1-2. Yowiiraneya ya munna Angelito, enniixuttiha exeeni?

NIIREKE muyariwe etthoko ya Anamoona a Yehova? Akhala wira ti siiso, muhiliyale wira okhalana waataana woolipa ni Yehova khonaamweliwa mmapeleni. Hata anamuyari ahu amurumeelaka Yehova aahiiso nnaari, otheene ahu nihaana olipiha waataana wahu ni Yehova.

² Nkahaya nwehe ntakiheryo na munna Angelito. Atthu otheene a etthoko awe, Anamoona a Yehova. Masi okathi ari awe mmiravo, Angelito aahoona wira khaarina waataana woolipa ni Yehova. Owo onihimya so: “Miyo kaamurumeela Yehova mwaha woowi kaatakiha amusi aka”. Masi Angelito aahilakela oviriha okathi munceene omusomaka Biibiliya, wuupuwelela ele aasoma awe ni onvekela Yehova ikwaha sinceene. Yaakhumelenle exeeni? Angelito onivikaniha oriki: “Kahiixutta wira enamuna emosa yaarowa okikhaliherya okhalana waataana woolipa ni Tiithi aka a wiirimu Yehova, waari omusuwela oratteene mmensaka”. Yowiiraneya ya Angelito ennikumiherya makoho ala otthuneya ani: Ontaphulela exeeni osuwela itthu vakhaani paahi voohimya sa Yehova ni omusuwela oratteene? Nihaana opaka exeeni wira nimusuwele oratteene Yehova?

3. Ovirikana xeeni okhanle eriyari ya osuwela itthu vakhaani paahi voohimya sa Yehova ni omusuwela oratteene?

³ Hiyo pooti wuupuwelaka wira mutthu onnimusuwela Yehova mwaha woowi osuwela nsina na Muluku, itthu ohimmye awe aahiiso opanke awe. Opaka eyo khontaphulela wira ninnimusuwela oratteene Yehova, maana sookhala itthu sikina ninreerela ahu opaka wira nimusuwele oratteene Yehova. Nihaana oviriha okathi niixuttaka voohimya sa Yehova ni mikhalelo sawe sookuxa murima. Nuumala-vo, nnoopacerya osuwela etthu enimwiiriha  Yehova ohimya aahiiso opaka etthu eyo. Opaka eyo enoonikhaliherya osuwela akhala wira Yehova onneemererya wala nnaari muupuwelo, moonelo, soothanla ni itthu nimpaka ahu. Nuumala osuwela ele Yehova oniphavela awe wira nipakeke, nihaana opaka yeeyo.

4. Othokorerya matakiheryo a mBiibiliyani annikhaliherya sai?

⁴ Atthu akina pooti oniramusa mwaha woowi nimphavela omurumeela Yehova. Itthu iyo pooti otepa onixankiha vaavo nimpacerya ahu orowela mithukumano. Tthiri, akhala wira ninnimuroromela Yehova, owo khonikhala-khala onihiyaka. Omuroromela iwo, onoonikhaliherya okhalana waataana wooloka ni yena okumi ahu wotheene. Niireke nnoowerya omusuwela oratteene Yehova ni okhala mpatthani awe? Aayo, nnoowerya! Matakiheryo a alopwana oohimalela ntoko Moise ni Mwene Davidi, annooniherya eyo. Vano nrowe nithokorerye itthu yaapanke aya wira naakhule makoho ala manli ani: Yaamusuwenle sai oratteene Yehova? Nniixutta exeeni ni ntakiheryo naya?

5. Moise aathanlale opaka exeeni?

⁵ Moise aahithanla omurumeela Muluku. Okathi aarina awe iyaakha 40, Moise aahithanla okhala ni atthu a Muluku, eyo piiyo, aHeberi ohiya osuweliwa ntoko “mwana a mwana muthiyana a mwené a wEjitu”. (aHéb. 11:24) Moise aahikhootta okhala mutthu oovuwa. Nto Moise aanisuwela wira waakhaliherya aHeberi wammwiiriha Farawo onanariwa. Farawo aari mwene owerya a okathi ole ni atthu a wExiitu yaamuthokorerya ntoko muluku. Tthiri eyo enooniherya wira Moise ahikhalana waamini woolipa! Moise aanimuroromela Yehova. Omuroromela Yehova waahimukhaliherya Moise okhalana waataana woolipa ni Yehova okumi awe wotheene.​—Mir. 3:5.

6. Ntakiheryo na Moise ninniixuttiha exeeni?

⁶ Nniixutta exeeni? Nimutakihaka Moise, otheene ahu nihaana othanla okhala vamosa ni atthu a Muluku aahiiso nnaari. Nihaana wiimananiha omurumeela Muluku hata atthu ale ahinimusuwela Yehova aninyokhaka. Nisuweleke wira namuroromela Tiithi ihu a wiirimu, owo onoonikhaliherya!

7-8. Exeeni Moise aavikaninhe awe wiixutta?

⁷ Moise aahivikaniha wiixutta mikhalelo sa Yehova ni opaka yootthuna awe. Mwa ntakiheryo, okathi Yehova anvekenle awe Moise owoopola aIsarayeli weepotthani wExiitu, Moise aahiihoverya ni aahimuleela Yehova ikwaha sinceene wira khaarowa owerya ovara muteko ole. Yehova aahimoonela othunku, eyo piiyo, aahisuwela mooneelo wa Moise ni aahimukhaliherya. (Okhum. 4:10-16) Exeeni yaakhumelenle? Moise aahiwerya opaka yootthuna ya Muluku ni aahimuleela muhupi woophukela Mwene Farawo, yoowo aathokoreriwa ntoko muluku. Moottharelana Moise aahimoona Yehova orumeelaka ikuru sawe vaavo ampwetenxe awe Farawo ni anakhotto awe Ephareya Yooxeerya.​—Okhum. 14:26-31; Esal. 136:15.

⁸ Nuumala owoopola aIsarayeli wExiitu, ikwaha sinceene aIsarayeli ale yaaniixinliha. Hata vari siiso, Yehova aanaapixerya murima, nto Moise aanoona opixa murima wa Yehova. (Esal. 78:40-43) Nave, Moise aahoona wiiyeviha wa Yehova vaavo aamuxonttenle awe Yehova wira oturuke muupuwelo awe. Nto Yehova aahinwiriyana.​—Okhum. 32:9-14.

9. Moovarihana ni aHéberi 11:27, waataana wa Moise ni Yehova waari sai?

⁹ Nuuvira okathi ole wa Mothakoni, waataana wa Moise ni Yehova waahitepa olipa onakhala ntoko wira Moise anweha Tiithi awe a wiirimu. (Mmusome aHéberi 11:27.)  Biibiliya onnooniherya waataana wa Moise ni Yehova, oriki: “Apwiya yanlavula ni Moise, ekhove n’ikhove, ntoko mutthu onivanela ni mukhw’awe”.​—Okhum. 33:11.

10. Wira nimusuwele oratteene Yehova nihaana opaka exeeni?

¹⁰ Etthu xeeni nniixutta ahu? Wira nimusuwele oratteene Yehova, khomphiyerya paahi osuwela mikhalelo sawe, masi nihaana opaka yootthuna awe. Olelo-va, Yehova oniphavela wira “atthu othene yòpowe, esuwele ekekhai”. (1 Tim. 2:3, 4) Enamuna emosa nnooniherya ahu wira ninnipaka yootthuna ya Muluku, ori owiixuttiha atthu voohimya sa Yehova.

11. Xeeni ohimyaka wira vaavo ninwiixuttiha ahu atthu akina ninnimusuwela oratteene Yehova?

¹¹ Okhala wene, vaavo nnaalaleerya ahu atthu voohimya sa Yehova, ninnimusuwela oratteene Yehova. Mwa ntakiheryo, ninnoona moota Yehova oniwoonela awe othunku atthu vaavo onnikhaliherya awe waaphwanya ale aniphavela okhala apatthani awe. (Yoh. 6:44; Mit. 13:48) Ninnoona owerya wa nuulumo na Muluku, vaavo nnaaweha ahu ale nnaasomiha ahu Biibiliya apakaka marukunuxo mookumini mwaya ni owara omutthu musya. (aKol. 3:9, 10) Nave ninnoona opixa murima wa Muluku vaavo onaavaha awe eparakha atthu anceene a muttetthe ahu wira amusuwele ni yoopowe.​—aRom. 10:13-15.

12. Moovarihana ni Okhuma 33:13, Moise aavekenle exeeni ni nthowa xeeni?

¹² Moise aanivaha efaita yinceene waataana wawe ni Yehova. Okhaliheriwaka ni Yehova, Moise aahipaka miiriirya sinceene, hata vaari siiso, Moise aahimuxonttela Yehova wira omusuwele oratteene. (Mmusome Okhuma 33:13.) Okathi aapanke awe yooveka eyo, Moise aarina iyaakha saavikana 80. Nlelo aanisuwela wira aahaana omusuwela oratteene Tiithi awe a wiirimu.

13. Enamuna xeeni nnooniherya ahu wira ninnivaha efaita waataana wahu ni Yehova?

¹³ Etthu xeeni nniixutta ahu? Hata nipacenrye ene khalai aahiiso niinaano omurumeela Yehova, nihikhala-khale nuupuwelaka wira waataana wahu ni yena khonikhala-khala ohononeyaka. Nihaana ovaha efaita waataana wahu ni yena. Enamuna emosa nikhanle ahu oopaka eyo, ori onvekela okathi wotheene.

14. Ovekela onnikhaliherya sai omusuwela oratteene Muluku?

¹⁴ Ovaanela, etthu yuulupale ennikhaliherya okhalana waataana wooloka ni atthu akina. Nto muhaana ovaanela ni Yehova ni muhooveleleke omuleela itthu sotheene siri vamurimani vanyu. (aÉf. 6:18) Murokora Krista, yoowo onikhala oTurquia, onihimya so: “Okathi wotheene kinvaanela aka ni Yehova kimuleelaka muupuwelo ni mixankiho saka, kinnoona wira onnikikhaliherya, nto omphenta waka ni omuroromela onnilipa. Nave vaavo kinoona aka wira onnaakhula mavekelo aka, kinnimoona Yehova okhala Tiithi ni Mpatthani aka”.

15. Yehova aahimmye exeeni sa Mwene Davidi?

¹⁵ Mwene Davidi aayariwe nloko naamukokhorela Yehova Muluku. Masi Davidi khaamukokhorela Yehova mwaha wa waatakiha anamuyari awe aahiiso atthu a nloko nawe. Davidi aahikhalana waataana wooloka ni Muluku, nto Yehova aanimphenta vanceene. Yehova ahimmye wira Davidi “mulopwana onettela murim’aka”. (Mit. 13:22) Davidi aawenrye sai okhalana waataana woolipa ni Yehova?

16. Okathi aaweha awe soopattuxiwa, Davidi iixuntte exeeni ni Yehova?

¹⁶ Soopattuxiwa saahimukhaliherya Davidi omusuwela Yehova. Okathi aari awe mmiravo, owo aanikhala okathi munceene okhapelelaka ipwittipwitthi sa tiithi awe mmathalani.  Woonasa wene, okathi ole Davidi aanuupuwelela vanceene itthu Yehova opattunxe awe. Mwa ntakiheryo, ohiyu, okathi aaweha awe erimu, Davidi khahiyo paahi aaweha imilyau sinceene sa itheneeri. Maana, Davidi aaniweha mikhalelo sa Muluku, yoowo opattunxe itheneeri. Owo aalempe so: “Erimu ennilaleya ovuwa wa Muluku: itheneri sinnivuwiha miteko sa matat’awe”. (Esal. 19:2, 3) Vaavo Davidi uupuwela awe moota apinaatamu apattuxiwe aya, owo aahoona wira Yehova ookhalana ankhili anceene. (Esal. 139:14) Okathi Davidi uupuwelela awe itthu sotheene Muluku opattunxe awe, owo aaniixoona okhala mwaamukhaani iilikanyiha ni Yehova, Muluku muulupalexa.​—Esal. 139:6.

17. Vaavo nnuupuwela ahu soopattuxiwa etthu xeeni nikhanle ahu oowiixutta?

¹⁷ Exeeni nnixutta ahu? Niimananiheke osuwela itthu Yehova opattunxe awe. Nviriheke okathi nwehaka itthu soopattuxiwa ni musiveliweke ni itthu soohakalaliha siri valaponi! Khula nihiku muupuweleke etthu soopattuxiwa sikhanle aya oowiixuttihani voohimya sa Yehova ntoko miri, inama ni atthu. Mwiira siiso, khula nihiku mookumini mwanyu munimwiixuttaka itthu voohimya sa Tiithi inyu oophenta Yehova. (aRom. 1:20) Nave munimoona wira, vaavo okathi onivira aya omphenta wanyu Yehova onoolipaka.

18. Ntoko enooniherya aya Esalimo 18, Davidi aasuwela exeeni?

¹⁸ Davidi aanisuwela wira aanikhaliheriwa ni Yehova. Mwa ntakiheryo, okathi aakhapelenle awe ipwittipwitthi sa tiithi awe wira sihikhuuriwe ni kharamu ni havara, Davidi aahoona wira aahiwerya wiiva inama iye sowoopiha okhaliheriwaka ni Yehova. Okathi aamwiivale awe nakhotto ootupa iihaniwa Goliyathi, Davidi aahoona wira aakhaliheriwa ni Yehova. (1 Sam. 17:37) Nave okathi ooponwe awe mmatatani mwa Mwene Sawuli, Davidi aahisuwela wira oopoliwe ni Yehova. (Esal. 18, muru) Vaakhanle wira Davidi ari mutthu oowiixinnuwiha, owo aarowa ohimyaka wira itthu iyo sotheene aapaka ni ikuru sawe. Masi, okhala wira aari oowiiyeviha, Davidi aanisuwela wira aakhaliheriwa ni Yehova.​—Esal. 138:6.

19. Ntakiheryo na Davidi ninniixuttiha exeeni?

¹⁹ Nniixutta exeeni? Khivaniphiyerya paahi onvekela Yehova nikhaliheryo. Nihaana woona okathi ni moota Yehova onnikhaliherya awe. Akhala wira na atthu oowiiyeviha, nnoosuwelaka wira sookhala itthu ninwerya ahu ni nihinwerya ahu. Eyo enoonikhaliherya woona moota Yehova onnikhaliherya awe vaavo nimpaka ahu etthu nihaarowa ahu owerya mekhihu. Okathi owo waataana wahu ni Muluku onoolipa vanceene. Munna oniihaniwa Isaac, yoowo onikhala oFiji ni onimurumeela Yehova mwa iyaakha sinceene aahoona wira eyo ekeekhai. Owo onihimya so: “Vaavo kinuupuwela aka itthu saakikhumelenle, kinnoona wira Yehova onnikikhaliherya okhuma okathi kaapacenrye aka omusoma Biibiliya mpakha olelo-va. Eyo yookikhaliherya woona wira Yehova teekeekhai”.

20. Exeeni nniixutta ahu ni waataana Davidi aarina awe ni Yehova?

²⁰ Davidi aanitakiha mikhalelo sa Yehova. Yehova onipattunxe wira nitakiheke mikhalelo sawe. (Maph. 1:26) Vaavo nintepa ahu osuwela mikhalelo sa Yehova, onninikhweela otakiha mikhalelo iyo. Davidi aahimusuwela oratteene Tiithi awe a wiirimu, tivonto aanimutakiha Yehova okathi aathokorerya awe atthu akina. Nkahaya nwehe ntakiheryo nimosa. Davidi aahimutthekela Yehova vaavo aararunwe awe ni Bathi-Xeba ni aamwiivinhe awe iyawe Bathi-Xeba. (2 Sam. 11:1-4, 15) Yehova aahimmorela  ikharari Davidi. Mwaha wa xeeni? Mwaha woowi Davidi aanaamorela ikharari atthu akina. Mwaha wookhalana waataana wooloka ni Yehova, Davidi aahikhala Mwene oophentiwa vanceene ni aIsarayeli, nave Yehova aahimurumeela ntoko ntakiheryo nooloka wira aakhaliherye mamwene makina a wIsarayeli.​—1 Mam. 15:11; 2 Mam. 14:1-3.

21. Moovarihana ni aÉfeso 4:24 ni 5:1, mireerelo xeeni nimphwanya ahu vaavo nimmutakiha ahu Muluku?

²¹ Etthu xeeni nniixutta ahu? Nihaana omutakiha Muluku. Vaavo nimmutakiha ahu Muluku, ninniphwanya mireerelo ni onninikhaliherya omusuwela oratteene. Nave vaavo nintakiha ahu mikhalelo sa Yehova, ninnooniherya wira na anaawe.​—Mmusome aÉfeso 4:24; 5:1.

22-23. Exeeni enrowa wiiraneya akhala wira ninnivarihela muteko ele nniixutta ahu voohimya sa Yehova?

²² Ntoko niwenhe ahu, Yehova onninooniherya mikhalelo sawe omurumeelaka Biibiliya ni soopattuxiwa. Biibiliya ookhalana matakiheryo manceene a arumeyi oororomeleya a Muluku yaawo nikhanle ahu oowaatakiha ntoko Moise ni Davidi. Yehova oopaka mpantta awe. Nave hiyo nihaana opaka mpantta ahu. Wira nipake eyo, nihaana ovikaniha orumeela maitho ahu, maaru ahu ni murima ahu wira nimusuwele oratteene Yehova.

²³ Khaninkhala-khala nihiyaka wiixutta voohimya sa Yehova. (Mus. 3:11) Etthu yootepa otthuneya khahiyo okathi nniixutta ahu voohimya sa Yehova. Masi etthu yootepa otthuneya ovarihela muteko ele nniixutta ahu. Vaavo nimpaka ahu eyo, ninnimutakiha Tiithi ahu oophenta Yehova ni owo onoovikanihaka onaattamela. (Yak. 4:8) Nuulumo nawe ori Biibiliya onninlipiherya wira khonikhala-khala aanyanyalaka ale aniimananiha omusuwela oratteene.