▪ Nnaari. Biibiliya ni iliivuru sa mulaponi khasinooniherya wira maKristau yaahikhalana yoolema eyo.

Enamuna aBiibiliya anceene ataphuleliwe aya eversiikulu ela, enniwiiriha atthu anceene wuupuwelaka wira, mahiku a Paulo yaahikhala yoolema ya maKristau opatisiwa mwaha wa alipa-ookhwa. Mwa ntakiheryo Biibiliya a Nova Versão Internacional otaphuleliwe so: “Akhala wira alipa-ookhwa khanihihimuxiwa, anrowa opaka exeeni atthu ale anipatisiwa mwaha wa alipa-ookhwa?”

Vano nkahaya nwehe ele ahimmye aya asomi anli a Biibiliya. Doutor Gregory Lockwoodor ohimmye wira opatisiwa “mwaha wa alipa-ookhwa” enamuna ya “opatiso ehinivarihana ni sowiiraneya sa mBiibiliyani”. Mwa enamuna emosaru, prusoore onisomiha wUniversidade oniihaniwa Gordon Donald Fee olempe so: “Khiivo etthu mBiibiliyani wala sowiiraneya enooniherya wira atthu yaanipatisiwa mwaha wa alipa-ookhwa. Waataana wa Naanaano khonilavula nnakhala vakhaani mwaha owo. Nave khiivo etthu ekina enooniherya wira maKristau a eseekulu yoopacerya ni ikerexa saapakiwe moohipisa nuumala arummwa okhwa atthu yaanipatisiwa mwaha wa alipa-ookhwa”.

Biibiliya onihimya wira atthareli a Yesu ahaana ‘owixuttiha atthu a maloko othene yabatizaka . . . , ni owixuttiha wettela sothene’ Yesu onrumme awe. (Math. 28:19, 20) Ohinatthi mutthu opatisiwa, owo ohaana wiixutta voohimya sa Yehova ni Mwanawe. Nave ohaana weemererya ni weettela ele iixuntte awe. Mutthu okhwiiye khuvithiwa khoniwerya opaka eyo, nave mutthu mukumi khokhanle oopaka eyo mwaha wa mutthu okhwiiye.—Mus 9:5, 10; Yoh. 4:1; 1 aKor. 1:14-16.

Nto murummwa Paulo aaphavela ohimya exeeni?

Atthu akina a oKorinto khiyaakupali wira atthu akhwiiye anoohihimuxiwa. (1 aKor. 15:12) Paulo aahiimananiha vanceene owooniherya wira moonelo aya waari woohiloka. Owo aahimmye wira ‘aniholeliha okhwa nihiku ti nihiku’. Tthiri eyo enooniherya wira owo aari mukumi. Nnaamwi aarina mixankiho sinceene, Paulo aanikupali ni murima wotheene wira nuumala okhwa, owo aamuhihimuxiwa ni ovahiwa erutthu ya omunepani wira akhaleke wiirimu ntoko yiiraneyale aya ni Yesu.—1 aKor. 15:30-32, 42-44.

Atthu ale a oKorinto yaahaana osuwela oratteene wira okhala muKristau oothanliwa, waahela muhina okhalana mixankiho khula nihiku ni okhwa ahinatthi ohihimuxiwa. Nto opatisiwa “mwa Yesu Kristu” onihela muhina opatisiwa “mokhwani mwawe”. (aRom. 6:3) Vannooneya wira Paulo aaphavela ohimya wira ntoko Yesu Kristu, maKristau oothanliwa ahaana opatisiwa aahiiso weemererya waakhumelela mixankiho mookumini woonasa wene mpakha wiiviwa, nuumala-vo anrowa ohihimuxiwa wira yakhaleke wiirimu.

Iyaakha piili muhoolo mwaya nuumala Yesu opatisiwa mmaasini, owo aahaaleela arummwa awe anli wira: “Mohawani munrowaka omireya, munomireya-tho”. (Mar. 10:38, 39) Yesu khaaphavela ohimya wira aarowa otthikela opatisiwa mmaasini. Masi aaphavela ohimya wira mwaha wa ororomeleya wa Muluku, owo aamwiiviwa. Paulo aahaalepela maKristau oothanliwa wira: “Okhala wira, nahawaru vamosá ni Kristu, nnovuwihiwa-tho vamosá ni yowo”. (aRom. 8:16, 17; 2 aKor. 4:17) Eyo enooniherya wira awo yaahaana okhwa wira ahihimuxiwe wira yakhaleke wiirimu.

Moovarihana ni itthu sotheene nithokorenrye ahu mpakha-va, enamuna yooloka ya otaphulela eversiikulu ela tiila: “Tivonto, exeeni anrowa aya opaka ale anipatisiwa yiirelaka okhwa? Akhala wira alipa-ookhwa khanrowa ohihimuxiwa, nto xeeni anipatisiwa aya yiirelaka okhwa?”