1-2. (a) Yubileyo exeeni? (Nwehe ekaaxa eni: “ Yubileyo Yaari Exeeni?”) (b) Exeeni Yesu aalavunle awe yoolepa ya Luka 4:16-18?

ILAPO sikina, sinnipaka efesta nuumala mwene aahiiso presidenti a elapo eyo oviriha iyaakha 50 olamulelaka. Mwaakha namalamulela ommaleliha awe iyaakha 50 olamulelaka, oniihaniwa yubileyo. Ifesta sa yubileyo pooti oviriha nihiku nimosa, esumana emosa wala ovikana. Masi ekeekhai ti yoowi: Efesta eyo ya yubileyo ennimala. Nave ohakalala onikhumelela nihiku nno, onniliyaliwa.

² Khula iyaakha 50, atthu a wIsarayeli wa khalai yaanipaka efesta ya Yubileyo eyaakha ntero. Yubileyo owo a khalai aanaavaha eparakha ya woopoliwa aIsarayeli ale. Xeeni vanireerela aya othokorerya niira na Yubileyo? Mwaha woowi, Yubileyo aapakiwa ni aIsarayeli onninuupuxerya mareheryo Yehova opanke awe wira onoopole mahiku otheene. Yesu aahilavula sa woopoliwa iwo. Vano nrowe nthokorerye oratteene.​—Mmusome Luka 4:16-18.

3. Moovarihana ni Onamukuttho 25:8-12, aIsarayeli yaattottela sai mureerelo mareheryo a Yubileyo?

³ Vannikhweya wiiwexexa ele Yesu aaphavela awe ohimya vaavo aalavunle awe sa woopoliwa nthokoreryaka mareheryo Muluku aapanke awe a Yubileyo okathi wa aIsarayeli. Yehova aalenle so aIsarayeli: “Eyakha yanamiloko mithanu ekhalé eyakha yowarya; mulaleyeke wòpoliwa w’atthu othene a mulaponi-mmo. Eyakh’ela yokhaleleni Eyobeli (yubileyo): imatta sithummwe sihokoloxeriwe mwanene a khalai; vano ipottha sitaphuliwe sihokolowele w’amusi aya”. (Mmusome Onamukuttho 25:8-12.) Mwaha ovinre, nihoona moota aIsarayeli yaattottela aya mureerelo nihiku na Esaabadu. Vano yaattottela sai mureerelo marehereryo a Yubileyo? Nkahaya mmuupuwele mwIsarayeli aakomphe musurukhu ohinawerya oliva, vano onnikhanyereriwa otumiha imatta  sawe wira olive musurukhu okomphe awe. Okathi wa Yubileyo, owo aanihokoloxeriwa imatta sawe. MwIsarayeli owo aanihokoloxeriwa “imatta sithummwe”, nto anaawe yaamuhalana imatta iyo nuumala owo okhwa. Vano nkahaya mmuupuwele mulopwana oxankale mpakha omutumiha mwanawe mmosa okhala epottha wala wiitumiha mmensawe wira olive ele okomphe awe. Vano okathi wa Yubileyo ipottha saanitaphuliwa inahokoloxeriwa “w’amusi aya”. Eyo yaaniwiiriha atthu ale ohikhala epottha mahiku otheene! Tthiri mareheryo awo yaanooniherya wira Yehova onnaathokorerya vanceene atthu awe!

4-5. Xeeni vari aya vootthuneya othokorerya mareheryo a Yubileyo?

⁴ Mareeliho xeeni makina yaakhumelela okathi wa Yubileyo? Yehova aahimmye so: “Apwiya Muluku anyu anniphavela worerihelani n’uruwerya mulaponi anrowaya wovahani, wira ekhalé yawinyu, mukhaleke-mo. Tivó khavo eriyari anyu onrowa othoiwa”. (Otum. 15:4) Tthiri eyo ennivirikana ni mahiku ahu ala! Olelo-va, mutthu oohaawa onoovikaniha oohaawa vano athaaciri anootepa othaaciri!

⁵ Ntoko nisuwenle ahu, hiyo maKristau khanneettela Nlamulo na Moise. Eyo entaphulela wira khanintthara nlamulo na Yubileyo wira nitaphule ipottha, oleva itthu nikopheliwe ahu ni waahokoloxerya axineene imatta saya. (aRom. 7:4; 10:4; aÉf. 2:15) Hata vari siiso, ti vootthuneya othokorerya mareheryo a Yubileyo. Mwaha wa xeeni? Mwaha woowi othokorerya moota Yehova aawoopola awe atthu okathi wa Yubileyo, onninuupuxerya woopoliwa ninlipelela ahu.

6. Apinaatamu ahaana woopoliwa exeeni?

⁶ Otheene ahu ninniphavela woopoliwa. Mwaha wa xeeni? Mwaha woowi otheene ahu noopakeya epottha ya etthu yootepa otakhala, etthu ene tiila: Na ipottha sa etampi. Mwaha wa etampi, otheene ahu ninnuuluvala, owereiwa ni okhwa. Anamunceene anniweha sookhumelela sa etampi vaavo aniiweha aya valoolani aahiiso anrowa aya oxiripitali. Nave otheene ahu ninniriipiwa murima vaavo nimpaka ahu etampi. Murummwa Paulo aanisuwela wira aari “epottha ya ikano s’etampi” yaari mwerutthuni mwawe. Nave aahihimya so: “Miyo nkirere  otakhaliwa! T’ani ontthuna okakiha makhalelo ala ankiruhela okhwa?”​—aRom. 7:23, 24.

7. Exeeni profeta Yesaya aahimmye awe vahinatthi?

⁷ Moohakalaliha, Yehova oopaka mareheryo wira nitaphuliwe aahiiso noopoliwe mwaha wa etampi. Yesu tothanliwe wira ovare muteko owo. Iyaakha 700 saavinre Yesu ohinatthi orwa valaponi, profeta Yesaya aahihimya vahinatthi wira muhoolo waamukhala woopoliwa wuulupale. Woopoliwa weiwo waari wootepa oreera ovikana woopoliwa wa aIsarayeli okathi wa Yubileyo. Owo aalempe so: “Eroho y’Apwiya Muluku yokikhuruwela miyo: Apwiya àkithanla, ekittikitthelaka makhura. Awo àkiruma walalèrya amasikhini ehapari yorera, wakurunuxa murima alipa-òhaxiwa, walalèrya alipa-òtthukeliwa wopoliwa waya”. (Yes. 61:1) Eprofesia ela yaahimya aani?

8. Eprofesia ya Yesaya yaahimya aani?

⁸ Eprofesia ela yaapacenrye wiiraneya nuumala opacerya muteko woolaleerya wa Yesu. Okathi aari awe musinagoga oNazarethi epooma aayariwe awe, Yesu aahaasomela eprofesia ela ya Yesaya aYuda yaathukumanne opuro ole. Yesu aahimmye wira eprofesia ele yaamuhimya yena. Owo aahimmye so: “Eroho y’Apwiya eri mwa miyo. Tthiri Muluku òkittikitthela makhura, wira kàlalèrye alipa-òhawa ehapari yorera. Owo òkiruma walalèrya alipa-òtthukweliwa otaphuliwa waya n’alipa-òhona ovonihiwa waya n’uwòpola alipa-òpuheriwa n’ulaleya eyakha y’eparakha y’Apwiya”. (Luka 4:16-19) Yesu aamalihenrye sai eprofesia ela?

9. Enamuna xeeni ya woopoliwa atthu anceene a okathi wa Yesu yaalipelela aya?

⁹ Okathi wa Yesu, ti yaapacenrye aya atthu waakhela woopoliwa waahimmwale vahinatthi ni profeta Yesaya, mpantta yoowo Yesu aasomme awe. Yesu aahooniherya eyo, vaavo aahimmye awe so: “Sihìraneya olelo solempwa iya sìwalyanyu nanano va”. (Luka 4:21) Atthu anceene yaamwiiwale Yesu osomaka eprofesia ela, woonasa wene yaalipelela oturukeya wa makhalelo a epoliitika, ntoko otaphuliwa okhala ipottha aahiiso olamuleliwa ni aRoma. Pooti wira, moonelo aya waamulikana ni moonelo wa alopwana anli yaahimmye so: “Hiyo nanroromela wira yowo t’atthuna owòpola atthu a Isarayeli”. (Luka 24:13, 21) Hiyo ninnisuwela nthowa naya Yesu aahaatumerenrye awe awiixutti awe ohiiwelela olamulelo wootakhala wa aRoma. Ohiya-vo, Yesu aahaavaha malakiheryo ala, ani: “Munvaheke mwené [Seesari] ekhanle ya mwené [Seesari]”. (Math. 22:21) Nto, okathi ole Yesu aawooponle sai atthu?

10. Yesu aahihula ephiro wira atthu yoopoliwe exeeni?

 ¹⁰ Mwaana a Muluku aarwiiye valaponi wira owoopole atthu mwa inamuna piili. Yoopacerya, Yesu aahihula ephiro wira atthu yoopowe mwaha wa soowiixuttiha sowoothiwa sa ahooleli a itiini. AYuda anceene a okathi ole, yaahikhala ipottha sa soolema sa apinaatamu. (Math. 5:31-37; 15:1-11) Ale yaarina eparakha ya waakhaliherya atthu omusuwela Muluku yaari oohoona. Mwaha woomukhootta Mesiya ni ekeekhai iixuttiha awe, atthu ale yanvikaniha okhala mweepiphini yomunepani ni itampi saya khisaarowa oleveleliwa. (Yoh. 9:1, 14-16, 35-41) Yesu aaniwiixuttiha itthu sekeekhai atthu oowiiyeviha ni aanaavaha ntakiheryo nooloka. Opaka eyo aanooniherya wira aaniwoopola soowiixuttiha ni soolema soohiloka atthu ale.​—Mar. 1:22; 2:23–3:5.

11. Enamuna xeeni ya nenli Yesu owooponle awe atthu?

¹¹ Enamuna ya nenli: Yesu owoopola apinaatamu etampi. Mwaha wa ovaha ekumi awe ntoko mukuttho, Muluku onnilevelela itampi sa atthu ale animwaamini ni aneemererya mukuttho wa Yesu. (aHéb. 10:12-18) Nto Yesu aahimmye so: “Mwana awopolani, tthiri munokhala òtaphuwa”. (Yoh. 8:36) Woopoliwa iwo waari wuulupale ovikana woopoliwa aIsarayeli yaaphwanya aya okathi wa Yubileyo! Mwa ntakiheryo, mulopwana aakhala epottha, aanitaphuliwa okathi wa Yubileyo, masi muhoolo mwaya pooti wira aamutthikela okhala epottha ni aanilipelela okhwa. Eyo ennooniherya wira otaphuwa Yesu onrowa awe okumiherya, onrowa okhala wa mahiku otheene.

12. Tani yaapacenrye ottottela mureerelo woopoliwa Yesu aalaleyale awe?

¹² Nihiku na Pentekoositi a 33 EC Yehova aahaathanla ni munepa awe wootteela arummwa, waahela muhina alopwana ni athiyana oororomeleya. Nto Yehova aahiwiiriha okhala anaawe atthu awo wira ahihimuxiwe ni yalamuleleke ni Yesu wiirimu. (aRom. 8:2, 15-17) Awo yaari atthu oopacerya yaattottenle mureerelo woopoliwa Yesu aalaleyale awe musinagoga oNazarethi. Alopwana ni athiyana ale khiyaakhanle-tho ipottha sa soowiixuttiha sowootha sa ahooleli a itiini ya aYuda ni khiyaakhanle ipottha sa soolema sinikhoottihiwa ni Biibiliya. Nave Muluku aahiwoopola okhala epottha ya etampi yeeyo eniphwanyiha okhwa. Woopoliwa iwo, waapacenrye ni atthu ale yaathanliwe Pentekoositi a 33 EC ni onrowa omala wanikisa wa Iyaakha Ekonto Emosa ya Olamulelo wa Yesu. Itthu xeeni sooloka sinrowa wiiraneya mpakha wanikisa wa olamulela wa Yesu?

13-14. Waahiya maKristau oothanliwa, atthu xeeni akina anttottela mureerelo woopoliwa Yesu aalaleyale awe?

¹³ Mahiku ahu ala, imilyau sinceene sa atthu oororomeleya a maloko otheene anniirela mpantta egrupu ya “ipwittipwitthi sikina”. (Yoh. 10:16) Atthu awo khathanliwe ni Muluku wira yalamuleleke ni Yesu wiirimu. Hata vari siiso, awo aakhalana nlipelelo na okhalaka mahiku otheene mparayiisu valaponi. Niireke ti nlipelelo murina anyu?

¹⁴ Akhala wira ti siiso, nyuwo munnaakhela mareeliho aniphwanya aya maKristau oowoottihiwa. Mwaha wowaamini mukuttho wa Yesu, nyuwo mookhalana eparakha ya onvekela Yehova wira ooleveleleni itampi sanyu. Eyo enniwiirihani weemereriwa ni Muluku ni okhalana yowuupuxerya ya murima yooloka. (aÉf. 1:7; Wis. 7:14, 15) Nkahaya muupuwele mareeliho murina anyu mwaha wowoopowa okhala epottha ya soowiixuttiha sowootha. Yesu aahimmye wira: “Munosuwela ekekhai, vano ekekhai yeyo enimokhalihani òtaphuwa”. (Yoh. 8:32) Tthiri ninnihakalala mwaha wowoopoliwa!

15. Woopoliwa xeeni onrowa wiiraneya ni mareeliho xeeni ninrowa ahu okhalana?

¹⁵ Nikupaliki wira muhoolo onimwiiraneya woopowa wuulupale. Moohipisa, Yesu onrowa opwetexa itiini sowootha ni olamulelo woohaaxa wa apinaatamu. Okathi owo Muluku onrowa okhapelela “muttitthi mulupalexa” yoowo onimukokhorela moororomeleya ni onrowa  waareeliha aavahaka okumi woohakalaliha mparayiisu valaponi. (Wis. 7:9, 14) Atthu imilyau sinceene anrowa ohihimuxiwa ni woopoliwa itthu sotheene sikhumelenle mwaha wa etampi ya Adamu.​—Mit. 24:15.

16. Woopoliwa xeeni woohakalaliha apinaatamu anlipelela aya muhoolo?

¹⁶ Okathi wa olamulelo wa Eyaakha Ekonto Emosa ya Kristu, Yesu ni ale onrowa awe olamulelanaka onrowa waakhaliherya apinaatamu okhalana okumi wooloka ni waataana wooloka ni Muluku. Okathi owo, otaphuliwa ni woopoliwa wa apinaatamu onrowa okhala ntoko Yubileyo. Nto atthu otheene animurumeela Yehova anrowa okhala oomalela ni khanrowa-tho okhala anatampi.

17. Moovarihana ni Yesaya 65:21-23, muhoolo mikhalelo xeeni apinaatamu anrowa aya okhalana? (Nwehe efootu ya ekaapa.)

¹⁷ Eprofesia eri Yesaya 65:21-23, ennilavula sa makhalelo ooloka anrowa okhala muhoolo. (Mmusome.) Makhalelo ahu khanrowa okhala ooxankiha. Biibiliya onihimya wira okathi owo nnookhalana muteko munceene woovara. Nikupaliki wira wanikisa wa Olamulelo wa Iyaakha Ekonto Emosa wa Kristu, soopattuxiwa “sinrowa wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’àna a Muluku”.​—aRom. 8:21.

18. Exeeni ennikupaliha wira muhoolo ninrowa ohakalalaka?

¹⁸ Yehova aahipaka malamulo wira aIsarayeli akhalaneke moonelo wooloka voohimya sa ovara muteko ni omumula. Nave okathi wa Olamulela wa Iyaakha Ekonto Emosa wa Kristu, Yehova oniphavela wira atthu awe akhalaneke moonelo wooloka voohimya sa muteko ni omumula. Tthiri okathi owo atthu anrowa okhalana okathi woomukokhorela Muluku. Olelo-va, wira niphwanye ohakalala wekeekhai, nihaana omukokhorela Muluku, nto elapo esya nnookhalana okathi munceene woopaka eyo. Moohaanyiherya, apinaatamu oororomeleya anrowa ohakalalaka mwaha wookhalana muteko wooloka ni omukokhorela Muluku okathi wa Iyaakha Ekonto Emosa wa Olamulelo wa Kristu.