1. Muritti xeeni Yehova aavanhe awe anamuyari?

YEHOVA aahaapattuxa anamathelana oopacerya ni yoophavela ya waayara anamwane. Tivonto Biibiliya onihimya awe wira: “An’ihu nivahiwé ni Muluku”. (Esal. 127:3) Nkahaya muupuwele vaakhanle wira mpatthani anyu ohoovekelani osuka musurukhu awe munceene. Mwaarowa woonela sai? Woonasa wene, nyuwo mwaamuhakalala vanceene mwaha woowi ohoororomelani etthu yuulupale. Nave pooti wira mwaamuxanka muupuwelaka moota mwaarowa anyu okhapelela musurukhu owo wotheene. Mwa enamuna emosaru, Mpatthani ahu Yehova, ohaavaha anamuyari etthu ya faita yinceene ovikana musurukhu. Maana ohaavaha eparakha ya waakhapelela anaaya wira akhaleke saana ni ahakalaleke. Eyo enitaphulela exeeni?

2. Makoho xeeni ninrowa ahu othokorerya?

² Tani onireerela othanla okathi anamathelana anireerela aya waayara anamwane? Anamuyari anrowa waakhaliherya sai anaaya okhalana okumi woohakalaliha? Nrowe nithokorerye malakiheryo a mBiibiliyani anrowa waakhaliherya anamathelana maKristau opaka soothanla sooloka.

3. (a) Tani akhanle oothanla akhala wira anamathelana ahaana waayara anamwane aahiiso nnaari? (b) Malakiheryo xeeni a mBiibiliyani amusi ni apatthani anireerela aya wuupuwela?

³ Ilapo sikina, anamathelana a niinaano anlipeleliwa wira animwaayara anamwane moohipisa. Nave anamathelana akina annikhanyereriwa ni amusi aya wira ahaana waayara anamwane. Murokora Jethro, onikhala wÁsia onihimya so: “Mmulokoni, anna akina arina anamwane annaakhanyererya anamathelana  ahiyanre wira aahaana waayara anamwane”. Munna mukina a wÁsia oniihaniwa Jeffrey, ohimmye so: “Anna akina annaaleela anamathelana ahiyanre wira tani onrowa waakhapelelaka yuuluvala vale”. Masi muhiliyale wira anamathelana takhanle oothanla akhala wira animwaayara anamwane aahiiso nnaari. Owo muritti wa anamathelana awo. (aGal. 6:5) Ekeekhai wira apatthani ni amusi aniphavela wira anamathelana a niinaano ahakalaleke. Masi ahaana osuwela wira yoothanla ya waayara anamwane aahiiso ohaayara khahiyo yawaya ti ya anamathelana awo.—1 aTes. 4:11.

4-5. Itthu xeeni piili sootthuneya anamathelana anireerela aya ovaanela? Okathi xeeni anireerela aya ovaanela voohimya sa mwaha owo? Mutthokiherye.

⁴ Okathi anamathelana aniphavela aya waayara anamwane, ti va miruku wuupuwela itthu piili sootthuneya, itthu sene tiiya: Yoopacerya, okathi aniphavela aya waayara anamwane. Ya nenli, anamwane akavi aniphavela aya waayara. Okathi xeeni onireerela aya anamathelana ovaanela voohimya sa mwaha owo? Xeeni vari aya vooloka wuupuwela itthu iyo sootthuneya?

⁵ Ti vooloka anamathelana ovaanela mwaha ola wa waayara anamwane aahiiso nnaari nlelo ahithelanne, niire so, anamorariki. Mwaha wa xeeni? Mwaha woowi ti vooloka anamathelana okhalana moonelo mmosaru voohimya sa mwaha owo. Nave mulopwana ni muthiyana ahaana osuwela akhala wira anoowerya omaleliha muritti wookhala namuyari. Anamathelana akina annithanla waayara anamwane nuuvira eyaakha emosa wala piili athelanne ene. Awo annipaka eyo wira akhalane okathi woolimalelana ntoko anamathelana. Opaka eyo ennaakhaliherya okhalana waataana wooloka.—aÉf. 5:33.

6. Yuupuwelaka okathi ninkhala ahu, yoothanla xeeni anamathelana akina anipaka aya?

⁶ Anamathelana akina annithanla otthara ntakiheryo na anamwane araru a Nowe. Nuumala othelana awo khiyaayanre anamwane moowaakuveya. (Maph. 6:18; 9:18, 19; 10:1; 2 Ped. 2:5) Yesu aahilikanyiha mahiku ahu ala ni “mahiku a Nowé”, nave ninnikupali wira ninkhala “mahiku òxanka” ni oovila okhala. (Math. 24:37; 2 Tim. 3:1) Yuupuwelaka mixankiho iyo, anamathelana akina annithanla ohaayara anamwane wira avareke muteko wa Yehova okathi munceene.

7. Malakiheryo ari Luka 14:28, 29 ni Miruku 21:5 anrowa waakhaliherya sai anamathelana?

⁷ Vaavo anithanla aya waayara anamwane ni nummuru na anamwane anaaphavela aya, anamathelana a miruku ‘annikilathi,  anupuwela’ akhala wira anoowerya. (Mmusome Luka 14:28, 29.) Anamuyari arina sookumanana, anihimya wira waahuwa anamwane onihela muhina musurukhu, ohiya paahi okathi ni ikuru. Tivonto vari aya vooloka anamathelana wiikoha so: ‘Niireke otheene ahu ninrowa ovaraka muteko wira naahuwe aniihu? Niireke oowanli ahu ninnisuwela itthu emusi ahu eniphavela aya? Akhala wira otheene ahu ninrowa ovaraka muteko tani onrowa waakhapelelaka aniihu? Mutthu owo khonrowa ohonona muupuwelo ni mweettelo wa aniihu?’ Anamathelana anivaanela voohimya sa itthu iyo, annivarihela muteko malakiheryo ari Miruku 21:5.​—Musome.

8. Mixankiho xeeni anamathelana maKristau akhanle aya oolipelela? Mulopwana oophenta onipaka exeeni?

⁸ Mwaana oniphavela wira paapa ni maama aviriheke okathi ni ikuru saya amukhapelelaka. Tivonto, akhala wira anamathelana aakhalana anamwane arina iyaakha soolikana, vanoovila omuthokorerya khula mwaana moovarihana ni mikhalelo sawe. Anamathelana akina, yaarina anamwane anceene arina iyaakha sinoolikana, ahimmye wira yaahixanka vanceene. Nto maama pooti okhulumuwa mmuupuweloni ni mwerutthuni. Maama owo pooti ohikhalana okathi ni ikuru wira omusome Biibiliya, ovekela ni olaleerya ikwaha sinceene. Nave pooti ohivaha ephoole okathi wa mithukumano mmulokoni ni pooti ohittottela mureerelo. Mulopwana oothela ori oophenta onnimukhaliherya mwaarawe waakhapelela anamwane mmithukumanoni ni owaani. Mwa ntakiheryo, mulopwana owo ohaana waakhaliherya amwaarawe miteko sa vate. Owo onimwiimananiha Omulompa Muluku vatthokoni wira emusi yotheene ettottele mureerelo. Ohiya-vo, owo onoolaleeryaka vamosa ni emusi awe.

9-10. Anamuyari ahaana opaka exeeni wira yaakhaliherye anaaya?

⁹ Anamuyari ahaana opaka exeeni wira yaakhaliherye anaaya omphenta Yehova? Anrowa waakhapelela sai wira ahihapuxiwe ni olumwenku ola wootakhala? Nrowe niwehe itthu vakhaani anamuyari akhanle aya oopaka.

¹⁰ Munvekeleke Yehova nikhaliheryo. Nkahaya muupuwele ntakiheryo na Manowa ni mwaarawe, yaawo yaamuyanre Sansoni. Okathi Manowa aasuwenle awe wira aarowa oyara, owo ni mwaarawe yaahinvekela Yehova malakiheryo a moota woomuhuwa mwanaya.

11. Anamuyari anrowa otthara sai ntakiheryo na Manowa nri Makhulupale 13:8?

¹¹ Munna Nihad ni mwaarawe oniihaniwa Alma, yaawo anikhala oBósnia-Herzegovina ahiixutta etthu yuulupale ni ntakiheryo na Manowa.  Awo anihimya so: “Hiyo naahipaka etthu emosaru aapanke awe Manowa, naahimuxonttela Yehova wira onikhaliherye okhala anamuyari ooloka. Owo oonaakhula mwa inamuna soovirikana omurumeelaka Biibiliya, iliivuru sinikumiheriwa ni mutthenkeso ahu, mithukumano ni akongresu”.​—Mmusome Makhulupale 13:8.

12. Ntakiheryo xeeni Yosefe ni Maria yaavanhe aya anaaya?

¹² Nwiixuttiheke mwaavahaka ntakiheryo nooloka. Ele munipaka anyu enimwaakhaliherya vanceene aniinyu ovikana ele munihimya anyu. Tthiri ninnikupali wira Yosefe ni Maria yaahaavaha ntakiheryo nooloka anaaya, omuhela muhina Yesu. Yosefe aaniimananiha ovara muteko wira okhaliherye etthoko awe. Nave aanaatumererya atthu otheene a etthoko awe omphenta ni omurumeela Yehova. (Otum. 4:9, 10) Yosefe aanitthara Nlamulo naahimya wira ahooleli a itthoko yaahaana okuxa emusi aya “iyakha sothene” wira arowele Niira na Paasikha oYerusalemu. (Luka 2:41, 42) Woonasa wene, ahooleli a itthoko akina a okathi wa Yesu yuupuwela wira mukwaha ole woorowa oYerusalemu ni emusi yotheene waaniyeeha musurukhu munceene, okathi ni waanivaha muteko. Masi, Yosefe aanivaha efaita miteko sa omunepani ni aahiwiixuttiha anaawe opaka etthu emosaru. Nave Maria oovaha ntakiheryo nooloka. Owo aanisuwela oratteene Soolempwa. Moolumo ni miteko sa Maria saahimukhaliherya owiixuttiha anaawe Nuulumo na Muluku.

13. Anamathelana amosa atthanre sai ntakiheryo na Yosefe ni Maria?

¹³ Nihad ni Alma naalavunle ahu, yaaphavela otthara ntakiheryo na Yosefe ni Maria. Opaka eyo ehaakhaliherya waahuwa anaaya wira amphenteke Yehova. Moota xeeni? Awo anihimya so: “Okumi ahu wotheene naaphavela owooniherya aniihu oreera waya otthara malakiheryo a Yehova”. Nihad onnincererya oriki: “Mukhaleke mutthu a enamuna mwaaphavela anyu wira mwaninyu okhale”.

14. Xeeni vari aya vooloka anamuyari waasuwela apatthani a anaaya?

¹⁴ Mwaakhaliheryeke aniinyu waathanla apatthani ooloka. Paapa ni maama, ahaana waasuwela atthu anaaya anithweelana aya ni etthu anipaka aya. Eyo enihela muhina osuwela mammaru a atthu ari muselulaarini mwaya, atthu anivaanelana aya yaarumeelaka redes sociais. Musuweleke wira, atthu aniinyu anithweelana aya pooti waakhaliherya aahiiso nnaari.—1 aKor. 15:33.

15. Ntakiheryo na Jessie ninwiixuttiha exeeni anamuyari?

¹⁵ Anamuyari ahaana opaka exeeni akhala wira khanisuwela omurumeela saana komputadore aahiiso selulari? Jessie, paapa onikhala oFilipina onihimya so: “Hiyo khaninsuwela waarumeela saana aparelyo eletroniko. Masi eyo khennikhoottiherya waakhaliherya aniihu osuwela mixankiho sinikumiheriwa ni aparelyo eletroniko”. Owo khaakhoottihenrye anaawe waarumeela aselulaari ni atableti mwaha woowi khonsuwela orumeela ikaruma iyo. Nto onitthokiherya so: “Kaahaatumererya anaaka waarumeela aselulaari ni atableti wira yiixutte nttaava nsya, olokiherya mithukumano ni omusoma Biibiliya khula nihiku”. Akhala wira mookhalana anamwane, mpantta oni: “Amiravo” va jw.org pooti wookhaliheryani ophwanya malakiheryo anrowa waakhaliherya aniinyu okhalana moonelo wooloka voohimya sa ohela ni winviyari ifootu munternetini. Niireke moosoma malakiheryo awo ni moothokorerya ni aniinyu? Nave nyuwo pooti oweha eviidiyu eni: Murumeeleke Mwa Miruku Redes Sociais * ni Muheemye Opakeya Epottha ya Selulari Anyu. Malakiheryo  awo pooti waakhaliherya aniinyu waarumeela mwa miruku aselulari ni atableti.​—Mir. 13:20.

16. Anamuyari anceene anipaka exeeni ni etthu xeeni enikhumelela?

¹⁶ Anamuyari anceene anniimananiha wira anaaya akhalane apatthani ooloka anrowa waakhaliherya omurumeela Muluku. Mwa ntakiheryo, anamathelana Endêni ni Bomine yaawo anikhala oCosta do Marfim, yaanaalattula axitokweene a esirkwiitu omaka owannyeya ikwaha sinceene. Endêni onihimya so: “Opaka eyo yoomukhaliherya vanceene mwanihu. Vano owo pioneero ni namaranttela a mutokweene a esirkwiitu”. Niireke nyuwo pooti opaka mareheryo awo wira mwaakhaliherye aniinyu?

17-18. Okathi xeeni anamuyari anireerela aya opacerya owiixuttiha anaaya?

¹⁷ Nwiixuttiheke aniinyu nlelo ayenve ene. Owiixuttiha anamwane nlelo ari ene acikhaani etthu yooloka. (Mir. 22:6) Nkahaya mmuupuwele Timootheyo, yoowo nuumala wunnuwa aapanke mikwaha sa omisionaario ni murummwa Paulo. Maama awe Timootheyo Eunisi ni piipi awe iihaniwa Loide yaahimwiixuttiha “okhuma enamwane” awe.​—2 Tim. 1:5; 3:15.

¹⁸ Anamathelana akina a oCosta do Marfim, Jean-Claude ni Peace aawerya waahuwa anamwane 6 wira amphenteke ni omurumeela Yehova. Exeeni yaakhalihenrye okhumela saana? Awo yaahitthara ntakiheryo na Eunisi ni Loide. Awo anihimya so: “Hiyo naanaalakiherya aniihu Nuulumo na Muluku okhuma enamwane aya. Naapacenrye eyo ayariwakaru”.​—Otum. 6:6, 7.

19. Waalakiherya anamwane Nuulumo na Muluku, onihela muhina exeeni?

¹⁹ Ontaphulela exeeni ‘walakiherya’ anamwane Nuulumo na Yehova? ‘Olakiherya’ ontaphulela ‘otthikela (olavula etthu emosaru) ikwaha sinceene’. Wira apake eyo anamuyari ahaana oviriha okathi ari ene ni anaaya. Okathi mukina pooti oxankiha omakela otthikela waalakiherya anaaya itthu simosaru. Masi, anamuyari ahaana wiimananiha woona eyo ntoko eparakha wira yaakhaliherye anaaya wiiwexexa ni ovarihela muteko Nuulumo na Muluku.

20. Mutthokiherye moota Esalimo 127:4 enivarihana aya ni anamwane.

²⁰ Mwaasuweleke saana aniinyu. Esalimo 127 ennaalikanyiha anamwane ni mattheere. (Musome  Esalimo 127:4.) Ntoko siisaale mattheere anipakiwa aya ni ikaruma soovirikana ni anivirikana aya ni makina, anamwane annivirikana ni anamwane akina. Nto anamuyari ahaana osuwela moota anrowa aya omwiixuttiha khula mwaana. Anamathelana a wIsarael awenrye waahuwa saana anamwane anli wira amurumeeleke Yehova annihimya etthu yaakhalihenrye ariki: “Naahipacerya omusomiha Biibiliya khula mwaana okathi awe”. Khula emusi ehaana osuwela enamuna enrowa aya waasomihaka anaaya.

21. Nikhaliheryo xeeni Yehova onaavaha awe anamuyari?

²¹ Okathi mukina anamuyari pooti okhulumuwa mwaha wa mixankiho sinikhumelela vaavo anaahuwa aya anaaya. Masi ahaana wuupuwela wira anaaya avahiwe ni Yehova. Nto owo onniphavela waakhaliherya waahuwa saana. Yehova onniwiriyana mavekelo anamuyari anipaka aya. Nto musuweleke wira Yehova onnaakhula mavekelo awo omurumeelaka Biibiliya, iliivuru sinikumiheriwa ni mutthenkeso ahu, matakiheryo ni miruku sa anamuyari a mmulokoni arina sookumanana.

22. Itthu xeeni sa faita yinceene anamuyari akhanle aya oowaavaha anaaya?

²² Vanihimmwa wira, omuhuwa mwaana muteko wa iyaakha 20. Masi muhiliyale wira anamuyari khanikhala-khala ahiyaka okhala namuyari. Itthu sa faita yinceene anamuyari akhanle aya oowaavaha anaaya tiiya: ophenta, okathi ni owiixuttiha wira amurumeeleke Yehova. Ekeekhai wira khula mwaana onrowa ovarihela muteko mwa enamuna yoovirikana wiixuttihiwa iwo. Murokora Joanna Mae, yoowo onikhala wÁsia, onihimya so: “Kuupuwelaka moota anamuyari aka akiixuttinhe aya, kinnixukhurela mwaha wa okilakiherya ni okiixuttiha wira kimphenteke Yehova. Awo khahiyo paahi akivanhe okumi, masi-tho aakivaha okumi woohakalaliha”. (Mir. 23:24, 25) Imilyau sinceene sa anna ni arokora ahuuwale etthoko ya Anamoona a Yehova, arina moonelo mmosaru ntoko wa murokora Joanna Mae.