Woonasa wene, nnaari. Mwaha woowi Diabo khaahimmye wira Eva alya vale muhokorokho wookhoottihiwa, aarowa okhalaka ntoko wira orimookhwa ni khaahimmye wira mpantta mukina wa erutthu awe ehinooneya yanvikaniha okhalaka (yeeyo olelo-va atthu anceene anihimya aya wira eroho). Orumeelaka enowa, Satana aahimuleela Eva wira alya vale muhokorokho wookhoottihiwa, khaarowa ‘okhwa’. Ela enooniherya wira Eva alya muhokorokho wa mwiri ole anvikaniha okhala mukumi ohimwiiwelelaka Muluku.​—Maph. 2:17; 3:3-5.

Akhala wira yowiixuttiha yoowootha ya ohikhwa wa erooho khepacenrye wEdeni, nto epacenrye silini? Khaninsuwela oratteene okathi epacenrye aya. Etthu ninsuwela ahu ti yoowi okokhorela weethiru, waahipwetexiwa okathi wa Epula ya Mutaaseke a mahiku a Nowe. Okhala wira atthu yooponwe taale yaamukokhorela Yehova mwekeekhai, eyo piiyo, Nowe ni emusi awe, nto khaakhanle nnakhala mutthu mmosa iixuttiha itthu sowootha.

Eyo enooniherya wira yowiixuttiha ya ohikhwa wa erooho, epacenrye nuumala Mutaaseke. Tthiri okathi Muluku aavirikanyinhe awe malavulelo oBabeli, atthu yaahimwareela “mulaponi mothene”, nto mapuro yaarowa aya yaahikhalana muupuwelo woowi apinaatamu aakhalana erooho ehinikhwa. (Maph. 11:8, 9) Moohicikha okathi epacenrye aya yowiixuttiha eyo, ninnikupali wira Satana Diabo “tithi a wothá” tiirinhe wootha iwo, maana owo onnisiveliwa oonaka wootha iwo omwareelaka mulaponi motheene.​—Yoh. 8:44.