1-2. Xeeni maKristau otheene vanireerela aya wiixutta voohimya sa ohihimuxiwa wa atthu ale anrowa wiirimu?

ARUMEYI anceene a Yehova olelo-va, arina nlipelelo na okhalaka mparayiisu valaponi mahiku otheene. Masi maKristau oothanliwa nlelo ari valaponi annilipelela ohihimuxiwa wira yakhaleke wiirimu. Nto maKristau awo oothanliwa anniphavela osuwela moota okumi aya onrowa aya okhala wiirimu. Nave-tho maKristau arina nlipelelo na okhalaka valaponi anniphavela osuwela moota eyo enrowa aya wiiraneya. Ntoko ninrowa ahu oweha mwaha ola, maKristau anrowa ohihimuxiwa wira yakhaleke wiirimu animwaaphwanyiha mireerelo ale anrowa ohihimuxiwa wira akhaleke valaponi. Nto hata nyuwo mulipelelaka orowa okhalaka wiirimu wala valaponi vaava, munoohakalala vanceene wiiwexexa voohimya sa ohihimuxiwa wa ale anrowa okhalaka wiirimu.

² Muluku aahaaruma atthareli akina a eseekulu yoopacerya a Yesu olepa voohimya sa ohihimuxiwa wa atthu anrowa okhalaka wiirimu. Mwa ntakiheryo, murummwa Yohani aahimmye so: “Hiyo n’àna a Muluku: nto nlelo khinòneya enamuna enrowahu okhala. Nosuwela wira, vanrowaya woneya makhalelo ahu, ninrowa ophwanyiwa nilikanaka ni Yesu”. (1 Yoh. 3:2) Yoolepa ela ennooniherya oratteene wira maKristau oothanliwa khansuwela makhalelo aya wiirimu nuumala ohihimuxiwa. Masi annisuwela wira nuumala ovahiwa etthuvo aya wiirimu, awo anoowerya onweha Yehova. Biibiliya khonihimya itthu sotheene voohimya sa ohihimuxiwa wa atthu anrowa okhalaka wiirimu. Masi murummwa Paulo onninivaha malakiheryo vakhaani voohimya sa enamuna eyo ya ohihimuxiwa. Musuweleke wira maKristau oothanliwa anrowa okhala vamosa ni Kristu vaavo onrowa awe ‘wapwetexa makhulupale othene n’ikuru sothene n’uwerya  wothene’ eyo enrowa ohela muhina “nwanani onrowa okiserya opwetexiwa, okhwá”. Wanikisa waya, Yesu ni ale anrowa olamulelaka vamosa ni yena anrowa onvahererya itthu sotheene Yehova. (1 aKor. 15:24-28) Tthiri okathi owo onrowa okhala woohakalaliha! *

3. Moovarihana ni 1 aKorinto 15:30-32, okhala wira Paulo aanaamini ohihimuxiwa, eyo yaamukhalihenrye sai?

³ Okhala wira Paulo aanikupali ohihimuxiwa, eyo yaahimukhaliherya ovilela mixankiho sinceene. (Mmusome 1 aKorinto 15:30-32.) Owo aahaaleela maKristau wira: “Miyo va kinnìholeliha okhwa nihiku ti nihiku”. Nave aalempe so: “Elapo ela ya wÉfeso, miyo kowana ntoko kawana n’inama sowali”. Woonasa wene, Paulo aahimya inama soowali aawananne awe wArena epooma ya wEefeso. (2 aKor. 1:8; 4:10; 11:23) Aahiiso aahimya aYuda ni atthu akina yaawo yaari ootakhala murima yaalikana ni inama soowali. (Mit. 19:26-34; 1 aKor. 16:9) Moohicikha etthu ene aahimya awe Paulo aahikhalana mixankiho. Masi hata vaari siiso, owo khaahiyale owehexexa itthu sooloka sa muhoolo.—2 aKor. 4:16-18.

4. Nlipelelo na ohihimuxiwa nnaalipiha sai maKristau olelo-va? (Nwehe efootu ya ekaapa.)

⁴ Hiyo ninkhala okathi wooxankiha ni wootakhala. Anna ni arokora akina sinnaakhumelela ikrime. Akina anikhala ilapo wala mittetthe eniwaniwa ekhotto, nto khanikhala oovareleleya. Anna ni arokora akina anikhala ilapo muteko ahu woolaleerya onikhoottihiwa aya ni kuvernu, nto omurumeela Yehova ilapo iyo khivanikhweya. Maana eyo pooti owiiriha oyeleela okumi aya wala otthukweliwa mukhatteya. Hata vari siiso, anna ni arokora awo khanihiya omukokhorela Yehova ni anninivaha ntakiheryo nooloka ninreerela ahu otthara. Awo khanitepa woova nnakhala othukumela, maana annisuwela wira hata yiiviwaka, Yehova ooleiherya waahihimuxa ni waavaha okumi wooloka muhoolo.

5. Moonelo xeeni woohiloka okhanle oohonona waamini wahu nlipelelo na ohihimuxiwa?

⁵ Murummwa Paulo aahaalopola anna voohimya sa moonelo woohiloka atthu akina yaarina aya. Awo yaahimya so: “Vari ekekhai wira alipa-òkhwa khanihihimuwa, ‘nilyeke, niwuryeke, okhala wira melo nnimokhwa!’” Moonelo owo woohiloka yaahikhalana atthu akina ahinatthi ophiya mahiku a Paulo. Woonasa wene, Paulo aahimya moolumo a profeta Yesaya, yaawo aahimya awe aIsarayeli ari Yesaya 22:13. Ohiya wiimananiha okhalana waataana wooloka ni Yehova, aIsarayeli ale yaaphavela wiihakalaliha paahi, awo yuupuwela so: “Nihaana ottottela mureerelo okumi olelo vaava, maana khula okathi ninlipelela okhwa”. Nave moonelo owo ohuulaana olelo-va. Musuweleke wira ele yaakhumelenle aIsarayeli ale enniniixuttiha etthu yuulupale.—2 Wah. 36:15-20.

6. Nlipelelo na ohihimuxiwa nihaana oniiriha waathanla apatthani a enamuna xeeni?

⁶ Waamini wahu wira atthu anoohihimuxiwa ohaana ovarihana ni enamuna nnaathanla ahu apatthani ahu. Anna a muloko wa oKorinto yaahaana okhalana ephoole ni apatthani aya, yaawo yahaakupali wira atthu ookhwa anoohihimuxiwa. Etthu xeeni nniixutta ahu? Akhala wira apatthani ahu atthu yaale arina moonelo woohiloka anihimya wira ahaana ottottela mureerelo okumi olelo-va, awo pooti onikumiherya mixankiho sinceene. Maana apatthani oohiloka pooti ohonona moonelo ni muupuwelo wooloka wa muKristau, nave pooti omwiiriha opaka itthu Yehova oninyokha awe. Tivonto Paulo oniloponle oriki: “Mwahokolowele ankhili n’ixariya: muhiyé itampi”.—1 aKor. 15:33, 34.

7. Nikoho xeeni ninlavuliwa 1 aKorinto 15:35-38, atthu akina yaakoha aya?

⁷ Mmusome 1 aKorinto 15:35-38. Mutthu aaphavela owiiriha atthu akina waanyiherya nlipelelo na ohihimuxiwa, woonasa wene aanikoha so: “Masi-nto alipa-òkhwa anihihimuwa sai?” Ti vooloka othokorerya oratteene moota Paulo aakhunle awe, mwaha woowi atthu anceene olelo-va aakhalana moonelo woovirikana voohimya sa okumi nuumala mutthu okhwa. Masi, Biibiliya oniixuttiha exeeni?

8. Nlikanyiho xeeni ninnikhaliherya wiiwexexa ohihimuxiwa wa atthu anrowa wiirimu?

⁸ Nuumala mutthu okhwa erutthu awe ennintta. Masi ole opattunxe olumwenku, owo khahiyo muxankiho. Maana Muluku pooti omuhihimuxa mutthu okhwiiye ni onvaha erutthu yootepexa oloka. (Maph. 1:1; 2:7) Paulo aahipaka nlikanyiho wira ooniherye wira khivanitthuneya Muluku omuhihimuxa mutthu ni erutthu aarina awe ohinatthi okhwa. Murummwa Paulo aahirumeela nlikanyiho na “epyó” enaaliwa aahiiso enuku ya mwiri. Musuweleke wira vaavo epyo wala enuku enaaliwa aya ennimela onakhumelela mwiri musya. Mwiri owo omenle onnivirikana vanceene ni enuku wala epyo ele yaaliwe. Paulo aahirumeela nlikanyiho nla ophavelaka wooniherya wira mutthu ole onrowa ohihimuxiwa, Muluku onrowa onvaha “erutthu ntoko sitthunnyawe”.

9. Irutthu xeeni soovirikana 1 aKorinto 15:39-41 onihimya awe?

⁹ Mmusome 1 aKorinto 15:39-41. Paulo ohimmye wira Muluku opaka irutthu sinceene ni soovirikana. Mwa ntakiheryo, erutthu ya ibooyi, ipalame ni ihopa ti soovirikana vanceene. Moottharelana Paulo aahimmye wira wookhala ovirikana wuulupale eriyari ya nsuwa ni mweeri. Nave aahimmye wira “warya wa khula etheneri onnivirikana”. Hata nihiweryaka oweha ni maitho ahu, sookhala itheneeri masientista anihimya aya wira ti sooxeerya, sikina ti sootteela  ni sikina ti sa ncano ntoko nsuwa. Nave-tho Paulo aahimmye wira sookhala irutthu sa wiirimu ni irutthu sa valaponi. Moota xeeni? Valaponi sookhala irutthu sirina enama ni makhuva, masi wiirimu siri irutthu sa omunepani ntoko irutthu sa malaikha.

10. Erutthu xeeni anrowa aya ovahiwa ale anrowa ohihimuxiwa wira yakhaleke wiirimu?

¹⁰ Nave nkahaya nwehe ele murummwa Paulo aahimmye awe moottharelana oriki: “Nave ohihimuwa w’alipa-òkhwa onnìraneya sisammo: enàliwa erutthu enintta, enahihimuwa erutthu ehinintta-tho”. Tthiri vaavo mutthu onikhwa awe ni ovithiwa, erutthu awe ennintta enapakeya etthaya. (Maph. 3:19) Nto vaniweryaneya sai ohihimuxiwa “erutthu ehinintta-tho”? Paulo khahiyo aahimya apinaatamu yaarowa ohihimuxiwa wira akhaleke valaponi ntoko atthu ale yaahihimuxiwe ni Eliya, Eliseyo ni Yesu. Masi Paulo aahimya atthu anrowa ohihimuxiwa wira yakhaleke wiirimu, niire so, ale anrowa ovahiwa “erutthu yowarya”.—1 aKor. 15:42-44.

11-12. Oturukeya xeeni waakhanle okathi Yesu aahihimuxiwe awe ni oniiraneya ni maKristau oothanliwa?

¹¹ Okathi aari awe valaponi, Yesu aarina erutthu ya apinaatamu. Masi nuumala ohihimuxiwa khurowa wiirimu, Kristu “t’iroho enivaha ekumi”. Mwa enamuna emosaru, maKristau oothanliwa yaarowa ohihimuxiwa ni erutthu yaarowa waakhaliherya okhala wiirimu. Paulo aatthokiherye so: “Sisale sinlattanahu ni mutthu okumihiwe mutthayani, siso-tho nintthuna olattana ni mutthu orwiye wirimu”.—1 aKor. 15:45-49.

¹² Vano Paulo aahihimya eponto yuulupale voohimya sa ohihimuxiwa. Ti vooloka wuupuwela wira okathi Yesu aahihimuxiwe awe khavahiwe erutthu ya apinaatamu. Maana Paulo aatthokihenrye so: “Erutthu ni ephome kheniwerya okela Moomweneni mwa Muluku” wiirimu. (1 aKor. 15:50, Tradução do Novo Mundo.) Tthiri arummwa ni maKristau makina oothanliwa khiyaarowa ohihimuxiwa ni erutthu enintta, niire so, erutthu ni ephome. Ohihimuxiwa wa  enamuna eyo waarowa wiiraneya okathi xeeni? Paulo aahooniherya oratteene wira ohihimuxiwa iwo waarowa wiiraneya muhoolo. Okathi Paulo aalempe awe ekarta ya 1 aKorinto, awiixutti akina yiira akhwiiye ene. Mwa ntakiheryo, murummwa Yakobo iira okhwiiye ene. (Mit. 12:1, 2) Nave arummwa akina ni maKristau makina oothanliwa yaahikhwa.—1 aKor. 15:6.

13. Itthu xeeni saarowa okhumelela okathi wa okhala-vo wa Yesu?

¹³ Yesu ni murummwa Paulo yaahihimya vahinatthi okathi wa vameekhaaya waarowa wiiraneya muhoolo, eyo piiyo, okhala-vo wa Kristu. Nto okathi wa okhala-vo wa Kristu saamukhumelela ikhotto, itetere, iretta ni itthu sikina sootakhala olumwenku wotheene. Okhuma mwaakha wa 1914 ninniweha eprofesia ela yiiraneyaka. Masi yookhala etthu ekina yootthuneya yaarowa wiiraneya okathi wa okhala-vo wa Kristu. Yesu aahimmye wira ihapari sooreera sa Omwene saamulaleiwa “mulaponi mothene, wira maloko othene esuwele, yamini. Vano-nto olumwenk’ula omaleke”. (Math. 24:3, 7-14) Ohiya-vo, Paulo aahitthokiherya wira “okathi [wa okhala-vo wa] Apwiya”, waarowa okhala okathi yaarowa aya ohihimuxiwa maKristau oothanliwa akhwiiye.—1 aTes. 4:14-16; 1 aKor. 15:23.

14. Etthu xeeni eniiraneya ni maKristau anikhwa okathi wa okhala-vo wa Kristu?

¹⁴ MaKristau otheene oothanliwa anikhwa olelo-va, ori okathi wa okhala-vo wa Kristu annihihimuxiwa mowaakuveya wira yakhaleke wiirimu. Paulo aahihimya eyo 1 aKorinto 15:51, 52, oriki: “Khahiyó wira hiyo othene ahu ninrowa okhwa, nto hiyo othene ninrowa otatuxiwa. Etthu ila enokhumelela nananoru, ntoko otthukula maitho ni waphila, vanrowaya wompwa nlope nokiserya”. Moolumo ala a murummwa Paulo anniiraneya olelo-va. Nto vaavo anrowa aya  ohihimuxiwa maKristau oothanliwa anoohakalala vanceene, awo anrowa “okhalaka n’Apwiya mahiku othene”.—1 aTes. 4:17.

15. Muteko xeeni maKristau oothanliwa anrowa aya ovara wiirimu?

¹⁵ Biibiliya onnihimya muteko anrowa aya ovara maKristau oothanliwa wiirimu nuumala ohihimuxiwa “ntoko otthukula maitho ni waphila”. Aahimyaka maKristau awo oothanliwa Yesu aahimmye so: “Ale anrowa oxintta n’uthipelela wettela miteko saka mpakha womalelani, kinimwavaha owerya weiwo kivahiwaka n’Atithi: eyo p’iyo waruma atthu othene, wira ewettiheke n’ikopo ya yuma, yapwexakase ntoko myapu s’oloko”. (Wis. 2:26, 27) Amuttharaka muhooleli aya, Yesu, maKristau oothanliwa anrowa waakukhula atthu a maloko otheene ni ekopo ya eyuuma.—Wis. 19:11-15.

16. Mwa enamuna xeeni apinaatamu anceene anrowa aya oxintta okhwa?

¹⁶ Moohaanyiherya maKristau oothanliwa anooxintta okhwa, maana anrowa ohihimuxiwa. (1 aKor. 15:54-57) Nto okathi wa ekhotto ya Armagedoni, maKristau oothanliwa animwiirela mpantta enamuna ekina ya oxintta, eyo piiyo, oxinttiwa otakhala wotheene. Vano imilyau sinceene sa arumeyi a Yehova anrowa woopowa okathi wa maxakha maalupale anookela elapo esya. (Wis. 7:14) Atthu awo anrowa woopowa, anookhalana eparakha ya oweha ni maitho aya oxinttiwa okhwa ni ohihimuxiwa wa ibilyau sinceene sa atthu ale akhwiiye. Nkahaya muupuwele ohakalala onrowa okhumelela okathi owo! (Mit. 24:15) Nave atthu otheene anrowa wooniherya ororomeleya moomalela wa Yehova, anooxintta mwa enamuna ekina. Maana anooxintta okhwa aravihiwe aya ni Adamu ni okhala mahiku otheene valaponi.

17. 1 aKorinto 15:58, onnitumererya opaka exeeni?

¹⁷ MaKristau otheene ahaana oxukhurela vanceene moolumo oomaaliha voohimya sa ohihimuxiwa Paulo aalempe awe 1 aKorinto. Nookhalana mathowa manceene anniiriha weemererya miruku sa Paulo aahimmye awe wira nihaana wiimananiha “okelela oholo mmutekoni mw’Apwiya”. (Mmusome 1 aKorinto 15:58.) Akhala wira nnimwiimananiha ovara muteko owo, nikupaliki ni murima wotheene wira nnookhalana okumi woohakalaliha muhoolo. Okumi ahu onrowa okhala wooloka ovikana nuupuwela ahu. Nto wiimananiha wahu wira nivare muteko wa Apwiya khonrowa okhala wa mahala.