NIIREKE nyuwo mwa mutthu ooxukhuru? Tthiri otheene ahu nihaana wuupuwela saana nikoho nno. Biibiliya aahihimya vahinatthi wira mahiku ala ookiserya atthu anceene yaarowa okhala “òhixukhuru”. (2 Tim. 3:2) Woonasa wene, munnaasuwela atthu onaasivela okhaliheriwa aahiiso ovahiwa itthu paahi. Awo anoona wira anniphwanela wiireliwa itthu iyo, hata vari siiso, khanixukhurela. Niireke vaamoosivelani okhala ni atthu ntoko awo?

Moovirikana ni atthu awo, arumeyi a Yehova annitumereriwa okhala “atthu òxukhuru”. Nto nihaana oxukhurela “itthu sothene”. (aKol. 3:15; 1 aTes. 5:18) Nave okhala atthu ooxukhuru onninikhaliherya vanceene. Aakhala mathowa manceene anniiriha oxukhurela.

Nthowa nuulupale ninniiriha okhala atthu ooxukhuru, okhala wira oxukhuru onninikhaliherya okhalana moonelo wooloka. Okhala wene mutthu ooxukhuru, onnikhalana moonelo wooloka ni ole onixukhureliwa onnihakalala. Xeeni oxukhurela onihakalaliha aya? Nkahaya muupuwele ntakiheryo nla: Akhala wira mutthu onniviriha okathi owiirelakani etthu yooloka, eyo enooniherya wira nyuwo munniphwanela eyo. Owo onnookhapelelani. Nto vaavo munoona anyu wira munnikhapeleliwa, nyuwo munnikhalana moonelo wooloka ni munnihakalala. Tthiri ninnikupali wira eyo yaahimwiiraneela Ruthi. Maana Bowazi aahimureerela murima. Moohaanyiherya, Ruthi aahihakalala vanceene vaavo aamoonale awe Bowazi omukhapelelaka saana.—Ruth. 2:10-13.

Ti vooloka omuxukhurela Muluku. Tthiri okathi ti okathi nyuwo munnuupuwela itthu sooloka Muluku onoovahaaweni ni onivikaniha awe woovahani. (Otum. 8:17, 18; Mit. 14:17) Ohiya paahi wuupuwela oreera murima wa Muluku, mphavelaseke okathi wira muupuwelele mareeliho Muluku oovanhaaweni nyuwo ni ale munaaphenta anyu. Wuupuwelela ovaha wa Mpattuxa anyu onimookhaliheryani wuncererya omuxukhurela ni omuroromela Yehova ni woona wira onnoophentani ni wookhapelelani.​—1 Yoh. 4:9.

Masi muhisiveliweke paahi wuupuwelela moota Muluku onooniherya awe ovaha ni mareeliho onoovahaaweni. Nto mmuxukhureleke mwaha wa oreera wawe murima. (Esal. 100:4, 5) Mulipa oolepa aahimmye so: “Waaxukhurela atthu akina onniniphwanyiha ohakalala”.

Nthowa nikina ninniiriha okhala atthu ooxukhuru, okhala wira onnilipiha opatthani. Otheene ahu onninsivela oxukhureliwa. Vaavo mummuxukhurela anyu mutthu mukina ni murima wotheene mwaha woowiirelani etthu yooloka, oowanli anyu munnikhalana waataana wooloka. (aRom. 16:3, 4) Ohiya-vo, waaxukhurela onnaakhaliherya atthu awo. Awo annoona vaavo anreereliwa aya murima ni annaareerela murima atthu akina. Moohaanyiherya, waakhaliherya atthu akina onnihakalaliha. Tivonto Yesu aahimmye awe wira: “Mulipa-òvaha onoreriwa onvikana mulipa-òvahiwa”.—Mit. 20:35.

Robert Emmons, a wUniversidade Califórnia, yoowo onihoolela muteko woosoma voohimya sa oxukhuru, ohimmye so: “Wira nikhale atthu ooxukhuru, nihaana osuwela wira nihaana okhaliheryana mukina ni mukhaawe. Okathi omosa mutthu pooti onipakela etthu ni okathi mukina hiyo nihaana ompakela etthu mutthu  mukina wira nimukhaliherye”. Tthiri wira nikhale akumi ni ohakalala nihaana okhaliheriwa ni atthu akina mwa inamuna soovirikana. Mwa ntakiheryo, atthu akina pooti onivaha yoolya aahiiso mirette. (1 aKor. 12:21) Mutthu ooxukhuru, onnivaha efaita itthu atthu akina anipaka aya. Okhala wira ti siiso, niikoheke so: Kiireke kinnaaxukhurela atthu akina anikiirela itthu sooloka?

Nthowa nikina ninniiriha okhala atthu ooxukhuru mwaha woowi oxukhurela onninikhaliherya oweha itthu sooloka ohiya soohiloka. Muupuwelo ahu onikhala ntoko efiltru. Owo onninikhaliherya woona itthu sooloka siniiraneya ni ottiyelela itthu sikina. Nto niimananiheke wuupuwelela itthu sooloka ohiya soohiloka. Vaavo muntepa anyu okhala mutthu ooxukhuru munimoonaka itthu sooloka nto munootepaka oxukhurela. Vaavo muniimananiha anyu oweha itthu mukhanle anyu ooxukhurela, eyo enimookhaliheryani opaka ele Paulo onitumerenrye awe oriki: “Mutteliweke murima mw’Apwiya, okathi wothene”.​—aFil. 4:4.

Munimoona wira oxukhurela onninikhaliherya ohuupuwela itthu soohiloka. Vannivila okhala mutthu ooxukhuru, okathi omosa-ru onaakhalela atthu nrima, oriipiwa murima ni owunlela ikuhu atthu akina. Okhala wene, atthu ooxukhuru khaniwehexexa itthu sa werutthuni. Awo annivaha efaita itthu arina aya ni khammakela ophavela itthu sikina.​—aFil. 4:12.

Okhala wira mwa muKristau, munnisuwela wira Satana oniphavela wira muriipiweke murima ni okhulumuwa mwaha wa mixankiho sinoophwanyani mahiku ala ookiserya. Owo aamusiveliwa woowehani murina ene moonelo woohiloka ni mwiixinlihaka mwaha wa khula etthu. Moonelo owo onniwiiriha atthu anceene ohoowiriyanani okathi munaalaleerya anyu ihapari sooreera. Tthiri oxukhurela onnivarihana ni yoowiima ya munepa wa Muluku. Mwa ntakiheryo, hiyo ninnihakalala vaavo nnoona ahu itthu sooloka Yehova onnivaha awe ni ninnaamini itthu sotheene oleihenrye awe muhoolo.​—aGal. 5:22, 23.

Okhala Namoona a Yehova, woonasa wene ohookhaliheryani weemererya itthu sotheene sihimmwale mwaha ola voohimya sa oxukhuru. Nave muhoona wira khahiyo vookhweya okathi wotheene oxukhurela ni okhalana moonelo wooloka. Muheemererye eyo yookhulumulakani. Nyuwo munoowerya okhalana ni ovikaniha okhala mutthu ooxukhuru. Moota xeeni? Khula nihiku, mwaavyeke okathi wira muupuwele itthu sooloka sikhumelenle mookumini mwanyu sinrowa wookhaliheryani okhala mutthu ooxukhuru. Vaavo munrowa anyu otepaka opaka eyo, vanimookhweelakani waaxukhurela atthu akina. Opaka eyo, enimoophwanyihani ohakalala ni munooliyalaka mixankiho sanyu. Wuupuwela itthu sooloka Muluku ni atthu akina anoopakelaayani, onimoophwanyihani ohakalala wekeekhai. Nyuwo pooti opacerya niinaano-va olepa itthu iyo. Khula nihiku, nyuwo pooti olepa etthu emosa wala piili siniwiirihani okhala mutthu ooxukhuru.

Atthu anisoma voohimya sa oxukhuru, anihimya wira oxukhurela pooti oturuka moota oramattha aahiiso ottoopare ahu onivara awe muteko ni okhalana moonelo wooloka. Tivonto, muupuweleke mareeliho ni muttotteleke mureerelo itthu sooloka sinikhumelela mookumini mwanyu wira mukhale mutthu ooxukhuru! Ohiya wuupuwela wira munniphwanela itthu sooloka sinookhumelelani mookumini mwanyu, okathi wotheene mmuxukhureleke Yehova “mana t’òrera murima”, ni muhiliyaleke omooniherya omuxukhurela wanyu “Muluku mwa itthu sothene”.​—1 Wah. 16:34; 1 aTes. 5:18.