhe awe ni ele yaataphulela aya. (Dan. 2:3-5) Daniyeli aahaana opaka etthu moowaakuveya, maana ahaapanke eyo, atthu anceene yaamookhwa. Owo “ahivenya nananoru, khurowa onvekela mwené wira àlitteke nlelo, mana aniwerya omutaphulela oloha wawe”. (Dan. 2:16) Wiira opake etthu ele, aahaana okhalana olipa murima ni waamini. Biibiliya khonihimya vakhala wiira Daniyeli aahitoko otaphulela sooloha. Daniyeli aahaavekela apatthani awe araru, yaawo masina yaavahiwa aya ni ababilonia yaari Xadraki, Mexaki ni Abedi-Nego, wiira anvekele “Muluku omoreliwa ikharari n’utaphuleliwa esir’iyo”. (Dan. 2:18) Yehova aahaakhula mavekelo aya, ni aahimukhaliherya Daniyeli otaphulela yooloha ya mwene Nabukodonosori. Nto Daniyeli ni apatthani awe khiyaiviwe.

5. Okathi xeeni-tho mukina Daniyeli aareerela awe wooniherya olipa murima?

⁵ Ovinre ene okathi vakhaani nuumala Daniyeli otaphulela yooloha ele ya mwene, olipa wawe murima waahitthikela-tho weehereriwa. Nabukodonosori aahiloha-tho etthu ekina yootikiniha. Ekwaha ela aalohenrye mwiri muulupale. Daniyeli aahitthokiherya etthu yaataphulela aya yooloha ele ya mwene, ohela muhina omuleela mwene wiira anvahuwa ni aamuhiya olamulela okathi vakhaani. (Dan. 4:25) Woonasa wene mwene anwerya wuupuwela wiira Daniyeli aari nwanani awe ni anwerya orumiha wiira iiviwe. Masi Daniyeli aahooniherya olipa murima ni aahihimya etthu yaataphulela aya yooloha ele.

6. Woonasa wene exeeni yaamukhalihenrye Daniyeli okhala oolipa murima?

⁶ Woonasa wene exeeni yaamukhalihenrye Daniyeli okhala oolipa murima okumi awe wootheene? Moohaanyiherya okathi aari awe mwaana, amamawe ni apapawe yaahinvaha ntakiheryo nooloka. Awo yaaniiwelela malakiheryo Yehova aavanhe awe aisarayeli, wiira anamuyari yaahaana owiixuttiha nlamulo anaaya. (Otum. 6:6-9) Daniyeli khahiyo paahi aasuwela itthu vakhaani sa nlamulo, ntoko malamulo  10, masi aanisuwela-tho itthu aisarayeli yeemereriwa aya olya ni yaaheemereriwa aya. b (Onam. 11:4-8; Dan. 1:8, 11-13) Nave Daniyeli aahiixutta yoowiiraneya ya arumeyi a Yehova ni aanisuwela etthu yiiraneya vakhala wiira khiyaatthara malamulo awe. (Dan. 9:10, 11) Daniyeli saahimukhumelela itthu sinceene. Itthu iyo saahimwiixuttiha wiira moohicikha etthu enikhumelela, Yehova ni malaikha awe oowerya anoomukhaliherya. — Dan. 2:19-24; 10:12, 18, 19.

7. Etthu xeeni-tho ekina, yaamukhalihenrye Daniyeli okhala oolipa murima? (Nwehe eteseenyo.)

⁷ Daniyeli aanisoma iprofesia, ohela muhina iprofesia sa Yeremiya. Mwaha woosoma, muhoolo mwaya Daniyeli aahisuwela wiira okathi ayuda yaarowa aya okhalihiwa ipottha oBabilonia, waahanle omala. (Dan. 9:2) Oweha iprofesia sa mbiibiliyani siiraneyaka, waahilipiha omwaamini wawe Yehova ni okupali wiira ootheene ale animuroromela Muluku anookhala oolipa murima. (Munwehe aRoma 8:31, 32, 37-39.) Etthu yuulupale okhala wiira khula okathi Daniyeli aaninvekela Tiithi awe a wiirimu, Yehova. (Dan. 6:10) Owo aaninvekela Yehova wiira oleveleliwe itampi sawe ni animuleela moonelo awe. Nave Daniyeli aanivekela okhaliheriwa. (Dan. 9:4, 5, 19) Daniyeli aari mutthu ntoko hiyo, khaayariwe ori ene oolipa murima. Owo aahiwerya okhalana mukhalelo owo okhala wiira aanisoma, aanivekela ni aanimuroromela Yehova.

8. Ninrowa owerya sai okhala oolipa murima?

⁸ Nipakeke exeeni wiira nikhale oolipa murima? Anamuyari ahu pooti onitumereryaka wiira nikhale oolipa murima, masi olipa murima khahiyo mukhalelo nnaamuyareliwa ahu. Wiira nikhale oolipa murima, vanoolikana ni wiixutta muteko musya. Wiira niixutte saana muteko owo, nihaana onwehaka saana ole onniixuttiha ni omutakiha. Mwa enamuna emosa-ru, nnimwiixutta okhala oolipa murima vakhala wiira nnimwaawehaka saana ale anooniherya mukhalelo owo ni otthara ntakiheryo naya. Nto ntakiheryo na Daniyeli ninniixuttiha exeeni? Nimutakihaka yena, nihaana osomaka oratteene Nuulumo na Muluku. Nihaana okhalana ompatthani woolipa ni Yehova ni onvekela nimutthukulelaka murima ahu. Nave nihaana omuroromela Yehova nikupaliki wiira khula okathi onoonikhaliheryaka. Niira siiso, okathi waamini wahu oneehereriwa aya, nnoowerya okhala oolipa murima.

9. Olipa murima oniphwanyiha mireerelo xeeni?

⁹ Okhala oolipa murima onoonikhaliherya mwa inamuna soovirikana. Nrowe nthokorerye etthu yiiraneyale ni Ben. Eskola aasoma awe wAlemanha, atthu anceene yaakupali wiira itthu siroothatuwa. Nto ele Biibiliya onihimya awe wiira itthu siroopattuxiwa yuupuwela wiira etthu yoowoothiwa. Nihiku nimosa, Ben aahivahiwa eparakha yootthokiherya ohoolo wa esaala awe yootheene etthu yaamwiiriha okupali wiira itthu siroopattuxiwa. Owo aahilipiha murima, ni aahitthokiherya etthu aakupali awe. Exeeni yaakhumelenle muhoolo mwaya? Ben onihimya so: “Prusoore aka aahikiwiriyana oratteene nave aahikopiyari myaha kaarumeelaka wiira kitthokiherye moonelo aka, aakawela anaskola ootheene”. Anaskola akhwaawe yoonenle sai ele Ben aahimmye awe? Owo onihimya-tho so: “Anaskola anceene yaahikiwiriyana oratteene, nave yaahipacerya okittittimiha”. Yoowiiraneya ya Ben enooniherya wiira atthu anooniherya olipa murima, ikwaha sinceene annittittimihiwa. Nave olipa murima iwo, onniwiiriha atthu akina ophavela omurumeela  Yehova. Moohaanyiherya, nookhalana mathowa ooloka anniiriha okhala oolipa murima.

10. Ororomeleya ontaphulela exeeni?

¹⁰ Mbiibiliyani nuulumo na eheeberi nitaphuleliwe wiira “oororomeleya” aahiiso “ophenta woororomeleya”, nimphavela ohimya waataana mutthu onikhalana awe ni mutthu mukina. Nave ikwaha sinceene ninnirumeeliwa niphavelaka ohimmwa ophenta woororomeleya Yehova oniwooniherya awe arumeyi awe. Biibiliya onnirumeela nuulumo nimosa-ru, wiira ooniherye ophenta woororomeleya arumeyi a Yehova anooniheryana aya mukina ni mukhwaawe. (2 Sam. 9:6, 7) Ororomeleya wahu pooti okhalaka woolipa nuuvira okathi. Nrowe niwehe moota eyo yiiraneyale aya ni profeta Daniyeli.

11. Nuumala Daniyeli wuuluvala, omuroromela wawe Yehova weehereriwe sai? (Nwehe eteseenyo ya ekaapa.)

¹¹ Okumi awe wootheene, Daniyeli saahimphwanya mixankiho seeherenrye omwaamini wawe Yehova, otepexa wene okathi aarina awe iyaakha 90. Okathi owo, Babilonia aahikuxiwa ni amedia ni apersia, nave aalamuleliwa ni mwene Dario. Arumeyi a mwene khiyaasiveliwa ni Daniyeli, nave khiyaamuttittimiha Muluku awe. Nto yaahimpaka palano wiira Daniyeli iiviwe. Awo yaahimwiiriha mwene waasinari nlamulo naamukhoottiherya khula mutthu omukokhorela aahiiso onvekela Muluku mukina ohikhanle mwene. Etthu Daniyeli aakhanle awe oopaka wiira ooniherye ororomeleya wa mwene ntoko atthu akina, waari oviriha mahiku 30 ohinvekenle Yehova. Masi Daniyeli aahikhootta wiiwelela nlamulo nne. Mwaha waivaavo, Daniyeli aahiriheliwa mulittini mwa akharamu. Masi Yehova aahimutthuvela Daniyeli mwaha woororomeleya wawe, omoopolaka wiira ohikhuuriwe ni akharamu. (Dan. 6:12-15, 20-22) Ninrowa owerya sai okhala oororomeleya wa Yehova ntoko Daniyeli?

12. Daniyeli aawenrye sai ohihiya okhala oororomeleya wa Yehova?

¹² Wiira nikhale oororomeleya wa Yehova, nihaana okhalana ompatthani woolipa ni yena. Daniyeli khaahiyale okhala oororomeleya wa Yehova, okhala wiira aanimphenta Tiithi awe a wiirimu ni murima awe wootheene. Moohaanyiherya, Daniyeli aahiwerya wuncererya omphenta wawe Yehova, okhala  wiira aaniviriha okathi uupuwelelaka mikhalelo sa Yehova ni moota ooniherya awe. (Dan. 9:4) Nave-tho, Daniyeli aanuupuwelela itthu sootheene sooloka Yehova aamwiirenle awe ni aawiirenle awe arumeyi awe. — Dan. 2:20-23; 9:15, 16.

13. a) Mixankiho xeeni sineehererya ororomeleya wa amiravo? Nvahe ntakiheryo. (Nwehe efootu.) b) Ntoko yoonihenrya aya eviidiyu, naakhuleke sai vakhala wiira atthu anninikoha vakhala wiira Anamoona a Yehova annaakhaliherya ale anrupihana alopwana-ru aahiiso athiyana-ru?

¹³ Moolikanasa ni Daniyeli, amiravo anceene animurumeela Yehova, anikhala eriyari ya atthu ahinimuttittimiha Muluku ni ahiniiwelela malamulo awe. Atthu akina khivanaasivela okathi animwiiwa aya mutthu ohimyaka wiira oniphavela omphentaka Muluku ni wiiwelela malamulo awe. Akina annaaveeha amiravo a mmutthenkesoni wiira ahiye ororomeleya wa Yehova. Nwehe etthu yaamwiiranenle mmiravo mmosa oniitthaniwa Graeme, onikhala wAustrália. Aahikhalana muxankiho mmosa okathi aasoma awe oskola. Prusoore awe aahaavekela anaskola wiira ahimye moota yaarowa aya woonela, vakhala wiira mpatthani aya aamwaaleela wiira onnirupihana alopwana-ru aahiiso athiyana-ru. Prusoore ole aahimmye wiira atthu ootheene yaarowa omukhaliherya mpatthani aya, yaahaana orowa weemela mpantta mukina wa esaala. Nave ale yahaarowa omukhaliherya, yeemele mpantta mukina. Graeme ohimmye so: “Anaskola ootheene yeemenle mpantta mmosa. Naari mpantta mukina kaari miyo ni munna mukina kaasomana aka”. Etthu yiiraneyale muhoolo mwaya yaaheehererya waamini wa Graeme. Owo onihimya so: “Mpakha okathi naamwareyale ahu, anaskola akina ni prusoore ole yaamuniveehasa. Kaahiimananiha waakiherya waamini waka mooreerela murima ni moomaaleleya, masi awo khiyaatthunne okiwiriyana”. Graeme oonenle sai nuumala muxankiho ole weeherenrye waamini wawe? Owo onihimya so: “Khivaakisivenle oveehiwa iwe, masi kaahihakalala mwaha woowi kaahaakiherya etthu kaakupali aka ni nkaahiyale ororomeleya”. c

14. Exeeni enrowa onikhaliherya olipiha omuroromela wahu Yehova?

¹⁴ Ntoko Daniyeli, vaavo ninlipiha ahu omuroromela wahu Yehova, khaninrowa ohiya omphenta. Nave nnootepaka omphenta Yehova vakhala wiira nnimwiixuttaka mikhalelo sawe. Mwa ntakiheryo, hiyo pooti osoma itthu opattunxe awe. (aRom. 1:20) Mwaaphavelaka olipiha omphenta ni omuttittimiha wanyu Yehova, nyuwo pooti oweha iviidiyu sini: “Niireke Eroopattuxiwa?” aahiiso osoma ibroxura sini: A Vida — Teve um Criador? ni A Origem da Vida — Cinco Perguntas Que Merecem Resposta. Nwehe etthu mwali mmosa oniitthaniwa Estheri a oDinamarca ohimmye awe. Olavulaka sa ibroxura iyo, ohimmye so: “Muupuwelo ori mbroxuurani-mu ti wooreera. Maana ibroxuura iya khasinihimya etthu mutthu onireerela awe okupali, masi sinooniherya itthu sene, nto khula mutthu othanleke etthu onikupali awe”. Ben, yoowo nimulavunle ahu wanipacerya, ohimmye so: “Ibroxuura iya sinnilipiha waamini. Maana sookooniherya wiira tthiri Muluku topattunxe okumi”. Vakhala wiira munootokosa myaha iya, moohaanyiherya munookupali moolumo ari mbiibiliyani ani: “Yehova, Muluku ahu oowerya, nyuwo munniphwanelela waakhela ovuwa ni nttittimiho, okhala wira moopattuxa itthu sotheene”. — Wiis. 4:11. d

15. Enamuna xeeni ekina enrowa onikhaliherya olipiha ompatthani ahu ni Yehova?

¹⁵ Etthu ekina enrowa onikhaliherya olipiha  omphenta wahu Yehova, ori osoma okumi wa mwanawe, Yesu Kristu. Murokora mmosa oniitthaniwa Samira, onikhala wAlemanha aahipaka eyo. Owo ohimmye so: “Kaahimusuwela saana Yehova, okathi kaasoomaka voohimya sa Yesu”. Okathi ari awe mwaana, Samira aahiiwexexa moota Yehova onoonela awe itthu. Nto aahiwerya wiiwexexa moonelo wa Yesu. Samira onihimya-tho so: “Kaanisiveliwa wiixutta voohimya sa Yesu, okhala wiira owo aari oopatthaneya ni aanaaphenta anamwane”. Okathi aatepa awe wiixutta itthu voohimya sa Yesu, nave aanitepa wuncererya omphenta wawe Yehova. Mwaha wa xeeni? Owo ohimmye so: “Kaaniweha wiira Yesu aanitakiha mikhalelo sa Tiithi awe. Nto awo yaamulikanasa. Kaahiweha wiira etthu yaamwiirinhe Yehova omuruma Yesu orwa valaponi, aaphavela wiira apinaatamu amusuwele saana yena”. (Yoh. 14:9) Akhala wiira muniphavela olipiha ompatthani anyu ni Yehova, munoonela sai osoma voohimya sa Yesu?

16. Mireerelo xeeni ninrowa ahu ophwanya vakhala wiira khannihiya okhala oororomeleya? (Esalimo 18:25; Mikeya 6:8.)

¹⁶ Okhala wene atthu oororomeleya, apatthani aya nave toororomeleya. (Ruth. 1:14-17) Ohiya-vo, okathi ninroromeleya ahu wa Yehova ninnikhala oomaaleleya ni oohakalala. Mwaha wa xeeni? Mwaha woowi Yehova ooleiherya wiira onookhala oororomeleya wa ale anikhala oororomeleya wa yena. (Musome Esalimo 18:26; Mikeya 6:8.) Muhiliyale ela: Nnaamwi niri ene acikhaanixa nailikanyiha ni mpattuxa ahu, owo ooleiherya wiira okathi wootheene onooniphentaka! Vakhala wiira nnookhalana ompatthani woolipa ni Yehova, khuuvo muxankiho, nnakhala nwanani, aahiiso okhwa khonrowa onivalaanya ni yena. (Dan. 12:13; Luka 20:37, 38; aRom. 8:38, 39) Etthu yuulupale nikhanle ahu oopaka, ori otthara ntakiheryo na Daniyeli ni okhala oororomeleya wa Yehova!

17-18. Itthu xeeni-tho sikina nniixutta ahu ni Daniyeli?

¹⁷ Mwaha ola, niwenhe mikhalelo miili paahi sa Daniyeli. Masi sookhala itthu sikina nikhanle ahu oowiixutta ni yena. Mwa ntakiheryo, Yehova aahimooniherya ni aahimwiiriha oloha itthu sinceene, nave aahinvaha owerya wootaphulela sooloha sa iprofesia. Iprofesia iyo sikina sinceene sihiiraneya. Sikina sinnihimya itthu sinrowa wiiraneya muhoolo, seiyo sinrowa waavara apinaatamu ootheene.

¹⁸ Mwaha onittharelana, nnootokosa iprofesia piili silempwale ni Daniyeli. Wiiwexexa saana iprofesia iyo, onoonikhaliherya ootheene ahu opaka soothanla sooloka, voohicikha iyaakha sirina ahu. Iprofesia iyo sinoonikhaliherya wuncererya olipa wahu murima ni ororomeleya wahu. Nave sinoonikhaliherya okhala oolikana ene okathi sinrowa aya oniphwanya mixankiho muhoolo.