1. Atthu anceene anoonela sai ovara muteko?

ATTHU a muttetthe munkhala anyu anoonela sai ovara muteko? Ilapo sinceene, atthu annitepa ovara muteko ovikana khalai. Atthu yaale anivara muteko mootepana, khanikhalana okathi woomumula, oviriha okathi ni emusi aya ni ophavela omusuwela Muluku. (Mus. 2:23) Nave, aakhala atthu ahiniphavela ovara muteko. Awo anniimananiha waavya mathowa wira ahivareke muteko.​—Mir. 26:13, 14.

2-3. Yehova ni Yesu anivanhe ntakiheryo xeeni na ovara muteko?

² Moovirikana ni atthu a mulaponi, Yehova ni Yesu aakhalana moonelo wooloka voohimya sa ovara muteko. Moohaanyiherya, hiyo ninnisuwela wira Yehova onnisiveliwa ovara muteko. Yesu aahiiwanyeiha eyo vaavo aahimmye awe so: “Atithi aka annivara muteko mahiku othene: ni miyo-tho kinnivara!” (Yoh. 5:17) Nkahaya muupuwele muteko Yehova aarina awe vaavo aapanke awe malaikha manceene ari wiirimu, itheneeri ni elapo. Nave ninnoona itthu sinceene sinooniherya muteko wa Muluku vaavo ninweha ahu itthu opattunxe awe valaponi. Eyo ti etthu yaamwiirinhe nasalimo ohimya so: “Apwiya! Miteko sanyu ti sowatta! Elapo yosareya itthu sipattuxalyanyu: nyuwo mopaka sothene seiyo n’ankhili”.​—Esal. 104:24.

³ Yesu aamutakiha Tiithi awe. Owo aahimukhaliherya opattuxa ni “olipiha erimu”, nto Yehova aanimoona Mwanawe ntoko muratti a miteko sawe. (Mir. 8:27-31) Nuuvira iyaakha sinceene, Yesu aahirwa valaponi ni aahivara muteko munceene. Owo aanithokorerya muteko awe ntoko yoolya ni itthu sotheene Yesu aapanke awe ori ene valaponi aanooniherya wira aarummwale ni Muluku.​—Yoh. 4:34; 5:36; 14:10.

4. Ntakiheryo na Yehova ni Yesu voohimya sa omumula ninniixuttiha exeeni?

 ⁴ Niireke ntakiheryo na ovara muteko wa Yehova ni Yesu nnooniherya wira khivanreerela omumula? Nnaari. Yehova khonakhulumuwe ni khonikhala-khala okhulumuwaka. Tivonto, owo khontthuneya omumula. Masi Biibiliya onihimya wira, nuumala opattuxa erimu ni elapo Yehova ‘ahimumula’. (Okhum. 31:17) Eyo enooniherya wira Yehova aahihiya opattuxa itthu wira owehe itthu sotheene sooloka aapanke awe. Nave, okathi aari awe valaponi, Yesu aaniluttuweliwa ovara muteko, masi aaniphavelasa okathi wira omumule ni olya yoolya ni apatthani awe.​—Math. 14:13; Luka 7:34.

5. Etthu xeeni ekhanle oowaaxankiha arumeyi a Muluku?

⁵ Biibiliya onnaatumererya atthu a Muluku ovara muteko. Awo ahaana oluttuweliwa ovara muteko ohiya okhala atthu oolosowa. (Mir. 15:19) Woonasa wene, muhaana ovara muteko wira mulyiheke etthoko anyu. Nave atthareli otheene a Kristu aakhalana muritti woolaleya ihapari sooreera sa Omwene. Hata vari siiso, nyuwo muhaana okhalana okathi wira mphumurye. Niireke onnoovilani ohela nipuro nooloka okathi woovara muteko, olaleerya ni omumula? Ninrowa osuwela sai okathi ninreerela ahu oviriha nivaraka muteko ni okathi ninviriha ahu nimumulaka?

6. Moovarihana ni Marko 6:30-34, exeeni enooniherya wira Yesu aahikhalana moonelo wooloka voohimya sa ovara muteko ni omumula?

⁶ Ti vooloka okhalana moonelo wooloka voohimya sa muteko. Mwene Salomoni aahuupuxeriwa ni Muluku olepa so: “Itthu sothene . . . sokhalana okathi aya”. Owo aahimmye wira wookhala okathi wowaala, wooteka, woowunla, wootheya, woowiina ni okathi woovara miteko sikina. (Mus. 3:1-8) Moohaanyiherya, itthu piili sootthuneya mookumi ti ovara muteko ni omumula. Yesu aahikhalana moonelo wooloka voohimya sa ovara muteko ni omumula. Okathi omosa, arummwa awe yaahiluttuweliwa vanceene olaleerya, nto “khiyàrina nnákhala okathi w’olya”. Vano Yesu aahaaleela wira: “Nyuwano murwé wiphini, nipuro nihinviraviriwa: mwamumule vakhani”. (Mmusome Marko 6:30-34.) Nnaamwi Yesu ni awiixutti awe yahaakhalana okathi woomumula okathi yaaphavela aya, Yesu aanisuwela wira ti vootthuneya omumula.

7. Othokorerya Nlamulo na Esaabadu, ninrowa onikhaliherya sai?

⁷ Okathi ti okathi, otheene ahu ninniphavela omumula aahiiso ohiya miteko ninvara ahu khula nihiku. Nlamulo Yehova aavanhe awe aIsarayeli ninnooniherya eyo. Nno naari nlamulo na Esaabadu ya khula esumana. Ekeekhai wira hiyo khaninkhanyereriwa weettela Nlamulo na Esaabadu, masi nnoottottela mureerelo othokorerya Nlamulo na Esaabadu. Nave nnoonikhaliherya osuwela moonelo ahu voohimya sa ovara muteko ni omumula.

8. Moovarihana ni Okhuma 31:12-15, Esaabadu naari nihiku na xeeni?

⁸ Nuulumo na Muluku ninhimya wira nuuvira mahiku 6 Muluku opattuxaka itthu, owo aahihiya opattuxa itthu valaponi. (Maph. 2:2) Tthiri Yehova onnisiveliwa ovara muteko, tivonto owo ‘onnivara muteko’ mwa inamuna sikina. (Yoh. 5:17) Ntoko siisaale Yehova aaphumunrye awe nihiku na Esaabadu, aIsarayeli nave yaanimumula nihiku na Esaabadu. Muluku aahimmye wira Esaabadu yaari ekanyeryo ya Yehova ni aIsarayeli. Nave naari “nihiku n’omumula, noreriheliwa Apwiya”. (Mmusome Okhuma 31:12-15.) Khuuvo mutthu aavara muteko nihiku na Esaabadu waahela muhina anamwane, ipottha  ni inama sinihuuwa. (Okhum. 20:10) Opaka eyo, yaanaakhaliherya aIsarayeli ovaha ephoole myaha sa omunepani.

9. Okathi wa Yesu, moonelo xeeni woohiloka waakhanle voohimya sa Nlamulo na Esaabadu?

⁹ Nihiku na Esaabadu naanaakhaliherya atthu a Muluku. Masi ahooleli anceene a etiini a mahiku a Yesu yaanirumeela Nlamulo na Esaabadu mwa enamuna yoohiloka ni yootakhala. Ahooleli akina, yaahimya wira Esaabadu khivaareerela ohepha ipyo mmatta aahiiso ompenuxa mutthu oniwereiwa. (Mar. 2:23-27; 3:2-5) Moonelo wa ahooleli ale a etiini khiwaavarihana ni moonelo wa Muluku, nto Yesu aahiiwanyeiha eyo saana.

10. Ntoko onihimya awe Matheyo 12:9-12, Yesu oonela sai Esaabadu?

¹⁰ Yesu ni atthareli awe aYuda yaanitthara nlamulo na Esaabadu mwaha woowi yaahaana wiiwelela Nlamulo na Moise. * Moolumo ni miteko sa Yesu saahooniherya wira mareheryo a Esaabadu yaaniweemererya atthu okhala ooreera murima ni waakhaliherya atthu akina. Tthiri Yesu aahimmye so: “Ikano sahu sinnitthuniherya ovara miteko sorera nihiku na Sábadu”. (Mmusome Matheyo 12:9-12.) Yesu khuupuwela wira mutthu aavara miteko sooreera wira aakhaliherye atthu akina, khaiwelela Nlamulo na Esaabadu. Itthu Yesu aapanke awe, aahooniherya wira aanisuwela nthowa naya Yehova aavanhe atthu awe Nlamulo nne. Mwaha woowi, Saabadu naari nihiku noophumurya naavaha eparakha aIsarayeli omukokhorela Muluku. Yesu aahuuwale etthoko yaarina yoolema yoovara miteko sa omunepani  nihiku na Esaabadu. Ninnisuwela eyo mwaha woowi, Biibiliya onihimya wira okathi Yesu aari awe oNazarethi epooma aayariwe awe: “Ahikela mpani mothukumana, yaihaniwa sinagoga, ntoko salimalenlyawe”.​ —Luka 4:15-19.

11. Ntakiheryo xeeni na wiimananiha ovara muteko Yesu ovanhe awe?

¹¹ Tthiri Yosefe aahimwiixuttiha Yesu okhala kalapintero ooloka ni okhalana moonelo wa Muluku voohimya sa muteko. (Math. 13:55, 56) Nave Yesu aanimoona Yosefe iimananihaka vanceene ovara muteko khula nihiku wira olyihe etthoko awe. Nto ninnoona nthowa naya Yesu aalenle awe awiixutti awe wira: “Namuteko oniphwanela oliviwa”. (Luka 10:7) Yesu aaniimananiha ovara muteko.

12. Soolepa xeeni voohimya sa okumi wa Paulo sinooniherya moonelo wa Biibiliya voohimya sa ovara muteko?

¹² Murummwa Paulo aaniimananiha ovara muteko. Muteko awe muulupale waari waalaleerya aYuda voohimya sa Yesu ni ele iixuttinhe awe. Hata vaari siiso, Paulo aaniimananiha ovara muteko wira ophwanyeke yoolya. Anna a muloko wa oTesalonika, yaanisuwela wira Paulo ‘anikukhumuwa ohiyu n’uthana ovaraka muteko, wira ohimùkhule nnákhala’ mutthu mmosa. (2 aTes. 3:8; Mit. 20:34, 35) Ni moolumo ala, vanikhala ntoko wira Paulo aahimya muteko awe wa opaka iheema. Okathi aari awe oKorinto, Paulo aahikhala ni Akila ni Prisila “khukhala owannyeya, avaraka muteko ni yawo”. Vaavo aahimmye awe wira aanivara muteko “ohiyu n’uthana”, Paulo khaaphavela ohimya wira aavara muteko woohimumula. Owo aanikhalana okathi wira ophumurye ntoko nihiku na Esaabadu. Nihiku nle, owo aanikhalana eparakha ya waalaleerya aYuda, yaawo nave yaahaavara muteko nihiku na Esaabadu.​—Mit. 13:14-16, 42-44; 16:13; 18:1-4.

13. Ntakiheryo na Paulo ninniixuttiha exeeni?

¹³ Murummwa Paulo oonivaha ntakiheryo nooloka! Owo aaniimananiha ovara muteko wa mulaponi, masi hata vaari siiso kheemerenrye muteko awe wa mulaponi ovuvuryaka muteko wa ‘olalerya ehapari yorera ya Muluku’. (aRom. 15:16; 2 aKor. 11:23) Paulo aanaatumererya atthu akina opaka etthu emosaru. Mwaha woopaka eyo, Akila ni Prisila yaavara ni Paulo “miteko sa Yesu Kristu”. (aRom. 12:11; 16:3) Nave murummwa Paulo aahaaleela anna a oKorinto wira ‘atepeke okelela oholo mmutekoni mw’Apwiya vohihiyererya’. (1 aKor. 15:58; 2 aKor. 9:8) Ohiya-vo, Yehova aahimuupuxerya Paulo olepa wira: “Mutthu ohintthuna ovara muteko khamphwanela olya”.​—2 aTes. 3:10.

14. Yesu aaphavela ohimya exeeni ni moolumo ari Yohani 14:12?

¹⁴ Mahiku ala ookiserya, muteko wootepa otthuneya ninreerela ahu ovara ori waapaka awiixutti. Tthiri Yesu aahihimya wira atthareli awe yanvara miteko suulupale ovikana iye aavanre awe. (Mmusome Yohani 14:12.) Owo khaaphavela ohimya wira yaarowa opakaka miiriirya ntoko yena aapaka awe. Masi atthareli a Yesu yaarowa olaleerya muttetthe muulupale, atthu anceene ni okathi munceene onvikana yena.

15. Makoho xeeni ninreerela ahu wiikoha ni nthowa xeeni?

¹⁵ Akhala wira muniphavela ovara muteko wira mphwanyeke yowiikhuuriha, mwiikoheke so: ‘Opuro kinvara aka muteko, kiireke kinnisuweliwa okhala namuteko oowiimananiha? Kiireke kinnimaliha muteko aka okathi kinvekeliwa aka ni kinnivara saana?’ Akhala wira munaakhula “aayo” makoho awo otheene, musuweleke wira patarau anyu onimoororomelakani. Ohiya-vo, mweettelo anyu omutekoni pooti waakhaliherya atthu akina ophavela wiiwa ihapari sooreera. Nuupuwelaka muteko woolaleerya ni wiixuttiha,  mwiikoheke so: ‘Kiireke kinniimananiha olaleerya? Kiireke kinnitthikela waaxukurya atthu ale anisiveliwa ekeekhai? Kinniirela mpantta inamuna soovirikana sa olaleerya?’ Akhala wira munaakhula wira “aayo” makoho otheene, munoohakalalaka ovara muteko woolaleerya.

16. Yesu ni arummwa awe yoonihenrye sai wira yaahivirikana ni atthu a okathi ole ni a olelo-va?

¹⁶ Yesu ni arummwa awe yaanisuwela wira okathi mukina yaahaana omumula. Masi atthu a okathi ole, ni atthu anceene olelo-va, anuupuwela ntoko mulopwana thaaciri a nlikanyiho na Yesu. Mulopwana ole thaaciri aahiihimyerya wira: “Omumuleke, olyeke, owuryeke, opuheke”. (Luka 12:19; 2 Tim. 3:4) Mulopwana ole, oona wira etthu yootepa otthuneya mookumini mwawe waari omumula ni othweela. Moovirikana ni mulopwana thaaciri, Yesu ni arummwa awe khiyeettihiwa ni ophavela opuha paahi.

17. Nipakeke exeeni okathi nihinvara ahu muteko?

¹⁷ Olelo-va, hiyo nave ninnitthara ntakiheryo na Yesu. Okathi nihinvara ahu muteko, ninnittottela mureerelo wira nipake itthu sooloka ntoko olaleerya, ni orowela mithukumano sa mmulokoni. Hiyo ninniimananiha waapaka awiixutti ni orowela mithukumano mwaha woowi miteko iyo ti sootepa otthuneya mookumi mwahu ni ninnoona okhala sowaarya. (aHéb. 10:24, 25) Hata okathi ninkhuma ahu ifeeriya, ninnivikaniha ovara miteko sahu somunepani, ntoko orowela mithukumano ni ottottela mureerelo khula eparakha ninkhalana ahu wira naalaleerye atthu ninkumana ahu.​—2 Tim. 4:2.

18. Mwene ahu Yesu Kristu oniphavela wira nipakeke exeeni?

¹⁸ Ti voohakalaliha osuwela wira Mwene ahu Yesu Kristu khonnivekela etthu nihinwerya ahu opaka. Nave ninnimuxukhurela mwaha woowi onninikhaliherya okhalana moonelo wooloka voohimya sa ovara muteko ni omumula! (aHéb. 4:15) Yesu oniphavela wira niphumuryeke oratteene. Nave oniphavela wira niimananiheke ovara muteko wira niphwanyeke yoolya ni niimananiheke wiirela mpantta muteko wowaapaka awiixutti. Mwaha onittharelana, ninrowa woona etthu Yesu onipaka awe wira onitaphule enamuna yootepa otakhala ya opottha.